1. Ki en bon lobzektif nou kapab annan anmezir nou vin pli vye?

ANMEZIR nou vin pli vye, i kapab ki nou per ki nou pou nepli itil pour Zeova parey ler nou ti ankor zenn. Menm si nou nepli annan sa lafors ki nou ti annan avan, nou kapab servi sa lasazes ek leksperyans ki nou’n gannyen, pour ansenny bann ki pli zenn pour vin pli itil pour lorganizasyon Zeova e pour aksepte plis responsabilite. En ansyen ti dir: “Ler mon ti nepli kapab fer parey mon ti abitye fer avan akoz mon laz, mon ti kontan ki i ti annan bann zenn frer kalifye pour kontinyen fer sa travay.”

2. Ki nou pou diskite dan sa lartik?

² Dan sa lartik avan, nou ti vwar ki byenfe bann zenn i kapab gannyen ler zot vin zanmi avek bann frer ek ser ki pli aze. Dan sa lartik, nou pou vwar ki mannyer ler bann frer ek ser aze i modes, demontre limilite, rekonesan e zenere, sa i kapab ed zot travay ansanm avek bann ki pli zenn, pour fer ki kongregasyon i ganny beni.

3. Dapre Filipyen 2:3, 4, ki si sa limilite e ki mannyer i kapab ed en Kretyen?

³ Si bann frer ek ser aze i anvi ed bann zenn, zot bezwen annan limilite. En dimoun ki annan limilite i konsider lezot pli siperyer ki li. (Lir Filipyen 2:3, 4.) Bann frer ek ser aze ki annan limilite i realize ki souvandfwa, en keksoz i kapab ganny fer dan diferan fason ki dapre bann prensip Labib e ki sa bann fason fer i marse. Alor zot pa ekspekte ki tou dimoun i fer keksoz parey i ti ganny fer dan lepase. (Ekle. 7:10) Menm si zot annan en kantite leksperyans pour partaz avek bann zenn, zot realize ki “sa lemonn parey i ete pe sanze” e ki zot bezwen aprann bann nouvo fason fer keksoz.​—1 Kor. 7:31.

4. Ki mannyer bann sirveyan rezyonal i demontre menm latitid avek bann Levit?

 ⁴ Bann frer ek ser aze ki annan limilite i rekonnet ki anmezir zot vin pli vye, zot pa kapab fer parey zot ti abitye fer. Pran par egzanp bann sirveyan rezyonal. Ler zot ganny 70 an, zot ganny demande pour konmans en nouvo servis. Sa i kapab difisil pour zot. Zot ti kontan pour ed bann frer ek ser dan bann kongregasyon. Zot ti kontan zot servis e zot ankor anvi fer sa travay. Me zot realize ki i pli byen pour bann zenn frer fer sa travay. Alor zot demontre menm latitid parey bann Levit dan letan pep Izrael, ki ti bezwen aret servi kot tabernak ler zot ti ganny 50 an. Sa bann Levit ti kontan pour fer nenport responsabilite ki zot ti ganny donnen. Zot ti devoue pour fer tou sa ki zot ti kapab e pour ed bann ki pli zenn. (Nom. 8:25, 26, NWT) Ozordi, ler bann sirveyan rezyonal i ganny 70 an, zot vizit mwens kongregasyon ki avan me zot kontinyen ed e ankouraz sa kongregasyon ki zot ladan.

5. Ki ou kapab aprann avek legzanp Dan ek Katie?

⁵ Annou vwar legzanp Dan, ki ti servi konman sirveyan rezyonal pour 23 an. Ler Dan ti ganny 70 an, li ek son madanm Katie ti ganny demande pour fer pionye spesyal. Ki mannyer zot in aziste avek zot nouvo sirkonstans? Dan i  dir ki i pli bizi ki avan. I desarz son bann responsabilite dan kongregasyon, ed bann frer pour kalifye konman serviter kongregasyon e i form lezot pour anons sa bon nouvel dan lavil e dan prizon. Si ou en frer oubyen en ser aze ki dan servis a plen tan oubyen non, ou kapab fer en kantite pour ed lezot. Ki mannyer ou kapab fer sa? Adapte avek ou nouvo sirkonstans, met bann nouvo lobzektif e konsantre lo sa ki ou kapab fer olye lo sa ki ou pa kapab fer.

6. Akoz i saz pour en dimoun vin modes? Donn en legzanp.

⁶ En dimoun ki modes i konn son limit. (Prov. 11:2, NWT) I pa ekspekte fer plis ki sa ki i kapab fer. Sa pou fer ki i pou zwaye e i pou kontinyen travay dir. Nou kapab konpar en dimoun ki modes avek en dimoun ki pe dray en transpor dan montanny. Sa drayver i bezwen sanz son gir pour li kapab kontinyen mont sa montanny. I tre probab ki i pou al pli dousman me i pou kontinyen monte. Pareyman, en dimoun ki modes i konnen kan in ler pour fer bann sanzman e pa fer tro bokou, pour li kapab kontinyen servi Zeova e ed lezot.​—Fili. 4:5.

7. Ki mannyer Barzilay ti montre ki i en dimoun modes?

⁷ Annou vwar legzanp Barzilay. I ti annan 80 an ler Lerwa David ti envit li pour form parti lakour rwayal. Barzilay ti en dimoun modes alor i ti refiz sa plas ki Lerwa ti’n donn li. Barzilay ti konnen ki i pa ti pou kapab fer bokou akoz son laz. Alor i ti sizere ki Kimam ki pli zenn ki li, i al dan son plas. (2 Sam. 19:35-37, NWT) Parey Barzilay, bann frer pli aze i kontan pour donn bann ki pli zenn sa loportinite pour fer bann travay dan kongregasyon.

8. Ki mannyer Lerwa David ti montre ki i en dimoun ki modes ler i ti anvi konstri en lakaz pour Zeova?

⁸ Lerwa David osi ti en dimoun modes e i’n kit en bon legzanp. I ti vreman anvi konstri en lakaz pour Zeova. Me ler Zeova ti dir li ki Salomon ki ti pou fer sa travay, David ti aksepte desizyon Zeova e i ti fer tou sa ki i ti kapab pour ede fer bann preparasyon pour sa konstriksyon. (1 Kron. 17:4; 22:5) David pa ti mazinen ki i ti sa pli bon dimoun pour fer sa travay ki Salomon vi ki Salomon ti “zenn e i [ti] mank leksperyans.” (1 Kron. 29:1) David ti konnen ki sa lakaz ti pou ganny konstrir parski Zeova ti pe beni sa travay, non pa akoz laz oubyen leksperyans sa bann ki ti pe diriz sa travay. Parey David, bann frer ek ser aze ozordi, i kontinyen travay dir dan servis Zeova menm ler zot servis in sanze. Zot konnen ki Zeova pou beni bann zenn ki pe fer sa travay ki zot ti fer avan.

9. Ki mannyer en manm lo en Komite Biro Brans ti montre ki i en dimoun modes?

⁹ Dan nou letan, en frer ki apel Shigeo ti montre ki i en dimoun modes. An 1976, ler i ti annan 30 an, i ti ganny apwente pour servi lo en Komite Biro Brans Temwen Zeova. An 2004, i ti vin kordinater lo sa Komite Biro Brans. Pli tar, i ti realize ki i ti nepli annan lafors parey avan e i ti pran plis letan pour fer en travay. I ti priy konsernan sa sityasyon e reflesir lo akoz i ti pou pli byen pour en frer ki pli zenn vin kordinater. Shigeo nepli kordinater lo sa Komite Biro Brans me i kontinyen travay ansanm avek lezot manm. Legzanp Barzilay,  Lerwa David ek Shigeo i montre ki en dimoun ki annan limilite e ki modes i konsantre lo sa ki bann zenn i deza konnen, olye lo sa ki zot bezwen aprann. I pa pou fer konpetisyon avek zot me i pou vwar zot konman bann koleg travay.​—Prov. 20:29, NWT.

10. Ki mannyer bann frer ek ser aze i vwar bann ki pli zenn dan kongregasyon?

¹⁰ Bann frer ek ser aze i rekonnet ki bann ki pli zenn i bann kado sorti kot Zeova e zot rekonesan pour sa. Anmezir ki zot lafors i diminyen, zot rekonesan ki bann ki pli zenn i pare pour travay pour servi kongregasyon.

11. Ki mannyer Rit 4:13-16 i montre byenfe ki bann frer ek ser aze i gannyen ler zot aksepte led bann ki pli zenn?

¹¹ Dan Labib i annan legzanp en dimoun aze ki ti aksepte led avek en dimoun ki ti pli zenn ki li. Sa i Naomi. Apre ki garson Naomi ti’n mor, i ti ankouraz son bel fiy Rit pour retourn kot son fanmir. Me Rit pa ti anvi kit Naomi e i ti al Betleenm avek li. Naomi ti vreman kontan e i ti aksepte led Rit. (Rit 1:7, 8, 18) Sa ti en bon keksoz pour zot tou le de. (Lir Rit 4:13-16, NWT.) Bann frer ek ser aze ki annan limilite i swiv legzanp Naomi.

12. Ki mannyer zapot Pol ti demontre rekonesans?

¹² Zapot Pol ti rekonesan pour led ki bann frer ek ser ti donn li. Par egzanp, i ti remersye bann Kretyen dan lavil Filip pour bann kado ki zot ti anvoy pour li. (Fili. 4:16) I ti demontre rekonesans pour led ki Timote ti donn li. (Fili. 2:19-22) Pol ti osi remersye Bondye pour bann frer ek ser ki ti vin ankouraz li ler i  ti pe al Ronm konman en prizonnyen. (Akt 28:15) Pol ti en dimoun ki ti annan en kantite lenerzi e i ti vwayaz plizyer milye kilomet pour anons sa bon nouvel e pour ankouraz bann kongregasyon. Me i ti annan limilite e i ti aksepte led ki bann frer ek ser ti donn li.

13. Ki mannyer bann frer ek ser aze i kapab demontre rekonesans pour bann ki pli zenn dan kongregasyon?

¹³ Frer ek ser aze, ou kapab montre ki ou rekonesan pour bann zenn dan kongregasyon dan diferan fason. Si zot annan en transpor e zot anvi anmenn ou kot ou bezwen ale, ed ou fer konmisyon ouswa ed ou pour fer lezot keksoz, aksepte zot led. Rapel ki zot led, i en fason ki Zeova pe montre ki i kontan ou. Ou kapab vin zanmi avek bann ki ed ou. Ou kapab osi ed ou bann zanmi pour vin pli pros avek Zeova e dir zot ki kantite ou kontan ler ou vwar bann zenn pe fer plis pour ed kongregasyon. Pas letan avek zot e rakont zot ou bann leksperyans. Ler ou fer sa, ou pou montre Zeova ki ou rekonesan pour bann zenn ki i’n atir dan kongregasyon.​—Kol. 3:15; Zan 6:44; 1 Tesa. 5:18.

14. Ki mannyer Lerwa David ti demontre zenerozite?

¹⁴ Lerwa David ti demontre en lot kalite enportan ki bann frer ek ser aze i bezwen demontre. Sa i zenerozite. I ti donn en kantite larzan ek bann keksoz ki annan valer pour ede konstri tanp. (1 Kron. 22:11-16, NWT; 29:3, 4, NWT) I ti fer sa, menm si dimoun ti pou apel sa tanp, tanp Salomon. Ler nou nepli annan lafors pour partisip dan bann proze konstriksyon ki pour lorganizasyon Temwen Zeova, nou kapab kontinyen siport sa bann proze par fer bann donasyon dapre nou mwayen. Nou kapab osi ed bann zenn par rakont zot bann leksperyans ki nou’n gannyen pandan bann lannen.

15. Ki sa bann kado presye ki zapot Pol ti donn Timote?

¹⁵ Annou vwar legzanp zapot Pol ki ti demontre zenerozite. Pol ti envit Timote pour akonpanny li dan son bann vwayaz misyonner e Pol ti demontre zenerozite anver Timote par montre li son bann metod predikasyon. (Akt 16:1-3) Pol ti form Timote pour anons byen sa bon nouvel e pour vin en bon ansenyan. (1 Kor. 4:17) Apre sa, Timote ti servi sa ki Pol ti’n ansenny li pour form lezot pour anons sa bon nouvel e ansennyen.

16. Akoz Shigeo ti form lezot?

¹⁶ Bann frer ek ser pli aze ozordi, pa per ki zot pou nepli itil si zot form bann ki pli zenn pour fer sa travay ki zot ti abitye fer dan kongregasyon. Par egzanp, pandan plizyer lannen, Shigeo ki’n ganny mansyonnen pli boner, ti form bann manm Komite Biro Brans ki ti pli zenn. I ti fer sa pour ki i kapab ede dan sa travay predikasyon dan sa pei kot i pe servi. Sa i fer ki ler i ti nepli kapab servi konman kordinater, i ti annan en frer ki ti’n ganny byen formen pour ranplas li. Shigeo in en manm Komite Biro Brans pour plis ki 45 an e i pe kontinyen servi sa ki i’n aprann pour ed bann pli zenn frer. Bann frer parey Shigeo, i vreman en bon led pour pep Bondye!

17. Dapre Lik 6:38, ki bann frer ek ser aze i kapab donn lezot?

¹⁷ Frer ek ser aze, ou leksperyans i montre ki sa pli bon fason viv i pour servi  Zeova avek lafwa ek fidelite. Atraver ou legzanp, ou montre ki i vo lapenn pour nou aprann bann prensip Labib e aplik zot dan nou lavi. Ou konnen ki mannyer keksoz ti ganny fer dan lepase me ou osi vwar ki i neseser pour adapte avek bann nouvo sanzman. Si ou en frer oubyen ser aze ki’n fek batize, ou osi ou kapab ed lezot dan diferan fason. Ou kapab dir zot ki mannyer ler ou’n aprann konn Zeova, sa in fer ou zwaye. Bann ki pli zenn pour kontan pour tann ou bann leksperyans ek bann leson ki ou’n aprann. Si ou servi bann leson ki ou’n aprann dan lavi pour form lezot, Zeova pou beni ou en kantite.​—Lir Lik 6:38.

18. Ki mannyer bann frer ek ser aze ek bann ki pli zenn i kapab ed kanmarad?

¹⁸ Frer ek ser aze, anmezir ki zot vin pli pros avek bann ki pli zenn, zot pou kapab siport kanmarad. (Rom. 1:12) Sakenn i annan en keksoz ki sa lot napa. Bann ki pli aze i annan lasazes ek leksperyans ki zot in gannyen pandan bann lannen ki’n pase. Bann ki pli zenn, i annan lenerzi ek lafors. Ler bann ki pli zenn i travay ansanm avek bann ki pli aze konman zanmi, zot onor nou Papa ki dan lesyel ki kontan nou e zot en benediksyon pour tou bann frer ek ser dan kongregasyon.