1. Akoz nou devret soumet avek Zeova?

ZEOVA i nou Kreater, alor nou devret soumet * avek li. I pour sa rezon ki Zeova i annan drwa dir nou ki pour fer. (Rev. 4:11) Me nou annan en lot bon rezon pour obei li. Sa i akoz son fason dirize i sa enn ki pli bon. Tou dilon listwar, plizyer imen in dirize. Me ler nou konpar lafason ki sa bann imen i dirize avek lafason ki Zeova i dirize, nou vwar ki Zeova i sa pli bon Dirizan, parski i annan plis lasazes, konpasyon, pitye ek lanmour.​—Egz. 34:6; Rom. 16:27; 1 Zan 4:8.

2. Dapre Ebre 12:9-11, akoz nou soumet avek Zeova?

² Konman nou Papa ki kontan nou, Zeova i anvi ki nou obei li akoz nou kontan li e pa zis akoz nou annan respe pour li. Dan let ki zapot Pol ti ekri bann Ebre, i ti eksplike ki nou devret “pare pour soumet avek nou Papa” akoz i form nou “pour nou prop dibyen.”​—Lir Ebre 12:9-11.

3. (a) Ki mannyer nou montre ki nou soumet avek Zeova? (b) Ki bann kestyon nou pou reponn?

³ Nou soumet avek Zeova ler nou fer nou mye pour obei li dan tou keksoz e ler nou lalit kont sa tandans pour desid pour nou menm kwa ki byen e kwa ki mal. (Prov. 3:5) Anmezir ki nou aprann plis lo bann zoli kalite ki Zeova i annan, nou vwar li pli fasil pour soumet avek li. Akoz? Parski tou sa ki i fer i akoz i annan sa bann zoli kalite. (Ps. 145:9, NWT) Pli nou aprann lo Zeova, pli nou lanmour pour li pou ogmante. Ler nou kontan Zeova, nou pa bezwen en kantite lareg pour dir nou ki nou devret fer e pa fer. Nou fer zefor pour annan menm fason panse ek santiman ki  Zeova e evite fer sa ki mal. (Ps. 97:10) Par kont, parfwa nou kapab vwar li difisil pour obei Zeova. Akoz sa i leka? Ki bann ansyen i kapab aprann avek legzanp Gouverner Neemya? Ki bann papa i kapab aprann avek legzanp Lerwa David? Ki bann manman i kapab aprann avek legzanp Mari, manman Zezi? Nou pou vwar larepons sa bann kestyon dan sa lartik.

4-5. Dapre Romen 7:21-23, akoz i kapab difisil pour soumet avek Zeova?

⁴ En rezon akoz nou kapab vwar li difisil pour soumet avek Zeova i akoz nou tou nou’n erit pese e nou enparfe. Alor i pa toultan ki nou anvi obei Bondye. Ler Adan ek Ev ti dezobei Bondye e manz sa fri, zot ti deside pour zot menm kwa ki byen e kwa ki mal. (Zen. 3:22) Ozordi, laplipar dimoun i inyor Bondye, zis parey Adan ek Ev e zot anvi deside pour zot menm kwa ki byen e kwa ki mal.

⁵ Menm si nou pa parey zot parski nou konn e kontan Zeova, nou kapab vwar li difisil pour toultan fer bann keksoz ki Zeova i anvi. Zapot Pol osi ti santi koumsa. (Lir Romen 7:21-23.) Parey Pol, nou anvi fer sa ki byen dan lizye Zeova. Me nou toultan bezwen lalit avek sa tandans pour fer sa ki mal.

6-7. Ki en lot rezon nou kapab vwar li difisil pour soumet avek Zeova? Donn en legzanp.

⁶ En lot rezon i kapab difisil pour soumet avek Zeova i akoz nou ganny enfliyanse par nou koutim ek landrwa kot nou’n grandi. Bokou dimoun pou dir nou bann keksoz ki diferan avek lavolonte Zeova, alor nou bezwen kontinyen fer zefor pour pa devlop menm fason panse avek sa bann dimoun. Annou vwar en legzanp.

⁷ Dan serten landrwa, en kantite dimoun i met presyon lo bann zenn pour zot fer en kantite larzan. En ser ki apel Mary * ti fer fas avek sa menm difikilte. Avan ki i ti aprann konn Zeova, i ti lekol dan enn bann pli bon lekol dan son pei. Fanmir Mary ti esey met presyon lo li pour li rod en travay kot i ti pou ganny en ta larzan e kot dimoun ti pou respekte li. Mary osi ti anvi fer sa. Me apre ki i ti’n aprann konn e kontan Zeova, son bann lobzektif dan lavi ti sanze. Kantmenm sa, i pa fasil pour li. I dir: “Parfwa mon ganny bann loportinite kot mon ti kapab fer en kantite larzan, me sa ti pou fer li difisil pour mwan servi Zeova dan menm fason ki mon pe fer la konmela. Lafason ki mon’n grandi i fer li difisil pour mwan refiz sa bann loportinite. Mon bezwen sipliy Zeova pour ed mwan reziste sa tantasyon pour aksepte en travay ki pou anpes mwan fer tou sa ki mon kapab dan son servis.”​—Mat. 6:24.

8. Ki nou pou diskite aprezan?

⁸ Parey nou’n aprann, i byen pour nou soumet avek Zeova. Me ler bann ki annan lotorite, tel parey bann ansyen, bann papa ek bann manman i soumet avek Bondye, zot kapab ed lezot. Annou vwar serten legzanp dan Labib ki pou ed nou aprann ki mannyer pour servi okenn lotorite ki nou annan dan en fason ki fer plezir Zeova.

9. Ki serten difikilte Neemya ti fer fas avek?

⁹ Zeova in donn bann ansyen sa responsabilite enportan pour pran swen avek son pep. (1 Pyer 5:2) Bann ansyen i kapab  aprann bann leson enportan avek lafason ki Neemya ti tret pep Zeova. Neemya ti gouverner Zida, alor i ti annan en gran lotorite. (Nee. 1:11; 2:7, 8; 5:14) Mazin lo serten difikilte ki Neemya ti fer fas avek. I ti’n tande ki bann Zwif ti pe servi tanp pour fer bann keksoz ki ti napa nanryen pour fer avek ladorasyon Zeova. Osi, zot pa ti pe donn kontribisyon pour bann Levit parey Lalwa ti demande. Bann Zwif pa ti pe obei Lalwa Zeova konsernan Saba e serten zonm ti’n marye avek bann madanm sorti dan bann nasyon ki pa ti ador Zeova. Gouverner Neemya ti pou bezwen fer en keksoz konsernan sa sityasyon.​—Nee. 13:4-30.

10. Ki mannyer Neemya ti fer fas avek bann difikilte ki i ti rankontre?

¹⁰ Neemya pa ti abiz son lotorite pour fors pep Bondye pour swiv son prop standar. O kontrer, i ti priy Zeova senserman e demann li son led. I ti osi ansenny nasyon Izrael Lalwa Zeova. (Nee. 1:4-10; 13:1-3) Neemya ti osi demontre limilite e travay ansanm avek lezot Izraelit. I ti menm ed zot rekonstri miray Zerizalenm.​—Nee. 4:15.

11. Dapre 1 Tesalonisyen 2:7, 8, ki mannyer bann ansyen i devret tret bann frer ek ser dan kongregasyon?

¹¹ Petet bann ansyen pa bezwen fer fas avek bann menm problenm ki Neemya ti fer fas avek. Me kantmenm sa, zot kapab swiv son legzanp dan plizyer fason. Par egzanp, bann ansyen i travay dir pour ed bann frer ek ser dan kongregasyon. Zot pa krwar ki zot pli siperyer ki lezot zis akoz zot annan serten lotorite. O kontrer, zot tret kongregasyon avek tandres. (Lir 1 Tesalonisyen 2:7, 8.) Vi ki zot annan limilite e zot vreman kontan bann frer ek ser, zot koz avek zot dan en fason zantiy. Andrew, ki’n servi konman ansyen pour plizyer lannen, i dir: “Mon’n remarke ki ler en ansyen i zantiy e amikal, sa i annan en bon lefe lo bann frer ek ser.  Sa i osi motiv zot pour travay ansanm avek bann ansyen.” Tony, ki’n osi servi konman ansyen pour plizyer lannen, i dir: “Mon esey aplik sa konsey dan Filipyen 2:3 e mon toultan fer zefor pour konsider lezot konman pli siperyer ki mwan. Sa i ed mwan evite fors lezot pour obei mwan.”

12. Akoz i enportan pour bann ansyen annan limilite?

¹² Bann ansyen i devret annan limilite zis parey Zeova i annan limilite. Zeova i Souvren liniver, me kantmenm sa i “bese” pour lev “sa enn ki pov dan lapousyer.” (Ps. 18:35, NWT; 113:6, 7) Labib i osi dir nou ki Zeova i deteste bann dimoun ki orgeye e arogan.​—Prov. 16:5.

13. Akoz en ansyen i bezwen “seryezman kontrol son labous”?

¹³ En ansyen ki soumet avek Zeova i bezwen “seryezman kontrol son labous.” Si non, petet i pou koz an mal avek en dimoun ki pa’n demontre respe pour li. (Zak 1:26; Gal. 5:14, 15) Andrew, ki’n ganny mansyonnen pli boner, i dir: “Parfwa mon’n anvi koz en pe brit oubyen sek ler mon’n santi ki en frer oubyen ser in mank respe pour mwan konman en ansyen. Par kont, mon’n medit lo legzanp bann zonm fidel dan Labib e sa in ed mwan konpran akoz i enportan pour annan limilite.” En ansyen i montre ki i soumet avek Zeova ler i koz avek bann frer ek ser e avek lezot ansyen dan en fason zantiy e ki demontre lanmour.​—Kol. 4:6.

14. Ki responsabilite enportan Zeova in donn bann papa e ki i ekspekte avek zot?

¹⁴ Dapre laranzman Zeova, en papa i sef fanmir e Bondye i ekspekte ki sa papa i ansenny, gid e disiplin son zanfan. (1 Kor. 11:3; Efe. 6:4) Me sa pa vedir ki sa papa i kapab servi son lotorite dan nenport fason ki i anvi. Vi ki Zeova i Loter lafanmir, en papa pou bezwen rann kont avek li pour lafason ki i tret son fanmir. (Efe. 3:14, 15) Bann papa i montre ki zot soumet avek Zeova par servi zot lotorite dan en fason ki fer plezir Bondye. Zot kapab aprann en kantite keksoz ler zot etidye lo lavi Lerwa David.

15. Akoz Lerwa David i en bon legzanp pour bann papa?

¹⁵ Zeova ti apwent David, pa zis konman en sef fanmir me osi konman sef nasyon Izrael antye. Konman lerwa, David ti annan bokou lotorite. Parfwa, i ti mal servi son lotorite e fer bann fot vreman grav. (2 Sam. 11:14, 15) Me David ti soumet avek Zeova e aksepte ler Zeova ti disiplin  li. Dan son lapriyer, i ti dir Zeova tou sa ki i ti santi. I ti osi fer son mye pour obei konsey Zeova. (Ps. 51:1-4) An plis, David ti annan limilite e i ti aksepte bann bon konsey ki i ti gannyen, pa zis avek bann msye me osi avek bann madanm. (1 Sam. 19:11, 12; 25:32, 33) David ti aprann avek son bann fot e i ti fer ladorasyon Zeova vin sa keksoz pli enportan dan son lavi.

16. Ki leson bann papa i kapab aprann avek David?

¹⁶ Ki bann papa i kapab aprann avek Lerwa David? Pa servi sa lotorite ki Zeova in donn zot dan en move fason. Admet ler ou fer en fot e aksepte bann konsey sorti dan Labib ki ou gannyen avek lezot. Si ou fer sa, ou fanmir pou annan respe pour ou akoz ou annan limilite. Ler ou priy ansanm avek ou fanmir, devid ou leker avek Zeova, koumsa ou fanmir pou tande ki kantite ou depan lo Zeova pour son led ek gidans. Pli enportan ankor, fer ou servis pour Zeova vin sa keksoz pli enportan dan ou lavi. (Det. 6:6-9) Ou bon legzanp i enn bann pli bon kado ki ou kapab donn ou fanmir.

17. Ki responsabilite Zeova in donn bann manman?

¹⁷ Zeova in donn sak manman en responsabilite enportan e i’n osi donn zot en serten lotorite lo zot zanfan. (Prov. 6:20) Anfet, sa ki en manman i dir e fer i kapab annan en lefe lo son zanfan tou dilon zot lavi. (Prov. 22:6) Annou vwar ki bann manman i kapab aprann avek Mari, manman Zezi.

18-19. Ki bann manman i kapab aprann avek legzanp Mari?

¹⁸ Mari ti konn byen Lekritir. I ti annan en gran respe pour Zeova e i ti osi annan en bon lanmitye avek li. I ti pare pour soumet avek Zeova e fer sa ki Zeova ti oule, menm si sa ti pou sanz son lavi konpletman.​—Lik 1:35-38, 46-55.

¹⁹ Bann manman i kapab swiv legzanp Mari dan plizyer fason. Ki mannyer ou kapab fer sa? Premyerman, ou bezwen gard ou lanmitye avek Zeova for par fer ou letid Labib personnel ek lapriyer personnel. Dezyenmman, ou bezwen pare pour fer bann sanzman ki fer plezir Zeova. Par egzanp, i kapab ki ou paran ti ankoler vitman e koz brit avek ou. Alor, petet ou krwar i normal pour tret ou zanfan dan sa fason. Menm si ou’n aprann ki mannyer Zeova i anvi ou tret ou zanfan, i kapab difisil pour ou reste kalm e demontre pasyans anver zot, sirtou ler ou fatige e zot pa oule ekout ou. (Efe. 4:31) Letan ou  santi koumsa, i vreman enportan pour demann Zeova son led. En manman ki apel Lydia i dir: “Parfwa, ler mon garson in dezobei mwan, mon’n bezwen priy bokou pour mwan pa koz avek lakoler. Mon’n menm deza aret koze dan milye en fraz e fer en pti lapriyer dan mon leker. Lapriyer i ed mwan reste kalm.”​—Ps. 37:5, NWT.

20. Ki difikilte serten manman i fer fas avek e ki mannyer zot kapab sirmont sa bann difikilte?

²⁰ En lot difikilte ki serten manman i fer fas avek, i ki zot vwar li difisil pour montre zot zanfan ki zot kontan zot. (Tit 2:3, 4) Serten madanm in grandi dan en fanmir kot zot paran pa ti devlop en relasyon pros avek zot. Si ou’n grandi dan sa fason, ou pa bezwen fer sa menm fot ki ou paran in fer. En manman ki soumet avek Zeova i bezwen aprann pour eksprim lanmour pour son zanfan. I kapab difisil pour en manman sanz son fason panse, son fason azir e fason ki i santi. Me i kapab fer sa bann sanzman e sa pou fer li ek son fanmir pli ere.

21-22. Dapre Izai 65:13, 14, ki bann byenfe nou gannyen ler nou soumet avek Zeova?

²¹ Lerwa David ti konnen ki i annan bokou byenfe ler nou soumet avek Zeova. I ti ekri: “Bann lord Zeova i drwat, i fer leker rezoui. Komannman Zeova i pir, i fer lizye briye. Ou serviter in ganny averti par zot, i annan en gran rekonpans pour sa enn ki obei.” (Ps. 19:8, 11, NWT) Ozordi, nou kapab vwar diferans ant bann dimoun ki soumet avek Zeova ek bann ki rezet bann bon konsey ki i donnen. Bann ki soumet avek Zeova i “sante avek lazwa dan zot leker.”​—Lir Izai 65:13, 14.

²² Ler bann ansyen, bann papa ek bann manman i soumet avek Zeova, zot lavi i amelyore, zot fanmir i pli ere e tou dimoun dan kongregasyon i ini avek kanmarad. Pli enportan ankor, ler zot soumet avek Zeova, zot fer son leker ere. (Prov. 27:11) Pa sa i sa pli gran rekonpans ki nou kapab gannyen!