LARTIK LETID 35
KANTIK 123 Soumet avek Zeova
Led pour bann ki’n ganny tire dan kongregasyon
“I annan plis lazwa dan lesyel ler en dimoun ki annan en move lavi i repantir ki pour 99 dimoun ki fer sa ki byen e ki pa bezwen repantir.”—LIK 15:7.
TOPIK
Akoz serten i bezwen ganny tire dan kongregasyon e ki mannyer bann ansyen i kapab ed sa bann dimoun pour repantir e reganny laprouvasyon Zeova.
1-2. (a) Ki mannyer Zeova i vwar pese ki ganny fer volonterman? (b) Ki Zeova i oule ki bann ki fer pese i fer?
ZEOVA pa en Bondye ki soutir oubyen toler pese. (Ps. 5:4-6) Bondye i oule ki nou swiv bann standar drwat ki i’n etabli dan son Parol Labib. Byensir, Zeova pa ekspekte ki bann dimoun enparfe i azir dan en fason parfe. (Ps. 130:3, 4) An menm tan, i pa pou tolere ki “bann move dimoun i servi labonte ekstraordiner Bondye konman en leskiz pour fer zot bann vis.” (Zid 4) Anfet, Labib i dir ki “bann dimoun ki napa respe pour Bondye pou ganny detrir” pandan lager Bondye, Armagedon.—2 Pyer 3:7; Rev. 16:16.
2 Par kont, Zeova pa oule ki personn i ganny detrir. Parey nou’n koz lo la dan bann lartik avan, Labib i montre klerman ki i “oule ki zot tou zot arive repantir.” (2 Pyer 3:9) Bann ansyen dan kongregasyon i imit Zeova e avek pasyans, zot esey ed bann dimoun ki fer pese, sanz zot fason viv e reganny laprouvasyon Zeova. Me pa tou dimoun ki aksepte sa led. (Iza. 6:9) Serten i kontinyen fer sa ki mal menm si bann ansyen in esey ed zot plizyer fwa pour repantir. Ki pou arive dan en sityasyon koumsa?
“TIR SA MOVE DIMOUN”
3. (a) Ki Labib i dir lo dimoun ki fer pese grav e ki pa repantir? (b) Akoz nou kapab dir ki dan en sans, sa dimoun ki swazir pour ganny tire dan kongregasyon?
3 Ler en dimoun in fer en pese grav e i pa oule repantir, bann ansyen napa swa ki swiv sa lenstriksyon ki dan 1 Korentyen 5:13: “Tir sa move dimoun parmi zot.” Anfet, dan en sans sa dimoun ki separ li avek kongregasyon. I rekolte sa ki i’n senmen. (Gal. 6:7) Akoz nou dir sa? Akoz plizyer fwa i’n refize aksepte led ki bann ansyen pe donn li pour li repantir. (2 Rwa. 17:12-15) Son bann aksyon i montre ki i’n swazir pour pa swiv bann standar Zeova.—Det. 30:19, 20.
4. Akoz en lanons i ganny fer ler en dimoun ki’n fer en pese grav e ki pa repantir i ganny tire dan kongregasyon?
4 Ler en dimoun ki’n fer en pese grav e ki pa repantir i ganny tire dan kongregasyon, en lanons i ganny fer pour enform kongregasyon ki i nepli en Temwen Zeova. a Sa lanons pa ganny fer pour imilye sa dimoun. Plito, kongregasyon i ganny enformen pour zot kapab swiv sa lenstriksyon ki dan Labib pour “aret frekant” sa dimoun e pa “menm manz avek en dimoun koumsa.” (1 Kor. 5:9-11) Sa lenstriksyon in ganny donnen pour en bon rezon. Zapot Pol ti ekri: “En ptigin lelven i fer monte tou sa lapat.” (1 Kor. 5:6) Ler en dimoun i fer en pese grav e i pa repantir, sa i kapab fer lezot dan kongregasyon ki pe esey swiv bann standar drwat Zeova annan mwens motivasyon pour fer sa ki byen.—Prov. 13:20; 1 Kor. 15:33.
5. Ki mannyer nou devret vwar en dimoun ki’n ganny tire dan kongregasyon e akoz?
5 Alor, ki mannyer nou devret vwar en dimoun ki nepli en Temwen Zeova? Menm si nou pou aret frekant li, nou devret kontinyen konsider li konman en mouton perdi e pa mazinen ki sa dimoun pa pou zanmen kapab sanze. En mouton ki’n elwannyen avek troupo i ankor kapab retournen. Pa oubliye ki sa mouton perdi ti dedye son lavi avek Zeova. Malerezman, i nepli viv son lavi an armoni avek son promes e sa i danzere pour li. (Ezek. 18:31) Osi lontan ki i posib pour benefisye avek pitye Zeova, i annan en lespwar pour sa dimoun retournen. Alor pour sa rezon, ki mannyer bann ansyen i ed sa dimoun ki’n ganny tire dan kongregasyon?
KI MANNYER BANN ANSYEN I ED BANN KI’N GANNY TIRE DAN KONGREGASYON?
6. Ki bann ansyen pou fer pour ed en dimoun ki’n ganny tire dan kongregasyon?
6 Eski sa dimoun ki nepli en Temwen Zeova i ganny abandonnen? Eski i pou bezwen retourn kot Zeova li tousel? Pa ditou! Ler en dimoun ki’n fer en pese grav ki pa repantir i ganny tire dan kongregasyon, sa komite bann ansyen pou eksplik li sa ki i kapab fer pour retourn dan kongregasyon. Me bann ansyen pou fer plis ki sa. Laplipar ditan, zot pou dir sa dimoun ki zot ti pou kontan zwenn avek li dan detrwa mwan pour gete si i’n sanz son latitid. Si sa dimoun i dakor pour zwenn avek bann ansyen ankor, alor bann ansyen pou sipliy li pour repantir e retourn dan kongregasyon. Me menm si i pa ankor pare pour sanze a sa moman, tanzantan bann ansyen pou kontakte li pour koz avek li.
7. Ki mannyer bann ansyen i imit konpasyon Zeova dan lafason ki zot tret en dimoun ki’n ganny tire dan kongregasyon? (Zeremi 3:12)
7 Bann ansyen i fer zefor pour imit konpasyon Zeova dan lafason ki zot tret bann ki nepli Temwen Zeova. Par egzanp, Zeova pa ti espere ki son pep rebel, bann Izraelit, i fer premye pa. O kontrer, i ti pran linisyativ pour ed zot, menm avan ki bann Izraelit ti demontre ki zot pe repantir. Parey nou ti vwar dan sa dezyenm lartik dan sa seri, Zeova ti donn en legzanp konpasyon par demann profet Osea pour rekonsilye avek son madanm, menm si son madanm ti ankor pe fer sa ki mal. (Ose. 3:1; Mal. 3:7) Bann ansyen i imit Zeova e zot vreman anvi ed sa dimoun ki’n fer pese grav pour retournen e zot esey fer li fasil pour li fer sa.—Lir Zeremi 3:12.
8. Ki mannyer parabol Zezi lo garson perdi i ed nou konpran pli byen pitye ek konpasyon Zeova? (Lik 15:7)
8 Dan dezyenm lartik dan sa seri, nou ti koz lo en parabol Zezi, sa enn lo garson perdi. Ler sa papa ti vwar son garson pe retourn kot lakour, i ti “tay kot li, may li e anbras li.” (Lik 15:20) I enteresan pour note ki sa papa pa ti esper ki son garson i sipliy li e demann li pardon. Plito, i ti pran linisyativ parey nenport papa ki annan lanmour ti pou fer. Bann ansyen i esey annan menm latitid anver bann ki’n kit kongregasyon. Zot anvi ki sa bann mouton perdi i “retourn dan lakour.” (Lik 15:22-24, 32) I annan lazwa dan lesyel ler en dimoun ki annan en move lavi i retournen e i osi annan lazwa lo later.—Lir Lik 15:7.
9. Ki Zeova i ankouraz bann ki’n fer pese pour fer?
9 Dapre sa ki nou’n vwar ziska aprezan, Zeova pa soutir bann ki fer pese e ki pa repantir. Me i kontinyen ed zot akoz i oule ki zot retournen. Zeova i annan menm santiman anver bann ki’n fer sa ki mal e ki repantir ki dan Osea 14:4: “Mon pou geri zot enfidelite. Mon pou kontan zot akoz mon anvi, parski mon nepli ankoler.” Pa sa pou vreman ed bann ansyen pour vey okenn pti siny repantans! Pa sa pou ankouraz bann ki’n kit Zeova pour retourn kot li san tarde!
10-11. Ki mannyer bann ansyen pou esey ed bann ki ti ganny tire dan kongregasyon dan lepase?
10 Me ki pou arive avek bann dimoun ki’n ganny tire dan kongregasyon petet plizyer lannen pase? Serten sa bann dimoun ki ti ganny tire dan kongregasyon in aret pratik sa pese. Parfwa i menm kapab arive ki zot nepli rapel akoz zot ti ganny tire dan kongregasyon. Me nenport sityasyon, bann ansyen pou esey trouv e vizit sa bann dimoun. Pandan sa bann vizit, bann ansyen pou demande si zot kapab fer lapriyer e zot pou fer zot mye pour ed sa bann dimoun retourn dan kongregasyon. Byensir, si en dimoun i elwannyen avek kongregasyon depi plizyer lannen, i tre probab ki i pou vreman feb spirityelman. Alor si sa dimoun i montre ki i anvi retourn dan kongregasyon, bann ansyen i kapab fer laranzman pour ki en dimoun i etidye Labib avek li, menm si zot pa ankor ganny reaksepte dan kongregasyon. Byensir, dan tou sa bann sityasyon, i bann ansyen ki pou fer sa laranzman pour sa dimoun etidye Labib.
11 Bann ansyen i imit konpasyon Zeova e zot pou fer zefor pour kontakte e ed plis dimoun posib pour konnen ki laport i ouver pour sa bann dimoun retournen. Ler en dimoun ki ti fer sa ki mal i repantir e aret fer sa ki mal, i kapab ganny reaksepte dan kongregasyon san tarde.—2 Kor. 2:6-8.
12. (a) Dan ki sityasyon bann ansyen pou vreman pridan? (b) Akoz nou pa devret krwar ki serten kalite pese pa pou kapab ganny pardonnen par Zeova? (Vwar osi sa not.)
12 Dan serten ka, bann ansyen pou vreman pridan pour reaksepte en dimoun dan kongregasyon. Par egzanp, si en dimoun in komet labi zanfan, si i ti en aposta oubyen i ti’n plàn pour fer fini avek son maryaz, dan bann ka koumsa, bann ansyen pou fer sir ki sa dimoun i vreman pe repantir. (Mal. 2:14; 2 Tim. 3:6) Zot oule protez kongregasyon. An menm tan, zot bezwen realize ki Zeova pou aksepte nenport dimoun ki demontre en repantans senser e ki aret fer sa ki mal. Alor menm si bann ansyen i bezwen pridan ler serten dimoun in anbet oubyen trai lezot, zot pa zanmen devret panse ki bann dimoun ki’n fer serten kalite pese pa pou zanmen ganny pardonnen par Zeova. b—1 Pyer 2:10.
SA KI KONGREGASYON I KAPAB FER
13. Ki diferans i annan dan lafason ki bann dimoun dan kongregasyon i tret en Kretyen ki’n ganny reprimande par bann ansyen oubyen enn ki’n ganny tire dan kongregasyon?
13 Parey nou ti vwar dan lartik avan, parfwa en lanons i ganny fer ki en dimoun in ganny reprimande. Dan sa ka, nou pou kapab kontinyen frekant sa dimoun akoz nou konnen ki i pe repantir e i’n aret fer sa ki mal. (1 Tim. 5:20) I ankor pe form parti kongregasyon e i bezwen lankourazman avek lezot Kretyen dan kongregasyon. (Ebr. 10:24, 25) Par kont, sityasyon i vreman diferan pour en dimoun ki’n ganny tire dan kongregasyon. Nou “aret frekant” sa dimoun e nou pa “ni menm manz avek en dimoun koumsa.”—1 Kor. 5:11.
14. Ki mannyer en Kretyen i kapab servi son konsyans ki’n ganny antrennen par Labib pour deside ki mannyer i pou tret en dimoun ki’n ganny tire dan kongregasyon? (Vwar osi portre.)
14 Eski sa i vedir ki nou pou konpletman inyor en dimoun ki nepli en Temwen Zeova? Pa neseserman. I vre ki nou pa pou frekant sa dimoun. Me dapre son konsyans ki’n ganny antrennen par Labib, sak Kretyen i kapab deside pour envit en dimoun ki’n ganny tire dan kongregasyon ki enn son fanmir oubyen en dimoun ki i ti pros avek pour asiste bann renyon kongregasyon. Ki nou pou fer si sa dimoun i asiste renyon? Dan lepase, nou pa ti pou dir bonzour sa dimoun. Me sak Kretyen i kapab servi son konsyans ki’n ganny antrennen par Labib pour fer en desizyon. Serten pou santi ki zot kapab dir bonzour sa dimoun e akeyir li ler i vin lasal. Par kont, nou pa pou fer en gran konversasyon oubyen konmans frekant sa dimoun.
Dapre zot konsyans, bann Kretyen i kapab deside si zot pou envit en dimoun ki’n ganny tire dan kongregasyon pour asiste renyon oubyen pour akeyir e dir bonzour sa dimoun ler i asiste renyon (Vwar paragraf 14)
15. Ki kalite pese 2 Zan 9-11 i koz lo la? (Vwar osi sa bwat “ Eski Zan ek Pol ti pe koz lo menm kalite pese?”)
15 Serten dimoun ti kapab demande, ‘Pa Labib i dir ki si en Kretyen i dir bonzour en dimoun ki’n ganny tire dan kongregasyon i pe partisip avek li dan son bann move aksyon?’ (Lir 2 Zan 9-11.) Konteks sa verse i montre ki sa lenstriksyon ti annan pour fer avek bann aposta oubyen bann dimoun ki promot bann move kondwit. (Rev. 2:20) Alor si en dimoun i promot bann lansennyman aposta oubyen ankouraz lezot pour fer sa ki mal, bann ansyen pa pou vizit li. Byensir, i toultan annan lespwar ki sa dimoun i sanze li osi. Me avan ki sa i arive, nou pa ti pou dir bonzour avek en tel dimoun, ni envit li pour vin asiste bann renyon kongregasyon.
ANNOU IMIT KONPASYON EK PITYE ZEOVA
16-17. (a) Ki Zeova i oule bann ki fer pese i fer? (Ezekyel 18:32) (b) Ki mannyer bann ansyen i kapab travay ansanm avek Zeova pour ed bann ki pe fer pese?
16 Ki nou’n aprann dan sa senk lartik? Zeova pa oule ki personn i ganny detrir! (Lir Ezekyel 18:32.) I anvi ki tou bann ki fer pese i rekonsilye avek li. (2 Kor. 5:20) Sanmenm ki tou dilon listwar, Zeova in toultan sipliy son pep rebel, ensi ki bann endividi pour repantir e retourn ver li. Bann ansyen dan kongregasyon i annan sa privilez pour travay ansanm avek Zeova pour fer tou sa ki zot kapab pour ed bann dimoun ki’n fer en pese grav repantir.—Rom. 2:4; 1 Kor. 3:9.
17 Zis mazin lazwa ki i annan dan lesyel ler en dimoun ki fer pese i repantir! Nou Papa dan lesyel, Zeova, i vreman kontan sak fwa ki enn bann mouton perdi i retourn dan kongregasyon. Sa i fer nou annan plis lanmour ankor pour Zeova ler nou reflesir lo son konpasyon, son pitye ek son labonte ekstraordiner.—Lik 1:78.
KANTIK 111 Rezon pour nou zwaye
a Nou pou nepli dir ki en dimoun in ganny ekskli dan kongregasyon. An armoni avek parol Pol dan 1 Korentyen 5:13, aprezan nou pou dir ki en dimoun in ganny tire dan kongregasyon oubyen ki sa dimoun i nepli en Temwen Zeova.
b Dapre Labib, pese ki pa kapab ganny pardonnen i pa en serten kalite pese, me i en pese ki ganny fer par en dimoun ki napa okenn regre, en dimoun ki kontinyen opoz e rebel kont Bondye. Pa nou ki devret zize si en dimoun in komet en pese ki pa kapab ganny pardonnen.—Mark 3:29; Ebr. 10:26, 27.
