1. Ki mannyer nou limilite i kapab ganny afekte par latitid egois sa lemonn?

AKOZ i difisil pour aplik sa ki nou aprann dan Parol Bondye? En rezon, se ki nou bezwen annan limilite pour fer sa ki byen. Dan sa “bann dernyen zour” i difisil pour kontinyen annan limilite parski en kantite dimoun otour nou i “egois, kontan larzan, vantar, arogan” e zot “napa en kontrol lo zot lekor.” (2 Timote 3:1-3) Konman bann serviter Bondye, nou konnen ki sa kalite latitid pa bon, me i kapab paret ki sa bann ki azir dan sa fason pe reisi e ki zot pe vreman profit lavi. (Psonm 37:1; 73:3) Nou menm kapab mazinen: ‘Eski i vo lapenn fer zefor pour met lentere lezot avan sa ki pour mwan? Eski dimoun pou ankor annan respe pour mwan si mon demontre limilite?’ (Lik 9:48) Si nou les latitid egois sa lemonn enfliyans nou, sa i kapab gat sa bon relasyon ki nou annan avek nou bann frer ek ser e fer li difisil pour lezot rekonnet ki nou bann Kretyen. Me ler nou etidye legzanp bann serviter Bondye ki ti annan limilite e imit zot, nou pou ganny bann bon rezilta.

2. Ki nou kapab aprann avek bann serviter fidel Bondye dan lepase?

 ² Kwa ki ti ed bann serviter fidel Bondye dan lepase pour vin son zanmi? Ki mannyer zot ti fer li plezir? Kote zot ti ganny lafors pour fer sa ki byen? Ler nou lir lo zot bann legzanp dan Labib e medit lo la, nou lafwa pou vin pli for.

3, 4. (a) Ki mannyer Zeova i ansenny nou? (b) Akoz konnesans pa ase pour gard nou lafwa for?

³ Zeova i donn nou sa ki nou bezwen pour gard nou lafwa for. Nou ganny bann bon konsey ek formasyon baze lo Labib dan nou bann piblikasyon Kretyen, nou sit Enternet, Televizyon JW ek nou bann renyon ek lasanble. Me Zezi ti eksplike ki i pa ase pour annan zis konnesans. I ti dir: “Mon manze se pour fer lavolonte sa enn ki’n anvoy mwan e pour fini son travay.”​—Zan 4:34.

⁴ Pour fer lavolonte Bondye ti parey manze pour Zezi. Ler nou manz manze ki nourisan, sa i fer nou dibyen e nouri nou lekor. Pareyman, ler nou fer lavolonte Bondye, sa i fer nou dibyen e i nouri nou lafwa. Par egzanp, eski ou’n deza al renyon predikasyon fatige me ler ou retourn kot ou apre predikasyon ou santi ou ere e ki ou’n reganny lafors?

5. Ki mannyer nou benefisye ler nou vin saz?

⁵ Ler nou fer sa ki Zeova i demann nou pour fer, nou montre ki nou saz. (Psonm 107:43) Osi, plizyer bon keksoz i arive avek bann ki annan lasazes. “Napa nanryen pli dezirab ki li. . . . Pour sa enn ki sezi li, lasazes i en pye dibwa ki donn lavi; sa enn ki gard li byen, i ganny deklare byennere.” (Proverb 3:13-18) Zezi ti dir: “Si zot konn sa bann keksoz, ere si zot fer li.” (Zan 13:17) Bann disip Zezi ti pou ere si zot ti kontinyen fer sa ki Zezi ti demann zot pour fer. Zot ti viv dapre son bann lansennyman ek legzanp.

6. Akoz nou bezwen kontinyen aplik sa ki nou aprann?

⁶ Ozordi, nou osi nou bezwen kontinyen aplik sa ki nou aprann. Mazin en mekanisyen ki annan bann zouti, materyo ek konnesans. Sa bann keksoz pou ed li vin en bon mekanisyen si selman i servi zot. I kapab ki i annan plizyer lannen leksperyans, me i bezwen kontinyen servi sa ki i’n aprann si i anvi reste en bon mekanisyen. Pareyman, ler nou fek aprann laverite, nou ti ere parski nou ti aplik sa ki nou ti lir dan Labib. Me pour reste ere, toulezour nou bezwen kontinyen aplik sa ki Zeova i ansenny nou.

7. Ki nou bezwen fer pour aprann avek legzanp bann serviter dan Labib?

⁷ Dan sa lartik, nou pou diskit lo serten sityasyon ki kapab fer li difisil pour nou kontinyen annan limilite. Nou pou aprann ki mannyer bann serviter fidel dan lepase ti kontinyen annan limilite dan sa bann menm sityasyon. Me nou bezwen fer plis ki zis lir sa bann lenformasyon. Nou bezwen mazin lo sa lenformasyon e apre aplik li dan nou lavi.

8, 9. Dan Akt 14:8-15, ki nou aprann konsernan limilite ki Pol ti annan? (Vwar portre o konmansman sa lartik.)

⁸ Bondye i anvi ki tou sort kalite dimoun “i ganny sove e ganny konnesans egzakt lo laverite.” (1 Timote 2:4) Ki mannyer ou konsider tou sa bann  dimoun ki pa ankor aprann laverite? Zapot Pol ti pres avek bann Zwif ki ti deza konn serten keksoz lo Zeova. Me i ti osi pres avek bann ki ti ador bann fo bondye. Ler Pol ti pres avek sa bann dimoun, sa ti teste son limilite. Ki mannyer?

⁹ Lo premye vwayaz misyonner ki Pol ti fer, i ti al avek Barnabas dan lavil Lis. Bann Likaonyen ki ti reste laba ti tret Pol ek Barnabas parey bann superhero e zot ti apel zot Zous ek Ermes, ki ti non zot bann fo bondye. Eski Pol ek Barnabas ti pran sa konman en konpliman? Eski zot ti konsider sa konman en bon sanzman, vi ki zot ti’n ganny persekite dan sa de dernyen lavil ki zot ti’n vizite? Eski zot ti mazinen ki tou sa latansyon ti pou ed plis dimoun pour tann sa bon nouvel? Non! Zot pa ti kontan sa ditou e zot ti kriye: “Akoz zot pe fer sa? Nou osi nou bann zonm ki annan menm febles parey zot.”​—Akt 14:8-15.

10. Akoz Pol ek Barnabas pa ti santi ki zot pli siperyer ki bann Likaonyen?

¹⁰ Ler Pol ek Barnabas ti dir ki zot osi zot ti bann zonm, zot ti pe dir ki zot ti enparfe. Zot pa ti pe dir ki zot ladorasyon ti parey avek pour bann Likaonyen. Pol ek Barnabas ti’n ganny anvoye par Bondye konman bann misyonner. (Akt 13:2) Zot ti’n ganny swazir avek lespri sen e zot ti annan en lespwar merveye. Me sa pa ti en rezon pour zot santi zot pli siperyer. Zot ti realize ki sa bann dimoun osi ti kapab ganny sa lespwar pour al viv dan lesyel si zot ti aksepte sa bon nouvel.

11. Ki mannyer nou kapab annan limilite parey Pol ler nou pe prese?

¹¹ La en fason ki nou montre ki nou annan limilite parey Pol. Nou pa zanmen santi ki nou spesyal akoz nou annan sa responsabilite pour prese ouswa akoz Zeova in ed nou akonpli serten keksoz. Nou kapab demann nou lekor: ‘Ki mannyer mon santi konsernan bann dimoun dan mon teritwar? Eski mon annan prezidis anver en serten group dimoun?’ Partou dan lemonn, Temwen Zeova i esey rod bann dimoun ki pou ekout sa bon nouvel. Serten i menm fer zefor pour aprann langaz ouswa koutim bann dimoun ki lezot i konsider konman enferyer. Me zot pa zanmen santi ki zot pli meyer ki sa bann ki zot pres avek. O kontrer, zot esey konpran sak dimoun pour zot kapab ed plis dimoun posib pour aksepte mesaz Rwayonm.

12. Ki mannyer Epafras ti montre ki i vreman enterese avek lezot?

¹² En lot fason ki nou montre ki nou annan limilite i ler nou priy pour nou bann frer ek ser, ki’n fini “ganny sa lafwa presye parey nou.” (2 Pyer 1:1) Sanmenm ki Epafras ti fer. Epafras i ganny mansyonnen zis trwa fwa dan Labib. Ler Pol ti prizonnyen dan son lakaz Ronm, i ti ekri bann Kretyen Kolos konsernan Epafras. I ti dir: “I pe toultan lite pour zot dan son bann lapriyer.” (Kolosyen 4:12) Epafras ti konn byen bann frer ek ser e i ti vreman enterese avek zot. Pol ti dir ki Epafras “i dan prizon avek mwan,” alor Epafras ti annan son prop problenm. (Filemon 23) Me toudmenm, i ti enterese avek bezwen lezot e i ti fer en keksoz pour ed zot. Epafras ti  priy pour son bann frer ek ser e nou osi nou kapab fer parey e menm mansyonn zot par non. Sa bann kalite lapriyer i annan bokou lefe.​—2 Korentyen 1:11; Zak 5:16.

13. Ki mannyer ou kapab imit Epafras ler ou priye?

¹³ Mazin lo en dimoun ki ou kapab mansyonn son non dan ou lapriyer. Petet ou konn bann frer ek ser dan ou kongregasyon ouswa fanmir ki pe fer fas avek bann defi. Petet zot annan bann desizyon difisil pour pran ouswa bann tantasyon pour reziste. Ou osi kapab priy pour bann frer ek ser ki zot non i dan sa lartik “Jehovah’s Witnesses Imprisoned for Their Faith” lo jw.org. (Sanz langaz sa sit pour Angle e get anba NEWSROOM > LEGAL DEVELOPMENTS.) Ou osi kapab priy pour bann ki’n perdi en dimoun ki zot kontan dan lanmor, bann ki resaman in sirviv bann dezas ouswa lager e bann ki annan problenm finansyel. I annan en kantite frer ek ser ki bezwen nou lapriyer. Ler nou priy pour zot, nou prouve ki nou pa pe mazin zis nou prop bezwen, me osi bezwen lezot. (Filipyen 2:4) Zeova i tann sa bann kalite lapriyer.

14. Ki mannyer Zeova i sa enn ki ekout pli byen?

¹⁴ En lot fason ki nou montre ki nou annan limilite i ler nou ekout byen. Zak 1:19 i dir ki nou “devret pare pour ekoute.” Zeova i sa enn ki ekout pli byen. (Zenez 18:32; Zozye 10:14) Par egzanp, lir sa konversasyon ki dan Egzod 32:11-14. (Lir.) Zeova ti permet Moiz pour eksprim son santiman menm si i pa ti bezwen lopinyon Moiz. Si ou ti konn en dimoun ki son rezonnman ti mal dan lepase, eski ou ti pou ekout li avek pasyans e apre swiv son sizesyon? Pourtan, Zeova i annan pasyans pour ekout tou imen ki priy li avek lafwa.

15. Ki mannyer nou kapab imit Zeova e donn loner lezot?

 ¹⁵ Demann ou lekor: ‘Si Zeova i sitan annan limilite ki i kapab ekout dimoun parey i ti ekout Abraam, Rasel, Moiz, Zozye, Manoa, Eliya ek Ezekya, pa mon devret esey fer parey? Eski mon kapab donn tou mon bann frer ek ser plis loner par ekout e aplik zot bann sizesyon ler i posib? Eski i annan en dimoun dan mon kongregasyon ouswa fanmir ki mon kapab donn plis latansyon? Ki mannyer mon pou fer sa?’​—Zenez 30:6; Ziz 13:9; 1 Lerwa 17:22; 2 Kronik 30:20.

16. Ki mannyer Lerwa David ti reazir ler Simei pa ti tret li byen?

¹⁶ Limilite i osi ed nou pour demontre kontrol lo nou lekor ler lezot pa tret nou byen. (Efezyen 4:2) Nou vwar en bon legzanp lo ki mannyer pour fer sa dan 2 Samyel 16:5-13. (Lir.) En fanmir Lerwa Sail ki apel Simei ti ensilte e atak David ek son bann serviter. David ti’n kapab aret Simei, me o kontrer, avek pasyans i ti siport bann lensilt Simei. Ki mannyer David ti kapab annan kontrol lo son lekor? Nou trouv larepons dan trwazyenm Psonm.

17. Kwa ki ti ed David pour annan kontrol lo son lekor e ki mannyer nou kapab imit li?

¹⁷ David ti konpoz sa trwazyenm Psonm ler son garson Absalonm ti pe esey touy li. I ti pandan sa letan ki Simei ti atak David, me David ti ganny lafors pour reste kalm. Ki mannyer? Dan Psonm 3:4 nou lir parol David: “Mon kriy for ver [Zeova]; depi son montanny sen i reponn mwan.” Ler nou pa pe ganny trete byen, nou bezwen priye parey David ti fer. Koumsa, Zeova pou donn nou son lespri sen pour nou kapab andire. Eski ou kapab annan plis kontrol lo ou lekor ouswa pli pare pour pardonnen ler en dimoun pa tret ou byen? Eski ou annan konfyans ki Zeova i enterese avek ou bann soufrans e ki i pou ed ou e beni ou?

18. Ki mannyer nou pou benefisye ler nou aplik lenstriksyon Zeova?

¹⁸ Ler nou fer sa ki nou konnen i byen, sa pou montre ki nou saz e Zeova pou beni nou. Dan Proverb 8:11, Labib i dir: “Lasazes . . . i pli presye ki tou sa ki ou kapab anvi.” Menm si lasazes i baze lo konnesans, i enplik plis ki zis konpran bann lenformasyon. Lasazes i enplik bann desizyon ki nou pran. Menm bann fourmi i demontre lasazes par anmas manze pour liver. (Proverb 30:24, 25, NWT) Kris ki ganny apele “lasazes Bondye,” i toultan fer bann keksoz ki fer plezir son Papa. (1 Korentyen 1:24; Zan 8:29) Bondye pou rekonpans nou ler nou osi nou kontinyen annan limilite e demontre lasazes par swazir pour fer sa ki nou konnen i byen. (Lir Matye 7:21-23.) Alor kontinyen travay pour fer kongregasyon en landrwa kot tou dimoun i kapab servi Zeova avek limilite. I demann letan ek pasyans pour aplik sa ki nou konnen i byen. Me ler nou fer sa, sa i montre ki nou annan limilite e limilite pou fer nou ere depi konmela menm e pour touzour.