1. Kwa ki kapab ed nou pour kontan etidye bann profesi ki dan Labib?

 EN ZENN frer ki apel Ben ti dir: “Mon kontan etidye bann profesi ki dan Labib.” Eski ou osi ou santi parey? Ouswa eski ou santi ki bann profesi ki dan Labib i tro difisil pour konpran? Oubyen i kapab ki ou santi ki bann profesi pa en topik enteresan pour etidye. Me ler ou aprann plis lo rezon akoz Zeova in fer ki bann profesi in ganny ekrir dan son Parol, sa i kapab fer ou konmans kontan pour etidye sa bann profesi.

2. Ki nou pou vwar dan sa lartik?

² Dan sa lartik, nou pou vwar akoz nou devret etidye bann profesi ki dan Labib e osi kwa ki pou ed nou etidye sa bann profesi. Apre nou pou etidye de profesi ki dan liv Danyel e nou pou vwar ki mannyer ler nou konpran sa bann profesi, sa pou ed nou la konmela.

3. Ki nou bezwen fer si nou anvi konpran bann profesi ki dan Labib?

³ Pour nou konpran bann profesi ki dan Labib, nou bezwen demann led. Annou vwar en legzanp ki pou ed nou konpran akoz i enportan pour demann led. Meton ou pe vizit en landrwa ki ou pa konnen me en zanmi ki avek ou i konn sa landrwa byen. I konn egzakteman kote zot ete e kote sak semen i ale. San dout, ou kontan ki ou zanmi in dakor pour vin avek ou. Zeova i parey sa zanmi. I konnen ki letan ki nou pe viv ladan e ki pou arive dan lavenir. Alor, pour nou konpran bann profesi ki dan Labib, nou bezwen demontre limilite e demann Zeova son led.​—Dan. 2:28; 2 Pyer 1:19, 20.

4. Akoz Zeova ti fer bann profesi ganny ekrir dan son Parol? (Zeremi 29:11) (Vwar portre.)

 ⁴ Parey tou bon paran, Zeova i anvi ki son bann zanfan i annan en bon lavenir. (Lir Zeremi 29:11.) Me Zeova i diferan avek bann paran imen parski i kapab dir nou ki pou arive dan lavenir e sa ki i dir i toultan ariv egzakteman parey i’n dir. I’n fer bann profesi ganny ekrir dan son Parol pour ki nou kapab konn konsernan bann levennman enportan avan ki zot arive. (Iza. 46:10) Bann profesi ki dan Labib i bann kado sorti kot nou Papa ki dan lesyel. Me ki mannyer ou kapab asire ki sa ki Labib i predir konsernan lavenir pou vin vre?

5. Ki en zenn i kapab aprann avek leksperyans Max?

⁵ Ler bann zenn i kot lekol, souvandfwa zot antoure avek bann dimoun ki annan en ptigin oubyen napa respe pour Labib. Parfwa sa ki sa bann dimoun i dir e fer i fer en zenn ki’n batize konmans annan dout lo son krwayans. Annou vwar leksperyans en frer ki apel Max. I dir: “Ler mon ti ankor pe lekol, mon ti konmans annan dout e mon ti mazinen si sa ki mon paran ti pe ansenny mwan ti sa vre larelizyon e si Labib in ganny enspire par Bondye.” Ki son paran ti fer? I dir: “Menm si mon konnen ki zot ti enkyet, zot ti reazir dan en fason kalm.” Paran Max ti servi Labib pour reponn son bann kestyon e Max osi ti fer en keksoz. I dir: “Mon ti etidye bann profesi ki dan Labib pour mwan menm e mon ti koz avek lezot zenn lo sa ki mon ti aprann.” Ki ti arive apre? Max i dir: “Apre sa, mon ti asire ki Labib in ganny enspire par Bondye.”

6. Ki ou bezwen fer si ou annan bann dout e akoz?

⁶ Si parey Max, ou konmans annan dout konsernan si sa ki Labib i dir i vre, pa bezwen santi ou koupab. I vreman enportan ki ou azir deswit. Bann dout i parey larouy. Si ou inyor li, i kapab ptitapti detri en keksoz ki annan valer. Bann dout i kapab afeblir nou lafwa. Pour nou kapab tir sa bann dout, nou bezwen demann nou lekor: ‘Eski mon krwar ki sa ki Labib i dir konsernan lavenir i vre?’ Si ou pa asire, ou bezwen etidye bann profesi ki dan Labib ki’n fini ganny akonplir. Annou vwar ki mannyer ou kapab fer sa.

7. Ki legzanp Danyel in kite lo lafason pour etidye bann profesi? (Danyel 12:10) (Vwar portre.)

⁷ Danyel in kit en bon legzanp lo lafason pour etidye bann profesi. Danyel ti etidye bann profesi avek sa bon motivasyon, setadir pour konn laverite. Danyel ti osi annan limilite. I ti konnen ki Zeova ti pou ed bann ki konn li e ki viv dapre son bann standar pour konpran bann profesi. (Dan. 2:27, 28; lir Danyel 12:10.) Danyel ti montre ki i annan limilite par depan lo Zeova pour ganny led. (Dan. 2:18) Danyel ti osi etidye o profon. I ti fer resers dan bann Lekritir ki ti disponib sa letan. (Zer. 25:11, 12; Dan. 9:2) Ki mannyer ou kapab swiv legzanp Danyel?

8. Akoz serten pa oule krwar ki bann profesi ki dan Labib i vin vre me ki nou devret fer?

 ⁸ Egzamin ou motivasyon. Eski ou etidye bann profesi parski ou vreman anvi konn laverite? Si wi, Zeova pou ed ou. (Zan 4:23, 24; 14:16, 17) Me ki en lot rezon ki en dimoun i etidye bann profesi? I kapab ki serten i etidye pour esey trouv levidans ki Labib pa’n ganny enspire par Bondye. Zot krwar ki si Labib pa sorti kot Bondye, zot kapab deside pour zot menm kwa ki byen e kwa ki mal. Alor i enportan ki nou annan sa bon motivasyon ler nou etidye bann profesi. Osi, pour nou konpran bann profesi ki dan Labib, nou bezwen annan en kalite ki enportan.

9. Ki kalite ki nou bezwen annan pour nou konpran bann profesi ki dan Labib? Eksplike.

⁹ Annan limilite. Zeova i promet ki i pou ed bann ki annan limilite. (Zak 4:6) Alor, nou bezwen priy Zeova pour li ed nou pour konpran bann profesi ki dan Labib. Si nou annan limilite, nou pou osi aksepte led ki nou gannyen avek sa lesklav fidel ki Zeova pe servi pour donn nou manze spirityel dan sa moman apropriye. (Lik 12:42) Zeova i en Bondye ki annord. Alor i fer sans ki i pou servi zis en mwayen pour ed nou konpran bann laverite ki dan son Parol.​—1 Kor. 14:33; Efe. 4:4-6.

10. Ki ou aprann avek leksperyans Esther?

¹⁰ Etidye o profon. Pour konmanse, swazir en profesi ki ou kontan e fer resers lo la. Sanmenm ki en ser ki apel Esther ti fer. I ti anvi konn plis konsernan bann profesi ki koz lo larive Mesi. I dir: “Ler mon ti annan 15 an, mon ti konmans fer resers pour trouv laprev ki sa bann profesi ti ganny ekrir avan ki Zezi ti vin lo later.” Sa ki Esther ti lir konsernan bann Roulo Lanmer Mor ti konvenk li ki sa bann profesi ti ganny ekrir avan Zezi ti vin lo later. I dir: “Serten sa bann roulo ti ganny ekrir avan ki Kris i vini, alor bann profesi ki’n ganny ekrir dan sa bann roulo i sorti kot Bondye.” Esther i osi dir: “I annan serten keksoz ki mon ti bezwen lir plizyer fwa pour mwan konpran.” Me i kontan ki i’n fer sa zefor pour etidye. Apre ki Esther ti’n etidye plizyer profesi ki dan Labib o profon, i dir: “Mon ti kapab vwar pour mwan menm ki sa ki Labib i dir, i vre!”

11. Ki byenfe ou gannyen ler ou fer sir pour ou menm ki sa ki Labib i dir i laverite?

¹¹ Ler nou vwar ki mannyer serten profesi ki dan Labib in ganny akonplir, sa i fer nou annan plis konfyans dan Zeova e dan lafason ki i pe gid nou. Osi, bann profesi ki dan Labib i ed nou pour reste pozitif e pour annan en lespwar pour lavenir malgre nenport problenm ki nou fer fas avek la konmela. Aprezan, annou vwar de profesi ki Danyel i koz lo la ki pe ganny akonplir ozordi. Ler nou konpran sa bann profesi, sa pou ed nou fer bann desizyon ki saz.

12. Ki sa lipye ki’n ganny fer avek “feray ki’n melanze avek larzil” i reprezante? (Danyel 2:41-43)

¹² Lir Danyel 2:41-43. Danyel ti enterpret rev ki Lerwa Neboukadnezar ti gannyen.  Dan sa rev, Neboukadnezar ti vwar en stati e lipye sa stati ti’n ganny fer avek “feray ki’n melanze avek larzil.” Ler nou konpar sa profesi avek lezot profesi dan liv Danyel ek liv Revelasyon, nou konpran ki sa lipye pe reprezant Pouvwar Mondyal Angle ek Ameriken, ki sa pouvwar mondyal ki pe dirize ozordi. Konsernan sa pouvwar mondyal, Danyel ti dir ki “sa rwayonm pou for e an menm tan fay.” Akoz Danyel ti dir ki sa? Parski bann dimoun ordiner ki pe ganny reprezante par larzil, i fer li difisil pour sa rwayonm azir avek lafors. b

13. Ki laverite enportan nou aprann avek sa profesi?

¹³ Nou aprann en kantite laverite enportan avek sa ki Danyel ti dir konsernan sa stati, sirtou dan sa ki i ti dir konsernan sa lipye. Premyerman, Pouvwar Mondyal Angle ek Ameriken in montre ki zot pwisan. Par egzanp, Lanmerik ek Langleter ti parmi bann nasyon ki ti ganny Premye Lager Mondyal ek Dezyenm Lager Mondyal. Me sa pouvwar mondyal i nepli for parey avan e zot pou kontinyen afeblir parski zot bann sitwayen i lager avek kanmarad e avek gouvernman. Dezyenmman, Pouvwar Mondyal Angle ek Ameriken pou sa dernyen pouvwar mondyal ki pou dirize avan ki Rwayonm Bondye i detri tou gouvernman imen. Menm si parfwa lezot nasyon i opoz Pouvwar Mondyal Angle ek Ameriken, zot pa pou ranplas li. Nou konn sa parski “sa ros” ki reprezant Rwayonm Bondye pou kraz sa lipye. Sa lipye i sa bout dan sa stati ki reprezant Pouvwar Mondyal Angle ek Ameriken.​—Dan. 2:34, 35, 44, 45.

14. Ki mannyer ler nou konpran sa profesi konsernan sa lipye ki an feray ek larzil, sa i kapab ed nou fer bann desizyon ki saz?

¹⁴ Eski ou asire ki sa profesi ki Danyel ti koz lo la konsernan sa lipye ki an feray ek larzil pe ganny akonplir? Si wi, sa pou annan en lefe lo lafason ki ou viv ou lavi. Ou pa pou konsantre lo esey fer plis larzan oubyen tay deryer bann keksoz materyel parski ou konnen ki byento sa move lemonn pou ganny detrir. (Lik 12:16-21; 1 Zan 2:15-17) Ler nou konpran sa profesi, sa pou osi ed nou vwar ki i enportan pour anons sa bon nouvel e ansenny dimoun. (Mat. 6:33; 28:18-20) Apre ki ou’n etidye sa profesi, petet ou kapab demann ou lekor sa kestyon: ‘Eski bann desizyon ki mon fer i montre ki mon asire ki byento Rwayonm Bondye pou detri tou gouvernman imen?’

15. Lekel “lerwa nor” ek “lerwa sid” ozordi? (Danyel 11:40)

¹⁵ Lir Danyel 11:40. Danyel sapit 11 i koz konsernan de lerwa oubyen de gouvernman ki opoz kanmarad. Ler nou konpar sa profesi avek lezot profesi ki dan Labib, nou konpran ki “lerwa nor” i reprezant Larisi ek son bann alye e “lerwa sid” i reprezant Pouvwar Mondyal Angle ek Ameriken. c

16. Ki difikilte bann frer ek ser ki reste dan bann landrwa kot “lerwa nor” i dirize, i fer fas avek?

¹⁶ Bann serviter Bondye ki reste dan bann landrwa kot “lerwa nor” i dirize, pe ganny persekite. Serten Temwen Zeova in ganny bate e ganny met dan prizon akoz zot krwayans. Me sa pa fer bann frer ek  ser per. O kontrer sa ki “lerwa nor” i fer, i fer zot annan plis lafwa dan Zeova ek son Parol. Akoz sa? Parski bann frer ek ser i konnen ki sa persekisyon ki zot pe gannyen, pe akonpli bann profesi dan liv Danyel. d (Dan. 11:41) Ler nou konpran ki bann persekisyon pe akonpli bann profesi, sa pou osi ed nou pour kontinyen gard nou lespwar antet e pour reste fidel avek Zeova.

17. Ki difikilte bann frer ek ser ki reste dan bann landrwa kot “lerwa sid” i dirize, in fer fas avek?

¹⁷ Dan lepase “lerwa sid” ti osi persekit pep Zeova. Par egzanp, sa ti arive pandan Premye Lager Mondyal ek Dezyenm Lager Mondyal, ler bann frer ti ganny met dan prizon parski zot ti refize al lager e serten zanfan ti ganny pouse dan lekol parski zot pa ti salye paviyon. Me dan bann lannen ki’n pase, pep Zeova ki reste dan bann landrwa ki ganny dirize par “lerwa sid” in fer fas avek lezot problenm ki’n teste  zot fidelite. Par egzanp, pandan bann kanpanny eleksyon, en Kretyen i kapab ganny tante pour siport en parti politik ouswa en kandida. Menm si i pa vote, i kapab santi ki en parti politik i pli meyer ki en lot. Alor, i enportan ki nou pa pran kote, pa zis par nou aksyon me osi dan nou lespri ek leker.​—Zan 15:18, 19; 18:36.

18. Ki mannyer nou reazir ler nou vwar sa laenn ki i annan ant “lerwa nor” ek “lerwa sid”? (Vwar portre.)

¹⁸ Bann dimoun ki pa krwar bann profesi ki dan Labib, i kapab vreman enkyet ler zot vwar “lerwa sid” pe “lalit” avek “lerwa nor.” (Dan. 11:40) Tou le de lerwa i annan ase bonm nikleer pour touy tou sa ki lo later. Me nou konnen ki Zeova pa pou les sa arive. (Iza. 45:18) Alor, olye fer nou per, sa laenn ki i annan ant “lerwa nor” ek “lerwa sid” i fer nou lafwa vin pli for. I montre nou ki lafen sa lemonn i pros.

19. Ki nou bezwen rekonnet konsernan bann profesi ki dan Labib?

¹⁹ Nou pa konnen ki mannyer serten profesi Labib pou ganny akonplir. Menm Danyel pa ti konpran sinifikasyon serten keksoz ki i ti ekri. (Dan. 12:8, 9) Me zis akoz nou pa konpran ki mannyer en profesi pou ganny akonplir, pa vedir ki i pa pou ganny akonplir. Nou kapab asire ki Zeova pou ed nou konpran sa ki nou bezwen konnen dan sa bon moman, zis parey i ti fer dan lepase.​—Amos 3:7.

20. Ki bann profesi Labib ki pou ganny akonplir byento e ki nou bezwen kontinyen fer?

²⁰ Bann nasyon pou anonse konmkwa i annan “lape ek sekirite.” (1 Tesa. 5:3) Apre bann gouvernman pou atak fo larelizyon e detri li. (Rev. 17:16, 17) Ler zot in fini, zot pou atak pep Bondye. (Ezek. 38:18, 19) Apre sa, lager Armagedon pou konmanse. (Rev. 16:14, 16) Nou kapab asire ki sa bann levennman pou arive byento. Me ziska ki sa i arive, annou kontinyen montre ki nou rekonesan anver nou Papa ki dan lesyel par etidye bann profesi ki dan Labib e par ed lezot pour fer parey.