1. Dapre Ebre 12:1, ki nou bezwen fer pour nou kapab fini sa lakours pour ganny lavi eternel?

 LABIB i konpar nou lavi konman en Kretyen avek en lakours. Bann atlet ki fini sa lakours pou ganny lavi eternel. (2 Tim. 4:7, 8) Nou bezwen fer tou sa ki nou kapab pour kontinyen taye parski laliny finisyon i vreman pros. Zapot Pol ti reisi fini sa lakours e i ti koz lo kwa ki pou ed nou fini sa lakours. I ti dir ki nou bezwen “debaras nou avek tou fardo . . . [e] avek landirans, annou tay dan sa lakours ki Bondye in met devan nou.”​—Lir Ebre 12:1.

2. Ki sa lekspresyon “debaras nou avek tou fardo” i vedir?

² Ler Pol ti dir ki nou bezwen “debaras nou avek tou fardo,” eski i ti pe dir ki dan sa lakours Kretyen en Kretyen pa devret anmenn nanryen? Non. O kontrer, i ti pe dir ki nou bezwen debaras nou avek bann keksoz ki nou pa bezwen. Sa bann keksoz i lour e zot kapab fer nou ralanti e fatige. Pour nou kapab andire nou bezwen vitman idantifye e zet okenn keksoz ki kapab en fardo pour nou. Me an menm tan nou pa anvi debaras nou avek bann keksoz ki nou devret anmennen. Si nou zet sa bann keksoz, nou pou nepli kalifye pour reste dan sa lakours. (2 Tim. 2:5) Ki bann keksoz ki nou devret pe anmennen?

3. (a) Dapre Galat 6:5, ki sak Kretyen i devret fer? (b) Ki nou pou vwar dan sa lartik e akoz?

³ Lir Galat 6:5. Pol ti koz lo en keksoz ki nou bezwen anmennen. I ti dir ki “sakenn i devret desarz son prop responsabilite.” Dan sa verse, Pol pe refer avek sa responsabilite ki nou annan devan Bondye, setadir sa ki Bondye  i ekspekte avek sak son bann serviter. Sa i en keksoz ki personn pa kapab fer pour nou. Dan sa lartik, nou pou vwar ki responsabilite nou annan devan Bondye e ki mannyer nou kapab desarz sa responsabilite. Osi, nou pou idantifye bann keksoz ki nou pe anmennen ki pa neseser e nou pou vwar ki mannyer nou kapab debaras nou avek sa bann fardo. Ler nou kontinyen desarz nou responsabilite e nou debaras nou avek bann fardo ki pa neseser, sa pou ed nou pour fini sa lakours pour ganny lavi eternel.

4. Akoz i pa en fardo pour gard sa promes ki nou’n fer pour servi Zeova pour touzour? (Vwar portre.)

⁴ Sa promes ki nou’n fer pour servi Zeova pour touzour. Ler nou ti dedye nou lavi avek Zeova, nou ti promet pour ador li e pour fer son lavolonte. Nou bezwen gard sa promes. Menm si i en gro responsabilite pour nou fer sa, i pa en fardo. Apre tou, Zeova in kree nou pour fer son lavolonte. (Rev. 4:11) Zeova in kree nou avek sa dezir pour aprann konn li e pour ador li. I’n osi kree nou dan son resanblans. Sa i  fer ki nou kapab vin pros avek li e pran plezir pour fer son lavolonte. (Ps. 40:8) Osi, ler nou fer lavolonte Bondye e nou swiv legzanp son Garson, nou “reganny lafors.”​—Mat. 11:28-30.

5. Kwa ki kapab ed ou pour gard ou promes pour servi Zeova pour touzour? (1 Zan 5:3)

⁵ Ki mannyer ou kapab desarz sa responsabilite? I annan de keksoz ki kapab ed ou. Premyerman, kontinyen devlop plis lanmour pour Zeova. Ou kapab fer sa par reflesir lo bann bon keksoz ki i’n fer pour ou e lo sa ki i pou fer pour ou a lavenir. Pli ou kontan Bondye, pli i pou fasil pour ou obei li. (Lir 1 Zan 5:3.) Dezyenmman, swiv legzanp Zezi. I ti fer lavolonte Bondye parski i ti demann Zeova son led e i ti konsantre lo sa rekonpans ki i ti pou gannyen. (Ebr. 5:7; 12:2) Parey Zezi, demann Zeova pour donn ou lafors e gard antet sa lespwar ki ou annan pour viv pour touzour. Ler ou devlop plis lanmour pour Zeova e ou swiv legzanp son Garson, ou pou kapab gard ou promes avek Zeova.

6. Akoz nou bezwen desarz nou responsabilite dan nou fanmir? (Vwar portre.)

⁶ Responsabilite ki nou annan dan nou fanmir. Vi ki nou dan sa lakours pour ganny lavi eternel, nou bezwen kontan Zeova ek Zezi plis ki nou fanmir. (Mat. 10:37) Me sa pa vedir ki nou negliz nou responsabilite dan nou fanmir, konmsi sa bann responsabilite pe anpes nou fer plezir Bondye ek Kris. O kontrer, pour nou kapab fer plezir Bondye ek Kris, nou bezwen desarz nou responsabilite dan nou fanmir. (1 Tim. 5:4, 8) Ler nou fer sa, nou pou pli zwaye. Apre tou, Zeova i konnen ki en fanmir pou zwaye ler msye ek madanm i tret kanmarad avek lanmour ek respe, ler paran i kontan e ansenny zot zanfan e ler zanfan i obei zot paran.​—Efe. 5:33; 6:1, 4.

7. Ki mannyer ou kapab desarz ou responsabilite dan ou fanmir?

⁷ Ki mannyer ou kapab desarz sa responsabilite? Ki swa ou en msye, madanm oubyen zanfan, annan konfyans dan bann konsey saz ki dan Labib. Pa zis fer sa ki ou krwar i byen, sa ki laplipar dimoun ki reste dan ou zanmirant i fer oubyen sa ki bann eksper i dir ou devret fer. (Prov. 24:3, 4) Servi nou bann piblikasyon ki baze lo Labib. Dan sa bann piblikasyon, i annan bann sizesyon lo ki mannyer pour aplik bann prensip Labib. Par egzanp, dan seri lartik “Led pour bann fanmir” i annan bann lartik konsernan bann problenm ki bann koup, paran ek adolesan i fer fas avek. b Alor ou bezwen determinen pour aplik sa ki Labib i dir menm si lezot manm ou fanmir pa pe fer parey. Ler ou fer sa, ou fanmir pou ganny bann byenfe e Zeova pou beni ou.​—1 Pyer 3:1, 2.

8. Ki lefe nou bann desizyon i kapab annan lo nou?

⁸ Pran responsabilite pour bann desizyon ki nou fer. Zeova in donn nou sa liberte pour swazir. I anvi ki nou fer bann bon desizyon ki pou fer nou zwaye. Me si nou fer bann move desizyon, i les nou eksperyans bann move konsekans nou aksyon. (Gal. 6:7, 8) I pour sa rezon ki nou aksepte konsekans ler nou fer bann move desizyon e ler nou dir e fer bann  keksoz san reflesir. Parfwa sa ki nou’n fer i kapab fer nou annan en konsyans sarze. Me lefet ki nou konnen ki nou bezwen pran responsabilite pour nou desizyon, sa i kapab motiv nou pour konfes nou pese, pour remet keksoz drwat e pour evite refer menm fot. Ler nou fer bann keksoz koumsa, sa i kapab ed nou pour reste dan sa lakours pour ganny lavi eternel.

9. Kwa ki kapab ed ou si ou’n fer en move desizyon? (Vwar portre.)

⁹ Ki mannyer ou kapab desarz sa responsabilite? Si ou’n fer en move desizyon, ou bezwen aksepte ou nouvo sirkonstans. Rekonnet ki ou pa kapab sanz sa ki’n arive. Pa servi ou letan ek lenerzi pour zistifye ou lekor oubyen blanm ou lekor ouswa lezot pour sa move desizyon. O kontrer rekonnet ki ou’n fer fot e fer ou mye dan ou nouvo sirkonstans. Si ou santi ou koupab pour en move keksoz ki ou’n fer, demontre limilite e koz avek Zeova dan lapriyer, admet ou fot e demann li pour pardonn ou. (Ps. 25:11; 51:3, 4) Demann leskiz avek bann ki petet in ganny blese par sa ki ou’n fer e si neseser demann led avek bann ansyen. (Zak 5:14, 15) Aprann avek ou bann fot e esey pa fer menm keksoz. Ler ou fer sa, ou kapab asire ki Zeova pou pran pitye pour ou e i pou donn ou sa led ki ou bezwen.​—Ps. 103:8-13.

10. Ki mannyer ler nou santi ki sa ki nou fer pa zanmen ase, sa i kapab vin parey en fardo? (Galat 6:4)

¹⁰ Ler nou santi ki sa ki nou pe fer pa zanmen ase. Ler nou konpar nou avek lezot, sa i kapab vin parey en fardo pour nou. (Lir Galat. 6:4.) Si nou toultan pe konpar nou avek lezot, nou kapab vin groker e konmans fer konpetisyon avek lezot. (Gal. 5:26) Si nou esey fer sa ki lezot pe fer menm si nou pa kapab, nou kapab fer ditor nou prop lekor. Reflesir lo sa: Labib i dir ki “ler en keksoz ki ou pe espere pa arive,” sa i fer ou dekouraze. (Prov. 13:12) Alor i pou pli dekourazan pour espere pour en keksoz ki nou pa pou zanmen gannyen. Si nou fer sa, nou kapab vin sitan fatige ki nou ralanti dan sa lakours pour ganny lavi eternel.​—Prov. 24:10.

11. Kwa ki kapab ed ou pour pa ekspekte plis ki sa ki ou kapab fer?

¹¹ Ki mannyer ou kapab debaras ou avek sa fardo? Pa ekspekte plis avek ou lekor ki sa ki Zeova i ekspekte avek ou. Zeova pa zanmen ekspekte ki nou donn dapre sa ki nou napa. (2 Kor. 8:12) Ou kapab asire ki Zeova pa konpar sa ki ou pe fer avek sa ki lezot pe fer. (Mat. 25:20-23) I apresye ou servis ki ou pe fer avek tou ou leker, ou fidelite ek ou landirans. Annan limilite e aksepte ki ou pa pou kapab fer tou sa ki ou anvi la konmela, petet akoz ou laz, ou lasante oubyen ou sirkonstans pa permet ou. Parey Barzilay, ou bezwen pare pour dir non si ou lasante ouswa ou laz pou fer li difisil pour ou fer en servis. (2 Sam. 19:35, 36) Parey Moiz, aksepte led e ler i apropriye, donn lezot serten responsabilite. (Egz. 18:21, 22) Si ou annan limilite, ou pa pou ekspekte ki ou fer plis ki sa ki ou kapab fer. Parski si ou fer sa, ou pou fatige dan ou lakours pour lavi eternel.

12. Eski nou responsab pour bann move desizyon ki lezot i fer? Eksplike.

¹² Ler ou santi ou responsab pour bann move desizyon ki lezot i fer. Nou pa kapab fer desizyon pour lezot e nou pa toultan kapab anpes zot ganny konsekans zot move desizyon. Par egzanp, i kapab ki  avek letan ou garson oubyen ou fiy i deside pour aret servi Zeova. Sa desizyon i kapab fer ou konman paran vreman sagren. Me bann paran ki blanm zot lekor pour bann move desizyon ki zot zanfan i fer, pe met en fardo lo zot lekor. Sa i pa en fardo ki Zeova i ekspekte zot anmennen.​—Rom. 14:12.

13. Ki en paran i kapab fer ler son zanfan i fer en move desizyon?

¹³ Ki mannyer ou kapab debaras ou avek sa fardo? Nou bezwen aksepte ki Zeova in donn nou tou sa liberte pour swazir. I les nou fer nou prop desizyon. Sa i enkli si nou pou servi li oubyen non. Zeova i konnen ki ou en paran ki enparfe e i zis anvi ki ou fer ou mye. Desizyon ki ou zanfan i fer, i son responsabilite me pa ou responsabilite. (Prov. 20:11) Kantmenm sa, i kapab ki ou pe kontinyen mazin lo bann fot ki ou’n fer konman en paran. Si ou santi koumsa, dir Zeova ki mannyer ou pe santi e demann li pour pardonn ou. I konnen ki ou pa kapab sanz sa ki’n arive dan lepase e i osi pa ekspekte ki ou anpes ou zanfan ganny konsekans son aksyon. Gard antet ki si ou zanfan i fer zefor pour retourn kot Zeova, Zeova i anvi akey li.​—Lik 15:18-20.

14. Akoz i pa bon pour nou toultan santi nou koupab?

¹⁴ Ler ou toultan santi ou koupab. Ler nou fer fot, i normal ki nou santi nou koupab me Zeova pa anvi ki nou kontinyen santi nou koupab. Sa i en fardo ki nou bezwen debaras nou avek. Ki mannyer nou pou konnen si nou pe kontinyen santi nou koupab? Si nou’n konfes nou pese, nou’n repantir e nou pe fer tou sa ki nou kapab pour pa repet menm fot, nou kapab asire ki Zeova in pardonn nou. (Akt 3:19) Apre ki nou’n fer sa bann keksoz, Zeova pa anvi ki nou kontinyen santi nou koupab. I konnen ki si nou kontinyen santi nou koupab, sa i kapab fer nou ditor. (Ps. 31:10) Si nou vin sitan tris, sa i kapab fer nou abandonn nou lakours pour ganny lavi eternel.​—2 Kor. 2:7.

15. Kwa ki kapab ed ou ler ou toultan santi ou koupab? (1 Zan 3:19, 20) (Vwar portre.)

 ¹⁵ Ki mannyer ou kapab debaras ou avek sa fardo? Si nou kontinyen santi nou koupab, nou kapab konsantre lo lefet ki Bondye i “vreman pardonnen.” (Ps. 130:4) Ler Zeova i pardonn bann ki’n repantir senserman, i promet: “Mon pou nepli rapel zot pese.” (Zer. 31:34) Sa i vedir ki Zeova pa pou zanmen mazin ankor bann fot ki ou’n fer ki i’n pardonn ou. Alor ler ou pe ganny konsekans bann fot ki ou’n fer, pa bezwen krwar ki Zeova pa’n pardonn ou. Pa dekouraze si ou’n perdi serten responsabilite dan kongregasyon akoz fot ki ou’n fer dan lepase. Zeova pa kontinyen mazin lo ou bann fot e ou osi ou devret fer parey.​—Lir 1 Zan 3:19, 20.

16. Konman bann atlet, ki nou bezwen konnen?

¹⁶ Anmezir ki nou tay dan sa lakours pour ganny lavi eternel, nou bezwen “tay dan en fason ki [nou] pou ranport sa pri.” (1 Kor. 9:24) Nou pou kapab fer sa si nou konnen kwa ki nou bezwen anmennen e kwa ki nou bezwen zete. Dan sa lartik, nou’n vwar serten keksoz ki nou bezwen anmennen e serten keksoz ki nou bezwen zete. Me i annan lezot keksoz ki ti’n kapab ganny mansyonnen. Zezi ti dir ki nou kapab “vin lour akoz manze e bwar tro bokou [e] akoz traka.” (Lik 21:34) Bann verse koumsa ek lezot ankor, i kapab ed ou pour vwar kote ki ou bezwen fer sanzman anmezir ki ou tay dan sa lakours pour ganny lavi eternel.

17. Akoz nou kapab asire ki nou pou fini sa lakours pour ganny lavi eternel e ganny sa pri?

¹⁷ Nou kapab asire ki nou pou kapab fini sa lakours pour ganny lavi eternel parski Zeova pou donn nou sa lafors ki nou bezwen. (Iza. 40:29-31) Alor pa ralanti. Swiv legzanp zapot Pol ki ti fer bokou zefor pour fini sa lakours e ranport sa pri. (Fili. 3:13, 14) Personn pa kapab tay dan sa lakours pour ou. Me avek led Zeova, ou kapab reisi. Zeova i kapab ed ou pour desarz ou bann responsabilite e debaras ou avek bann fardo ki pa neseser. (Ps. 68:19) Avek led Zeova, ou pou kapab tay dan sa lakours avek landirans e ranport sa pri.