1. Kwa ki ti enpresyonn bann Babilonnyen avek profet Danyel?

 PROFET Danyel ti ankor zenn ler bann Babilonnyen ti anmenn li konman en prizonnyen lwen avek Zerizalenm. Menm si Danyel ti ankor zenn, i ti enpresyonn bann zofisye Babilonnyen. Zot ti vwar ki Danyel ti en zoli garson e ki i ti sorti dan en fanmir enportan. (1 Sam. 16:7) Alor bann Babilonnyen ti donn Danyel formasyon pour li kapab servi dan pale Lerwa.​—Dan. 1:3, 4, 6.

2. Ki mannyer Zeova ti santi anver Danyel? (Ezekyel 14:14)

² Zeova ti kontan Danyel, pa akoz son laparans oubyen bann privilez spesyal ki i ti annan dan pale me Zeova ti kontan Danyel akoz sa kalite dimoun ki Danyel ti ete. Annefe, ler Zeova ti dir ki Danyel i parey Noe ek Zob, i kapab ki Danyel ti annan apepre 20 an. Alor, menm si Danyel ti ankor zenn, pour Zeova i ti en dimoun drwat parey Noe ek Zob, ki ti’n servi li fidelman pour bokou lannen. (Zen. 5:32; 6:9, 10; Zob 42:16, 17; lir Ezekyel 14:14.) Danyel ti viv lontan e Zeova ti kontinyen kontan li tou dilon son lavi.​—Dan. 10:11, 19.

3. Ki nou pou vwar dan sa lartik?

³ Dan sa lartik, nou pou vwar de kalite ki Danyel ti annan ki ti fer li presye pour Zeova. Premyerman, nou pou vwar sak sa bann kalite e nou pou vwar kan ki Danyel ti demontre sa bann kalite. Apre nou pou vwar kwa ki ti ed Danyel pour devlop sa bann kalite. Finalman, nou pou vwar ki mannyer nou kapab swiv legzanp Danyel. Menm si sa lartik in ganny ekrir pour bann zenn, nou tou nou kapab aprann avek legzanp Danyel.

4. Ki mannyer Danyel ti demontre kouraz? Donn en legzanp.

⁴ Bann dimoun ki annan kouraz i kapab santi zot per parfwa me zot pa les lafreyer anpes zot fer sa ki byen. Danyel  ti en garson ki ti annan bokou kouraz. Annou vwar de moman kot i ti demontre kouraz. I kapab ki sa premye fwa ki Danyel ti demontre kouraz ti apepre de-z-an apre ki bann Babilonnyen ti’n detri Zerizalenm. Neboukadnezar, ki ti lerwa Babilonn ti ganny en rev konsernan en gran stati ki ti fer li per. I ti donn lord son bann zonm saz, enkli Danyel, pour dir li sa rev ki i ti’n reve e ki sa rev ti vedir. Si zot pa ti kapab fer sa, i ti pou touy zot tou. (Dan. 2:3-5) Danyel ti pou bezwen azir vitman si non en kantite dimoun ti pou mor. I ti “al vwar lerwa pour demann li en pe letan pour li kapab dir li lenterpretasyon sa rev.” (Dan. 2:16) Danyel ti bezwen annan kouraz ek lafwa pour fer sa. Labib pa dir ki avan sa Danyel ti deza enterpret rev. I ti demann son bann zanmi, ki ti apel Sadrak, Mesak ek Abednego b “pour priy sa Bondye ki dan lesyel pour ki i pran pitye pour zot e revel sa sekre.” (Dan. 2:18) Zeova ti reponn zot lapriyer. Avek led Bondye, Danyel ti enterpret rev Neboukadnezar. Danyel ek son bann zanmi pa ti ganny touye.

5. Ki en lot moman ki Danyel ti bezwen demontre kouraz?

⁵ En pe letan apre ki Danyel ti’n enterpret sa rev konsernan sa gran stati, en lot keksoz ti arive kot i ti bezwen demontre kouraz. Neboukadnezar ti ganny en lot rev ki ti fer li per. Dan sa rev, i ti vwar en gran pye dibwa. Danyel ti demontre kouraz e i ti eksplik lerwa sinifikasyon son rev. Danyel ti menm dir lerwa ki lerwa ti pou vin fou e ki i pa ti pou dirize konman lerwa pour en pe letan. (Dan. 4:25) Lerwa ti’n kapab krwar ki Danyel ti pe rebel kont li e i ti’n kapab fer touy Danyel. Me Danyel ti demontre kouraz e i ti eksplik lerwa sa rev.

6. Petet kwa ki ti ed Danyel pour demontre kouraz?

⁶ Petet kwa ki ti ed Danyel pour demontre kouraz tou dilon son lavi? Nou kapab asire ki manman ek papa Danyel ti bann bon legzanp pour Danyel ler i ti ankor zenn. San dout, zot ti obei bann lenstriksyon ki Zeova ti’n donn bann paran Izraelit e zot ti ansenny zot zanfan Lalwa Bondye. (Det. 6:6-9) Danyel ti konn sa dis komannman me i ti osi konn bann keksoz pli  o profon dan Lalwa. Par egzanp, i ti konn sa ki en Izraelit i kapab manze e sa ki i pa kapab manze. c (Lev. 11:4-8; Dan. 1:8, 11-13) Danyel ti osi konn listwar pep Bondye e i ti konnen ki ti arive avek zot ler zot pa ti obei Zeova. (Dan. 9:10, 11) Sa ki Danyel ti pas atraver tou dilon son lavi ti fer li asire ki nenport kwa ki arive, Zeova ek Son bann lanz pwisan pou ed li.​—Dan. 2:19-24; 10:12, 18, 19.

7. Kwa ankor ki ti ed Danyel pour annan kouraz? (Vwar portre.)

⁷ Danyel ti etidye sa ki bann profet Bondye ti’n ekri enkli sa ki profet Zeremi ti’n ekri. Sa i fer ki pli tar Danyel ti kapab konpran ki lakantite lannen ki bann Zwif ti pou fer an egzil Babilonn, ti pros pour fini. (Dan. 9:2) Ler Danyel ti vwar ki sa ki Zeova ti dir i vin vre, sa ti fer li annan plis konfyans dan Zeova e bann dimoun ki annan konfyans dan Bondye, i annan bokou kouraz. (Konpar Romen 8:31, 32, 37-39.) Sa ki pli enportan ankor, Danyel ti koz avek son Papa ki dan lesyel souvan. (Dan. 6:10) I ti konfes son pese avek Zeova e i ti koz avek Zeova lo son bann santiman. I ti osi demann Zeova pour ed li. (Dan. 9:4, 5, 19) Danyel ti en imen parey nou. Alor, i pa ti’n ne avek kouraz. O kontrer i ti devlop sa kalite parski i ti etidye, priye e met konfyans dan Zeova.

8. Ki mannyer nou kapab devlop kouraz?

⁸ Ki nou bezwen fer pour nou devlop kouraz? Nou paran i kapab ankouraz nou pour devlop kouraz me zot pa kapab fer nou annan kouraz menm si zot, zot annan. Ler ou pe devlop kouraz sa i parey ler ou pe aprann fer en keksoz. En fason ki ou kapab fer sa, i par obzerv sa ki sa enstrikter i fer e apre fer parey. Dan menm fason, nou aprann pour demontre kouraz par obzerv bann ki pe demontre sa kalite e apre fer parey zot. Alor ki nou’n aprann avek legzanp Danyel? Parey Danyel, nou bezwen konn byen Parol Bondye, nou bezwen devlop en lanmitye pros avek Zeova par koz avek li souvan e dir li egzakteman ki mannyer nou pe santi. Nou bezwen annan konfyans dan Zeova e asire ki i pou toultan ed nou. Koumsa ler nou fer fas avek bann difikilte, nou pou annan kouraz.

9. Ki byenfe nou gannyen ler nou demontre kouraz?

⁹ Nou ganny bokou byenfe ler nou annan kouraz. Annou vwar leksperyans Ben. I ti al en lekol Lalmanny kot tou dimoun ti krwar dan evolisyon e zot ti santi ki sa resi dan Labib konsernan kreasyon pa vre. En zour, Ben ti ganny sa loportinite pour eksplik laklas akoz ki i krwar dan kreasyon. I ti demontre kouraz e i ti koz lo son krwayans. Ki ti arive apre? Ben i dir: “Mon ansenyan ti ekout mwan byen e i ti fer kopi sa lenformasyon ki mon ti servi pour siport mon largiman e i ti donn sak etidyan dan laklas en kopi.” Ki mannyer bann manrmay dan laklas Ben ti reazir? Ben i dir: “En kantite zot ti ekout sa ki mon ti’n dir e zot ti dir ki zot apresye sa ki mon ti’n fer.” Parey nou’n vwar avek leksperyans Ben, souvandfwa dimoun ki demontre kouraz i ganny respe lezot. Zot legzanp i osi kapab ed serten dimoun pour aprann konn Zeova. I kler alor ki nou annan bann bon rezon pour devlop kouraz.

10. Kisisa fidelite?

¹⁰ Dan Labib, sa mo Ebre ki’n ganny tradwir konman “fidel” oubyen “lanmour fidel” i donn nide en lanmitye pros ki ranpli avek lanmour e sa mo i souvan ganny servi pour dekri sa lanmour ki Bondye i annan pour son bann serviter. Sa mo i osi ganny servi pour dekri lafason ki bann serviter Bondye i fidel avek kanmarad. (2 Sam. 9:6, 7) Avek letan, nou kapab vin en dimoun ki pli fidel. Annou vwar ki mannyer sa ti arive avek profet Danyel.

11. Ki mannyer Danyel ti montre ki i ti fidel avek Zeova pandan son vye zour? (Vwar portre lo kouvertir.)

¹¹ Tou dilon son lavi, Danyel ti pas dan bann sityasyon kot i ti bezwen montre si i ti pou reste fidel avek Zeova oubyen non. Enn bann moman ki ti vreman difisil ti arive ler i ti dan son 90 an. Sa letan, bann Med ek Pers ti’n ranport laviktwar lo Babilonn e Lerwa Daryis ki ti pe dirize. Bann o zofisye dan lakour Lerwa Daryis pa ti kontan Danyel e zot ti napa respe pour sa Bondye ki Danyel ti adore. Alor zot ti fer en plan pour fer touy Danyel. Zot ti fer lerwa siny en lalwa ki ti pou montre si Danyel ti fidel avek son Bondye oubyen avek lerwa. Si Danyel ti aret priy Zeova pour 30 zour, sa ti pou montre ki Danyel i fidel avek lerwa e ki i parey tou lezot dimoun. Me Danyel ti swazir pour reste fidel avek Zeova. Sa ti fer ki i ti ganny zete dan trou lyon. Me Zeova ti rekonpans Danyel pour son fidelite par delivre li dan lagel lyon. (Dan. 6:12-15, 20-22) Ki mannyer nou kapab reste fidel avek Zeova parey Danyel ti fer?

12. Kwa ki ti ed Danyel pour reste fidel avek Zeova?

¹² Parey nou’n vwar pli boner, pour nou fidel avek Zeova, nou bezwen kontan li en kantite. Danyel ti reste fidel avek Zeova parski i ti vreman kontan son Papa ki dan lesyel. Danyel ti kontan Zeova en kantite parski i ti pas letan pour reflesir lo bann kalite ki Zeova i annan e lo lafason ki Zeova i demontre sa bann kalite. (Dan. 9:4) Danyel ti osi medit lo bann bon keksoz ki Zeova ti’n fer pour li ek Son pep e sa ti fer li rekonesan.​—Dan. 2:20-23; 9:15, 16.

13. (a) Ki sityasyon ki bann zenn i fer fas avek ki fer li difisil pour zot reste fidel? Donn en legzanp. (Vwar portre.) (b) Dapre sa video, ki ou kapab dir ler lezot i demande si Temwen Zeova i siport bann ki swazir pour fer bann aksyon omoseksyel?

 ¹³ Parey Danyel, nou bann zenn i antoure avek dimoun ki napa respe pour Zeova ek son bann standar. I kapab ki bann dimoun koumsa pa kontan dimoun ki dir ki zot kontan Bondye. Serten i esey bouli nou bann zenn pour anpes zot reste fidel avek Zeova. Par egzanp, annou vwar sa ki ti arive avek en garson ki ti apel Graeme, ki reste Lostrali. Ler i ti segonder, i ti fer fas avek en sityasyon difisil. En ansenyan ti demann bann manrmay dan son laklas ki mannyer zot ti pou reazir si enn zot zanmi ti dir zot ki i en omoseksyel. I ti demann tou bann ki ti pou siport sa zanmi pour debout lo en kote laklas e tou bann ki pa ti pou siport li pour debout lo lot kote. Graeme i dir: “Laklas antye ti debout lo sa kote ki siport sa zanmi eksepte mwan ek en lot garson ki ti Temwen Zeova.” Apre sa, sa sityasyon ti vin pli difisil e Graeme ti bezwen montre si i ti fidel avek Zeova. Graeme i dir: “Sa laklas ti dire pour enn erdtan e pandan sa letan, bann lezot etidyan e menm sa ansenyan ti ensilte nou. Mon ti fer mon mye pour defann mon lafwa dan en fason kalm e dan en fason ki zot pou konpran. Me zot pa ti ekout mwan.” Ki mannyer sa sityasyon ti fer Graeme santi? I dir: “Mon pa ti kontan ler mon bann kanmarad laklas ti ensilte mwan me mon ti vreman kontan ki mon ti kapab reste fidel avek Zeova e defann mon lafwa.” d

14. Ki en keksoz nou kapab fer ki pou ed nou reste fidel avek Zeova?

¹⁴ Pour nou kapab reste fidel avek Zeova parey Danyel, nou bezwen annan en gran lanmour pour Zeova. Pour nou kapab devlop sa kalite lanmour, nou bezwen aprann konsernan bann kalite ki Zeova i annan. Par egzanp, nou kapab etidye bann keksoz ki Zeova in fer. (Rom. 1:20) Si ou anvi devlop plis lanmour ek respe pour Zeova, petet ou kapab lir bann pti lartik oubyen get bann video dan sa seri “Was It Designed?” Ou kapab osi etidye sa brosir Was Life Created? ek The Origin of Life​—Five Questions Worth Asking. Remark sa ki en zenn ser ki apel Esther, ki reste Dennmark i dir konsernan sa bann piblikasyon. I dir: “Mon kontan ki mannyer sa bann lenformasyon dan sa bann brosir i ganny prezante. Sa bann brosir pa dir ou ki ou pour krwar me zot donn ou bann lenformasyon ki ed ou fer ou prop desizyon.” Ben, ki’n ganny mansyonnen pli boner, i dir: “Sa bann lenformasyon ti fer mon lafwa vin pli for. I ti montre mwan levidans ki Bondye ki’n kree tou keksoz.” Apre ki ou’n etidye sa bann lenformasyon, i tre probab ki ou pou dakor avek sa ki Labib i dir: “Zeova nou Bondye, ou merit laglwar, loner ek pwisans, parski ou’n kree tou keksoz.”​—Rev. 4:11. e

15. Ki en lot fason ki nou kapab vin pli pros avek Zeova?

¹⁵ En lot fason ki nou kapab kontan Zeova plis, i par etidye lafason ki Zezi ti viv son lavi ler i ti lo later. En zenn ser ki apel Samira, ki reste Lalmanny ti fer sa. I dir: “Mon ti aprann konn Zeova pli byen atraver legzanp Zezi.” Ler Samira ti ankor zenn, i ti vwar li difisil pour konpran ki mannyer Zeova i kapab annan santiman.  Me i ti kapab konpran bann santiman ki Zezi ti annan. I dir: “Mon ti kontan Zezi parski i ti zantiy e i ti kontan bann zanfan.” Pli Samira ti aprann konsernan Zezi, pli i ti konn Zeova e i ti devlop en lanmitye avek Zeova. Ki mannyer sa? I dir: “Ptitapti, mon ti konpran ki Zezi i imit son Papa dan en fason parfe. Zot vreman parey kanmarad. Mon ti realize ki enn bann rezon akoz Zeova ti anvoy Zezi lo later, i pour fer li posib pour bann imen aprann konn Zeova pli byen.” (Zan 14:9) Si ou anvi vin pli pros avek Zeova, petet ou kapab pran letan pour aprann tou sa ki ou kapab lo Zezi. Si ou fer sa, ou pou kontan Zeova plis e ou pou kapab reste fidel avek li.

16. Ki byenfe nou gannyen ler nou reste fidel avek Zeova? (Psonm 18:25; Mika 6:8)

¹⁶ Si ou fidel avek lezot, souvandfwa, ou pou annan bann bon zanmi ki fidel avek ou. (Rit 1:14-17) Osi, en dimoun ki fidel avek Zeova, i kapab annan lape lespri. Akoz sa? Parski Zeova i promet ki i reste fidel avek bann ki fidel avek li. (Lir Psonm 18:25; Mika 6:8.) Zis mazin sa: Nou Kreater ki tou pwisan i pare pour vin zanmi avek nou. Ler nou annan en bon lanmitye avek Zeova, ni problenm, ni bann ki opoz nou, ni menm lanmor pa kapab separ nou avek li. (Dan. 12:13; Lik 20:37, 38; Rom. 8:38, 39) Alor, i enportan ki nou swiv legzanp Danyel e nou reste fidel avek Zeova.

17-18. Kwa ankor ki nou kapab aprann avek legzanp Danyel?

¹⁷ Dan sa lartik, nou’n vwar de kalite ki Danyel i annan. Me i annan lezot keksoz ki nou kapab aprann avek li. Par egzanp, Zeova ti fer Danyel ganny plizyer vizyon ek rev. Zeova ti osi donn li sa abilite pour enterpret bann profesi. En kantite sa bann profesi in fini ganny akonplir. Lezot sa bann profesi i donn bann detay konsernan bann levennman ki pou arive dan lavenir ki pou annan en lefe lo tou dimoun lo later.

¹⁸ Dan sa lartik ki swiv, nou pou vwar de profesi ki Danyel i koz lo la. Ler nou konpran sa bann profesi, sa pou ed nou tou, ki swa nou zenn oubyen aze, pour fer bann desizyon ki saz. Sa bann profesi i kapab osi ed nou devlop plis kouraz e reste fidel avek Zeova. Sa bann kalite pou ed nou pour prepare pour fer fas avek sa ki pou arive a lavenir.