1-2. Ki mannyer Eklezyast 11:6 i relye avek sa travay predikasyon?

DAN serten pei, dimoun i reazir byen ler zot tann sa bon nouvel. I sanmenm sa ki zot ti pe espere! Dan lezot pei, dimoun pa vreman enterese avek Bondye oubyen Labib. Ki mannyer dimoun dan ou pei i reazir ler zot tann sa bon nouvel? Nenport fason ki dimoun i reazir, Zeova i ekspekte ki nou kontinyen anons sa bon nouvel ziska ki i dir sa travay in fini.

² Zeova in fini deside kan sa travay predikasyon pou fini. Apre sa, “lafen pou arive.” (Mat. 24:14, 36) Ziska ki sa i arive, ki mannyer ou kapab obei sa parol pour “pa les ou lanmen repoze”? *​—Lir Eklezyast 11:6, NWT. *

3. Ki nou pou diskite dan sa lartik?

³ Dan sa lartik avan, nou ti vwar kat keksoz ki nou bezwen fer pour nou kapab “lapes dimoun” byen. (Mat. 4:19) Dan sa enn lartik, nou pou vwar trwa fason ki nou kapab pli determinen pour kontinyen anons sa bon nouvel, nenport kwa ki i arive. Nou pou vwar akoz i enportan pour (1) reste konsantre, (2) annan pasyans e (3) kontinyen annan en lafwa for.

4. Akoz nou bezwen reste konsantre lo sa travay ki Zeova in donn pour fer?

⁴ Zezi ti dir son bann disip ki i ti pou arive pandan bann dernyen zour e ki mannyer dimoun ti pou ete sa letan. I ti konnen ki sa bann keksoz ti kapab fer son bann disip aret  konsantre lo sa travay predikasyon. Alor, i ti dir son bann disip “kontinyen veye.” (Mat. 24:42) Dan letan Noe, i ti annan en kantite keksoz ki ti fer dimoun pa port latansyon lo lavertisman ki Noe ti donnen. Sa bann menm keksoz i kapab distrer nou ozordi. (Mat. 24:37-39; 2 Pyer 2:5) I pour sa rezon ki nou bezwen reste konsantre lo sa travay ki Zeova in donn nou pour fer.

5. Dapre Akt 1:6-8 ki zistans sa travay predikasyon ti pou arive?

⁵ Ozordi, nou vreman bezwen konsantre lo anons sa bon nouvel Rwayonm. Zezi ti dir ki apre son lanmor, son bann disip ti pou kontinyen anons sa bon nouvel e zot ti pou fer plis ki sa ki li i ti fer ler i ti ankor vivan. (Zan 14:12) Apre ki Zezi ti mor, serten son bann disip ti repran zot biznes lapes. Apre ki Zezi ti’n resisite, i ti fer en mirak pour ed son bann disip atrap en kantite pwason. Zezi ti servi sa lokazyon pour fer son bann disip konpran ki sa travay predikasyon i pli enportan ki okenn lezot travay. (Zan 21:15-17) Zis avan Zezi ti al dan lesyel, i ti dir son bann disip ki sa travay predikasyon ki i ti’n konmans fer, ti pou ganny fer dan lezot landrwa an deor Izrael. (Lir Akt 1:6-8.) Plizyer lannen pli tar, Zezi ti fer zapot Zan vwar en vizyon. Dan sa vizyon, Zan ti vwar ki i ti pou arive “pandan zour Senyer.” * Enn bann keksoz ki Zan ti vwar ti en lanz ki “ti annan en bon nouvel eternel pour anonse . . . avek tou nasyon, tribi, langaz ek pep.” (Rev. 1:10; 14:6) I kler alor ki i lavolonte Zeova ozordi ki nou partisip dan sa travay predikasyon ki pe ganny fer partou dan lemonn ziska ki sa travay i fini.

6. Ki mannyer nou kapab reste konsantre lo sa travay predikasyon?

⁶ Si nou reflesir lo tou sa ki Zeova pe  fer pour ed nou, sa pou ed nou reste konsantre lo sa travay predikasyon. Par egzanp, i pe donn nou en kantite manze spirityel atraver nou bann piblikasyon, ki swa dan form elektronik ek lo papye, bann lanrezistreman odyo ek video e osi televizyon JW lo Enternet. Zis mazin sa: Lo nou sit Enternet, i annan lenformasyon dan plis ki 1,000 langaz! (Mat. 24:45-47) Dan en lemonn kot dimoun i divize akoz politik, larelizyon ek larzan, i annan plis ki wit milyon serviter Zeova partou dan lemonn ki ini ansanm. Par egzanp, Vandredi le 19 Avril 2019, Temwen Zeova partou dan lemonn ti get menm video ki ti koz lo teks pour lazournen. Sa menm swar, i ti annan 20,919,041 dimoun ki ti selebre Memoryal lanmor Zezi. Ler nou vwar tou sa bann keksoz ki pe arive, sa i motiv nou pour reste konsantre lo sa travay pour anons sa bon nouvel Rwayonm.

7. Ki mannyer legzanp Zezi i ed nou reste konsantre?

⁷ En lot fason ki nou kapab reste konsantre lo sa travay predikasyon i ler nou swiv legzanp Zezi. I pa ti les nanryen anpes li anons sa bon nouvel Rwayonm. (Zan 18:37) I pa ti les li ganny tante ler Satan ti ofer li “tou bann rwayonm dan sa lemonn e zot laglwar” e i pa ti les li ganny tante ler bann dimoun ti esey fer li vin lerwa. (Mat. 4:8, 9; Zan 6:15) I pa ti les bann keksoz materyel distrer li e i pa ti les bann dimoun ki opoz li anpes li anons sa bon nouvel. (Lik 9:58; Zan 8:59) Ler nou lafwa i ganny teste, nou kapab reste konsantre si nou mazin konsey zapot Pol. I ti dir bann Kretyen ki zot ti bezwen swiv legzanp Zezi pour zot “pa epwize e abandonnen.”​—Ebr. 12:3.

8. Ki savedir annan pasyans e akoz nou bezwen annan pasyans ozordi?

⁸ Dimoun ki annan pasyans i esper trankilman ziska ki en sityasyon i sanze. Ki swa nou pe esper en move sityasyon sanze oubyen nou pe esper en bon keksoz arive, nou bezwen annan pasyans. Profet Abakouk ti vreman anvi ki vyolans i arete dan lavil Zida. (Aba. 1:2) Bann disip Zezi ti anvi ki Rwayonm Bondye i “vin deswit” e liber zot avek bann Romen. (Lik 19:11) Nou anvi ki Rwayonm Bondye i retir bann move keksoz e etablir en nouvo lemonn avek zis bann dimoun ki obei Bondye. (2 Pyer 3:13) Par kont, nou bezwen annan pasyans e esper Zeova azir. Annou vwar serten fason ki Zeova i montre nou ki mannyer pour annan pasyans.

9. Kwa ki montre ki Zeova i annan pasyans?

⁹ Zeova in kit sa pli bon legzanp lo ki mannyer pour demontre pasyans. I ti donn Noe ase letan pour konstri lars e pour “pres lo ladrwatir.” (2 Pyer 2:5; 1 Pyer 3:20) Zeova ti ekoute anmezir ki Abraam ti kestyonn Li konsernan Son desizyon pour detri bann dimoun ki ti reste dan lavil Sodonm ek Gomor. (Zen. 18:20-33) Pour plizyer syek, Zeova in vreman annan pasyans avek nasyon Izrael ki pa ti fidel avek li. (Nee. 9:30, 31) Nou kapab vwar ki Zeova i annan pasyans parski i donn tou bann ki i atir ver li ase letan pour “arive repantir.” (2 Pyer 3:9; Zan 6:44; 1 Tim. 2:3, 4) Legzanp Zeova i donn nou bon rezon pour annan pasyans anmezir ki nou anons sa bon nouvel e ansennyen. Zeova i osi ansenny nou konsernan annan pasyans atraver en legzanp dan Labib.

10. Ki legzanp sa fermye dan Zak 5:7, 8 i ansenny nou?

 ¹⁰ Lir Zak 5:7, 8. Legzanp sa fermye i ansenny nou ki mannyer pour demontre pasyans. I annan serten plant ki pous vitman. Par kont, laplipar plant, sirtou bann ki raport fri, i pran plis letan pour raporte. An Izrael, i pran apepre sis mwan pour plant pare pour rekolt. Sa fermye i senm lagrenn pandan lotonn apre premye sezon lapli e i rekolte pandan prentan apre dernyen sezon lapli. (Mark 4:28) I ti pou byen si nou demontre pasyans parey sa fermye. Me i pa pou fasil.

11. Ki mannyer ler nou annan pasyans sa pou ed nou dan predikasyon?

¹¹ Konman bann imen enparfe, nou tant pou anvi vwar rezilta nou travay deswit. Me si nou anvi nou plant i pouse e raport fri, nou bezwen kontinyen pran swen avek sa bann plant. Nou bezwen fouye, plante, tir move zerb e aroze. Si nou anvi fer disip, nou osi nou bezwen travay dir. I pran letan pour nou kapab ed bann etidyan Labib aprann pour pa fer lapreferans e pour demontre lanmour pour lezot. Ler nou annan pasyans, sa pou anpes nou dekouraze ler dimoun pa ekout nou. Menm ler dimoun i pare pour ekout nou e aprann, nou ankor bezwen annan pasyans. Nou pa kapab fors en etidyan Labib pour annan lafwa. Parfwa, menm bann disip Zezi pa ti konpran sa ki Zezi ti pe ansennyen. (Zan 14:9) Annou gard antet ki menm si nou plante e aroze, Bondye ki fer pouse.​—1 Kor. 3:6.

12. Ki mannyer nou kapab demontre pasyans ler nou pe anons sa bon nouvel avek bann manm fanmir ki pa Temwen Zeova?

¹² I kapab difisil pour demontre pasyans ler nou anons sa bon nouvel avek bann manm fanmir ki pa Temwen Zeova. Sa prensip ki dan Eklezyast 3:7 i kapab ed nou. Sa verse i dir: “I annan . . . en letan  pour reste trankil e en letan pour koze.” Nou bon kondwit i kapab ed nou fanmir anvi ekout nou mesaz. Me an menm tan, nou devret toultan pare pour koz avek zot lo Zeova. (1 Pyer 3:1, 2) Nou anons sa bon nouvel e ansenny avek devouman, me nou devret toultan demontre pasyans anver tou dimoun enkli bann manm fanmir.

13-14. Ki serten legzanp konsernan demontre pasyans ki nou kapab swiv?

¹³ Nou kapab aprann pour devlop pasyans atraver legzanp bann serviter fidel dan Labib e osi bann dan nou letan. Abakouk ti vreman anvi ki bann move keksoz i arete me i ti montre ki i ti annan pasyans ler i ti dir: “Mon pou reste dan sa pos kot mon pe veye.” (Aba. 2:1, NWT) Zapot Pol ti dir ki i vreman anvi “fini” son minister. Me kantmenm sa, i ti demontre pasyans e kontinyen “rann temwannyaz afon lo sa bon nouvel.”​—Akt 20:24.

¹⁴ Annou vwar legzanp en koup marye ki ti ganny anvoye dan en pei kot napa bokou Temwen Zeova, apre ki zot ti’n asiste Lekol Gilead. Laplipar dimoun dan sa pei pa Kretyen e pa bokou dimoun ki ti anvi etidye Labib. De lot kote, bann frer ek ser ki ti’n asiste Lekol Gilead ansanm avek zot e ki ti pe servi dan lezot pei, ti dir ki zot annan plizyer letid Labib ki ti pe byen progrese. Menm si dan pei kot sa koup ti ete, dimoun pa ti ekoute, sa koup ti kontinyen annan pasyans e zot ti kontinyen zot servis. Apre ki sa koup ti’n anons sa bon nouvel pour wit an dan en landrwa kot pa bokou dimoun ki ti ekoute, zot ti vreman kontan ler enn zot etidyan ti batize. Ki nou aprann avek sa bann legzanp? Sa bann serviter fidel pa ti aret devoue dan zot servis oubyen les zot lanmen repoze e Zeova ti rekonpans zot pour zot pasyans. Alor, annou “imit sa bann ki Bondye ti fer bann promes avek, akoz zot lafwa ek pasyans.”​—Ebr. 6:10-12.

15. Ki en fason lafwa i fer nou pli determinen pour anons sa bon nouvel?

¹⁵ Nou anvi anons sa bon nouvel avek otan dimoun posib parski nou annan lafwa dan sa mesaz. Sa i akoz nou annan konfyans dan bann promes ki dan Labib. (Ps. 119:42, NWT; Iza. 40:8) Nou’n vwar bann profesi Labib ganny akonplir dan nou letan. Nou’n osi vwar lafason ki dimoun in sanz zot lavi ler zot in aplik bann konsey Labib. Tou sa bann keksoz i fer nou pli asire ki sa bon nouvel Rwayonm i en mesaz ki tou dimoun i bezwen tande.

16. Anliny avek Psonm 46:1-3, ki mannyer lafwa dan Zeova ek Zezi i fer nou pli determinen pour anons sa bon nouvel?

¹⁶ Nou osi annan lafwa dan Zeova, sa Enn ki’n donn nou sa mesaz ki nou anonse. Nou osi annan lafwa dan Zezi, sa enn ki Zeova in apwente konman Lerwa dan Son Rwayonm. (Zan 14:1) Nenport keksoz ki arive avek nou, Zeova pou toultan nou refiz ek lafors. (Lir Psonm 46:1-3, NWT.) * Osi, nou annan konfyans ki Zezi i dan lesyel pe servi sa pouvwar ek lotorite ki Zeova in donn li pour diriz sa travay predikasyon.​—Mat. 28:18-20.

17. Donn en legzanp ki montre akoz nou devret kontinyen anons sa bon nouvel.

¹⁷ Lafwa i fer nou pli asire ki Zeova pou  beni nou bann zefor me parfwa Zeova i beni nou dan bann fason ki nou pa pe ekspekte. (Ekle. 11:6, NWT) Par egzanp, toulezour plizyer milye dimoun i vwar nou bann prezantwar. Eski sa i en bon fason pour anons sa bon nouvel? Wi! Dan Nou Minister Rwayonm pour Novanm 2014 i annan leksperyans en zenn fiy ki ti liniversite e ki ti anvi ekri en lartik lo Temwen Zeova. I pa ti kapab trouv en Lasal Rwayonm me kot liniversite i ti vwar en latab ki ti annan nou bann piblikasyon lo la e la i ti osi ganny bann lenformasyon ki i ti bezwen pour son lartik. Pli tar, i ti vin en Temwen Zeova e aprezan i en pionye ordiner. Bann leksperyans koumsa i motiv nou pour kontinyen anons sa bon nouvel akoz i montre ki i ankor annan dimoun ki bezwen konn sa mesaz Rwayonm.

18. Akoz nou kapab asire ki sa travay predikasyon pou fini dan lafason ki Zeova i anvi?

¹⁸ Nou kapab asire ki sa travay predikasyon pou fini zis a tan. Annou vwar sa ki ti arive dan letan Noe. Zeova ti montre ki i toultan fer keksoz dan sa pli bon moman. Apepre 120 an avan Deliz, Zeova ti deside kan ki Deliz ti pou konmanse. Plizyer lannen pli tar, Zeova ti dir Noe konstri lars. Noe ti kontinyen travay dir pour apepre 40 oubyen 50 an avan Deliz i konmanse. Menm si dimoun pa ti ekout li, i ti kontinyen averti zot ziska ki Zeova ti dir ki i ti’n ariv ler pour fer bann zannimo antre dan lars. Apre, dan sa moman ki Zeova ti’n swazir, “[Zeova] ti ferm laport deryer Noe.”​—Zen. 6:3, NWT; 7:1, 2, 16.

19. Si nou pa les nou lanmen repoze, ki nou pou gannyen byento?

¹⁹ Byento, Zeova pou dir nou ki in ler pour aret anons sa bon nouvel Rwayonm. Apre sa, i pou detri lemonn Satan e i pou etablir en nouvo lemonn avek zis bann dimoun ki obei Li. Ziska ki sa i arive, annou swiv legzanp Noe, Abakouk e lezot serviter Zeova ki pa’n les zot lanmen repoze. Annou osi reste konsantre, annan pasyans e gard en lafwa for dan Zeova ek son bann promes.