LARTIK LETID 31
KANTIK 12 Zeova, Bondye Tre O
Sa ki Zeova in fer pour sov bann imen ki fer pese
“Bondye in telman kontan lemonn ki i’n donn son sel Garson.”—ZAN 3:16.
TOPIK
Nou pou vwar ki mannyer Zeova i ed nou pour obeir li menm si nou enparfe e ki mannyer i’n fer li posib pour nou viv pour touzour konman bann imen parfe.
1-2. (a) Kisisa pese e ki mannyer nou kapab ganny laviktwar lo pese? (Vwar osi “Ki sa i vedir?”) (b) Ki bann kestyon nou pou reponn dan sa lartik e dan bann lezot lartik ki annan dan sa Latour Veyer? (Vwar osi “Not pour bann lekter” dan sa nimero.)
ESKI ou ti pou kontan pour konnen ki kantite Zeova i kontan ou? Ou kapab konn larepons sa kestyon ler ou etidye sa ki Zeova in fer pour sov ou dan pese ek lanmor. Pese a i en lennmi. Nou pa kapab ranport laviktwar lo li si nou depan lo nou menm. Nou fer pese tou le zour e nou mor akoz nou fer pese. (Rom. 5:12) Me i annan en bon nouvel. Nou kapab asire ki Zeova pou ed nou ranport laviktwar lo pese ek lanmor.
2 Depi apepre 6,000 an, Zeova pe ed bann dimoun pour obeir li, menm si zot enparfe. Akoz? Parski i kontan nou. I’n toultan kontan bann imen, alor i’n fer en kantite keksoz pour ed bann imen lalit avek pese. Bondye i konnen ki nou mor akoz nou fer pese me i pa anvi nou mor. I anvi nou viv pour touzour. (Rom. 6:23) Sanmenm sa ki i anvi pour ou. Dan sa lartik, nou pou reponn trwa kestyon: (1) Ki lespwar Zeova in donn bann imen enparfe? (2) Ki mannyer bann imen enparfe dan letan Labib ti ganny laprouvasyon Zeova? (3) Ki Zezi ti fer pour sov bann imen dan pese ek lanmor?
KI LESPWAR ZEOVA IN DONN BANN IMEN ENPARFE?
3. Kwa ki ti fer Adan ek Ev fer pese?
3 Ler Zeova ti kree sa premye zonm ek sa premye madanm, i ti anvi ki zot zwaye. I ti donn zot en zoli landrwa pour reste, maryaz konman en kado e en travay enteresan pour fer. Zot ti sipoze fer zanfan e ranpli later, fer later antye vin en paradi parey zarden Edenn. I ti donn zot zis en lord. I ti dir zot ki si zot swazir pour pa obeir sa lord zot pou mor. Nou konnen ki ti arive. En move lanz ki pa ti kontan bann imen ek Bondye ti tant Adan ek Ev pour dezobeir Bondye. Adan ek Ev ti fer sa ki sa move lanz, setadir Satan ti anvi zot fer. Zot ti napa konfyans dan zot Papa ki ti kontan zot en kantite. Zot pa ti obeir li e zot ti fer pese. Sa ki Zeova ti dir ti vin vre. Vi ki zot ti dezobeir Zeova, Adan ek Ev ti soufer pour larestan zot lavi. Zot ti vin vye, malad e apre zot ti mor.—Zen. 1:28, 29; 2:8, 9, 16-18; 3:1-6, 17-19, 24; 5:5.
4. Akoz Zeova i ay pese e ki mannyer i ed nou pour obeir li? (Romen 8:20, 21)
4 Zeova in met sa resi dan Labib pour nou kapab konpran en keksoz enportan. I ed nou konpran akoz i ay pese en kantite. Pese i separ nou avek Bondye e nou mor akoz nou fer pese. (Iza. 59:2) Sanmenm sa, Satan ti tant Adan ek Ev pour fer pese e pe kontinyen fer sa ozordi akoz i ay Zeova ek bann imen. Alor, ler Adan ek Ev ti fer pese, petet Satan ti panse ki i ti’n kas plan Zeova pour bann imen. Me i pa ti konpran ki kantite Zeova i kontan bann imen. Plan Bondye pour bann desandans Adan ek Ev i ankor parey, i pa’n sanze. I kontan bann imen, alor deswit i ti donn zot lespwar. (Lir Romen 8:20, 21.) Zeova ti konnen ki i ti pou annan dimoun ki ti pou swazir pour kontan li e ki ti pou rod son led pour zot kapab obeir li. Konman zot Papa e osi zot Kreater, Zeova ti fer li posib pour zot kapab vin pros avek li e pour sov zot dan pese ek lanmor. Ki mannyer Zeova ti pou fer sa?
5. Kan ki Zeova ti donn bann imen enparfe lespwar? Eksplike. (Zenez 3:15)
5 Lir Zenez 3:15. Deswit apre, Zeova ti dir ki i pou detrir Satan e i ti donn bann imen lespwar. Bondye ti dir ki i ti pou annan en “desandans” ki ti pou sov bann imen. Sa desandans ti pou detrir Satan e rezourd tou bann problenm ki i’n fer dan zarden Edenn. (1 Zan 3:8) Par kont, sa desandans ti pou soufer parski Satan ti pou bles li e sa ti pou touy li. Sa ti pou fer Zeova soufer en kantite. Me Zeova ti pare pour soufer e les sa desandans soufer pour li kapab sov bann imen dan pese ek lanmor.
KI MANNYER BANN IMEN ENPARFE TI GANNY LAPROUVASYON ZEOVA?
6. Ki Abel, Noe ek lezot serviter fidel Zeova ti fer pour zot kapab vin pros avek li?
6 Avek letan, Zeova ti montre ki mannyer bann imen enparfe i kapab vin pros avek li. Abel, dezyenm garson Adan ek Ev ti sa premye imen ki ti annan lafwa dan Zeova apre sa rebelyon dan zarden Edenn. Abel ti kontan Zeova, i ti anvi fer Zeova kontan e vin pros avek Li, alor i ti ofer en sakrifis avek li. Abel ti en berze, alor i ti pran detrwa pti mouton e ofer zot konman en sakrifis avek Zeova. Ki mannyer Zeova ti reazir? Zeova “ti aksepte son lofrann e Abel ti ganny laprouvasyon Bondye.” (Zen. 4:4) Zeova ti aksepte sakrifis bann dimoun ki ti kontan li e ki ti annan konfyans dan li, parey Noe. (Zen. 8:20, 21) Ler Zeova ti aksepte sa bann sakrifis, i ti montre ki bann imen ki fer pese i kapab ganny son laprouvasyon e vin pros avek li. b
7. Ki nou aprann avek legzanp Abraam vi ki i ti pare pour ofer son prop garson konman sakrifis?
7 Zeova ti demann Abraam, en zonm ki ti annan lafwa, pour fer en keksoz vreman difisil. I ti demann li pour ofer son garson Izaak konman en sakrifis. Sa ti bezwen en keksoz vreman difisil pour Abraam fer. Kantmenm sa, i ti pare pour obeir Zeova. Ler Abraam ti pros pour touy son garson, Bondye ti anpes li. Zeova ti konnen ki Abraam ti pou soufer en kantite si i ti touy son garson. Legzanp Abraam i montre nou ki Zeova ti pou fer dan lavenir. Zeova ti pou pare pour ofer son prop Garson ki i ti kontan konman en sakrifis. Sa i montre ki Zeova i kontan bann imen en kantite.—Zen. 22:1-18.
8. Ki nou aprann avek sa bann sakrifis ki Lalwa ti demande pour fer? (Levitik 4:27-29; 17:11)
8 Plizyer santenn lannen pli tar, ler Zeova ti donn bann Izraelit son Lalwa, i ti demann zot pour fer bann sakrifis pour zot pese kapab ganny pardonnen. (Lir Levitik 4:27-29; 17:11.) Sa bann sakrifis ti montre ki Zeova ti pou ofer en pli gran sakrifis pour sov bann imen dan pese. Bondye ti demann son bann profet pour ekri konsernan sa desandans ki ti’n ganny promet. Anfet, sa desandans ti en Garson Bondye ki spesyal ki ti pou soufer e ganny touye. I ti pou parey en mouton ki ganny ofer konman en sakrifis. (Iza. 53:1-12) Zis mazinen ki Zeova ti pou ofer son Garson ki i kontan konman en sakrifis pour li kapab sov bann imen, enkli ou, dan pese ek lanmor!
KI ZEZI TI FER POUR SOV BANN IMEN DAN PESE EK LANMOR?
9. Ki Zan ki batize ti dir lo Zezi? (Ebre 9:22; 10:1-4, 12)
9 Dan premye syek, Zan ki batize ki ti en serviter Bondye ti vwar Zezi ki sorti Nazaret e i ti dir: “Gete! La Pti Mouton Bondye ki tir pese lemonn!” (Zan 1:29) Sa ki Zan ti dir i montre ki Zezi ti sa desandans ki Bondye ti’n promet. Zezi ti pou donn son lavi konman en sakrifis. Finalman, sa desandans ti’n arive pour li konpletman sov bann imen dan pese.—Lir Ebre 9:22; 10:1-4, 12.
10. Ki mannyer Zezi ti montre ki i’n vin pour bann dimoun ki fer pese?
10 Zezi ti konsantre plis lo ed bann dimoun ki ti santi zot koupab akoz zot ti fer pese e i ti envit zot pour vin son disip. I ti konnen ki bann dimoun i malad akoz pese. Alor, i ti ed bann zonm ek madanm ki ti pe soufer akoz bann pese ki zot ti’n fer. I ti servi en legzanp pour eksplik zot. I ti dir: “Dimoun an bonn sante pa bezwen dokter, me bann ki malad ki bezwen dokter. . . . Mon pa’n vin pour dimoun ki fer sa ki byen me pour bann ki annan en move lavi.” (Mat. 9:12, 13) Sanmenm sa ki Zezi ti fer. Ler en madanm ti mouy son lipye avek larm, i ti koz avek sa madanm dan en fason zantiy e i ti pardonn son pese. (Lik 7:37-50) Zezi ti ansenny en madanm Samariten bann laverite enportan menm si i ti konnen ki sa madanm ti pe reste avek en zonm ki i pa ti’n marye avek. (Zan 4:7, 17-19, 25, 26) Dimoun i mor akoz pese me Bondye ti donn Zezi sa pouvwar pour resisit bann zonm, madanm ek zanfan.—Mat. 11:5.
11. Akoz bann dimoun ki fer pese ti kontan Zezi?
11 Nou konpran akoz bann dimoun ki ti fer pese ti kontan Zezi. I ti annan konpasyon pour zot e i ti montre ki i konpran zot santiman. Zot ti santi zot alez pour koz avek li. (Lik 15:1, 2) Zezi ti felisit e ed sa bann dimoun parski zot ti annan lafwa dan li. (Lik 19:1-10) Zezi ti pran pitye pour lezot zis parey son Papa. (Zan 14:9) Lafason ki Zezi ti koz e tret bann dimoun, i montre ki Zeova i kontan bann dimoun e ki i anvi ed zot pour kapab obeir li. Zezi ti ed bann dimoun ki fer pese pour sanz zot lavi e swiv li.—Lik 5:27, 28.
12. Ki Zezi ti dir lo son lanmor?
12 Zezi ti konnen ki i ti pou ofer son lavi konman en sakrifis. Plizyer fwa, i ti dir son bann disip ki i ti pou ganny trair e ganny touye lo en poto. (Mat. 17:22; 20:18, 19) I ti konnen ki ler i ofer son lavi konman en sakrifis, sa ti pou tir pese lemonn, zis parey Zan ek lezot profet ti dir. Zezi ti osi dir ki apre son lanmor, i ti pou “atir tou sort kalite dimoun” kot li. (Zan 12:32) Bann dimoun ki annan lafwa dan Zezi e ki esey swiv son legzanp, pou kapab fer Zeova kontan. Si zot fer sa, zot pou ganny “libere avek pese.” (Rom. 6:14, 18, 22; Zan 8:32) Alor avek kouraz, Zezi ti pare pour donn son lavi pour sov nou.—Zan 10:17, 18.
13. Ki mannyer Zezi ti mor e ki lanmor Zezi i aprann nou lo Zeova? (Vwar portre.)
13 Zezi ti ganny trair par enn son bon zanmi. Apre, son bann lennmi ti aret li, ensilte li e akiz li pour keksoz ki i pa’n fer. Zot ti kondann Zezi amor e fer li soufer en kantite. Bann solda ti anmenn Zezi dan sa landrwa kot i ti pou ganny touye e klout li lo en poto. Zezi ti reste fidel menm si i ti soufer en kantite, me i ti annan Enn ki ti soufer plis ki li. Sa ti Zeova. Zeova ti annan sa pouvwar ek sa abilite pour anpes son Garson soufer me i pa ti fer nanryen. Zeova ti kontan son Garson en kantite, me akoz i ti les son Garson soufer e mor? Parski Zeova i kontan nou. Zezi ti dir: “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.”—Zan 3:16.
Zeova ti soufer en kantite ler i ti les son Garson ganny touye pour li kapab sov nou dan pese ek lanmor (Vwar paragraf 13)
14. Ki ou aprann avek sakrifis Zezi?
14 Sakrifis Zezi i sa pli gran laprev ki Zeova i kontan bann desandans Adan ek Ev. Sa i montre ki kantite Zeova i kontan ou. I ti donn son Garson konman en sakrifis e i ti vreman soufer en kantite pour sov ou dan pese ek lanmor. (1 Zan 4:9, 10) I anvi ed nou pour reisi obeir li, menm si nou fer pese e i anvi tir pese konpletman dan lavenir.
15. Ki nou bezwen fer pour benefisye avek sa kado ki Bondye in donn nou?
15 Sa kado ki Bondye in donn nou, setadir son Garson ki i kontan konman en sakrifis, i fer li posib pour nou pese ganny pardonnen. Me nou bezwen fer en keksoz pour Bondye pardonn nou. Ki nou bezwen fer? Zan ki batize ek Zezi ti dir: “Repantir, parski Rwayonm lesyel in aprose.” (Mat. 3:1, 2; 4:17) Alor, nou bezwen repantir pour nou bann pese si nou oule lalit avek pese e vin pros avek Bondye e pour li pardonn nou pour nou bann pese. Me ki savedir repantir e ki mannyer sa i ed nou pour fer Zeova kontan menm si nou fer pese? Dan sa lot lartik letid, nou pou reponn sa kestyon.
KANTIK 18 Nou dir ou mersi pour sa ranson
a KI SA I VEDIR? Dan Labib, sa mo “pese” i kapab pe refer avek en move aksyon, ler nou fer en keksoz ki Zeova i dir nou i mal oubyen ler nou pa fer sa ki Zeova i dir nou i byen. Me sa mo “pese” i kapab osi refer avek lenperfeksyon ki tou dimoun in gannyen avek Adan. Nou tou nou mor akoz sa pese ki nou’n gannyen avek Adan.
