1. Kan ki i kapab difisil pour servi Zeova?

KAN ki ou krwar i sa letan pli difisil pour servi Zeova? Eski i ler ou pe fer fas avek en kantite problenm oubyen ler ou napa en kantite problenm? I fasil pour nou depan lo Zeova ler nou dan problenm. Me ki nou fer ler nou napa problenm? Eski parfwa nou oubliye ki i vreman enportan pour servi Bondye? Zeova ti averti bann Izraelit ki sa ti kapab arive avek zot.​—Det. 6:10-12.

2. Ki legzanp Lerwa Aza in kite?

² Lerwa Aza i en bon legzanp en zonm ki ti depan lo Zeova konpletman. I ti servi Zeova dan bann letan difisil e osi dan letan kot i ti annan lape. “Pandan tou son lavi, son leker ti senser anver [Zeova].” (1 Rwa. 15:14) En fason ki Aza ti montre ki i ti servi Zeova avek tou son leker, i ler i ti fer arete tou fo ladorasyon Zida. Labib i dir ki “i ti fer disparet bann lotel lezot bondye ek bann landrwa sakre. I ti kraz zot ros pilye e koup zot bann ros sakre.” (2 Kron. 14:3, 5) I ti menm tir son granmanman Maaka, dan sa o pozisyon ki i ti annan konman Larenn Mer. Akoz i ti fer sa? Parski Maaka ti pe ankouraz bann dimoun pour ador zidol.​—1 Rwa. 15:11-13.

3. Ki kestyon nou pou vwar dan sa lartik?

³ Aza pa ti zis detri bann zidol. I ti osi ed bann zabitan Zida pour rekonmans ador Zeova. Zeova ti beni Aza ek bann zabitan Zida e i ti fer ki i ti annan en letan lape. * Pandan renny Aza, “pei ti trankil” pour 10 an. (2 Kron.  14:1, 4, 6) Dan sa lartik, nou pou vwar ki mannyer Aza ti servi sa letan lape. Apre, nou pou vwar legzanp bann Kretyen dan premye syek ki ti servi byen letan lape ki zot ti annan, parey Aza. Finalman, nou pou reponn sa kestyon: Ki mannyer ou kapab servi byen sa letan lape si ou reste dan en pei kot Temwen Zeova i lib pour ador Zeova?

4. Dapre 2 Kronik 14:2, 6, 7, ki mannyer Aza ti servi sa letan lape?

⁴ Lir 2 Kronik 14:2, 6, 7. Aza ti dir bann zabitan Zida ki Zeova ki ti’n “donn [zot] lape, lo tou kote.” Me i pa ti krwar ki sa letan lape ti zis en letan pour rezouir lavi. O kontrer, i ti konmans konstri bann lavil, miray, latour ek baro. I ti dir bann zabitan Zida: “Pei i ankor anba nou kontrol.” Ki Aza ti pe esey dir? I ti pe dir ki zot ti napa okenn lennmi ki ti pou anpes zot al kot zot anvi e konstri dan sa pei ki Zeova ti’n donn zot. I ti ankouraz zot pour profit sa letan lape.

5. Akoz Aza ti ranforsi son larme?

⁵ Aza ti osi servi sa letan lape pour ranforsi son larme. (2 Kron. 14:8) Eski sa ti vedir ki i ti napa konfyans dan Zeova? Non. O kontrer, Aza ti konnen ki i ti son responsabilite konman lerwa pour prepar son pep pour bann problenm ki zot ti kapab rankontre a lavenir. I ti konnen ki sa pei pa ti pou toultan dan lape e sa ti vre.

6. Ki mannyer bann Kretyen dan premye syek ti servi en letan lape?

⁶ Menm si bann Kretyen dan premye syek ti souvandfwa ganny persekite, i ti  annan letan kot zot ti anpe. Ki mannyer bann disip ti servi sa bann letan? Sa bann zonm ek madanm fidel ti anons sa bon nouvel san arete e zot ti konsantre lo servi Zeova. Sa ti fer ki “lakantite disip ti ogmante.” I ti kler ki Zeova ti pe beni sa travay predikasyon ki zot ti pe fer dan sa bann letan lape.​—Akt 9:26-31.

7-8. Ki zapot Pol ek lezot Kretyen ti fer ler zot ti ganny loportinite? Eksplike.

⁷ Bann Kretyen dan premye syek ti sezi tou loportinite pour anons sa bon nouvel. Par egzanp, ler zapot Pol ti realize ki i ti kapab anons sa bon nouvel avek bann dimoun Efez, i ti reste dan sa lavil e anons sa bon nouvel.​—1 Kor. 16:8, 9.

⁸ Lannen 49 Pol ek lezot Kretyen ti ganny en lot loportinite pour anons sa bon nouvel avek bokou dimoun. Sa ti ler bann zapot ek ansyen Zerizalenm ti fer en desizyon final konsernan sirkonsizyon. (Akt 15:23-29) Apre ki bann kongregasyon ti’n ganny enformen konsernan sa desizyon, tou bann disip ti fer bokou zefor pour “anons sa bon nouvel konsernan parol Zeova.” (Akt 15:30-35) Ki ti rezilta? Labib i dir ki “bann kongregasyon ti vin deplizanpli for e lakantite disip ti ogmante zour apre zour.”​—Akt 16:4, 5.

9. Ki mannyer keksoz i ete dan bokou pei e ki nou kapab demann nou lekor?

⁹ Dan bokou pei, nou lib pour anons sa bon nouvel. Eski ou reste dan en pei kot ou lib pour ador Zeova? Si wi, demann ou lekor: ‘Ki mannyer mon pe servi mon liberte?’ Sa bann dernyen zour i vreman eksitan pour pep Zeova parski zot pe partisip dan sa pli gran travay predikasyon ki’n deza ganny fer dan lemonn. (Mark 13:10) I annan bokou keksoz nou kapab fer dan sa travay!

10. Ki 2 Timote 4:2 i ankouraz nou pour fer?

¹⁰ Ki mannyer ou kapab servi sa letan lape ki ou annan? (Lir 2 Timote 4:2.) Akoz ou pa egzamin ou sirkonstans e vwar si ou oubyen en manm ou fanmir i kapab fer plis dan predikasyon oubyen petet pran servis pionye? La i pa sa letan pour esey vin ris parski bann keksoz materyel ki nou annan pa pou al avek nou pandan gran ladetres.​—Prov. 11:4; Mat. 6:31-33; 1 Zan 2:15-17.

11. Ki serten in fer pour ed plis dimoun posib pour tann sa bon nouvel?

¹¹ Bokou proklanmater in aprann en nouvo langaz pour zot kapab ed lezot aprann konn Zeova. Lorganizasyon Zeova in prodwir en kantite keksoz pour ed nou anons sa bon nouvel dan plis langaz. Par egzanp, an 2010 nou bann piblikasyon ti disponib dan apepre 500 langaz. Ozordi, nou bann piblikasyon i disponib dan plis ki 1,000 langaz!

12. Ki byenfe dimoun i gannyen ler zot tann sa mesaz Rwayonm dan zot prop langaz? Donn en legzanp.

¹² Ki mannyer dimoun i santi ler zot tann konsernan Zeova dan zot prop langaz? Annou vwar leksperyans en ser ki ti vreman apresye en lasanble rezyonal ki ti fer Memphis, Tennessee, Leta-z-ini. Sa lasanble ti ganny fer dan langaz Kinyarwanda, en langaz ki dimoun i koze Rwannda, Kongo (Kinshasa) ek Uganda. Apre sa lasanble, sa ser ti dir: “Depi ki mon’n ariv Leta-z-ini 17 an pase, sa i premye fwa ki mon’n kapab  konpran byen sa ki pe ganny dir dan en lasanble.” I kler ki sa ser ti vreman kontan pour tann sa lasanble dan son prop langaz. Si ou sityasyon i permet ou, eski ou kapab aprann en nouvo langaz pour ed serten dimoun dan ou teritwar? Eski i annan dimoun dan ou teritwar ki pou pli pare pour ekout sa mesaz si ou koz avek zot dan zot prop langaz? Ou zefor pou anmenn bon rezilta.

13. Ki mannyer nou ban frer ek ser Larisi ti servi en letan lape?

¹³ Pa tou nou bann frer ek ser ki annan sa liberte pour anons sa bon nouvel. Dan serten pei, gouvernman in met bann restriksyon pour anpes nou bann frer ek ser anons sa bon nouvel. Par egzanp, annou vwar sa ki’n arive avek nou bann frer ek ser Larisi. Pour en kantite lannen zot in ganny persekite e an Mars 1991, gouvernman ti donn zot drwa pour ador Bondye dan en fason lib. Sa letan, i ti annan apepre 16,000 proklanmater Larisi. Ven-t-an pli tar, sa sif ti’n ogmante pour vin plis ki 160,000 proklanmater! I kler ki nou bann frer ek ser ti servi byen sa letan lape ki zot ti annan pour anons sa bon nouvel. Sa letan lape pa ti dire. Menm si keksoz in sanze dan sa pei, sa bann frer ek ser i ankor pe servi Zeova avek devouman. Zot ankor pe fer tou sa ki zot kapab pour fer li.

14-15. Ki mannyer Zeova ti servi son pwisans pour ed Aza?

¹⁴ Sa letan lape pandan renny Aza ti fini. En gran larme Etyopyen ti vin atak Zida. Dan sa larme, i ti annan en milyon solda. Zera, sef sa larme ti asire ki zot ti  pou ranport laviktwar lo Zida. Me Lerwa Aza ti annan konfyans dan Zeova. I ti priye: “Vin sekour nou, [Zeova], Bondye, akoz nou kont lo ou. Nou’n sorti pour lager lo ou non, kont sa gran larme.”​—2 Kron. 14:11.

¹⁵ Larme Etyopyen ti annan apepre de fwa plis solda ki larme Aza me Aza ti konnen ki Zeova ti pwisan e ki I ti kapab ed son pep. Sanmenm ki Zeova ti fer. Zeova ti ed Zida ranport laviktwar lo sa larme Etyopyen.​—2 Kron. 14:8-13.

16. Ki mannyer nou konnen ki sa letan lape ki nou annan pa pou dire?

¹⁶ Nou pa konn egzakteman sa ki pou arive avek sakenn ant nou a lavenir me nou konnen ki sa letan lape ki nou annan konmela, pa pou dire. Rapel ki Zezi ti dir ki dan bann dernyen zour “tou nasyon pou ay” son bann disip. (Mat. 24:9) Pareyman, zapot Pol ti dir ki “tou bann ki oule vin disip Kris Zezi e demontre devosyon pour Bondye dan zot lavi pou osi ganny persekite.” (2 Tim. 3:12) Satan i annan “en gran lakoler” e nou ti pou bet pour krwar ki nou pou kapab sap son lakoler.​—Rev. 12:12.

17. Dan ki fason nou lafwa pou ganny teste?

¹⁷ Byento, nou tou nou lafwa pou ganny teste. I pou annan “en gran ladetres, enn ki pa’n zanmen arive depi konmansman lemonn ziska prezan.” (Mat. 24:21) I kapab ki sa letan nou fanmir i vir lo nou e nou travay i ganny enterdi. (Mat. 10:35, 36) Personnelman, eski ou pou fer parey Aza e annan konfyans ki Zeova pour ed e protez ou?

18. Dapre Ebre 10:38, 39, kwa ki pou ed nou prepar nou pour sa ki pou arive byento?

¹⁸ Zeova pe deza prepar nou pour sa ki pou arive byento. I pe servi “sa lesklav fidel e pridan” pour donn nou “manze dan sa moman apropriye” pour ki nou annan tou sa ki nou bezwen pour reste for. (Mat. 24:45) Me nou tou nou devret fer tou sa ki nou kapab pour annan en lafwa for dan Zeova.​—Lir Ebre 10:38, 39.

19-20. Apre ki nou’n lir 1 Kronik 28:9, ki kestyon nou devret demann nou lekor e akoz?

 ¹⁹ Parey Lerwa Aza, nou bezwen “rod Zeova.” (2 Kron. 14:4, NWT; 15:1, 2) Nou konmans rod Zeova ler nou aprann konsernan li e nou batize. Nou osi fer tou sa ki nou kapab pour ranforsi nou lanmour pour Zeova. Petet nou kapab demann nou lekor: ‘Eski mon asiste renyon regilyerman?’ Ler nou asiste renyon, nou ganny lafors pour kontinyen servi Zeova e nou ganny lankourazman avek nou bann frer ek ser. (Mat. 11:28) Nou osi kapab demann nou lekor: ‘Eski mon etidye Labib regilyerman?’ Si ou reste avek ou fanmir, eski ou fer ladorasyon fanmir tou le semenn? Oubyen eski ou fer ladorasyon fanmir menm si ou reste ou tousel? Osi, eski ou fer ou mye pour partisip dan sa travay predikasyon otan ki posib?

²⁰ Akoz nou devret demann nou lekor sa bann kestyon? Labib i dir nou ki Zeova i egzamin nou panse e sa ki dan nou leker, alor nou osi nou devret fer parey. (Lir 1 Kronik 28:9, NWT.) * Si nou vwar ki nou bezwen fer bann sanzman dan nou lobzektif, nou fason panse oubyen latitid, nou devret demann Zeova pour ed nou fer sa bann sanzman. Nou bezwen prepar nou depi la konmela pour nou kapab fer fas avek bann problenm ki nou pou gannyen a lavenir. Pa les nanryen anpes ou servi byen sa letan lape!