1. Ki Zeova i anvi pour tou dimoun?

 ZEOVA ti kree bann imen avek sa liberte pour swazir. Nou servi sa kado ki Bondye in donn nou pour fer bann desizyon. Desizyon pli enportan ki en dimoun i kapab fer, i ler i deside pour dedye son lavi avek Zeova e form parti Son fanmir ki ador li. Zeova i oule ki tou dimoun i fer sa. Akoz? Parski i kontan dimoun e i anvi sa ki pli bon pour nou. I anvi ki nou vin son zanmi e ki nou viv pour touzour.—Det. 30:19, 20; Gal. 6:7, 8.

2. Ki mannyer Zeova i santi anver bann dimoun ki’n fer pese me ki pa repantir? (1 Zan 2:1)

² Par kont, Zeova pa fors nou pour servi li. I les sak dimoun deside sa ki i pou fer. Me ki pou arive si en Kretyen batize i kas lalwa Bondye e fer en pese grav? Si i pa repantir i bezwen ganny tire dan kongregasyon. (1 Kor. 5:13) Toudmenm, Zeova i vreman anvi ki sa dimoun i retourn kot Li. Anfet, sa i en rezon enportan akoz Zezi ti mor pour nou, pour fer li posib pour en dimoun ki’n fer pese, repantir. (Lir 1 Zan 2:1.) Nou Bondye lanmour i sipliy avek bokou konpasyon bann dimoun ki’n fer pese pour repantir.—Zek. 1:3; Rom. 2:4; Zak 4:8.

3. Ki nou pou koz lo la dan sa lartik?

³ Zeova i oule ki nou annan menm pwennvi ki li konsernan sa ki mal e bann dimoun ki fer sa ki mal. Sa lartik pou ed nou konpran ki mannyer pour fer sa. Anmezir  ki ou lir sa lartik esey konpran (1) ki mannyer kongregasyon Korent dan premye syek ti tret en dimoun ki ti’n fer en pese grav, (2) ki gidans Zapot Pol ti donnen ler sa dimoun ti repantir e (3) ki nou aprann dan Labib lo lafason ki Zeova i tret bann Kretyen ki fer en pese grav.

KI MANNYER KONGREGASYON TI BEZWEN TRET SA DIMOUN KI TI’N FER EN PESE GRAV

4. Ki sityasyon ki ti’n devlope dan kongregasyon Korent dan premye syek? (1 Korentyen 5:1, 2)

⁴ Lir 1 Korentyen 5:1, 2. Pandan son trwazyenm vwayaz misyonner, Pol ti tann en nouvel ki ti fatig li konsernan sa nouvo kongregasyon dan lavil Korent. En frer dan sa kongregasyon ti annan relasyon seksyel avek son belmer. Sa kondwit ti vreman mal e i ti en keksoz ki “menm bann dimoun lezot nasyon pa [ti] pe pratike.” Sa kongregasyon ti toler sa sityasyon e zot ti les sa dimoun reste dan kongregasyon. Petet zot ti mazinen ki sa i montre ki Bondye i konpran e i pran pitye pour bann dimoun enparfe. Me Zeova pa soutir son pep ler zot fer sa ki mal. Vi ki sa kondwit ti vreman mal, sa zonm ti gat bon repitasyon sa kongregasyon. Son kondwit ti osi kapab annan en move lenfliyans lo lezot Kretyen ki ti frekant li. Alor ki Pol ti demann kongregasyon pour fer?

5. Ki Pol ti demann kongregasyon pour fer e ki sa ti vedir? (1 Korentyen 5:13) (Vwar osi portre.)

⁵ Lir 1 Korentyen 5:13. Anba gidans lespri sen, Pol ti ekri en let kot i ti demande pour tir sa dimoun ki pa ti repantir dan kongregasyon. Ki mannyer bann Kretyen fidel ti pou tret li? Pol ti dir zot ki zot ti devret “aret frekant” li. Ki sa ti vedir? Pol ti eksplike ki sa lenstriksyon ti vedir pa “ni menm manz avek en dimoun koumsa.” (1 Kor. 5:11) Pran en repa ansanm ti kapab fer en dimoun anvi asosye plis ankor avek li. Anfet Pol ti demann kongregasyon pour pa frekant sa dimoun. Sa ti pou protez kongregasyon kont sa move lenfliyans. (1 Kor. 5:5-7) Deplis, vi ki kongregasyon ti pou nepli pros avek sa dimoun, sa ti kapab ed li pour konpran ki i’n kas lalwa Bondye, fer li santi li  onte e ed li pour devlop sa dezir pour repantir.

6. Ki lefe let Pol ti annan lo kongregasyon e lo sa dimoun ki ti’n fer pese?

⁶ Apre ki i ti’n anvoy sa let kot bann Kretyen dan kongregasyon Korent, Pol ti anvi konnen ki mannyer kongregasyon ti’n reazir. Pli tar, Tit ti donn Pol en bon nouvel. Kongregasyon ti’n aksepte bann konsey dan let Pol. (2 Kor. 7:6, 7) Zot ti swiv lenstriksyon. Deplis, pandan sa bann mwan depi ki Pol ti’n anvoy sa let, sa dimoun ti’n repantir, i ti’n sanz son kondwit ek son latitid e i ti’n rekonmans swiv bann standar drwat Zeova. (2 Kor. 7:8-11) Alor, ki Pol ti demann kongregasyon pour fer?

 KI MANNYER KONGREGASYON I TRET EN DIMOUN KI’N FER SA KI MAL E KI’N REPANTIR

7. Ler sa dimoun ti ganny tire dan kongregasyon, ki bon rezilta sa ti anmennen? (2 Korentyen 2:5-8)

⁷ Lir 2 Korentyen 2:5-8. Pol ti dir ki “disiplin ki lamazorite in donnen i sifi pour sa zonm.” Andotmo, sa disiplin ti’n anmenn bann bon rezilta. Akoz? Parski i ti ed sa dimoun pour repantir.—Ebr. 12:11.

8. Ki Pol ti demann kongregasyon pour fer apre sa?

⁸ Alor Pol ti demann kongregasyon pour “pardonn e rekonfort li” e osi pour “rasir li ki zot kontan li.” I enteresan pour note ki Pol pa ti oule ki kongregasyon i zis reaksepte sa dimoun parmi pep Zeova. Pol ti oule ki kongregasyon i asir sa dimoun ki’n repantir an parol, kondwit ek aksyon ki zot ti’n vreman pardonn li e kontan li. Sa ti pou montre ki zot ti vreman kontan ki sa dimoun ti’n retourn dan kongregasyon.

9. Akoz petet serten ti ezite pour pardonn sa dimoun ki ti’n repantir?

⁹ Eski serten dan kongregasyon ti ezite pour byen resevwar sa dimoun ki ti’n repantir dan kongregasyon? Sa resi pa dir nou, me sa i posib. Apre tou, aksyon sa dimoun ti fer problenm dan kongregasyon e petet sa ti afekte serten dan kongregasyon osi. Petet serten ti pe mazinen ki i ti enzis pour byen resevwar sa dimoun konman en frer ler zot menm zot ti’n bezwen lalit pour reste prop moralman. (Konpar Lik 15:28-30.) Akoz i ti enportan ki kongregasyon i demontre lanmour senser anver sa frer ki ti pe retourn dan kongregasyon?

10-11. Ki ti kapab arive si bann ansyen ti refize pardonn en dimoun ki’n repantir?

¹⁰ Ki ti pou arive si bann ansyen ti’n refize aksepte sa dimoun ki ti’n repantir dan kongregasyon? Oubyen si apre ki sa dimoun ti’n retournen, kongregasyon ti refize demontre lanmour anver li? Sa dimoun ti pou kapab tris e “dekouraz net.” I ti pou kapab santi ki i napa lespwar dan son sityasyon. Osi i ti pou kapab aret fer zefor pour annan en bon relasyon avek Bondye.

¹¹ Si bann frer ek ser dan kongregasyon ti refize pardonn en dimoun ki ti’n fini repantir, sa ti pou osi kapab gat zot relasyon avek Zeova. Akoz? Parski zot pa ti pou imit legzanp Zeova, en Bondye ki pardonnen ler nou repantir, me zot ti pou imit latitid Satan ki dir e ki napa pitye. Anfet zot ti pou les Dyab servi zot pour dekouraz en dimoun pour servi Zeova.—2 Kor. 2:10, 11; Efe. 4:27.

12. Ki mannyer kongregasyon i kapab imit Zeova?

¹² Ki mannyer kongregasyon Korent ti kapab imit Zeova e rezet latitid Satan? Par swiv lafason ki Zeova i tret bann dimoun ki’n fer fot me ki’n repantir. La lafason ki Labib i koz lo pardon Zeova. David ti dir i “bon e pare pour pardonnen.” (Ps. 86:5) Profet Mika ti dir: “Lekel sa Bondye ki parey ou, ki pardonn fot e kouver pese.” (Mik. 7: 18) Izai ti osi dir: “Ki sa move dimoun i sanz son fason viv e son fason panse. Ki i retourn kot Zeova ki pou pran pitye pour li, ki i retourn kot nou Bondye parski i pou pardonn li konpletman.”—Iza. 55:7.

13. Akoz i ti apropriye pour sa dimoun ki ti’n repantir ganny reaksepte dan kongregasyon? (Vwar bwat “ Kan ki sa dimoun Korent ti ganny reaksepte dan kongregasyon?”)

 ¹³ Pour imit Zeova, kongregasyon Korent ti bezwen akeyir sa dimoun ki ti’n repantir dan kongregasyon e montre li ki zot ti vreman kontan li. Ler kongregasyon ti swiv gidans Pol e byen resevwar sa dimoun ki ti’n fer fot e ki ti’n repantir, kongregasyon ti montre ki zot ti “obeisan dan tou keksoz.” (2 Kor. 2:9) I vre ki i ti fer selman detrwa mwan depi ki sa dimoun ti’n ganny tire dan kongregasyon me sa disiplin ti ed li pour repantir, alor i pa ti neseser espere pour sa dimoun retourn dan kongregasyon.

ANNOU IMIT LAZISTIS EK PITYE ZEOVA

14-15. Ki nou aprann avek lafason ki sa sityasyon ti ganny trete dan kongregasyon Korent? (2 Pyer 3:9) (Vwar osi portre.)

¹⁴ Sa resi lo lafason ki sa sityasyon ti ganny trete dan kongregasyon Korent in ganny ekrir “pour ansenny nou.” (Rom. 15:4) Atraver sa resi, nou aprann ki Zeova pa soutir bann pese grav parmi son pep. Zeova pa demontre “pitye” par les en dimoun ki’n fer en pese grav me ki pa repantir kontinyen asosye avek son bann adorater ki fidel.  Zeova i pran pitye me i pa soutir sa ki mal. I pa abes son bann standar osi. (Zid 4) Si nou ti fer sa, nou pa ti pou demontre pitye me o kontrer nou ti pou met tou dimoun dan kongregasyon an danze.—Prov. 13:20; 1 Kor. 15:33.

¹⁵ Toudmenm, nou aprann ki Zeova pa oule ki tou dimoun i ganny detrir. I esey servi tou mwayen posib pour sov bann dimoun. I pran pitye pour dimoun si zot sanz zot latitid e zot anvi annan en bon relasyon avek li ankor. (Ezek. 33:11; lir 2 Pyer 3:9.) Alor, ler sa dimoun Korent ti repantir e sanz son move kondwit, Zeova ti servi Pol pour eksplik kongregasyon ki sa dimoun i devret ganny pardonnen e byen ganny resevwar ler i retourn dan kongregasyon.

16. Ki mannyer ou santi konsernan lafason ki sa sityasyon ti ganny trete dan kongregasyon Korent?

¹⁶ Ler nou revwar sa sityasyon dan kongregasyon Korent, sa i ed nou pour vwar ki Zeova i annan lanmour, i en Bondye drwat e zis dan lafason ki i tret bann sityasyon. (Ps. 33:5) Pa sa i fer nou anvi loue Bondye? Apre tou, nou tou nou fer pese e nou tou nou bezwen ganny pardonnen par Zeova. Alor nou tou nou devret rekonesan anver Zeova pour sa ranson ki fer li posib pour Zeova pardonn nou pese. Pa sa i vreman rekonfortan e rasir nou ki Zeova i vreman kontan son pep! I anvi sa ki pli bon pour nou!

17. Ki nou pou koz lo la dan bann lartik ki swiv?

¹⁷ Ki mannyer en dimoun ki’n fer en pese grav i devret ganny trete dan kongregasyon ozordi? Ki mannyer bann ansyen dan kongregasyon i kapab imit Zeova ki oule ki bann dimoun ki fer sa ki mal i repantir? Ki mannyer kongregasyon i devret reazir si bann ansyen i deside pour tir oubyen reaksepte en dimoun dan kongregasyon? Sa bann kestyon pou ganny reponn dan bann lartik ki swiv.