1. Akoz nou pa sirprann ki bokou dimoun ozordi i santi ki zot pa kapab annan konfyans dan lezot?

 BANN dimoun dan lemonn Satan pa konnen lekel ki zot kapab annan konfyans ladan. Souvan zot dezapwente avek sa ki bann biznesmenn, politisyen ek bann sef relizye i fer. Zot osi santi koumsa anver zot bann zanmi, vwazen e menm anver zot bann manm fanmir. Sa pa devret sirprann nou parski Labib ti predir ki dan “bann dernyen zour . . . , dimoun . . . pa pou fidel, . . . zot pou malparl lezot, . . . [e] zot pou tret.” Sa i vedir ki dimoun ti pou parey Satan, bondye sa lemonn ki personn pa kapab annan konfyans ladan.​—2 Tim. 3:1-4; 2 Kor. 4:4.

2. (a) Lekel ki nou kapab annan konfyans ladan? (b) Ki kestyon serten i kapab demande?

² Konman Kretyen, nou konnen ki nou kapab met tou nou konfyans dan Zeova. (Zer. 17:7, 8) Nou asire ki i kontan nou e ki i “pa pou zanmen abandonn” son bann zanmi. (Ps. 9:10) Nou kapab osi annan konfyans dan Kris parski in donn son lavi pour nou. (1 Pyer 3:18) Nou’n vwar atraver nou leksperyans ki nou kapab depan lo gidans ki sorti dan Labib. (2 Tim. 3:16, 17) Nou asire ki nou kapab annan konfyans dan Zeova, Zezi e dan Labib. Me petet serten i demande si zot kapab toultan met konfyans dan bann frer ek ser dan kongregasyon. Si wi, akoz nou kapab annan konfyans dan zot?

3. Ki privilez spesyal nou annan? (Mark 10:29, 30)

³ Zeova in swazir nou pour form parti son pep ki partou dan lemonn e nou ador li ansanm konman en fanmir. Sa i en privilez vreman spesyal e i anmenn en kantite byenfe. (Lir Mark 10:29, 30.) Nou annan bann frer ek ser partou dan lemonn ki kontan Zeova parey nou e ki fer zot mye pour viv dapre son bann standar. Nou langaz, kiltir ek fason sanze i diferan avek sa ki pour zot me nou kontan zot menm ler nou zwenn zot  pour premye fwa. Sa ki nou vreman kontan i ler nou ansanm avek zot pour loue e ador nou Papa ki dan lesyel.​—Ps. 133:1.

4. Akoz nou bezwen nou bann frer ek ser?

⁴ Ozordi plis ki zanmen oparavan, nou bezwen reste ini avek nou bann frer ek ser. Parfwa nou bann frer ek ser i ed nou pour fer fas avek nou problenm. (Rom. 15:1; Gal. 6:2) Zot osi ankouraz nou pour reste okipe dan nou servis pour Zeova e pour reste zanmi avek Zeova. (1 Tesa. 5:11; Ebr. 10:23-25) Zis mazinen ki mannyer nou ti pou santi si nou ti napa nou bann frer ek ser pour ed nou reziste nou bann lennmi, setadir Satan ek son move lemonn. Byento Satan ek tou bann ki anba son kontrol pou atak bann serviter Bondye. Me ler sa i arive, nou pou vreman rekonesan ki nou bann frer ek ser pe ed nou!

5. Akoz i difisil pour serten annan konfyans dan bann frer ek ser?

⁵ Me serten i vwar li difisil pour annan konfyans dan nou bann frer ek ser. Petet akoz zot in dir en frer oubyen en ser en keksoz konfidansyel e sa dimoun in al dir lezot. Oubyen sa dimoun pa’n gard en promes ouswa i kapab ki en dimoun dan kongregasyon in dir oubyen fer en keksoz ki’n bles zot santiman. Bann leksperyans koumsa i kapab fer li difisil pour nou annan konfyans dan lezot. Alor, kwa ki kapab ed nou pour devlop konfyans dan nou bann frer ek ser?

6. Ki mannyer lanmour pour nou bann frer ek ser i ed nou pour devlop konfyans dan zot? (1 Korentyen 13:4-8)

⁶ Pour nou kapab annan konfyans dan lezot, nou bezwen kontan zot. Premye Korentyen sapit 13 i koz lo bann fason ki nou demontre lanmour pour lezot e sa i kapab ed nou pour devlop konfyans dan lezot  oubyen pour reganny konfyans dan zot. (Lir 1 Korentyen 13:4-8.) Par egzanp, dan verse 4 i dir ki “lanmour i pasyan e i bon.” Zeova i demontre pasyans anver nou menm ler nou fer pese. Alor nou devret demontre pasyans anver nou bann frer ek ser si zot dir oubyen fer en keksoz ki fer nou ankoler oubyen bles nou santiman. Verse 5 i dir: “[Lanmour] pa ankoler fasilman. I pa gard rankin.” Nou pa pou anvi “gard rankin” kont nou bann frer ek ser setadir gard en rikord bann keksoz mal ki zot in fer. Eklezyast 7:9 i dir ki nou pa devret vin en dimoun ki “ofans vitman.” I ti pou pli byen si nou fer sa ki Efezyen 4:26 i dir nou fer: “Pa reste ankoler ziska soley kouse.”

7. Ki mannyer bann prensip dan Matye 7:1-5 pou ed nou devlop konfyans dan lezot?

⁷ Pour nou kapab devlop plis konfyans dan nou bann frer ek ser, nou bezwen vwar zot parey Zeova i vwar zot. Zeova i kontan zot e i pa gard en rikord lo bann pese ki zot in fer. Nou osi nou devret fer parey. (Ps. 130:3) Olye konsantre lo zot bann defo, nou devret fer nou mye pour vwar zot bann bon kalite e pour mazin lo bann bon keksoz ki zot kapab fer. (Lir Matye 7:1-5.) Vi ki lanmour “i krwar tou,” nou krwar ki nou bann frer ek ser i anvi fer sa ki byen e zot pa zanmen anvi fer keksoz pour bles nou santiman. (1 Kor. 13:7) Sa pa vedir ki Zeova i ekspekte ki nou annan konfyans dan lezot zis koumsanmenm. O kontrer i ekspekte ki nou annan konfyans dan zot parski zot in montre ki zot diny konfyans. b

8. Ki mannyer ou kapab devlop konfyans dan ou bann frer ek ser?

⁸ I pran letan pour devlop konfyans dan bann frer ek ser. Ki mannyer ou fer sa? Aprann konn zot byen. Koz avek zot ler ou vin renyon. Al predikasyon avek zot. Annan pasyans avek zot, donn zot sa loportinite pour zot montre ki ou kapab annan konfyans dan zot. Petet o konmansman, ou pa pou dir ou bann keksoz personnel avek en dimoun ki ou pe aprann konnen. Me anmezir ki ou konn sa dimoun pli byen, petet ou pou pli konfortab pour koz lo ou bann santiman avek li. (Lik 16:10) Me ki ou kapab fer si en frer oubyen en ser i fer en keksoz ki fer ou perdi konfyans dan li? Pa taye pour aret zot lanmitye. O kontrer, les en pe letan pase. Pa les sa ki serten i fer, fer ou aret annan konfyans dan lezot frer ek ser. Annou vwar legzanp serten serviter fidel Zeova ki ti fer sa. Sa bann serviter ti kontinyen annan konfyans dan lezot menm si serten ti dezapwent zot.

9. (a) Ki mannyer Ana ti montre ki i ti annan konfyans dan laranzman Zeova menm si bann ki ti pe reprezant Zeova ti fer fot? (b) Ki leksperyans Ana i montre ou konsernan annan konfyans dan laranzman Zeova? (Vwar portre.)

⁹ Eski en frer ki annan responsabilite dan kongregasyon in dezapwent ou? Si wi, legzanp Ana i kapab ed ou. Dan letan Ana, Granpret Eli ki ti responsab ladorasyon Zeova an Izrael. Me serten son bann manm fanmir pa ti bann bon legzanp. Son bann garson ki ti bann pret ti souvan pe fer bann move keksoz enkli imoralite seksyel e zot papa pa ti fer preski nanryen pour koriz zot. Zeova pa ti tir Eli konman granpret deswit. Menm si Eli ti ankor granpret, Ana pa ti refize pour al kot tabernak pour ador Zeova. Ler Eli ti vwar Ana pe plere dan en gran latristes, i ti krwar ki Ana i sou menm si sa pa ti vre. I ti kritik Ana san rod tou lenformasyon.  (1 Sam. 1:12-16) Kantmenm sa, Ana ti promet ki si i ganny en garson, i pou donn sa garson pour servi kot tabernak e laba, Eli ki pou pran swen avek li. (1 Sam. 1:11) Eski sa sityasyon konsernan bann garson Eli ti bezwen ganny korize? Wi. Dan sa letan ki Zeova ti’n swazir, Zeova ti aranz sa sityasyon. (1 Sam. 4:17) Me antretan, Bondye ti rekonpans Ana e i ti ganny en garson ki i ti apel Samyel.​—1 Sam. 1:17-20.

10. Ki mannyer Lerwa David ti kontinyen met konfyans dan lezot menm si serten dimoun ti’n trai li?

¹⁰ Eski enn ou bon zanmi in trai ou? Si wi, reflesir lo leksperyans Lerwa David. I ti annan en zanmi ki ti apel Aitofel. Me ler Absalonm, garson David ti esey vin lerwa, Aitofel ti zwenn ansanm avek Absalonm pour rebel kont David. I tre probab ki leker David ti fermal parski i ti’n perdi sipor son garson ek sipor en zonm ki i ti konsider konman en zanmi. Kantmenm sa, David pa ti les sa anpes li annan konfyans dan lezot. David ti kontinyen met konfyans dan enn son zanmi ki ti apel Ousay, ki ti refize rebel kot li. David ti annan bann bon rezon pour annan konfyans dan Ousay. Ousay ti montre ki i ti en bon zanmi pour David e i ti menm riske son lavi pour David.​—2 Sam. 17:1-16.

11. Ki mannyer en serviter Nabal ti demontre konfyans?

¹¹ Annou vwar en lot legzanp. Safwasi annou vwar sa ki enn bann serviter Nabal ti fer. David ek son bann zonm ti’n protez bann serviter en Izraelit ki ti apel Nabal e ki ti en zonm ris. En pe letan apre, David ti demann Nabal pour donn li en pe manze pour David kapab donn son bann zonm. David ti pou aksepte nenport kwa ki Nabal ti kapab donn li. Sa ki David ti demann Nabal ti rezonnab. Kantmenm sa, Nabal ti refize donn li en pe manze. Sa ti fer David ankoler e i ti deside pour touy tou zonm dan lakour Nabal. Enn bann serviter ti al dir Abigel, madanm Nabal, sa ki ti pe arive. Vi ki i ti form parti sa lakour, i ti konnen ki Abigel ti kapab sov son lavi. Olye kit sa landrwa pour sov son lavi, i ti annan konfyans ki Abigel ti pou kapab aranz sa sityasyon. I ti annan konfyans dan Abigel parski tou dimoun ti konnen ki Abigel ti en madanm ki saz. Sa ki ti arive apre ti montre ki i ti annan bann  bon rezon pour annan konfyans dan Abigel. Abigel ti annan kouraz ler i ti al koz avek David pour anpes li fer sa ki i ti’n plàn. (1 Sam. 25:2-35) Abigel ti annan konfyans ki David ti pou azir dan en fason ki rezonnab.

12. Ki mannyer Zezi ti demontre konfyans dan son bann disip menm si zot ti fer fot?

¹² Zezi ti annan konfyans dan son bann disip menm si zot ti fer fot. (Zan 15:15, 16) Ler Zak ek Zan ti demann Zezi en pozisyon spesyal dan Rwayonm, Zezi pa ti krwar ki zot ti pe servi Zeova pour bann move rezon oubyen i pa ti tir zot konman bann zapot. (Mark 10:35-40) Pli tar ler Zezi ti ganny arete, tou son bann disip ti abandonn li. (Mat. 26:56) Me Zezi pa ti perdi konfyans dan zot. I ti konnen ki zot enparfe me kantmenm sa, i ti “kontinyen kontan zot ziska lafen.” (Zan 13:1) Apre ki Zezi ti resisite, i ti donn son 11 zapot fidel sa responsabilite enportan pour diriz sa travay predikasyon e pour pran swen avek son bann mouton presye. (Mat. 28:19, 20; Zan 21:15-17) I ti annan bon rezon pour annan konfyans dan sa bann zonm enparfe. Zot tou zot ti desarz zot responsabilite fidelman ziska ler zot ti mor. Ana, David, serviter Nabal, Abigel ek Zezi ti demontre konfyans dan bann imen enparfe e sa i en bon legzanp pour nou.

13. Kwa ki kapab fer li difisil pour annan konfyans dan lezot?

¹³ Eski ou’n deza dir en frer oubyen ser en keksoz konfidansyel e apre ou tande ki i’n al dir sa ki ou’n dir avek en lot? Sa i kapab dekourazan. Annou vwar en legzanp. En fwa en ser ti dir en ansyen en keksoz konfidansyel e i ti krwar ki i pa ti pou dir personn. Me son lannmen, madanm sa ansyen ti telefonn sa ser pour ankouraz li. I ti kler ki sa madanm ti konn sa ki sa ser ti’n dir sa ansyen. Sa ti fer li difisil pour sa ser annan konfyans dan sa ansyen. Me sa ser ti fer en bon keksoz. I ti koz avek en lot ansyen konsernan sa sityasyon. Sa ansyen ti ed sa ser pour reganny konfyans dan bann ansyen.

14. Kwa ki ti ed en frer pour reganny konfyans dan de ansyen?

¹⁴ Annou vwar en lot legzanp. Pour en kantite letan en frer ti ankoler avek de ansyen e sa ti fer li santi ki i pa ti kapab annan konfyans dan zot. Me en frer ki i ti respekte ti dir en keksoz senp ki ti annan en gran lefe lo li. I ti dir: “Satan ki nou lennmi, pa nou bann frer ek ser.” Sa frer ti reflesir lo sa bann parol e i ti reflesir lo ki i devret fer. I ti demann Zeova led e avek letan, i ti kapab fer lape avek sa de ansyen.

15. Akoz i kapab pran letan pour reganny konfyans dan lezot? Donn en legzanp.

¹⁵ Eski ou’n deza perdi en privilez? Sa i kapab fer ou vreman sagren. Grete ek son manman ti de Temwen Zeova fidel ki ti reste Lalmanny dan bann lannen 1930. Sa letan, bann Nazi ki ti pe kontrol Lalmanny e nou travay ti’n ganny enterdi. Grete ti annan sa privilez pour tip bann kopi Latour Veyer pour bann frer ek ser. Me ler bann frer ti konnen ki son papa ti opoz laverite, zot ti retir son privilez parski zot ti per ki son papa ti pou donn bann lenformasyon konsernan kongregasyon avek bann ki opoz laverite. Me sa i pa sel problenm ki Grete ti fer fas avek. Pandan Dezyenm Lager Mondyal, bann frer pa ti oule donn Grete ek son manman kopi bann piblikasyon e bann frer ti refize koz avek zot lo semen. Sa ti sitan bles santiman Grete, ki i ti pran en kantite letan pour li pardonn sa bann frer e pour annan konfyans dan zot ankor. Avek letan, Grete ti rekonnet ki Zeova ti’n bezwen pardonn  sa bann frer, alor li osi i ti bezwen pardonn zot. c

16. Akoz nou pa devret les nanryen anpes nou devlop konfyans dan nou bann frer ek ser?

¹⁶ Si ou’n pas dan en leksperyans ki’n fer ou perdi konfyans dan lezot, fer zefor pour reganny konfyans dan zot. I kapab ki i pou pran letan me ou zefor pou vo lapenn. Pour konpran sa, annou vwar en legzanp. Si nou’n deza malad akoz nou’n manz en manze ki’n gate, laprosenn fwa nou pou vey byen sa ki nou manze. Me sa pa pou anpes nou manze. Pareyman, nou pa devret les en move leksperyans fer nou perdi konfyans dan tou nou bann frer ek ser ki nou konnen i enparfe. Ler nou fer zefor pour reganny konfyans dan bann frer ek ser, nou pou zwaye e sa pou ed nou konpran ki nou bezwen fer pour ede ki tou dimoun dan kongregasyon i annan konfyans dan kanmarad.

17. Akoz i enportan pour nou annan konfyans dan lezot e ki nou pou vwar dan sa lartik ki swiv?

¹⁷ Dan lemonn Satan, i difisil pour trouv dimoun ki diny konfyans. Me nou kapab annan konfyans dan nou bann frer ek ser parski nou kontan zot e zot kontan nou. Sa konfyans ki nou annan dan nou bann frer ek ser i fer nou zwaye e ini la konmela e i pou en proteksyon pour nou ler nou fer fas avek difikilte dan lavenir. Ki ou devret fer si en dimoun in dezapwent ou e ou nepli annan konfyans dan li? Esey vwar keksoz parey Zeova i vwar, aplik bann prensip Labib, devlop plis lanmour pour ou bann frer ek ser e aprann avek bann legzanp ki dan Labib. Menm si nou santiman in ganny blese, nou kapab les pase tousala e reganny konfyans dan lezot. Ler nou fer sa, nou pou annan en kantite zanmi e sa bann zanmi pou “pli pros ki en frer.” (Prov. 18:24) Me i pa ase pour nou annan konfyans dan lezot, lezot osi i bezwen konnen ki zot kapab annan konfyans dan nou. Dan sa lartik ki swiv, nou pou vwar ki mannyer nou kapab montre ki nou bann frer ek ser i kapab annan konfyans dan nou.