LER ou anvi konnen keler i ete, ki ou fer? I tre probab ou get lo ou mont ouswa lo en revey. Ou kapab vwar ki i enn erdtan 30 minit apre midi. Ki ou ti pou dir en zanmi si i ti demann ou, “Keler i ete?”

I tou depan lo landrwa kot ou reste. Par egzanp, petet ou pou dir, “I 1:30” ouswa “I 13:30.” Dan serten landrwa petet ou pou menm dir, “I lanmwatye de,” ki vedir 30 minit avan de-z-er.

Ki mannyer dimoun dan letan Labib ti konnen keler i ete? Zot osi zot ti annan plizyer fason dir. Lekritir Ebre i servi diferan lekspresyon tel parey “granmaten,” “lizour,” “midi” ek “aswar.” (Zenez 8:11; 19:27; 43:16; Deterononm 28:29; 1 Lerwa 18:26) Me par ler, Labib i servi bann lekspresyon ki pli presi.

Dan letan lontan an Izrael, i ti annan bann zonm ki ti veye, sirtou pandan lannwit. Bann Izraelit ti diviz lannwit an trwa peryod letan. (Psonm 63:6, NWT) Ziz 7:19 (NWT) i dir ki i ti annan en peryod letan dan milye lannwit kot bann zonm ti veye. Ler Zezi ti ne, bann Zwif ti’n deza konmans diviz lannwit an kat peryod letan, parey bann Grek ek Romen ti fer.

Sa bann peryod letan kot bann zonm ti veye dan lannwit i ganny mansyonnen plizyer fwa dan bann Levanzil. Par egzanp, “ler i ti’n ariv granmaten,” Zezi ti mars lo delo pour al kot son bann disip ki ti dan en bato. Sa ti pandan sa katriyenm peryod letan.​—Matye 14:25.

Zezi ti mansyonn tou le kat peryod letan ler i ti dir son bann disip pour veye akoz zot “pa konnen kan ki met lakour pe vini, ki swa tar pandan lazournen, minwi, granmaten ouswa boner dan bomaten.” (Mark 13:35; not) Sa premye peryod letan, “tar pandan lazournen,” ti depi soley kouse ziska apepre ne-v-er diswar. Sa dezyenm peryod letan, “minwi,” ti depi apepre ne-v-er diswar ziska minwi. Sa trwazyenm peryod letan, “granmaten,” ti depi minwi ziska apepre trwa-z-er bomaten. I tre probab ki i ti pandan sa peryod letan ki sa kok ti sante sa zour swar ki Zezi ti ganny arete. (Mark 14:72) Sa katriyenm peryod letan, “boner dan bomaten,” ti depi apepre trwa-z-er bomaten ziska soley leve.

Alor menm si dimoun sa letan ti napa bann revey oubyen mont parey nou nou annan ozordi, zot ti annan en fason pour konnen keler i ete.