1. Ki mannyer en dimoun i santi ler en manm fanmir i ganny ekskli dan kongregasyon?

ESKI en dimoun ki ou kontan in ganny ekskli dan kongregasyon? Sa i kapab fermal. En ser ki apel Hilda, i dir: “Mon msye ti mor apre 41 an maryaz. * Mon ti krwar ki sa i keksoz pli fermal ki mon kapab eksperyanse. Me ler mon garson ti kit kongregasyon, son madanm ek son bann zanfan, sa ti bokou pli fermal pour mwan.”

2-3. Dapre Psonm 78:40, 41, ki mannyer Zeova i santi ler enn son serviter i aret servi li?

² Mazin ki mannyer Zeova ti sagren ler serten lanz ki ti form parti son fanmir ti rezet li! (Zid 6) Mazin osi ki mannyer Zeova ti sagren ler bann Izraelit ki i ti kontan ti rebel kont li plizyer fwa. (Lir Psonm 78:40, 41, NWT.) Ou kapab asire ki nou Papa ki dan lesyel ki kontan ou, i osi sagren ler en dimoun ki ou kontan i aret servi li. I konpran ki mannyer ou pe santi. I pou donn ou sa lankourazman ek sipor ki ou bezwen.

³ Dan sa lartik, nou pou vwar ki nou kapab fer pour ganny led Zeova si en dimoun ki nou kontan in aret servi li. Nou pou osi vwar ki mannyer nou kapab ed bann frer ek ser ki zot fanmir in ganny ekskli dan kongregasyon. Me premyerman, annou vwar serten fason panse ki nou devret evite annan.

4. Ki mannyer en kantite paran i santi ler zot garson ouswa fiy i aret servi Zeova?

⁴ Ler en paran i vwar son garson ouswa fiy i aret servi Zeova, souvan sa paran i mazinen ki i ti’n devret fer plis pour ed son zanfan kontinyen servi Zeova. Apre ki garson en frer ki apel Luke ti’n ganny ekskli dan kongregasyon, Luke ti dir: “Mon ti blanm mon lekor e mon ti menm ganny kosmar. Parfwa mon ti plere e mon leker ti fermal.” En ser ki apel Elizabeth  ki li osi son garson ti’n ganny ekskli dan kongregasyon, ti souvan demann son lekor: “Kot mon’n al mal konman en manman? Mon ti santi ki mon pa’n fer ase pour ansenny mon garson pour kontan Zeova.”

5. Lekel ki responsab ler en dimoun i aret servi Zeova?

⁵ Nou bezwen rapel ki Zeova in donn nou tou sa liberte pour swazir. Sa i vedir ki nou kapab swazir si nou pou obei li ouswa non. I annan serten zenn ki ti napa bann paran ki ti bann bon legzanp me zot in deside pour servi Zeova e zot fidel avek li. I annan lezot ki zot paran in travay dir pour ansenny zot pour kontan Zeova e pli tar zot in aret servi Zeova. Sa i montre ki nou tou nou bezwen deside si nou pou servi Zeova. (Zoz. 24:15) Alor, paran ki sagren akoz ou zanfan in aret servi Zeova, pa bezwen krwar ki sa i ou lafot!

6. Ki mannyer en zanfan i kapab santi ler son paran i aret servi Zeova?

⁶ Parfwa en papa oubyen en manman i aret servi Zeova e i menm kit son fanmir. (Ps. 27:10) Sa i kapab afekte bann zanfan ki annan respe pour zot paran e ki vwar zot paran konman en legzanp pour zot. Esther, ki son papa ti ganny ekskli dan kongregasyon i dir: “Souvan mon ti plere parski mon ti realize ki i pa ti pe zis elwanye avek laverite, i ti’n deside ki i nepli anvi servi Zeova. Mon kontan mon papa alor ler i ti ganny ekskli dan kongregasyon, mon ti toultan enkyet pour li. Mon ti menm ganny panic attacks.”

7. Ki mannyer Zeova i santi anver en zenn ki son paran in ganny ekskli dan kongregasyon?

⁷ Zenn, si ou manman oubyen ou papa in ganny ekskli dan kongregasyon, nou vreman sagren pour ou. Ou kapab asire ki Zeova i konnen ki kantite sa in bles ou. I kontan ou e i kontan ki ou pe kontinyen servi li fidelman. Ou bann frer ek ser dan kongregasyon i kontan ou. Rapel ki pa ou ki responsab pour bann desizyon ki ou paran i fer. Parey in ganny mansyonnen pli boner, Zeova in donn sak dimoun sa liberte pour swazir si zot anvi servi li oubyen non. Sak Kretyen ki’n dedye son lavi avek Zeova e batize, i devret “desarz son prop responsabilite.”​—Gal. 6:5.

8. Ki bann manm fanmir i kapab fer anmezir ki zot pe esper sa dimoun ki zot kontan retourn kot Zeova? (Vwar osi sa bwat “ Retourn kot Zeova.”)

⁸ Ler en dimoun ki ou kontan i aret servi Zeova, i normal pour ou kontinyen annan lespwar ki i pou retourn kot Zeova. Ki ou kapab fer anmezir ou esper li retourn kot Zeova? Fer tou sa ki ou kapab pour gard ou lafwa for. Ler ou fer sa, ou pou kit en bon legzanp pour lezot manm fanmir e petet pour sa enn ki’n ganny ekskli dan kongregasyon. Ou pou osi ganny lafors ki ou bezwen pour fer fas avek ou sagrinasyon. Annou vwar serten keksoz ki ou kapab fer pour gard ou lafwa for.

9. Ki ou kapab fer pour gard ou lafwa for? (Vwar osi sa bwat “ Bann verse ki kapab rekonfort ou si en dimoun ki ou kontan in aret servi Zeova.”)

⁹ Fer tou sa ki ou kapab pour kontinyen gard ou lafwa for. I vreman enportan ki ou kontinyen fer ou lafwa ek lafwa lezot  manm ou fanmir for. Ki mannyer ou kapab fer sa? Si ou kontinyen lir Labib, medit lo la toulezour e osi asiste renyon, Zeova pou donn ou lafors. Joanna, ki son papa ek son ser in kit laverite, i dir: “Ler mon lir konsernan Abigail, Ester, Zob, Zozef ek Zezi dan Labib, mon santi mwan pli kalm. Zot legzanp i ankouraz mwan e ed mwan pour annan en leta lespri pozitif. Nou bann sanson orizinal in osi ankouraz mwan.”

10. Ki mannyer Psonm 32:6-8 i ed ou ler ou enkyet?

¹⁰ Dir Zeova tou sa ki fer ou enkyet. Ler ou enkyet, pa aret priy Zeova. Kontinyen demann nou Bondye ki kontan nou pour ed ou vwar keksoz parey li i vwar e pour ‘fer ou annan bon zizman e pour ansenny ou dan ki semen ou devret ale.’ (Lir Psonm 32:6-8, NWT.) I kapab vreman difisil pour dir Zeova ki mannyer ou vreman santi. Me Zeova i konpran ou soufrans. I kontan ou en kantite e i ankouraz ou pour devid ou leker avek li.​—Egz. 34:6; Ps. 62:7, 8.

11. Dapre Ebre 12:11, akoz nou devret annan konfyans dan lafason ki Zeova i disiplin nou? (Vwar osi sa bwat “ Ler en dimoun i ganny ekskli dan kongregasyon, sa i montre ki Zeova i kontan nou.”)

¹¹ Siport desizyon bann ansyen. Ler en dimoun i ganny ekskli dan kongregasyon, sa i form parti laranzman Zeova. Zeova i disiplin nou avek lanmour e sa i sa pli bon fason pour ed en dimoun ki’n aret servi Zeova e i osi en bon keksoz pour tou lezot dimoun. (Lir Ebre 12:11.) Serten dan kongregasyon i kapab dir ki bann ansyen pa’n pran sa bon desizyon ler zot in ekskli en dimoun dan kongregasyon. Me rapel ki bann dimoun ki dir sa bann keksoz, pa anvi koz lo bann move keksoz ki sa enn ki’n ganny ekskli in fer. Nou napa tou lenformasyon alor annan konfyans ki bann ansyen lo komite disiplin in fer byen atansyon pour  aplik bann prensip Labib e pour ziz ‘pour Zeova.’​—2 Kron. 19:6.

12. Ki bon rezilta ki serten in gannyen ler zot in siport lafason ki Zeova i disiplin nou?

¹² Ler nou siport desizyon bann ansyen pour ekskli en dimoun ki nou kontan, nou kapab ed li pour retourn kot Zeova. Elizabeth, ki’n ganny mansyonnen pli boner, i dir: “I ti vreman difisil pour nou napa okenn kontak avek nou gran garson. Me apre ki i ti’n retourn kot Zeova, i ti dir ki i ti en bon desizyon pour li ganny ekskli dan kongregasyon. Pli tar, i ti dir ki i ti’n aprann en kantite bon leson. Mon ti aprann ki lafason ki Zeova i disiplin nou, i toultan bon.” Son msye Mark i dir: “En pe letan pli tar, nou garson ti dir mwan ki enn bann rezon ki i ti anvi retourn dan kongregasyon i akoz nou ti’n fer egzakteman sa ki nou ti devret fer. Mon vreman kontan ki Zeova in ed nou pour obei li.”

13. Kwa ki kapab ed ou ler ou vreman sagren?

¹³ Koz avek bann zanmi ki konpran lafason ki ou pe santi. (Prov. 12:25, NWT; 17:17, NWT) Pas letan avek bann frer ek ser eksperyanse ki kapab ed ou pa perdi lespwar. Joanna, ki’n ganny mansyonnen pli boner, i dir: “Mon ti santi mwan tousel. Me ler mon ti koz avek bann zanmi ki mon ti annan konfyans ladan, sa ti ed mwan en kantite.” Me ki ou kapab fer si serten dimoun dan kongregasyon i dir ou bann keksoz ki kapab fer ou santi ou pli mal?

14. Akoz nou bezwen “kontinyen siport kanmarad e pardonn kanmarad volonterman”?

¹⁴ Annan pasyans avek ou bann frer ek ser. Nou pa kapab ekspekte ki tou dimoun pou toultan dir sa pli bon keksoz. (Zak 3:2) Nou tou nou enparfe. Alor, pa sirprann ki serten pa konnen ki pour dir oubyen ki san fer par ekspre zot in dir en keksoz ki’n bles ou. Rapel konsey zapot Pol: “Kontinyen siport kanmarad e pardonn kanmarad volonterman menm si en dimoun i annan rezon pour konplent akoz en lot.” (Kol. 3:13) En ser ki enn son fanmir ti ganny ekskli dan kongregasyon i dir: “Zeova in ed mwan pour pardonn bann frer ek ser ki dan pe sey ankouraz mwan, zot in dir keksoz ki’n bles mwan.” Ki kongregasyon i kapab fer pour ed bann frer ek ser ki enn zot fanmir in ganny ekskli dan kongregasyon?

15. Ki nou kapab fer pour ed bann frer ek ser ki enn zot fanmir in fek ganny ekskli dan kongregasyon?

¹⁵ Demontre labonte anver bann frer ek ser ki zot fanmir in ganny ekskli dan kongregasyon. Tret zot dan en fason amikal. En ser ki apel Miriam i dir ki i ti per pour al renyon apre ki son frer ti’n ganny ekskli dan kongregasyon. I dir: “Mon ti per sa ki dimoun ti pou dir me i ti annan en kantite frer ek ser ki ti sagren zot osi konsernan sa ki ti’n arive. Zot pa ti dir okenn keksoz negatif lo mon frer. Sa ti fer ki mon pa ti santi mwan tousel.” En lot ser i dir: “Apre ki  nou garson ti’n ganny ekskli dan kongregasyon, nou bann zanmi ti vin rekonfort nou. Serten ti dir ki zot pa ti konnen ki pou dir. Serten ti plere avek mwan e lezot ti ekri bann let ankourazan. Sa ki zot ti fer, ti ed mwan en kantite.”

16. Ki mannyer kongregasyon i kapab kontinyen rekonfort e ed bann ki enn zot fanmir in ganny ekskli dan kongregasyon?

¹⁶ Kontinyen siport bann frer ek ser ki enn zot fanmir in ganny ekskli dan kongregasyon. Zot bezwen ou lanmour ek lankourazman plis ki oparavan. (Ebr. 10:24, 25) Parfwa bann frer ek ser ki zot manm fanmir in ganny ekskli dan kongregasyon, i’n remarke ki serten dan kongregasyon nepli koz avek zot konmsi zot osi zot in ganny ekskli. Nou pa anvi ki zot santi koumsa! Nou bezwen felisit e ankouraz bann zenn ki ankor la, menm si zot paran in aret servi Zeova. Maria, ki son msye ti ganny ekskli dan kongregasyon e kit zot fanmir, i dir: “Serten mon bann zanmi ti vin kot mwan, kwi manze e ed mwan pour fer ladorasyon fanmir. Zot ti santi mon douler e zot ti plere ansanm avek mwan. Zot ti defann mwan ler dimoun ti fann rimer lo mwan. Zot ti vreman ankouraz mwan!”​—Rom. 12:13, 15.

17. Ki bann ansyen i kapab fer pour rekonfort bann ki sagren?

¹⁷ Ansyen, servi tou loportinite ki ou gannyen pour ankouraz bann frer ek ser ki zot fanmir in ganny ekskli dan kongregasyon. Ou annan en responsabilite spesyal pour rekonfort sa bann frer ek ser. (1 Tesa. 5:14) Pour ankouraz zot, koz avek zot avan e apre renyon. Vizit zot kot zot lakour e priy ansanm avek zot. Travay avek zot dan predikasyon oubyen parfwa envit zot pour fer ladorasyon fanmir avek ou. Bann ansyen i bezwen pran swen avek bann ki sagren e demontre lanmour ek konpasyon anver zot.​—1 Tesa. 2:7, 8.

18. Dapre 2 Pyer 3:9, ki Bondye i anvi bann ki’n aret servi li i fer?

¹⁸ Zeova “pa oule ki personn i ganny detrir, me i oule ki zot tou zot arive repantir.”  (Lir 2 Pyer 3:9.) Menm si en dimoun i komet en pese grav, i ankor presye pour Bondye. Mazin sa pri ki Zeova in peye pour sakenn parmi nou. I ti sakrifye son prop garson pour nou. Parey nou vwar dan sa legzanp ki Zezi ti donnen konsernan garson perdi, avek lanmour Zeova i esey ed bann ki’n aret servi li pour retourn kot li. (Lik 15:11-32) Zeova i anvi ki bann ki’n aret servi li i swazir pour retourn kot li. En kantite dimoun ki’n kit laverite in retourn kot zot Papa ki kontan zot. Bann frer ek ser i vreman kontan pour akey zot. Elizabeth ki’n ganny mansyonnen pli boner ti kontan ler son garson ti revin en Temwen Zeova. I dir: “Mon vreman kontan ki en kantite frer ek ser ti ankouraz nou pour pa perdi lespwar.”

19. Akoz nou kapab kontinyen annan konfyans dan Zeova?

¹⁹ Nou kapab toultan annan konfyans dan Zeova. Son bann konsey pou toultan ed nou. I en Papa ki zenere, ki annan konpasyon e ki kontan bann ki kontan li e ador li. Ou kapab asire ki Zeova pa pou abandonn ou dan ou bann moman difisil. (Ebr. 13:5, 6) Mark, ki’n ganny mansyonnen pli boner, i dir: “Zeova pa ti zanmen abandonn nou. I pou toultan ed nou menm ler nou dan difikilte.” Zeova pou kontinyen donn nou “lafors . . . ki pli pwisan ki nou prop lafors.” (2 Kor. 4:7) Alor, nou kapab reste fidel e annan lespwar menm ler en dimoun ki nou kontan i aret servi Zeova.