Annou vwar ki mannyer Labib i reponn sa bann kestyon.

Akt 24:15 i dir ki “dimoun bon konman move pou resisite.” Sa bann bon dimoun i bann dimoun ki’n obei Bondye avan zot mor e sa i fer ki zot non in ganny ekrir dan liv lavi. (Mal. 3:16) Sa bann ki move i enkli bann ki’n mor avan ki zot ganny loportinite pour aprann konn Zeova e sa i fer ki zot non pa’n ganny ekrir dan liv lavi.

Zan 5:28, 29 i koz lo sa de group ki ganny mansyonnen dan Akt 24:15. Zezi i dir ki “bann ki ti fer sa ki byen pou ganny resisite pour ganny lavi e bann ki ti fer sa ki mal pou ganny resisite pour ganny zize.” Bann bon dimoun i bann ki ti fer sa ki byen avan zot mor. Zot pou resisite pour ganny lavi parski zot non in ganny ekrir dan liv lavi. Me bann move dimoun i bann ki ti fer sa ki mal avan zot mor e zot pou ganny resisite pour ganny zize. Zot non pa ankor ganny ekrir dan liv lavi e pour en peryod letan zot pou ganny zize, setadir en peryod letan kot zot pou lo probasyon. Pandan sa letan, zot pou annan sa loportinite pour aprann konn Zeova pour ki zot non i ganny ekrir dan liv lavi.

Revelasyon 20:12, 13 i eksplike ki tou dimoun ki ganny resisite pou bezwen obei “bann keksoz ki ti’n ganny ekrir dan sa bann roulo,” setadir bann nouvo lalwa ki Bondye pou donn nou dan nouvo lemonn. Bann ki pa obei sa bann nouvo lalwa pou ganny detrir.​—Iza. 65:20.

Danyel 12:2 ti predir ki serten ki’n mor pou resisite pour “ganny lavi eternel e lezot pour ganny laont ek dezoner eternel.” Sa verse pe koz lo sa dernyen zizman ki tou bann ki resisite pou gannyen. Zot pou ganny “lavi eternel” oubyen “dezoner eternel.” Alor a lafen sa 1,000 an, serten pou ganny lavi eternel e lezot pou ganny detrir konpletman.​—Rev. 20:15; 21:3, 4.

Sa ki pou arive avek sa de group ki pou ganny resisite i kapab ganny konpare avek sa ki arive avek bann etranze ki anvi reste dan en lot pei. Bann bon dimoun i parey bann ki ganny en permi travay ouswa en permi pour reste dan en pei. Zot ganny rekonnet e zot annan serten liberte. De lot kote, bann move dimoun i parey bann etranze ki ganny en permi tanporer ouswa en permi pour viziter. Sa bann etranze pou bezwen montre ki zot diny avan ki zot ganny permisyon pour reste dan sa pei. Dan menm fason, bann move dimoun ki ganny resisite pou bezwen obei bann lalwa Zeova e montre ki zot bann bon dimoun pour zot kapab reste dan Paradi. Nenport ki permi sa bann etranze i annan ler zot antre dan pei, avek letan serten i kapab vin sitwayen sa pei tandis ki lezot i kapab ganny deporte. Sa pou depan lo zot latitid ek konportman dan sa pei. Sa dernyen zizman pour tou bann ki’n ganny resisite pou depan lo zot fidelite ek zot konportman dan nouvo lemonn.

Zeova i en Bondye ki demontre konpasyon me i osi en Bondye ki demontre lazistis. (Det. 32:4; Ps. 33:5) I pou demontre son lanmour par resisit dimoun bon konman move. Me i pou ekspekte ki zot tou zot obei son bann standar konsernan sa ki byen ek sa ki mal. Zis bann ki aprann pour kontan li e obei son bann standar ki pou kapab kontinyen viv dan nouvo lemonn.