1. Ki mannyer nou konnen ki nou kapab annan konfyans dan en dimoun?

 EN DIMOUN diny konfyans i fer zefor pour gard son bann promes e i dir laverite. (Ps. 15:4) Dimoun i konnen ki zot kapab depan lo li. Nou anvi ki nou bann frer ek ser i santi koumsa anver nou. Ki nou kapab fer pour zot annan konfyans dan nou?

2. Ki mannyer nou kapab montre ki nou en dimoun ki diny konfyans?

² Nou pa kapab fors lezot pour annan konfyans dan nou. Nou bezwen montre ki nou diny konfyans. Zis parey i difisil pour ganny larzan, i difisil pour ganny konfyans lezot e zis parey i fasil pour perdi larzan, i fasil pour perdi konfyans lezot. Zeova i merite ki nou annan konfyans dan li. I pa pou zanmen donn nou rezon pour perdi konfyans dan li parski “tou sa ki i fer” i diny konfyans. (Ps. 33:4) I ekspekte ki nou swiv son legzanp. (Efe. 5:1) Annou vwar legzanp serten serviter Zeova ki ti swiv legzanp Zeova e ki ti montre ki zot diny konfyans. Nou pou osi vwar senk kalite ki pou ed nou vin en dimoun ki diny konfyans.

3-4. Ki mannyer profet Danyel ti montre ki i diny konfyans e ki sa i devret motiv nou pour demann nou lekor?

³ Profet Danyel i en bon legzanp en dimoun ki ti diny konfyans. Menm si i ti’n ganny anmennen an egzil Babilonn, i ti montre ki lezot ti kapab depan lo li e ki i ti en zonm diny konfyans. Dimoun ti annan plis konfyans dan li ler Zeova ti ed li pour enterpret rev Neboukadnezar, lerwa Babilonn. En fwa Danyel ti bezwen dir sa lerwa ki Zeova ti ankoler avek li e sa ti en mesaz ki en lerwa pa ti pou anvi tande. I ti demann kouraz pour Danyel fer sa parski Neboukadnezar ti annan en move lakoler. (Dan. 2:12; 4:20-22, 25) Bokou lannen pli tar, Danyel ti montre ankor enn fwa ki i en dimoun ki diny konfyans ler i ti enterpret sa mesaz  ki ti’n aparet lo miray pale Babilonn. (Dan. 5:5, 25-29) Pli tar, Daryis ki ti en Med ek son bann zofisye ti remarke ki Danyel ti annan “bokou lentelizans.” Zot ti dir ki Danyel “ti diny konfyans, i pa ti neglizan e i pa ti fer nanryen ki malonnet.” (Dan. 6:3, 4) Menm bann dirizan ki pa ti ador Zeova ti rekonnet ki zot ti kapab annan konfyans dan sa adorater Zeova!

⁴ Anmezir nou medit lo legzanp Danyel, nou kapab demann nou lekor sa de kestyon: ‘Ki mannyer bann dimoun ki pa Temwen Zeova i vwar mwan? Eski zot vwar mwan konman en dimoun ki desarz mon bann responsabilite e ki zot kapab annan konfyans dan mwan?’ Akoz sa bann kestyon i enportan? Ler nou en dimoun ki diny konfyans, sa i anmenn louanz pour Zeova.

5. Akoz dimoun ti konn Ananya konman en dimoun ki diny konfyans?

⁵ Apre ki Gouverner Neemya ti’n rekonstri miray Zerizalenm an 455 avan Kris, i ti rod bann zonm ki ti diny konfyans pour okip sa lavil. Parmi bann zonm ki Neemya ti swazir, i ti swazir Ananya, sef Landrwa proteksyon. Labib i dir ki Ananya “ti en zonm ki ti diny konfyans e i ti annan en gran respe pour sa vre Bondye plis ki en kantite lezot dimoun.” (Nee. 7:2) Ananya ti kontan Zeova e i pa ti anvi fer bann keksoz ki pa fer Zeova plezir. Sa ti fer Ananya pran o serye nenport responsabilite ki i ti gannyen. Sa lanmour ek gran respe ki nou annan pour Zeova pou ed nou vin en dimoun ki diny konfyans dan servis Zeova.

6. Ki mannyer Tisik ti montre ki i ti en zanmi ki diny konfyans?

 ⁶ Annou vwar legzanp Tisik, en frer ki zapot Pol ti annan konfyans ladan. Ler Pol ti en prizonnyen dan en lakaz, i ti depan lo Tisik e i ti dir ki Tisik i en “serviter fidel.” (Efe. 6:21, 22) Pol ti fer Tisik anmenn let pour bann frer ek ser Efez ek Kolos e i ti osi fer li ankouraz e rekonfort sa bann frer ek ser. Tisik i fer nou rapel bann zonm fidel ozordi ki diny konfyans e ki ed nou pour annan en bon lanmitye avek Zeova.​—Kol. 4:7-9.

7. Ki ou kapab aprann avek bann ansyen ek serviter kongregasyon konsernan vin en dimoun ki diny konfyans?

⁷ Nou rekonesan ki nou annan bann ansyen ek serviter kongregasyon ki diny konfyans. Parey Danyel, Ananya ek Tisik, sa bann frer i pran zot bann responsabilite o serye. Par egzanp, ler nou asiste renyon lasemenn, nou asire ki bann ansyen in fer progranm pour fer sir ki tou bann size i ganny fer. Bann ansyen i apresye ler bann frer ek ser ki ganny en size pour fer pandan renyon, i byen prepare e zot la pour fer sa size. Osi, ler nou envit nou etidyan Labib pour asiste renyon wikenn, nou asire ki i pou annan en frer pour fer diskour piblik. Nou asire ki i pou annan bann piblikasyon ki nou bezwen pour predikasyon. Sa bann frer fidel i pran byen swen avek nou e nou remersye Zeova ki nou annan zot! Me ki mannyer nou kapab montre ki nou diny konfyans?

8. Akoz nou devret rezonnab ler nou pe demontre lentere dan lezot? (Proverb 11:13)

⁸ Nou kontan nou bann frer ek ser e nou anvi konnen ki mannyer zot ete. Me nou bezwen rezonnab e pa enterfer dan zot lavi prive. Serten Kretyen dan premye syek ti “koz an bonnavini e mel dan zafer dimoun, zot [ti] koz lo bann keksoz ki zot pa devret.” (1 Tim. 5:13) Nou pa anvi fer parey zot. Me meton en dimoun i dir nou en keksoz personnel e i demann nou pour pa dir personn. Par egzanp, i kapab ki en ser i dir nou konsernan son problenm lasante ouswa konsernan en lot problenm ki i pe fer fas avek e i demann nou pour pa dir personn. Nou devret fer sa ki i’n demann nou. b (Lir Proverb 11:13.) Aprezan, annou vwar detrwa sityasyon kot i enportan pour nou gard bann lenformasyon konfidansyel.

9. Ki mannyer sak manm fanmir i kapab montre ki zot diny konfyans?

⁹ Dan lafanmir. Sak manm fanmir i annan en responsabilite pour gard serten lenformasyon konsernan lafanmir prive. Par egzanp, i kapab ki en madanm i annan en pti labitid ki fer son msye riye. Eski son msye pou koz lo la avek lezot e fer li anbarase? Non. I kontan son madanm e i pa pou zanmen anvi fer okenn keksoz ki bles santiman son madanm. (Efe. 5:33) Bann adolesan i anvi ganny trete avek respe. I ti pou byen pour bann paran rekonnet sa. Paran pa devret anbaras zot zanfan par dir lezot konsernan bann fot ki zot zanfan i fer. (Kol. 3:21) Bann zanfan i bezwen aprann pour fer atansyon e pa dir lezot bann lenformasyon ki pou anbaras lezot manm fanmir. (Det. 5:16) Ler sak manm fanmir i fer zot mye pour gard bann lenformasyon personnel konsernan lafanmir  prive, sa pou fer sa fanmir vin pli pros avek kanmarad.

10. Ki mannyer en vre zanmi i ete? (Proverb 17:17)

¹⁰ Avek nou bann zanmi. I ariv en moman dan nou lavi, kot nou santi ki nou bezwen koz avek en zanmi pros konsernan ki mannyer nou pe santi. Parfwa i kapab difisil pour fer sa. I kapab difisil pour nou koz lo nou santiman avek lezot e si pli tar nou konnen ki sa zanmi in rakont sa ki nou’n dir li avek lezot, sa pou bles nou santiman. De lot kote, nou rekonesan pour annan en zanmi ki nou konnen i pa pou rakont sa ki nou’n dir li avek lezot. Sa dimoun i “en vre zanmi” pour nou.​—Lir Proverb 17:17.

11. (a) Ki mannyer bann ansyen ek zot madanm i montre ki zot diny konfyans? (b) Ki leson nou kapab aprann avek en ansyen ki pa koz lo bann lenformasyon konfidansyel konsernan kongregasyon avek son fanmir? (Vwar portre.)

¹¹ Dan kongregasyon. En ansyen ki gard bann lenformasyon konfidansyel i ‘parey en landrwa kasyet kont divan e en landrwa maske’ pour son bann frer ek ser. (Iza. 32:2) Nou kapab koz avek bann ansyen lo nenport keksoz parski nou konnen ki sa ki nou dir zot pou reste konfidansyel. Nou pa met presyon lo zot pour dir nou bann keksoz ki devret reste konfidansyel. Nou apresye bann madanm ansyen parski zot pa esey fer zot msye dir zot bann lenformasyon konfidansyel lo lezot. I vreman en bon keksoz ki bann madanm ansyen pa konn lenformasyon personnel lo son bann frer ek ser. Madanm en ansyen ti dir: “Mon apresye ki mon msye pa donn mwan bann lenformasyon konfidansyel konsernan vizit lankourazman ki i al fer oubyen bann frer ek ser ki bezwen led. I pa ni menm dir mwan zot non. Mon kontan ki mon msye pa donn mwan sa bann lenformasyon, pour ki mon pa enkyet konsernan bann problenm ki mon pa kapab rezourd. Sa i fer ki mon alez pour koz avek tou dimoun dan kongregasyon. Ler mon dir mon msye konsernan mon bann santiman  oubyen mon bann problenm, mon annan konfyans ki i pa pou al repet sa ki mon’n dir li.” Byensir, nou tou nou ti ava kontan ki lezot i vwar nou konman en dimoun ki diny konfyans. Ki bann kalite ki pou ed nou vin en dimoun ki diny konfyans? Annou vwar senk kalite.

12. Akoz nou bezwen annan lanmour pour lezot si nou anvi zot annan konfyans dan nou? Donn en legzanp.

¹² Nou bezwen annan lanmour pour lezot si nou anvi ki zot annan konfyans dan nou. Zezi ti dir ki sa de pli gran komannman i pour kontan Zeova e kontan nou prosen. (Mat. 22:37-39) Zeova i diny konfyans e nou lanmour pour li, pou motiv nou pour swiv son legzanp. Par egzanp, lanmour pour nou bann frer ek ser pou fer nou gard zot bann lenformasyon personnel konfidansyel. Nou pa pou zanmen anvi dir en keksoz ki fer zot ditor, anbaras zot ouswa bles zot santiman.​—Zan 15:12.

13. Dan ki fason limilite i ed nou vin en dimoun ki diny konfyans?

¹³ Limilite pou ed nou vin en dimoun ki diny konfyans. En Kretyen ki annan limilite pa pou esey enpresyonn lezot par vin sa premye dimoun pour donn en lenformasyon. (Fili. 2:3) I pa pou esey fer lezot krwar ki i konn lenformasyon konfidansyel ki i pa kapab koz lo la. Ler nou annan limilite nou pa pou donn nou lopinyon personnel avek en kantite dimoun konsernan bann keksoz ki Labib ek nou bann piblikasyon ki baze lo Labib pa koz lo la.

14. Ki mannyer ler nou annan disernman sa pou ed nou vin en dimoun ki diny konfyans?

¹⁴ En Kretyen ki annan disernman pou konnen ‘kan ki i pou reste trankil e kan ki i pou koze.’ (Ekle. 3:7) I annan letan ki i pli bon pour reste trankil olye koze. I pour sa rezon ki Proverb 11:12 i dir: “Sa enn ki annan disernman pou reste trankil.” Annou vwar en legzanp. En ansyen eksperyanse i souvan ganny demande pour ed lezot kongregasyon avek zot bann problenm ki difisil. Remark sa ki en lot ansyen i dir lo li: “I toultan fer atansyon pour pa koz lo bann lenformasyon konfidansyel konsernan lezot kongregasyon.” Vi ki sa ansyen i annan disernman, sa i fer ki lezot ansyen dan son kongregasyon i annan respe pour li. Zot asire ki i pa pou devwal zot bann lenformasyon konfidansyel avek lezot.

15. Donn en legzanp pour montre ki en dimoun onnet i kapab ganny konfyans lezot.

¹⁵ Nou bezwen onnet si nou anvi vin en dimoun ki diny konfyans. Nou annan konfyans dan en dimoun ki onnet parski nou konnen ki i pou toultan koz laverite. (Efe. 4:25; Ebr. 13:18) Par egzanp, meton ou anvi amelyor ou abilite pour ansennyen. Alor ou kapab demann en dimoun pour ekout ou ler ou pe fer ou size pandan renyon pour li kapab donn ou sizesyon lo ki mannyer ou kapab amelyore. Ki kalite dimoun ki ou asire pou donn en konsey ki onnet? Eski i en dimoun ki dir ou sa ki ou anvi tande oubyen en dimoun ki dir ou laverite? Larepons i kler. Labib i dir: “En konsey fran i pli meyer ki en lanmour kasyet. Menm i bles ou, konsey en zanmi i montre ki i fidel.” (Prov. 27:5, 6) Menm si i difisil o konmansman, si nou aksepte sa konsey, avek letan nou pou ganny bann byenfe.

16. Ki mannyer Proverb 10:19 i montre ki nou bezwen annan kontrol lo nou lekor?

¹⁶ I vreman enportan pour annan kontrol lo nou lekor si nou anvi lezot i annan  konfyans dan nou. Ler nou annan kontrol lo nou lekor, sa pou ed nou pour reste trankil ler nou ganny tante pour devwal en keksoz konfidansyel. (Lir Proverb 10:19.) I kapab difisil pour annan kontrol lo nou lekor ler nou pe servi rezo sosyal. Si nou pa fer atansyon, nou kapab devwal bann lenformasyon konfidansyel avek plizyer dimoun san ki nou realize. Enn fwa ki nou anvoy sa lenformasyon lo rezo sosyal, nou pa kapab kontrol lafason ki lezot pou servi sa lenformasyon oubyen ki kantite problenm sa pou anmennen. Ler nou annan kontrol lo nou lekor nou pou reste trankil ler bann ki opoz nou, i esey fer nou devwal bann lenformasyon ki kapab met nou bann frer ek ser an danze. Sa i kapab arive dan bann landrwa kot nou travay in ganny enterdi oubyen restrikte. Lapolis i kapab aret nou e kestyonn nou. Dan bann sityasyon koumsa e dan lezot ankor, nou kapab aplik sa prensip pour “met en bayon avek [nou] labous.” (Ps. 39:1) Nou bezwen vin en dimoun ki diny konfyans pour nou fanmir, nou bann zanmi, nou bann frer ek ser oubyen pour lezot dimoun. Pour nou kapab vin en dimoun ki diny konfyans, nou bezwen annan kontrol lo nou lekor.

17. Ki nou kapab fer pour ede pour ki dan kongregasyon nou tou nou annan konfyans dan kanmarad?

¹⁷ Nou vreman rekonesan ki Zeova in atir nou dan son lorganizasyon parmi bann dimoun ki kontan nou e ki diny konfyans. Nou tou nou annan sa responsabilite pour fer ki nou bann frer ek ser i annan konfyans dan nou. Anmezir ki nou tou nou fer zefor pour demontre lanmour, pour annan limilite, pour annan disernman, pour vin en dimoun onnet e pour annan kontrol lo nou lekor, nou ede pour ki dan kongregasyon nou tou nou annan konfyans dan kanmarad. Nou bezwen kontinyen fer zefor pour montre ki nou en dimoun ki diny konfyans. Annou swiv legzanp nou Bondye e kontinyen montre ki nou en dimoun ki diny konfyans.