1. Ki topik enportan Zezi ti koz lo la pandan sa dernyen lannwit ki i ti pas avek son bann disip?

PANDAN dernyen lannwit ki Zezi ti pase avek son bann disip avan i mor, i ti mansyonn lanmour apepre 30 fwa. I ti dir son bann disip ki zot devret “kontan kanmarad.” (Zan 15:12, 17) Zot lanmour ti pou telman evidan ki lezot ti pou remarke e konnen ki zot ti bann vre disip Kris. (Zan 13:34, 35) Sa lanmour ki Zezi ti koz lo la pa zis en santiman, i en kalite vreman for ki pous nou pour met lentere lezot avan sa ki pour nou. Zezi ti dir: “Personn napa en pli gran lanmour ki sa, ki en dimoun i pare pour donn son lavi pour son bann zanmi. Zot mon zanmi si zot obei mon komannman.”​—Zan 15:13, 14.

2. (a) Bann serviter Bondye i koni pour kwa ozordi? (b) Ki kestyon nou pou reponn dan sa lartik?

² Ozordi bann serviter Zeova i koni pour zot lanmour senser kot zot met lentere lezot avan sa ki pour zot e zot osi koni pour zot linite. (1 Zan 3:10, 11) I pa enportan ki  nasyonalite ouswa tribi nou sorti ladan, ki langaz nou koze, ki landrwa nou sorti ouswa ki fason nou’n grandi. Partou dan lemonn, bann serviter Zeova i vreman kontan kanmarad. Akoz lanmour i sitan neseser ozordi? Ki mannyer Zeova ek Zezi i batir nou avek lanmour? Finalman, ki mannyer nou kapab demontre sa lanmour pour rekonfort e fortifye lezot?​—1 Korentyen 8:1.

3. Ki mannyer sa “bann dernyen zour” i afekte dimoun?

³ Nou pe viv dan “bann dernyen zour” e lavi i ranpli avek “traka ek lapenn.” (2 Timote 3:1-5; Psonm 90:10) En kantite dimoun pe telman soufer ki zot anvi abandonnen. Plis ki wit san mil dimoun i komet swisid tou le lannen, ki vedir en dimoun tou le 40 segonn. Malerezman, menm serten nou bann frer ek ser in santi koumsa e zot in pran zot prop lavi.

4. Lekel bann dimoun dan Labib ki a en serten moman ti anvi mor?

⁴ Dan letan Labib, serten serviter fidel Bondye ti santi zot sitan mal akoz zot bann problenm ki zot ti anvi mor. Par egzanp, Zob ti telman pe soufer ki i pa ti anvi kontinyen viv e i ti dir: “Mon degout mon lavi.” (Zob 10:1; 14:13) Zonas ti telman dezapwente ki i ti dir: “[Zeova] mon demann ou pran mon lavi. Plito mon mor ki kontinyen viv konmsa.” (Zonas 4:3) Profet Eliya ti santi li telman dezespere ki i ti dir: “Mon’n ganny ase. Aprezan, [Zeova], pran mon lavi.” (1 Lerwa 19:4) Me Zeova ti kontan sa bann serviter fidel e i ti anvi ki zot viv. I pa ti repros zot akoz zot ti santi koumsa. O kontrer, i ti ed zot pour reganny sa dezir pour viv pour ki zot kapab kontinyen servi li fidelman.

5. Akoz nou bann frer ek ser i vreman bezwen nou lanmour la konmela?

⁵ Ozordi, en kantite nou bann frer ek ser pe fer fas avek bann sityasyon difisil e zot bezwen nou lanmour. Serten pe ganny sikannen oubyen persekite. Lezot pe ganny bouli ouswa pe ganny malparle dan zot landrwa travay e zot bezwen fer fas avek tousala. Oubyen zot senpleman epwize parski zot bezwen fer bann gran zournen travay ouswa zot annan bann travay ki met en ta presyon lo zot. I osi annan lezot ki annan bann problenm grav dan lafanmir. Petet zot in marye avek en dimoun ki pa servi Zeova e ki toultan kritik zot. Sa bann sityasyon ek lezot kalite presyon i fer ki bokou i santi ki zot nepli annan lafors e petet zot in menm konmans mazinen ki zot napa okenn valer. Lekel ki kapab ed zot?

6. Ki mannyer lanmour Zeova i fortifye son bann serviter?

⁶ Zeova i reasir son bann serviter ki i kontan zot e ki i pou kontan zot pour touzour. Imazinen ki mannyer bann Izraelit ti santi ler Zeova ti dir zot: “Ou annan gran valer pour mwan. Ou presye pour mwan e mon kontan ou” e ler i ti dir zot: “Pa bezwen per, akoz mon avek ou!” (Izai 43:4, 5) Nou konnen  ki sakenn parmi nou i presye pour Zeova. * (Vwar not.) Labib i promet: “Bondye i . . . koman en gerye ki donn laviktwar. I dan gran lazwa akoz ou.”​—Zefanya 3:16, 17.

7. Ki mannyer lanmour Zeova i parey lanmour en manman? (Vwar portre o konmansman sa lartik.)

⁷ Zeova i promet pour fortifye e rekonfort son pep malgre nenport ki problenm ki zot pe pas atraver. I ti dir: “Ou pou ganny gate e ganny pran dan lebra. Ou pou ganny dorlote lo son zenou. Parey en manman i konsol son zanfan, mwan osi mon pou konsol ou.” (Izai 66:12, 13) Zis mazinen ki mannyer en pti baba i santi li an sekirite ler son manman i pran li oubyen zwe avek li! Zeova i vreman kontan ou e i anvi ki ou santi ou an sekirite. Pa zanmen doute ki ou vreman presye pour Zeova.​—Zeremi 31:3.

8, 9. Ki mannyer lanmour Zezi i kapab fortifye nou?

⁸ La en lot rezon akoz nou konnen ki Zeova i kontan nou: “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.” (Zan 3:16) Sakrifis Zezi i prouve ki li osi i kontan nou e sa lanmour i fortifye nou. Labib i dir ki ni menm “leprev, lenkyetid” pa “kapab anpes Bondye ek Kris Zezi nou Senyer kontan nou.”​—Romen 8:35, 38, 39.

⁹ Parfwa nou annan bann problenm ki afebli nou swa fizikman e emosyonnelman ouswa ki fer nou perdi nou lazwa dan nou servis pour Zeova. Me ler  nou mazin lo ki kantite Kris i kontan nou, sa i kapab donn nou lafors pour andire. (Lir 2 Korentyen 5:14, 15.) Lanmour Kris i donn nou sa dezir pour kontinyen viv e servi Zeova. I kapab ed nou pour pa abandonnen, menm si nou pe soufer akoz bann dezas, persekisyon, dezapwentman ouswa lenkyetid.

10, 11. Lekel ki annan sa responsabilite pour batir bann frer ek ser ki dekouraze? Eksplike.

¹⁰ Zeova i osi servi kongregasyon pour batir nou avek son lanmour. Ler nou kontan nou bann frer ek ser, nou prouve ki nou kontan Zeova. Nou fer tou sa ki nou kapab pour ed nou bann frer ek ser konnen ki zot annan valer e ki Zeova i kontan zot. (1 Zan 4:19-21) Zapot Pol ti ekri: “Kontinyen ankouraz kanmarad e batir kanmarad zis parey zot pe deza fer li.” (1 Tesalonisyen 5:11) Pa zis bann ansyen ki kapab fer sa. Sakenn parmi nou i kapab imit Zeova ek Zezi par rekonfort nou bann frer ek ser.​—Lir Romen 15:1, 2.

¹¹ I kapab ki serten dan kongregasyon ki soufer akoz bann gro depresyon ouswa lenkyetid pou bezwen swen medikal profesyonnel ek latizann. (Lik 5:31) Bann ansyen ek lezot dan kongregasyon i realize ki menm si zot pa bann dokter kalifye, sa led ek rekonfor ki zot kapab donnen i vreman enportan. Tou dimoun dan kongregasyon i kapab “koz dan en fason ki pou konsol bann ki dan depresyon, siport bann ki feb, annan pasyans anver tou dimoun.” (1 Tesalonisyen 5:14) Nou anvi esey konpran lafason ki nou bann frer ek ser i santi.  Nou bezwen annan pasyans anver zot e koz avek zot dan en fason ki pou rekonfort zot ler zot dekouraze. Eski ou esey fortifye lezot? Ki ou kapab fer pour vin pli rekonfortan e ankourazan?

12. Donn legzanp en dimoun ki ti ganny ankouraze par lanmour dan son kongregasyon.

¹² En ser Lerop i dir: “Parfwa mon mazin pour swiside, me i annan en laranzman an plas kot mon ganny bon sipor. Mon kongregasyon in sov mon lavi. Bann frer ek ser i toultan vreman ankourazan e zot annan en gran lanmour. Menm si pa bokou ki konnen mon ganny depresyon, kongregasyon i toultan la pour mwan. I annan en koup marye ki parey mon paran spirityel. Zot pran byen swen avek mwan e zot la pour mwan 24 lo 24.” Byensir, pa tou dimoun ki kapab ede koumsa. Me nou tou nou kapab fer en kantite pour siport nou bann frer ek ser. * (Vwar not.)

13. Ki nou bezwen fer pour rekonfort lezot?

¹³ Ekout byen. (Zak 1:19) Nou demontre lanmour ler nou ekout en frer oubyen ser e esey konpran son santiman. Zantiman demann bann kestyon ki pou ed ou konpran ki mannyer ou frer oubyen ser i santi. I pou konnen ki ou vreman enterese avek li, menm atraver lekspresyon lo ou figir. Ler i pe koze, demontre pasyans e les li eksprim son lekor san enteronp li. Si ou ekout byen, ou kapab pli byen konpran li e sa i kapab ed li pour annan konfyans dan ou. Apre sa, i pou pli fasil pour li ekout ou anmezir ki ou esey ed li. Ler ou annan en lentere senser dan lezot, ou kapab vin vreman rekonfortan pour zot.

14. Akoz nou pa devret kritike?

¹⁴ Pa kritike. En dimoun ki dan depresyon pou santi li pli mal si i krwar ki nou pe kritik li. Sa pou fer li vreman difisil pour nou ed li. “Bann parol san reflesi i parey bann kou lepe, me lalang en dimoun saz i en gerizon.” (Proverb 12:18, NWT) Menm si nou pa ti pou zanmen dir en keksoz par ekspre pour bles en dimoun ki dan depresyon, nou kapab fer zot bokou ditor ler nou koze san reflesi. Pour reasir nou frer oubyen ser, nou bezwen vreman fer li santi ki nou pe esey konpran son sityasyon.​—Matye 7:12.

15. Ki bann bon zouti nou kapab servi pour rekonfort lezot?

¹⁵ Servi Parol Bondye pour rekonfort lezot. (Lir Romen 15:4, 5.) Labib i sorti kot “sa Bondye ki donn landirans ek rekonfor,” alor nou pa sirprann ki nou ganny bokou rekonfor dan Labib. Nou osi annan Watch Tower Publications Index ek Liv resers pour Temwen Zeova. Ler nou servi sa bann zouti, nou kapab trouv bann verse ek piblikasyon ki nou kapab servi pour rekonfort e ankouraz nou bann frer ek ser.

16. Ki bann kalite ki pou ed nou ankouraz en dimoun ki dan depresyon?

¹⁶ Demontre tandres ek ladouser. Zeova i “en Papa ki pran lapenn e ki  donn rekonfor dan tou sityasyon” e i annan “tandres ek konpasyon” pour son bann serviter. (Lir 2 Korentyen 1:3-6; Lik 1:78; Romen 15:13) Pol ti en bon legzanp dan sa domenn parski i ti imit Zeova. I ti ekri: “Avek ladouser, nou ti pran swen avek zot, parey en manman ki pran swen avek son bann zanfan. Alor, akoz nou annan lafeksyon ek tandres pour zot, nou ti determinen pour pa zis anons sa bon nouvel Bondye avek zot me osi pour donn zot tou sa ki nou ti annan, parski zot in vin bann dimoun ki nou kontan en kantite.” (1 Tesalonisyen 2:7, 8) Ler nou demontre tandres parey Zeova, i kapab ki nou pe donn nou bann frer ek ser sa rekonfor ki zot pe priye pour gannyen!

17. Ki pwennvi realistik nou annan lo nou bann frer ek ser ki ed nou ankouraz zot?

¹⁷ Pa ekspekte ki ou bann frer ek ser i parfe. Nou bezwen realistik. Si ou ekspekte ki ou bann frer ek ser i parfe, ou pou dezapwente. (Eklezyast 7:21, 22) Rapel ki Zeova i realistik dan sa ki i ekspekte avek nou. Alor nou bezwen annan pasyans avek kanmarad. (Efezyen 4:2, 32) Nou pa zanmen anvi fer nou bann frer ek ser santi ki zot pa pe fer ase ouswa konpar zot avek lezot. O kontrer, nou ankouraz zot e konsantre lo bann bon keksoz ki zot pe fer. Sa i kapab ed zot pour annan lazwa anmezir ki zot servi Zeova.​—Galat 6:4.

18. Akoz nou anvi batir lezot avek lanmour?

¹⁸ Tou serviter Zeova i presye pour li ek Zezi. (Galat 2:20) Nou vreman kontan nou bann frer ek ser, alor nou bezwen tret zot avek tandres. Nou “rod bann keksoz ki promot lape e bann keksoz ki batir kanmarad.” (Romen 14:19) Nou enpasyan pour viv dan Paradi kot personn pa pou dekouraze! I pou nepli annan maladi ek lager. Dimoun pou nepli mor akoz pese ki nou’n erite e i pou nepli annan persekisyon, problenm lafanmir ouswa bann dezapwentman dan lavi. A lafen sa mil an, tou dimoun pou parfe. Bann ki reste fidel dan sa tes final pou ganny adopte par Zeova konman son bann zanfan lo later e zot pou ganny “laglwar ek laliberte bann zanfan Bondye.” (Romen 8:21) Alor nou tou, annou demontre lanmour ki batir e ed lezot pour sirviv e antre dan nouvo lemonn Bondye.