Boner dan bann lannen 1940, mon paran ti konmans etidye Labib avek Temwen Zeova. Menm si zot ti aret etidye Labib apre, mon manman ti kontinyen ganny bann kopi Latour Veyer ek Awake! An 1950, mon fanmir ti asiste en lasanble enternasyonal ki ti ganny fer New York City.

Pa bokou letan apre sa, Frer Lawrence Jeffries ti konmans vizit nou. I ti esey ed mwan aprann laverite. O konmansman, mon pa ti dakor avek lefet ki Temwen Zeova pa ti partisip dan bann zafer politik e pa ti antre dan larme. Mon ti dir li ki si tou dimoun Lanmerik ti refize al lager, nou bann lennmi ti pou kapab vin pran kontrol nou pei. Avek pasyans, Frer Jeffries ti dir mwan: “Ki ou krwar Zeova ti pou fer si tou dimoun Lanmerik ti enn son serviter e bann lennmi ti vin atak zot?” Sa bann parol ek lezot keksoz ki i ti dir ti ed mwan vwar ki sa ki mon ti krwar ti mal. Sa ti fer mwan pli anvi aprann laverite ki dan Labib.

Mon ti pas plizyer erdtan pe lir bann vye kopi Latour Veyer ek Awake! ki mon manman ti’n met dan soubasman. Avek letan, mon ti realize ki mon ti pe aprann laverite. Alor, mon ti aksepte pour etidye Labib avek Frer Jeffries. Mon ti osi konmans asiste renyon regilyerman. Mon ti kontan sa ki mon ti pe aprann e mon ti vin en proklanmater sa bon nouvel. Ler mon ti konpran ki “gran zour Zeova i pros,” mon ti sanz mon lobzektif. (Zef. 1:14) Mon ti nepli anvi al liniversite. O kontrer, mon ti anvi ed lezot aprann laverite ki dan Labib.

Mon ti fini segonder le 13 Zen 1956 e trwa zour pli tar, mon ti batize dan en lasanble rezyonal. Mon pa ti konnen ki ler mon ti swazir pour aprann konsernan Zeova e ed lezot pour fer parey, sa ti pou anmenn en kantite benediksyon.

Sis mwan apre mon batenm, mon ti vin en pionye ordiner. Dan Nou Minister Rwayonm pour Desanm 1956 an Angle, i ti annan en lartik ki ti annan pour tit “Can You Serve Where the Need Is Great?” Mon ti kapab fer sa. Mon ti anvi ede dan bann landrwa kot i ti napa bokou proklanmater ki ti pe anons sa bon nouvel.​—Mat. 24:14.

Mon ti al reste Edgefield, South Carolina. I ti annan zis kat proklanmater dan sa kongregasyon e avek mwan i ti fer senk. Nou ti fer renyon dan salon kot en frer. Tou le mwan, mon ti fer 100 erdtan dan predikasyon. Mon ti vreman okipe parski mon ti pe diriz travay predikasyon pour sa kongregasyon e mon ti pe osi fer bann diskour pandan renyon. Anmezir mon ti fer plis pour kongregasyon, mon ti aprann plis keksoz lo Zeova.

Mon ti fer letid Labib avek en madanm ki ti annan en lakaz mor dan lavil Johnston, ki ti en lavil ki pa tro lwen. Sa madanm ti les mwan travay a mitan e i ti les nou fer nou renyon dan en pti batiman ki i ti annan.

Frer Jolly Jeffries, ki garson sa frer ki ti etidye Labib avek mwan, ti kit Brooklyn, New York e i ti vin reste Edgefield. Nou ti fer pionye ansanm e nou ti reste dan en pti karavann, ki en frer ti’n pret nou.

Bann travayer pa ti ganny bokou larzan dan sid Leta-z-ini. Nou ti ganny de oubyen trwa dolar pour en lazournen travay. En fwa, mon ti’n fek fini servi mon dernyen pti larzan pour aste manze dan laboutik. Ler mon ti sorti deor, en zonm ti vin kot mwan e demann mwan: “Ou pe rod louvraz? Mon a pey ou en dolar par erdtan.” Sa msye ti fer mwan netway en sit konstriksyon e sa ti pran trwa zour. I ti kler ki Zeova ti pe ed mwan pour mwan kapab reste Edgefield. Menm si mon ti napa bokou larzan, mon ti kapab al sa lasanble enternasyonal ki ti ganny fer New York City an 1958.

En keksoz spesyal ti arive lo dezyenm zour sa lasanble. Mon ti zwenn en ser ki apel Ruby Wadlington, ki ti pe servi konman pionye ordiner Gallatin, Tennessee. Vi ki nou tou le de nou ti anvi vin misyonner, nou ti asiste sa renyon ki ganny fer pandan lasanble, pour bann ki ti pou kontan asiste Lekol Gilead. Apre lasanble, nou ti konmans ekri let kanmarad. Pli tar, mon ti ganny envite pour fer diskour piblik Gallatin. Ler mon ti laba, mon ti pran sa loportinite pour demann Ruby pour marye avek mwan. Apre sa, mon ti sanz kongregasyon e al dan kongregasyon Ruby e an 1959, nou ti marye.

Ler mon ti annan 23 an, mon ti ganny apwente konman serviter kongregasyon (ki ozordi i kordinater konsey ansyen) dan kongregasyon Gallatin. Charles Thompson ti’n fek vin sirveyan rezyonal ler i ti vizit nou kongregasyon. Menm si i ti annan en kantite leksperyans, i ti demann mwan mon lopinyon lo ki bann frer ek ser i bezwen e ki  mannyer lezot sirveyan rezyonal ti pran swen avek kongregasyon. I ti montre mwan ki i enportan pour demann kestyon e pour rod tou lenformasyon avan fer en desizyon.

An Me 1964, mon ti ganny envite pour asiste Lekol Minister Rwayonm ki ti ganny fer South Lansing, New York. Sa lekol ti dire pour en mwan. Bann formater dan sa lekol ti fer mwan anvi aprann plis lo Zeova e vin pli pros avek li.

An Zanvye 1965, Biro Brans Temwen Zeova ti demann mwan pour vin sirveyan rezyonal e pour vizit bann kongregasyon ansanm avek mon madanm Ruby. Sa premye rezyon ki nou ti vizite ti gran. I ti kouver depi Knoxville, Tennessee ziska pros avek Richmond, Virginia. I ti osi enkli bann kongregasyon dan North Carolina, Kentucky ek West Virginia. Mon ti vizit zis bann kongregasyon kot ti annan bann dimoun nwanr parski dapre lalwa dan sid Leta-z-ini, bann dimoun nwanr pa ti ganny drwa asiste renyon avek bann dimoun blan. Bann frer ek ser ti pov e nou ti aprann pour partaz sa ki nou ti annan avek bann ki ti dan bezwen. En frer ki’n en sirveyan rezyonal pour en kantite letan ti ansenny mwan en leson enportan. I ti dir: “Vin en frer. Ler ou vizit en kongregasyon, pa azir konmsi ou zot sef. Ou kapab ed zot si zot vwar ou konman enn zot frer.”

Ler nou ti pe vizit en pti kongregasyon, Ruby ti konmans en letid Labib avek en zenn madanm ki ti annan en pti fiy enn an. Ler personn pa ti kapab fer sa letid, Ruby ti fer li par let. Lo nou lot vizit, sa madanm ti asiste tou renyon. Ler de ser pionye spesyal ti ganny anvoye dan sa kongregasyon, zot ti kontinyen fer son letid. Apepre 30 an pli tar, an 1995, kot Betel Patterson, en zenn ser ti vin koz avek Ruby. I ti fiy sa madanm ki Ruby ti fer son letid. Sa fiy ek son msye ti pe asiste santyenm Laklas Gilead.

Dezyenm rezyon ki nou ti vizite ti dan sant Florida. Sa letan nou ti bezwen en transpor, alor nou ti reisi aste enn bon marse. Me premye semenn en pyes dan masin ti kase. Nou ti napa larzan pour repare. Mon ti telefonn en frer ki mon ti mazinen i ti pou kapab ed nou. Sa frer ti demann enn son travayer pour repar nou loto. Apre sa, sa frer pa ti oule ki nou peye pour sa travay. I ti zis dir: “Ou pa drwa mwan nanryen.” I ti menm donn nou larzan! Sa ti en bon legzanp lo lafason ki Zeova i pran swen avek son bann serviter. Sa ti fer nou rapel ki nou bezwen demontre zenerozite anver lezot.

Sak fwa nou ti vizit en kongregasyon, nou ti reste kot bann frer ek ser. Sa ti fer ki nou ti fer en kantite bon zanmi. En zour mon ti konmans tip mon rapor konsernan sa kongregasyon e mon ti oubliy li dan typewriter. Ler mon ti retournen son aswar, mon ti ganny dir ki pti garson trwa z-an sa fanmir kot mon ti pe reste, ti’n pez bouton lo typewriter e “ed” mwan fini mon rapor. Mon ti bezwen refer mon rapor. Pour plizyer lannen, mon ti sikann li e fer li mazin sa zour.

An 1971, mon ti ganny en let pour mwan al servi New York konman sirveyan distrik. Nou ti dan sok! Ler nou ti al laba mon ti annan zis 34 an. Mon ti premye sirveyan distrik nwanr ki ti pe vizit sa landrwa e bann frer ek ser ti akey mwan vreman byen.

Konman sirveyan distrik, tou le wikenn mon ti pe ansennyen dan en lasanble rezyonal. Laplipar sirveyan rezyonal ti annan plis leksperyans ki mwan. Enn parmi zot ti’n fer mon diskour batenm. En lot frer ki apel Theodore Jaracz, ti pli tar vin en manm lo Konsey Direkter. Mon ti vreman rekonesan ki bann sirveyan rezyonal ek bann Betelit ti fer mwan santi mon alez. Mon ti vwar pour mwan menm ki zot ti bann bon berze ki ti depan lo Parol Bondye e ki ti siport lorganizasyon Zeova fidelman. Zot limilite ti fer li fasil pour mwan servi konman sirveyan distrik.

An 1974, Konsey Direkter ti swazir en lot group sirveyan rezyonal pour vin sirveyan distrik. Mon ti ganny anvoye pour servi ankor konman sirveyan rezyonal e safwasi mon ti al South Carolina. Sa letan dan sid Leta-z-ini, bann kongregasyon  dimoun nwanr ti kapab zwenn ansanm avek kongregasyon dimoun blan e sa ti fer bann frer ek ser vreman kontan.

Ver lafen 1976, mon ti ganny anvoye dan rezyon Georgia ant Atlanta ek Colombus. Mon rapel byen ler mon ti fer en diskour lanterman pour senk zanfan nwanr ki ti mor apre ki bann dimoun ti met dife par ekspre dan zot lakour. Zot manman ti ganny blese e i ti bezwen reste lopital. En kantite frer ek ser ki swa nwanr oubyen blan ti al lopital pour rekonfort sa bann paran. Mon ti vwar ki bann frer ek ser ti vreman kontan kanmarad. Ler bann serviter Bondye i demontre konpasyon anver kanmarad, zot kapab andir bann sityasyon ki vreman difisil.

An 1977, nou ti ganny demande pour al Betel Brooklyn pour detrwa mwan pour ede avek en proze. Ler sa proze ti pros pour fini, de manm lo Konsey Direkter ti demann mwan si mwan ek Ruby ti pou kontan pour servi dan Betel dan en fason permanan. Nou ti aksepte sa lenvitasyon.

Pour 24 an, mon ti travay dan Departman Servis kot bann frer i souvan bezwen ede rezourd bann kestyon difisil. Pandan bann lannen ki’n pase, Konsey Direkter in donn gidans baze lo bann prensip Labib. Sa in ed Departman Servis pour reponn bann kestyon e sa bann gidans i osi ganny servi pour form bann sirveyan rezyonal, ansyen ek pionye. Sa in ed en kantite frer ek ser pour vin bann Kretyen pli matir ki fer ki lorganizasyon Zeova in vin pli for.

Apartir 1995 ziska 2018, mon ti vizit plizyer Biro Brans partou dan lemonn parski mon ti en reprezantan biro prensipal Temwen Zeova, ki avan ti apel sirveyan zòn. Mon ti zwenn avek bann Komite Biro Brans, bann Betelit e bann misyonner pour ankouraz zot e ed zot avek okenn difikilte ki zot rankontre. An retour, nou de Ruby nou ti ganny ankouraze avek zot bann leksperyans ki zot ti koz lo la avek nou. Par egzanp, lannen 2000 nou ti vizit Rwannda. Nou ti vreman kontan pour tande ki nou bann frer ek ser ek lafanmir Betel, ti’n sirviv sa zenosid an 1994. En kantite parmi zot in perdi bann dimoun ki zot ti kontan. Malgre tou sa ki sa bann frer ek ser ti’n pas ladan zot ti annan lafwa, lespwar e zot ti zwaye.

Aprezan nou annan plis ki 80 an. Pour sa dernyen 20 an, mon’n servi lo Komite Biro Brans Leta-z-ini. Mon pa’n zanmen al liniversite. Me mon’n ganny sa pli bon ledikasyon avek Zeova ek son lorganizasyon. Sa in ed mwan pour kapab ansenny lezot konsernan bann laverite ki dan Labib ki kapab fer zot ganny bann byenfe pour touzour. (2 Kor. 3:5; 2 Tim. 2:2) Mon’n vwar lafason ki mesaz Labib in ed bann dimoun pour amelyor zot fason viv e pour devlop en lanmitye avek zot Kreater. (Zak 4:8) Ler nou ganny en loportinite, nou de Ruby nou kontinyen ankouraz lezot pour apresye sa privilez ki zot annan pour aprann konsernan Zeova e ansenny bann laverite ki dan Labib avek lezot. Sa i sa pli gran privilez ki nou annan konman en serviter Zeova.