LARTIK LETID 40
“Ed bokou pour fer sa ki drwat”
“Bann ki ed bokou pour fer sa ki drwat pou briye parey zetwal pour touzour e touzour.”—DAN. 12:3.
KANTIK 151 I pou kriy zot
SA KI NOU POU ETIDYE a
1. Ki bann keksoz merveye ki pou arive pandan Renny Mil an Kris?
LER rezireksyon i konmanse lo later pandan Renny Mil an Kris, sa pou en zour vreman merveye! Tou bann ki’n perdi en dimoun ki zot kontan dan lanmor, i vreman anvi revwar zot ankor e Zeova osi i santi parey. (Zob 14:15) Imazinen ki mannyer tou dimoun lo later pou zwaye ler bann dimoun ki zot kontan pou resisite. Parey nou’n vwar dan sa lartik avan, bann bon dimoun ki zot non i dan liv lavi pou “ganny resisite pour ganny lavi.” (Akt 24:15; Zan 5:29) I kapab ki en kantite dimoun ki nou kontan pou parmi bann ki pou ganny resisite lo later zis apre Armagedon. b Osi, bann move dimoun, setadir bann ki pa’n ganny sa loportinite pour konn Zeova oubyen pour servi li avan zot mor, pou “ganny resisite pour ganny zize.”
2-3. (a) Dapre Izai 11:9, 10, ki sa pli gran travay lansennyman ki pou ganny fer? (b) Ki nou pou vwar dan sa lartik?
2 Tou bann ki ganny resisite pou bezwen ganny ansennyen. (Iza. 26:9; 61:11) Alor sa pli gran travay lansennyman dan listwar imen pou bezwen ganny fer. (Lir Izai 11:9, 10.) Akoz? Premyerman, bann move dimoun ki ganny resisite pou bezwen aprann konsernan Zezi Kri, Rwayonm Bondye, sakrifis Zezi, lenportans non Zeova e akoz zis Zeova tousel ki annan drwa pour dirize. Menm bann bon dimoun pou bezwen aprann konsernan sa ki Zeova in gradyelman ansenny son pep konsernan son plan pour later. Serten sa bann serviter fidel in mor en kantite letan avan ki Labib i ganny konplete. Bann dimoun bon konman move pou annan en kantite pour aprann.
3 Dan sa lartik, nou pou vwar larepons sa bann kestyon swivan: Ki mannyer sa gran travay lansennyman pou ganny fer? Ki pou arive avek bann dimoun ki reazir byen anver sa travay lansennyman e ki pou arive avek bann ki pa reazir byen? Larepons sa bann kestyon i enportan pour nou ozordi. Parey nou pou vwar, serten profesi dan liv Danyel ek Revelasyon pou ed nou aziste nou konprenezon lo ki pou arive ler bann mor i resisite. Premyerman, annou vwar bann levennman eksitan ki Danyel 12:1, 2 i koz lo la.
“BOKOU KI’N MOR . . . POU LEVE”
4-5. Ki Danyel 12:1 i dir konsernan bann dernyen zour?
4 Lir Danyel 12:1. Liv Danyel i montre nou dan ki lord bann levennman eksitan pou arive pandan bann dernyen zour. Par egzanp, Danyel 12:1 i dir ki Mikael setadir Zezi pou la pour ‘ed pep Bondye.’ Sa parti dan sa profesi ti konmans ganny akonplir an 1914 ler Zezi ti vin Lerwa dan Rwayonm Bondye ki dan lesyel.
5 Danyel ti osi ganny dir ki Zezi ti pou “pran aksyon” pandan “en letan kot i pou annan ladetres ki pa’n zanmen arive depi ki en nasyon i egziste ziska aprezan.” Sa “letan kot i pou annan ladetres” i sanmenm sa “gran ladetres” ki ganny mansyonnen dan Matye 24:21. Zezi pou pran aksyon pour defann pep Bondye a lafen sa letan ladetres setadir pandan Armagedon. Dan liv Revelasyon, pep Bondye i ganny apele gran lafoul e sa liv i dir ki zot “pas atraver sa gran ladetres.”—Rev. 7:9, 14.
6. Ki pou arive apre ki sa gran lafoul i pas atraver gran ladetres? Eksplike. (Vwar osi “Kestyon lekter” konsernan bann ki pou ganny resisite lo later, dan sa Latour Veyer.)
6 Lir Danyel 12:2. Ki pou arive apre ki sa gran lafoul i pas atraver gran ladetres? Oparavan, nou ti krwar ki Danyel 12:2 pe refer avek rezireksyon bann Kretyen swazir pour al dan lesyel oubyen avek sa travay predikasyon ki ti repran lo en pli gran lanpler apre ki bann ki opoz sa travay ti’n pros pour fer li arete an 1918. c Me aprezan nou konpran ki sa bann parol pe refer avek rezireksyon ki pou ganny fer dan nouvo lemonn. Akoz nou dir sa? Dan langaz orizinal ki Labib ti ganny ekrir, sa mo “lapousyer” i ganny servi dan Zob 17:16 e dan Danyel 12:2. I pour sa rezon ki nou kapab dir ki Danyel 12:2 pe refer avek rezireksyon ki pou arive apre bann dernyen zour e apre lager Armagedon.
7. (a) Ki mannyer serten ki pou ganny resisite pou kapab ganny “lavi eternel”? (b) Akoz sa i “en pli meyer rezireksyon”?
7 Ki Danyel 12:2 pe vedir ler i dir ki serten pou ganny resisite pour ganny “lavi eternel”? Sa i vedir ki bann ki ganny resisite e aprann konn Zeova ek Zezi oubyen ki kontinyen aprann konn e obei Zeova ek Zezi pandan sa 1,000 an, pou finalman ganny lavi eternel. (Zan 17:3) Sa pou “en pli meyer rezireksyon” ki bann rezireksyon ki’n arive dan lepase. (Ebr. 11:35) Akoz? Parski sa bann imen ki ti ganny resisite dan lepase ti mor ankor.
8. Ki mannyer serten i ganny resisite pour “ganny laont ek dezoner eternel”?
8 Pa tou bann ki pou ganny resisite ki pou anvi les Zeova ansenny zot. Profesi Danyel i dir ki serten pou ganny resisite pour “ganny laont ek dezoner eternel.” Vi ki zot pou annan en latitid rebel, zot non pa pou ganny ekrir dan liv lavi e zot pa pou ganny lavi eternel. O kontrer, zot pou ganny “dezoner eternel” setadir zot pou ganny detrir konpletman. Alor Danyel 12:2 pe koz lo sa ki pou finalman arive avek tou bann ki resisite. Sa pou baze lo sa ki zot fer apre zot rezireksyon. d (Rev. 20:12) Serten pou ganny lavi eternel e lezot pou ganny detrir.
“ED BOKOU POUR FER SA KI DRWAT”
9-10. Kwa ankor ki pou arive apre gran ladetres e lekel ki “pou briye parey lesyel”?
9 Lir Danyel 12:3. Kwa ankor ki pou arive apre “sa letan kot i pou annan ladetres”? Danyel 12:3 osi i koz lo en keksoz ki pou arive apre gran ladetres.
10 Lekel ki “pou briye parey lesyel”? Matye 13:43 i ed nou pour konnen lekel ler i dir: “Sa letan, bann ki drwat pou briye parey soley dan Rwayonm zot Papa.” Ler Zezi ti dir sa bann parol, i ti pe koz konsernan “bann garson Rwayonm” setadir son bann frer swazir ki pou dirize ansanm avek li dan Rwayonm Bondye dan lesyel. (Mat. 13:38) Alor i bezwen ki Danyel 12:3 pe refer avek bann Kretyen swazir ek sa travay ki zot pou fer pandan Renny Mil an Kris.
Bann Kretyen swazir pou travay ansanm avek Zezi Kri pour diriz sa travay lansennyman ki pou ganny fer lo later pandan sa 1,000 an (Vwar paragraf 11)
11-12. Ki travay sa 144,000 Kretyen swazir pou fer pandan sa renny 1,000 an?
11 Ki mannyer bann Kretyen swazir pou ed “bokou pour fer sa ki drwat”? Bann Kretyen swazir pou travay ansanm avek Zezi Kri pou diriz sa travay lansennyman ki pou ganny fer lo later pandan sa 1,000 an. Sa 144,000 Kretyen swazir pa pou zis dirize konman lerwa me zot pou osi servi konman pret. (Rev. 1:6; 5:10; 20:6) Alor zot pou ede pour anmenn “gerizon [pour] bann nasyon” e pour ed bann imen pour ptitapti vin parfe. (Rev. 22:1, 2; Ezek. 47:12) Bann Kretyen swazir pou vreman kontan pour fer sa!
12 Bann Kretyen swazir pou ed lekel pour fer sa ki drwat? Zot pou ed bann ki ganny resisite, bann ki sirviv Armagedon e osi okenn zanfan ki ne dan nouvo lemonn. A lafen sa 1,000 an, tou dimoun lo later pou’n vin parfe. Alor kan ki zot non pou ganny ekrir dan liv lavi avek lank setadir dan en fason permanan olye avek kreyon?
SA TES FINAL
13-14. Ki tou dimoun parfe lo later pou bezwen fer avan ki zot ganny lavi eternel?
13 Nou bezwen rapel ki en dimoun parfe pa otomatikman ganny lavi eternel. Mazin sa ki ti arive avek Adan ek Ev. Zot ti parfe me zot ti bezwen demontre zot lobeisans anver Zeova avan ki zot ganny lavi eternel. Malerezman, zot pa ti obei li.—Rom. 5:12.
14 Ki mannyer bann imen pou ete a lafen sa 1,000 an? Zot tou zot pou parfe. Eski tou sa bann dimoun ki parfe pou aksepte ki Zeova i diriz zot pour touzour? Ouswa eski serten pou fer parey Adan ek Ev, ki pa ti reste fidel menm si zot ti parfe? Sa bann kestyon pou bezwen ganny reponn me ki mannyer?
15-16. (a) Kan ki tou imen parfe pou ganny loportinite pour demontre zot fidelite anver Zeova? (b) Ki pou arive apre sa tes?
15 Pandan sa 1,000 an, Satan pou ganny anprizonnen. Pandan sa letan, i pa pou kapab anbet personn. Me apre sa 1,000 an, Satan pou ganny large e i pou esey anbet bann imen parfe. Pandan sa tes, tou imen parfe ki lo later pou annan sa loportinite pour montre si zot annan respe pour non Bondye e si zot siport son drwa pour dirize. (Rev. 20:7-10) Sa ki zot fer sa letan pou montre si zot non i devret ganny ekrir dan liv lavi dan en fason permanan.
16 Labib i dir nou ki parey Adan ek Ev, serten dimoun pa pou reste fidel avek Zeova e zot pou rezet son drwa pour dirize. Ki pou arive avek zot? Revelasyon 20:15 i dir nou: “Tou sa ki son non pa ti’n ganny ekrir dan liv lavi ti ganny zete dan lak dife.” Sa bann ki rebele pou ganny detrir konpletman. Me lamazorite dimoun parfe pou pas sa tes final e zot non pou ganny ekrir dan liv lavi dan en fason permanan.
PANDAN “LETAN LAFEN”
17. Ki sa lanz ti dir Danyel pou arive dan nou letan? (Danyel 12:4, 8-10)
17 I vreman eksitan pour mazin lo sa ki pou arive dan lavenir. Me en lanz ti osi dir Danyel serten lenformasyon enportan konsernan nou letan setadir “letan lafen.” (Lir Danyel 12:4, 8-10; 2 Tim. 3:1-5) Sa lanz ti dir Danyel: “Sa vre konnesans pou vin annabondans.” Sa i vedir ki pep Bondye pou konpran pli byen bann profesi ki dan liv Danyel. Sa lanz ti osi dir ki pandan sa letan “bann move dimoun pou fer sa ki mal e i pou napa okenn move dimoun ki pou konpran sa bann keksoz.”
18. Ki pou arive byento avek bann move dimoun?
18 Ozordi i paret ki bann move dimoun pa pe ganny pini pour bann move keksoz ki zot fer. (Mal. 3:14, 15) Byento Zezi pou ziz bann dimoun ki Labib i dekrir konman bann kabri e i pou separ zot avek bann dimoun ki Labib i dekrir konman bann mouton. (Mat. 25:31-33) Sa bann move dimoun pa pou sirviv gran ladetres e zot pa pou ganny resisite pour viv dan nouvo lemonn. Zot non pa pou dan “liv souvenir” ki ganny mansyonnen dan Malaki 3:16.
19. Ki nou devret fer la konmela e akoz? (Malaki 3:16-18)
19 La i sa letan pour montre par sa ki nou fer ki nou pa parmi bann move dimoun. (Lir Malaki 3:16-18.) Zeova pe rasanble bann dimoun ki presye pour li, pour fer zot vin en “pep spesyal.” Sirman, nou anvi parmi sa pep.
Nou pou kontan pour vwar Danyel, bann dimoun ki nou kontan ki’n mor ek lezot dimoun ki pou “leve” pour ganny zot par dan nouvo lemonn! (Vwar paragraf 20)
20. Ki sa dernyen promes Zeova ti fer avek Danyel e akoz ou pe espere pour vwar sa promes ganny akonplir?
20 Nou pe viv dan en letan eksitan. Me byento bann keksoz pli merveye pou arive. Byento, nou pou vwar ler bann move dimoun i ganny detrir. Apre sa, nou pou vwar ler Zeova i akonpli sa promes ki i ti fer avek Danyel. Zeova ti dir: “A lafen, ou pou leve e ou pou ganny ou par.” (Dan. 12:13) Eski ou pe esper sa letan ler Danyel ansanm avek bann dimoun ki ou kontan ki’n mor pou “leve”? Si wi, fer tou sa ki ou kapab pour reste fidel e ou kapab asire ki ou non pou reste dan liv lavi.
KANTIK 80 “Goute e vwar konman Zeova i bon”
a Dan sa lartik, nou pou vwar en azisteman dan lafason ki nou konpran sa ki ganny dir dan Danyel 12:2, 3 konsernan sa pli gran travay lansennyman ki’n deza ganny fer. Nou pou vwar kan ki sa pou arive e lekel ki pou partisip dan sa travay. Nou pou osi vwar ki mannyer sa travay lansennyman pou prepar bann ki lo later pour sa tes final a lafen Renny Mil an Kris.
b I kapab ki bann premye dimoun ki pou ganny resisite i bann ki’n mor fidel pandan bann dernyen zour e apre sa, bann ki’n mor avan zot, pou ganny resisite zenerasyon par zenerasyon. Si sa i leka, sak zenerasyon pou annan sa loportinite pour akeyir bann ki zot in konnen. Nenport fason ki sa pou ganny fer, Labib i dir ki bann ki pou ganny resisite pour al dan lesyel pou ganny resisite dan “lord.” Alor, nou kapab dir ki rezireksyon ki pou ganny fer lo later, pou ganny fer dan lord.—1 Kor. 14:33; 15:23.
c Sa leksplikasyon i en azisteman dan lafason ki nou konpran sa profesi ki ganny eksplike dan liv Pay Attention to Daniel’s Prophecy! sapit 17 e dan The Watchtower le 1 Zilyet 1987, paz 21-25 an Angle.
