Nou Bondye Tou Pwisan i osi demontre konsiderasyon
“[Zeova] i konnen koman nou’n ganny kree; i rapel ki nou zis lapousyer.”—PSONM 103:14.
1, 2. (a) Ki mannyer fason ki Zeova i tret bann dimoun i diferan avek fason ki bann dimoun pwisan i tret zot? (b) Ki nou pou diskite dan sa lartik?
SOUVANDFWA bann dimoun pwisan i domin lezot oubyen zot menm anpes lezot ganny bann menm byenfe avek zot. (Matye 20:25; Eklezyast 8:9) Zeova pa zanmen fer sa! Menm si i Bondye Tou Pwisan, setadir sa Personnaz pli pwisan dan liniver, i demontre konsiderasyon anver bann imen enparfe. I bon anver nou e i pran kont nou bann santiman ek nou bann bezwen. I rapel ki nou enparfe e i konn nou limit, alor i pa zanmen demann nou pour fer plis ki nou kapab.—Psonm 103:13, 14.
2 Dan Labib, nou aprann ki mannyer Zeova i demontre konsiderasyon anver son pep. Annou diskit lo trwa legzanp: Premyerman, lafason ki Zeova ti ed Samyel ler i ti ankor zenn pour pas en mesaz zizman avek Granpret Eli. Dezyenmman, lafason ki Zeova ti demontre pasyans
avek Moiz ler Moiz ti santi ki i pa ti kapab gid nasyon Izrael pour sorti Lezip. Trwazyenmman, lafason ki Zeova ti demontre konsiderasyon anver bann Izraelit ler zot ti pe kit Lezip. Ki nou aprann lo Zeova atraver sa bann legzanp e ki mannyer nou kapab imit li?KONSIDERASYON ANVER EN GARSON
3. Ki keksoz drol ti arive avek Samyel en zour swar e ki kestyon nou kapab demande? (Vwar portre o konmansman sa lartik.)
3 Samyel ti konmans servi kot tabernak ler i ti ankor byen zenn. (1 Samyel 3:1) En zour swar apre ki i ti’n al dormi, en keksoz vreman drol ti arive. * (Vwar not.) (Lir 1 Samyel 3:2-10.) I ti tann en dimoun apel li. Samyel ti krwar ki Granpret Eli ki ti aze, ki ti pe apel li. I ti obei, leve e tay kot Eli e dir: “Wi, ou’n apel mwan.” Me Eli ti dir li: “Non, mon pa’n apel ou.” Apre ki menm keksoz ti arive ankor de fwa, Eli ti realize ki Bondye ki ti pe apel Samyel. Alor Eli ti dir Samyel ki pour dir laprosenn fwa e Samyel ti obei. Akoz depi o konmansman Zeova pa ti dir Samyel ki Li ki ti pe apel li? Labib pa dir. Me i posib ki Zeova ti fer keksoz dan sa fason parski i ti pran kont santiman Samyel.
4, 5. (a) Ki Samyel ti fer ler Zeova ti donn li en mesaz pour dir Eli? (b) Ki nou aprann lo Zeova dan sa resi?
4 Lir 1 Samyel 3:11-18. Dapre Lalwa Zeova, bann zanfan ti bezwen annan respe pour bann dimoun aze, espesyalman bann ki ti annan lotorite. (Egzod 22:28; Levitik 19:32) Alor i difisil pour mazinen ki en zenn garson parey Samyel ti pou al kot Eli bomaten e annan lardyes pour dir li mesaz zizman Bondye. Labib i dir nou ki Samyel “ti per pour rakont son vizyon avek Eli.” Par kont, Bondye ti fer Eli konpran ki Li ki ti pe kriy Samyel. Alor, Eli ti dir Samyel pa kasyet nanryen ki Bondye ti’n dir li. Samyel ti obei Eli e “rakont li tou.”
Zeova ti fer li pli fasil pour Samyel kontinyen obei e annan respe
5 Eli pa ti sirprann pour tann sa mesaz. Avan sa “en profet” ti’n deza dir li en mesaz en pe parey. (1 Samyel 2:27-36) Sa resi i montre nou lasazes Zeova e ki degre i demontre konsiderasyon anver lezot.
6. Ki leson nou kapab aprann avek lafason ki Bondye ti ed Samyel ler i ti ankor zenn?
6 Eski ou en zenn? Si wi, sa resi lo Samyel ler i ti ankor zenn, i montre ki Zeova i konpran ou bann problenm ek ou santiman. Petet ou timid e vwar li difisil pour pres avek bann adilt oubyen pour ou diferan avek lezot zenn ou laz. Ou kapab asire ki Zeova i anvi ed ou. Alor priy avek li e dir li egzakteman ki ou santi. (Psonm 62:8) Reflesi byen lo legzanp bann zenn dan Labib, tel parey Samyel. Ou osi kapab koz avek bann frer ek ser ou laz oubyen bann ki pli vye ki’n reisi sirmont bann menm problenm ki ou pe pas atraver. I kapab ki zot pou rakont ou bann moman kot Zeova in ed zot, petet dan bann fason ki zot pa ti pe ekspekte.
KONSIDERASYON ANVER MOIZ
7, 8. Ki mannyer Zeova ti montre ki i ti vreman enterese avek santiman Moiz?
7 Ler Moiz ti annan 80 an, Zeova ti donn li en responsabilite vreman difisil: pour liber nasyon Izrael ki ti dan lesklavaz Lezip. (Egzod 3:10) I tre probab ki sa responsabilite ti en sok pour Moiz parski pour 40 an i ti’n travay konman en berze dan pei Madyann. Moiz ti dir: “Ki mon ete mwan, pour al kot Faraon pour fer pep Izrael sorti Lezip?” Zeova ti reasir Moiz e dir li: “Mon pou avek ou.” (Egzod 3:11, 12) Zeova ti osi promet li ki bann ansyen Izrael ti pou “ekout” li. Kantmenm sa, Moiz ti dir: “Bann Izraelit pa pou krwar mwan, zot pa pou ekout mwan.” (Egzod 3:18; 4:1) Moiz ti pe dir ki petet Zeova ti mal! Me Zeova ti demontre pasyans anver Moiz. I ti menm donn li pouvwar pour fer bann mirak. Anfet, Moiz ti sa premye imen ki ganny mansyonnen dan Labib pour ganny sa pouvwar.—Egzod 4:2-9, 21.
8 Menm apre tousala, Moiz ti annan en lot leskiz. I ti dir ki i pa kapab koz byen. Alor Bondye ti dir li: “Mon pou avek ou labous e mon pou ansenny ou sa ki ou devre dir.” Eski finalman Moiz ti konvenki? Non, i ti demann Bondye pour anvoy en lot dimoun! Zeova ti pran lakoler. Me kantmenm sa, i ti ankor enterese avek santiman Moiz, alor i ti anvoy Aaron pour koz pour Moiz.—Egzod 4:10-16.
9. Ki mannyer pasyans ek labonte Zeova ti ed Moiz pour vin en bon lider?
9 Ki nou aprann lo Zeova dan sa resi? Vi ki Zeova i Tou Pwisan, i ti’n kapab servi son pwisans pour fer Moiz per e obei li. O kontrer, Zeova ti demontre pasyans ek labonte e asir son serviter ki ti modes e annan limilite ki i ti pou avek li. Eski sa fason fer ti marse? Wi! Moiz ti vin en gran lider pour pep Bondye. I ti esey demontre ladouser ek konsiderasyon anver lezot, zis parey Zeova ti fer avek li.—Eski ou tret lezot parey Zeova i tret zot? (Vwar paragraf 10)
10. Ki mannyer nou benefisye ler nou demontre konsiderasyon anver lezot parey Zeova i fer?
10 Ki bann leson pour nou ozordi? Si ou en msye marye, en paran oubyen en ansyen, ou annan serten lotorite lo lezot. Sanmenm sa i vreman enportan ki ou imit Zeova par demontre konsiderasyon, labonte ek pasyans anver ou madanm, zanfan ek bann dan kongregasyon. (Kolosyen 3:19-21; 1 Pyer 5:1-3) Si ou imit Zeova ek Zezi Kri ki sa pli gran Moiz, ou pou fer li fasil pour lezot vin koz avek ou e ou pou kapab ankouraz zot. (Matye 11:28, 29) Ou pou osi en bon legzanp pour zot.—Ebre 13:7.
EN SOVER PWISAN KI OSI DEMONTRE KONSIDERASYON
11, 12. Ki mannyer Zeova ti fer bann Izraelit santi zot sen e sof e an sekirite ler i ti gid zot pour sorti Lezip?
11 I posib ki i ti annan plis ki trwa milyon Izraelit ki ti kit Lezip lannen 1513 avan Kris. Dan sa group i ti annan bann zanfan, bann aze e i tre probab ki serten ti malad oubyen annan dezabilite. En gran group koumsa ti bezwen en Lider ki enterese avek zot e ki konpran zot. Sa ti egzakteman rol ki Zeova ti zwe atraver Moiz. Sa ti fer ki bann Izraelit ti santi zot an sekirite anmezir zot ti kit sa sel landrwa ki zot ti’n reste.—Psonm 78:52, 53.
12 Ki mannyer Zeova ti fer son pep santi zot sen e sof e an sekirite? Ler nasyon Izrael ti kit Lezip, i ti organiz zot “parey bann solda ki pe al lager.” (Egzod 13:18, NWT) Vi ki zot ti’n ganny organize dan sa fason, zot ti kapab vwar ki zot Bondye ti pe kontrol sa sityasyon. “Lizour, [Zeova ti osi] gid zot par nyaz e lannwit, par dife” pour fer zot rapel ki i ti avek zot pour gid e protez zot. (Psonm 78:14) Deplis, nasyon Izrael ti bezwen sa lasirans akoz sa ki ti pou arive apre.
Ki mannyer Zeova ti pran swen avek bann Izraelit kot Lanmer Rouz? (Vwar paragraf 13)
13, 14. (a) Ki mannyer Zeova ti pran swen avek bann Izraelit kot Lanmer Rouz? (b) Ki mannyer Zeova ti montre ki i pli pwisan ki bann Ezipsyen?
13 Lir Egzod 14:19-22. Imazinen ki ou laba avek bann Izraelit. Ou’n pri. Larme Ezipsyen i par deryer ou e Lanmer Rouz i devan ou. Apre Bondye i azir. Sa kolonn nyaz ki ti toultan devan ou i sorti e al deryer kan, ant ou ek bann Ezipsyen. Aprezan zot dan fernwanr, me gras a en mirak i annan laklerte dan ou kan! Apre, ou vwar Moiz fil son lanmen par lao lanmer e en divan for sorti dan les i vini e ouver en gran semen ziska lot kote. Alor ou, ou fanmir ek tou ou bann zannimo i mars lo sa semen dan en fason organize avek tou larestan dimoun. Ou sirprann pour vwar ki ater pa glise ouswa ranpli avek labou. I sek e solid, alor i fasil pour mars lo la. Sa i fer ki menm bann ki mars pli dousman i kapab ariv lot kote lanmer sen e sof.
14 Lir Egzod 14:23, 26-30. Pandan ki tousala pe arive, Faraon, ki orgeye e bet, i konmans tay deryer ou ek lezot Izraelit. Apre, Moiz i fil son lanmen ankor enn fwa par lao lanmer e sa de miray delo i tonbe. Delo i kraz lo Faraon ek son larme. Napa ni enn parmi zot ki sirviv!—Egzod 15:8-10.
15. Ki nou aprann lo Zeova dan sa resi?
15 Sa resi i ed nou aprann en lot keksoz 1 Korentyen 14:33) Parey en berze ki kontan e pran swen avek son mouton, Zeova i pran swen avek son pep dan bann fason pratik. I gard zot sen e sof e protez zot kont zot lennmi. Sa i reasir e rekonfort nou en kantite anmezir ki nou ariv pli pros avek lafen sa lemonn.—Proverb 1:33.
lo Zeova. I en Bondye annord e sa i fer nou santi nou sen e sof e an sekirite. (16. Ki mannyer nou kapab benefisye ler nou repas lo lafason ki Zeova ti sov bann Izraelit?
16 Ozordi, Zeova i ankor pe pran swen avek son pep konman en group. I ed zot pour gard en bon relasyon avek li e i protez zot kont zot lennmi. Deplis, i pou kontinyen fer sa pandan gran ladetres ki pe vini byento. (Revelasyon 7:9, 10) Alor, ki swa pep Bondye i zenn ouswa aze, an bonn sante ouswa annan dezabilite, zot pa pou panik oubyen per pandan gran ladetres. * (Vwar not.) Anfet, zot pou fer lekontrer! Zot pou rapel parol Zezi ki dir: “Debout drwat e lev zot latet akoz zot delivrans pe aprose.” (Lik 21:28) Menm ler zot ganny atake avek Gog, en group nasyon ki pli pwisan ki Faraon, pep Bondye pou annan konfyans ki Zeova pou protez zot. (Ezekyel 38:2, 14-16) Akoz? Parski zot konnen ki Zeova pa zanmen sanze. Ankor enn fwa i pou prouve ki i en Sover ki annan lanmour e ki pran swen avek son pep.—Izai 26:3, 20.
17. (a) Ki mannyer nou kapab benefisye ler nou etidye bann resi Labib lo lafason ki Zeova i pran swen avek son pep? (b) Ki nou pou diskite dan sa lot lartik?
17 Dan sa lartik, nou’n vwar serten legzanp lo ki mannyer Zeova i demontre konsiderasyon ek labonte ler i pran swen avek son pep e ler i gid e sov zot. Anmezir ki ou medit lo sa bann kalite resi, esey aprann en keksoz nouvo lo Zeova par rod bann pti detay ki petet ou pa’n deza remarke avan. Anmezir ki ou aprann plis lo bann zoli kalite Zeova, ou lanmour pour li e ou lafwa dan li pou vin pli for. Dan sa lot lartik, nou pou aprann ki mannyer nou kapab imit Zeova par demontre konsiderasyon anver bann dimoun dan nou fanmir, kongregasyon ek predikasyon.
^ par. 3 En istoryen Zwif ki apel Josephus i dir ki Samyel ti annan 12 an sa letan.
^ par. 16 I rezonnab pour krwar ki serten dimoun ki sirviv Armagedon pou annan dezabilite. Ler Zezi ti lo later, i ti geri bann dimoun ki ti annan “tou sort problenm lasante” oubyen tou sort kalite dezabilite. Sa ki i ti fer sa letan i montre nou sa ki i pou fer pour bann ki sirviv Armagedon. (Matye 9:35) Bann ki resisite pou annan en lekor an bonn sante.