1. Ki mannyer Zeova i santi konsernan bann dimoun ki annan limilite? Eksplike.

ZEOVA i kontan bann dimoun ki annan limilite. Zis bann ki vreman annan limilite ki kapab annan en bon relasyon avek li. De lot kote, “i gard son zistans avek bann ki arogan.” (Ps. 138:6, NWT) Nou tou nou anvi fer plezir Zeova e nou anvi ki i vin pros avek nou. Alor nou annan bann bon rezon pour devlop limilite.

2. Ki nou pou diskite dan sa lartik?

² Dan sa lartik, nou pou diskit lo larepons sa trwa kestyon swivan: (1) Kisisa limilite? (2) Akoz nou devret devlop limilite? (3) Kan ki i kapab difisil pour demontre limilite? Parey nou pou vwar, ler nou devlop limilite, sa i fer leker Zeova ere e fer nou dibyen.​—Prov. 27:11; Iza. 48:17.

3. Kisisa limilite?

³ En dimoun ki annan limilite pa krwar ki i pli enportan ki lezot. I pa orgeye oubyen arogan. Dapre Labib, en dimoun ki annan limilite i realize ki Zeova i bokou pli siperyer ki li. I osi rekonnet ki tou dimoun i pli siperyer ki li dan en serten fason.​—Fili. 2:3, 4.

4-5. Akoz nou kapab dir ki en dimoun ki paret konmsi i annan limilite pa vreman annan limilite?

⁴ I annan serten dimoun ki ler ou get zot ou krwar ki zot annan limilite. Par egzanp, petet zot trankil e timid. Oubyen i kapab ki zot demontre lapolites ek respe anver lezot akoz landrwa ek lafason ki zot in grandi. Me dan fon zot leker, i kapab ki zot vreman orgeye e napa limilite. To ou tar, zot pou montre ki kalite dimoun zot vreman ete.​—Lik 6:45.

⁵ De lot kote, i annan dimoun ki paret konfidan e ki  fran, me sa pa vedir ki zot orgeye. (Zan 1:46, 47) Par kont, bann dimoun koumsa i bezwen fer atansyon ki zot pa depan lo zot prop abilite. Ki swa nou timid oubyen non, nou tou nou bezwen fer bokou zefor pour devlop vre limilite.

6. Dapre 1 Korentyen 15:10, ki nou kapab aprann avek legzanp zapot Pol?

⁶ Annou vwar legzanp zapot Pol. Zeova ti servi li pour form bann nouvo kongregasyon dan plizyer lavil. I kapab ki i’n fer bokou plis dan predikasyon ki okenn lezot zapot Zezi. Par kont, Pol pa ti krwar ki i pli enportan ki bann lezot zapot. Avek limilite i ti dir: “Mon pli pti parmi tou bann zapot e mon pa merite ganny apele zapot parski mon ti persekit kongregasyon Bondye.” (1 Kor. 15:9) Apre, Pol ti dir ki sel rezon ki i annan en bon relasyon avek Zeova i akoz Zeova in demontre labonte ekstraordiner anver li, me pa akoz i spesyal oubyen akoz i’n fer en kantite keksoz. (Lir 1 Korentyen 15:10.) Pol in kit en bon legzanp lo limilite. Ler i ti ekri son let pour bann Kretyen dan lavil Korent, i pa ti fer vantar akoz tou sa ki i ti’n fer, menm si serten dan kongregasyon ti pe kritik li.​—2 Kor. 10:10.

7. Ki mannyer en frer ki bokou dimoun ti konnen ti demontre limilite?

⁷ En lot frer ki en bon legzanp limilite i Frer Karl F. Klein ki ti servi lo Konsey Direkter. Son biografi i vreman ankourazan. Frer Klein ti onnet e avek limilite i ti koz lo son bann defo e bann problenm ki i ti’n pas atraver. Par egzanp, ler i ti esey pres kazankaz pour premye fwa an 1922, i ti vwar li sitan difisil ki pour de-z-an i pa ti pres kazankaz ankor. Pli tar, ler i ti dan Betel, en frer ti donn li en konsey e pour  en pe letan i ti gard rankin kont sa frer. Deplis, i ti malad emosyonnelman akoz i ti strese e enkyet (nervous breakdown), me pli tar i ti refer. Kantmenm sa, Frer Klein ti osi ganny bokou zoli privilez. I kler ki Frer Klein ti annan bokou limilite akoz i ti koz lo son bann febles menm si i ti en frer ki bokou dimoun ti konnen. Bokou frer ek ser i rapel Frer Klein e lafason ki i ti koz fran dan son biografi. *

8. Ki mannyer 1 Pyer 5:6 i montre ki Zeova i kontan ler nou demontre limilite?

⁸ Sa rezon pli enportan ki nou esey abes nou, setadir demontre limilite, i akoz sa i fer plezir Zeova. Zapot Pyer i ed nou konpran akoz i enportan pour abes nou. (Lir 1 Pyer 5:6.) Liv “Come Be My Follower” * i fer nou konpran pli byen ki zapot Pyer ti pe esey dir. Sa liv i dir ki lorgey i parey en pwazon e ki son lefe i kapab fer bokou ditor. Bondye pa kapab servi en dimoun ki orgeye menm si i annan sa pli bon abilite. De lot kote, si en dimoun i annan limilite, Zeova i kapab servi li menm si i napa bokou abilite. Pareyman, i pou en plezir pour Zeova rekonpans ou si ou annan limilite. Sa pli bon keksoz ki nou kapab fer, i fer Zeova kontan.​—Prov. 23:15.

9. Akoz lezot dimoun pou anvi vin pros avek nou si nou annan limilite?

⁹ Ler nou devlop limilite, nou pa zis fer Zeova plezir me nou osi ganny bokou byenfe. Si nou annan limilite, lezot pou anvi vin pros avek nou. Pour ou kapab konpran akoz, esey mazin lo ki kalite dimoun ou kontan pas letan avek. (Mat. 7:12) Nou pa vreman kontan pas letan avek en dimoun ki toultan anvi ki lezot i fer sa ki li i anvi e ki pa oule ekout sizesyon lezot. De lot kote, nou kontan pas letan avek bann dimoun ki “kontan kanmarad parey bann frer ek ser, [ki] demontre tandres ek konpasyon, ensi ki limilite.” (1 Pyer 3:8) Nou anvi pas letan avek bann dimoun koumsa e tan ki nou annan limilite, zot osi zot pou anvi pas letan avek nou.

10. Akoz i pli fasil pour bann dimoun ki annan limilite fer fas avek bann problenm?

¹⁰ Ler nou annan limilite, sa i osi fer nou lavi pli fasil. Parfwa nou vwar oubyen  eksperyans bann keksoz ki paret enzis. Lerwa Salomon ki ti en zonm saz ti dir: “Mon’n deza war bann lesklav pe mont seval e bann sef pe mars apye parey lesklav.” (Ekle. 10:7) Parfwa bann dimoun ki annan bann bon abilite pa ganny felisite. Tandis ki lezot ki napa bokou abilite i ganny bokou latansyon ek felisitasyon. Me kantmenm sa, Salomon ti realize ki nou devret aksepte lavi mannyer i ete e pa les bann keksoz ki arive dan lavi tro fatig nou. (Ekle. 6:9) Si nou annan limilite, i pou pli fasil pour aksepte bann keksoz dan lavi ki nou pa kontan.

11. Ki nou devret fer ler nou ganny konseye?

¹¹ Nou annan plizyer loportinite pour demontre limilite toulezour. Annou vwar detrwa legzanp. Ler nou ganny konseye. Nou devret rapel ki si en dimoun i fer zefor pour donn nou en konsey, i tre probab ki sa ki nou’n fer i bokou pli grav ki nou realize. Ler sa i arive, deswit nou kapab tant pour anvi rezet sa konsey. Petet nou pou kritik sa dimoun ki’n konsey nou oubyen lafason ki i’n koze. Me si nou annan limilite, nou pou esey demontre en bon latitid.

12. Dapre Proverb 27:5, 6, akoz nou devret apresye ler en dimoun i donn nou en konsey? Donn en legzanp.

¹² En dimoun ki annan limilite i apresye konsey ki i gannyen. Annou vwar en legzanp ki pou ed nou konpran sa pli byen: Meton ou kot Lasal Rwayonm. Apre ki ou’n koz avek plizyer dimoun, enn i anmenn ou akote e dir ou ki ou annan manze dan ou ledan. San dout ou pou anbarase. Me pa ou pou apresye ki i’n dir ou? Anfet, i tre probab ki ou ti pou’n prefere ki en dimoun ti’n dir ou pli boner. Pareyman, nou devret demontre limilite ek lapresyasyon ler en frer oubyen en ser i annan sa kouraz pour donn nou en konsey ki nou bezwen. Nou vwar sa dimoun konman nou zanmi e pa nou lennmi.​—Lir Proverb 27:5, 6; * Gal. 4:16.

13. Ki mannyer nou kapab demontre limilite ler lezot i ganny bann privilez dan kongregasyon?

¹³ Ler lezot i ganny bann privilez. En ansyen ki apel Jason i admet: “Ler mon vwar lezot ganny bann privilez, parfwa  mon demande akoz pa mwan ki’n ganny swazir?” Eski ou’n deza santi koumsa? I pa mal pour “fer zefor pour kalifye” pour ganny bann privilez. (1 Tim. 3:1) Par kont, nou bezwen kontrol nou fason panse. Si nou pa fer atansyon, nou kapab konmans vin orgeye. Par egzanp, en frer i kapab konmans mazinen ki i pli kalifye pour fer en serten travay dan kongregasyon. Oubyen en ser i kapab mazinen, ‘Mon msye ti pou fer sa pli byen ki sa lot frer!’ Par kont, si nou annan vre limilite, nou pa pou mazin dan sa fason.

14. Ki nou kapab aprann avek lafason ki Moiz ti reazir ler lezot ti ganny bann privilez?

¹⁴ Nou kapab aprann avek lafason ki Moiz ti reazir ler lezot ti ganny bann privilez. Moiz ti vreman apresye sa responsabilite ki i ti annan pour diriz nasyon Izrael. Me ki mannyer Moiz ti reakte ler Zeova ti donn lezot sa abilite pour fer serten travay ki i ti pe fer? I pa ti zalou. (Nom. 11:24-29) I ti annan limilite e i ti les lezot ed li pour ziz nasyon Izrael. (Egz. 18:13-24) Sa ti fer ki bann Izraelit ti annan bokou plis zonm pour ziz bann ka e alor zot pa ti bezwen esper en kantite letan pour ganny zize. Sa i montre ki Moiz ti met lentere lezot avan son bann privilez. Pa sa i en bon legzanp pour nou! Nou bezwen gard antet ki si nou anvi ki Zeova i servi nou, i pli enportan pour nou annan limilite ki pour annan bann abilite. Menm si “Zeova i o, i remark bann ki annan limilite.”​—Ps. 138:6, NWT.

15. Ki mannyer sirkonstans plizyer frer ek ser in sanze?

¹⁵ Ler nou sirkonstans i sanze. Dan sa bann dernyen lannen, en kantite frer ek ser ki’n servi Zeova pour plizyer dizenn lannen in ganny demande pour pran en lot form servis. Par egzanp, an 2014, lorganizasyon ti deside ki i ti pou nepli  annan bann sirveyan distrik. Alor sa bann frer ek zot madanm ti ganny demande pour pran en lot servis. Sa menm lannen, lorganizasyon ti osi dir ki ler en frer i ganny 70 an, i pou nepli kapab servi konman en sirveyan rezyonal. Osi bann frer ki annan 80 an oubyen plis, i nepli kapab servi konman kordinater konsey ansyen dan kongregasyon. Deplis, dan bann dernyen lannen, plizyer Betelit in ganny demande pour pran servis pionye. I annan lezot serviter spesyal a plen tan ki’n bezwen aret zot servis akoz problenm lasante, zot fanmir i bezwen zot oubyen lezot rezon ankor.

16. Ki mannyer nou bann frer ek ser in demontre limilite ler zot in adapte avek zot nouvo sirkonstans?

¹⁶ I pa ti fasil pour sa bann frer ek ser adapte avek zot nouvo sirkonstans. I fer sans ki zot ti kontan zot servis avan. Pour serten parmi zot, zot ti’n dan sa servis pour plizyer lannen. I pour sa rezon ki pour en pe letan i annan ki sagren anmezir ki zot adapte avek zot nouvo sirkonstans. Me avek letan, zot in arive fer li. Kwa ki’n ed zot? Sa keksoz prensipal ki’n ed zot i zot lanmour pour Zeova. Zot pa ti’n promet pour servi Zeova si selman zot ti annan en serten servis, tit oubyen privilez. (Kol. 3:23) Zot kontan pour kontinyen servi Zeova dan nenport fason e pour demontre limilite. Zot “larg tou zot traka lo li” parski zot konnen ki i enterese avek zot.​—1 Pyer 5:6, 7.

17. Akoz nou rekonesan ki Parol Bondye i ankouraz nou pour demontre limilite?

¹⁷ Pa nou rekonesan ki Parol Bondye i ankouraz nou pour devlop limilite? Ler nou devlop sa zoli kalite, lezot i kontan pour pas letan avek nou e nou kontan pour pas letan avek zot. Nou pli byen kapab fer fas avek bann problenm ki nou gannyen dan lavi. Pli enportan ankor, nou vin pli pros avek nou Papa ki dan lesyel. Pa nou vreman kontan pour konnen ki menm si Zeova i “sa enn ki plase tre, tre o,” i kontan son bann serviter ki demontre limilite!​—Iza. 57:15.