Sa ki sa verse i dir i enteresan. I dir: “Pa sirprann si ou vwar bann pov pe ganny abize e kan dimoun dan pei i perdi zot drwa e pa ganny lazistis. Annefe, par lao en o zofisye, i annan en sef pli enportan ki pe obzerv li, e par lao tou le de, i annan en lot sef ki pli enportan ankor.”​—Ekle. 5:8, NWT.

Dapre pwennvi imen, sa verse pe dekri bann dimoun ki annan lotorite dan bann gouvernman imen. Me si nou reflesir byen lo sa verse, nou pou vwar ki i montre en laverite lo Zeova e sa laverite pou rekonfort e reasir nou.

Eklezyast 5:8 i refer avek en dirizan ki abiz bann pov e ki tret zot dan en fason enzis. Sa dirizan i devret rapel ki i tre probab ki i pe ganny obzerve par en dimoun ki pli o ki li oubyen ki annan plis lotorite dan gouvernman ki li. Anfet, i kapab ki i annan lezot ki annan en pozisyon pli o ankor. Malerezman, dan bann gouvernman imen, i kapab ki tou sa bann dirizan i koronpi e dimoun i soufer akoz i annan koripsyon.

Me menm si i paret ki nou pa kapab fer nanryen pour amelyor sa sityasyon, nou kapab ganny rekonforte ler nou konnen ki Zeova pe ‘obzerv sa bann o zofisye’ dan bann gouvernman imen. Nou kapab demann Bondye led e desarz nou fardo lo li. (Ps. 55:22; Fili. 4:6, 7) Nou konnen ki Zeova i “pronmnen son regar partou lo later pour soutenir bann ki zot leker i konpletman atase avek li.”​—2 Kron. 16:9.

Alor, Eklezyast 5:8 i fer nou mazin sa ki pe vreman arive dan lemonn, setadir ki i toultan annan en dimoun ki annan plis lotorite. Pli enportan ankor, sa verse i fer nou rapel ki Zeova i pli o ki tou, ki i Lotorite Siprenm. I’n swazir son Garson, Zezi Kri, konman Lerwa dan Son Rwayonm. Zeova i Tou Pwisan e i pe obzerv tou sa ki pe arive. I ziz dan en fason ki zis e son Garson i fer parey li.