1-2. Kwa ki fer bann serviter Zeova ere? (Zak 1:22-25)

 ZEOVA ek son Garson i anvi ki nou ere. Ekriven Psonm 119:2 i dir: “Bann ki swiv son bann rapel e ki rod Bondye avek tou zot leker pou ere.” Osi, Zezi ti dir: “Ere sa bann ki tann parol Bondye e obei li!”—Lik 11:28.

² Bann serviter Zeova i bann dimoun ki ere. Akoz? I annan en kantite rezon akoz nou ere. Me en rezon enportan i akoz nou lir Parol Bondye regilyerman e nou fer nou mye pour aplik sa ki nou aprann.—Lir Zak 1:22-25.

3. Ki byenfe nou gannyen ler nou aplik sa ki nou aprann dan Parol Bondye?

³ Ler nou aplik sa ki nou aprann dan Parol Bondye, nou ganny en kantite byenfe. Par egzanp, nou konnen ki sa i fer Bondye plezir e i fer nou ere. (Ekle. 12:13) Anmezir nou aplik sa ki nou aprann dan Parol Bondye, nou amelyor nou lavi fanmir e nou devlop bann bon lanmitye avek bann frer ek ser dan kongregasyon. I tre probab ki ou’n eksperyans sa. An plis ki sa, nou evit en kantite problenm ki bann dimoun ki pa obei Zeova i gannyen. Anfet nou dakor avek sa ki Lerwa David ti dir dan en sanson. Apre ki David ti’n mansyonn lalwa, lord ek zizman Zeova, i ti dir: “Sa enn ki obei zot i ganny en gran rekonpans.”—Ps. 19:7-11.

4. Akoz i pa toultan fasil pour aplik sa ki nou lir dan Parol Bondye?

⁴ I pa toultan fasil pour lir Parol Bondye e aplik sa ki nou aprann. Menm si nou bizi, nou bezwen swazir en letan kot nou pou lir e etidye Labib pour nou kapab konpran sa ki Zeova i anvi nou fer. Alor annou vwar serten sizesyon ki kapab ed nou lir Labib regilyerman. Nou pou  osi vwar kwa ki kapab ed nou pour reflesir lo sa ki nou lir e nou pou vwar bann fason ki nou kapab aplik sa ki nou aprann.

MET LETAN DEKOTE POUR LIR PAROL BONDYE

5. Ki responsabilite nou annan ki fer nou bizi?

⁵ Laplipar serviter Bondye i vreman bizi. Nou pas en kantite letan pe desarz bann responsabilite enportan. Par egzanp, laplipar nou i travay pour pran swen avek nou lekor e avek nou fanmir. (1 Tim. 5:8) En kantite Kretyen i pran swen avek bann manm fanmir ki malad oubyen aze. An plis ki sa, nou tou nou bezwen pran swen avek nou prop lasante e sa i pran letan. Apard sa bann responsabilite, nou annan lezot responsabilite dan kongregasyon. Enn bann responsabilite enportan ki nou annan i pour donn nou meyer dan sa travay predikasyon. Avek tou sa responsabilite ki ou annan, ki mannyer ou kapab trouv letan pour lir Labib regilyerman, medit lo sa ki ou lir e aplik sa ki ou aprann?

6. Ki mannyer ou kapab fer ou lektir Labib vin en priyorite? (Vwar portre.)

⁶ Konman bann Kretyen, enn bann keksoz “pli enportan” ki nou bezwen fer i pour lir Labib. Alor nou bezwen fer sir ki nou lektir Labib i vin en priyorite. (Fili. 1:10) Sa premye Psonm i dir sa konsernan en dimoun ki ere: “I pran plezir dan lalwa Zeova e i lir Son lalwa avwabas lizour konman aswar.” (Ps. 1:1, 2) I kler alor ki nou bezwen fer letan pour li Labib. Me kan ki i sa pli bon moman pour lir Labib? Larepons i kapab diferan pour sak dimoun. Sa ki enportan i ki nou swazir en letan kot nou pou kapab lir Labib regilyerman. En frer ki apel Victor i dir: “Mon kontan lir Labib dan bomaten. Menm si mon pa kontan lev boner, sa i sa letan kot i napa bokou keksoz pour distrer mwan. Mon alert e i pli fasil pour mwan konsantre.” Eski sa i  leka pour ou? Demann ou lekor, ‘Kan ki i sa pli bon letan pour mwan lir Labib?’

REFLESIR LO SA KI OU LIR

7-8. Kwa ki kapab anpes nou ganny bann byenfe avek sa ki nou lir? Donn en legzanp.

⁷ Meton ou’n met letan dekote e ou lir Labib regilyerman. I annan en keksoz ki ou bezwen fer atansyon. Eski i’n ariv ou kot ou’n lir en keksoz e pa bokou letan apre ou pa rapel sa ki ou’n lir? Sa i arive avek nou tou. Malerezman, sa i kapab arive ler nou lir Labib. Petet nou met en lobzektif pour lir plizyer sapit Labib sak zour. Sa i en bon lobzektif pour annan. Nou devret met bann lobzektif e fer zefor pour atenn sa bann lobzektif. (1 Kor. 9:26) I byen pour konmans lir Labib me sa i zis en konmansman. Nou bezwen fer plis ki sa si nou anvi ganny bann byenfe avek Parol Bondye.

⁸ Annou vwar en legzanp. Bann plant i bezwen delo pour viv. Me si tro bokou lapli i tonbe dan en ptigin letan, later pa pou kapab abzorb tou sa delo. Si lapli i kontinyen tonbe, sa pa pou anmenn okenn byenfe pour bann plant. I pli bon ler lapli i tonm dousman parski later i kapab ganny letan pour abzorb sa delo e sa pou ed bann plant pouse. Pareyman nou devret evite lir Labib sitan vit ki nou pa ganny letan pour reflesir, rapel e aplik sa ki nou’n lir.—Zak 1:24.

9. Ki nou devret fer si nou annan labitid lir Labib tro vit?

⁹ Eski parfwa ou santi ki ou pe lir Labib tro vitman? Si wi, ki ou devret? Lir pli dousman. Fer zefor pour reflesir lo sa ki ou lir pandan ki ou pe lir e apre ki ou’n fini lir. Sa pa en keksoz difisil pour fer. Petet ou kapab pas plis letan pour etidye Labib pour ou kapab medite. Oubyen ou kapab swazir pour lir mwens verse e servi sa letan ki reste pour reflesir lo sa ki ou’n lir. Victor, ki’n ganny mansyonnen pli boner i dir: “Mon gard mon lektir Labib kourt. Mon lir petet zis en sapit. Vi ki mon lir Labib dan bomaten,  pandan lazournen mon kapab reflesir lo sa ki mon’n lir.” Ou kapab swazir ki kantite ou pou lir. Me i enportan ki ou lir ase dousman pour ki ou kapab reflesir lo sa ki ou pe lir.—Ps. 119:97; vwar sa bwat “ Bann kestyon ou kapab reflesir lo la.”

10. Ki mannyer ou kapab aplik sa ki ou pe lir? Donn en legzanp. (1 Tesalonisyen 5:17, 18)

¹⁰ Nenport ler ki ou lir Labib e nenport kantite letan ki ou pase pour lir Labib, reflesir lo ki mannyer ou kapab aplik sa ki ou pe lir. Anmezir ki ou lir en porsyon dan Parol Bondye, demann ou lekor: “Ki mannyer mon kapab aplik sa lenformasyon la konmela oubyen dan lavenir?” Annou vwar en legzanp. Meton ou’n lir 1 Tesalonisyen 5:17, 18. (Lir.) Apre ki ou’n lir sa de verse, ou kapab pran letan pour reflesir lo lakantite fwa ki ou priye e lo si ou lapriyer i profon. Ou osi kapab mazin lo serten rezon akoz ou rekonesan anver Zeova. Petet sa i fer ou deside pour remersye Zeova pour trwa keksoz spesifik. Menm si ou pas en ptigin letan pour reflesir lo sa ki ou lir dan Labib, sa pou ed ou pour konpran Parol Bondye e pour fer sa ki i dir. Mazin sa kantite byenfe ki ou pou gannyen si ou fer sa toulezour avek lezot porsyon Labib ki ou lir. Sa pou fer ki avek letan, ou pou vin en pli bon serviter Zeova. Me ki ou devret fer si i paret ki i annan en kantite keksoz pour ou amelyore?

MET BANN LOBZEKTIF KI REZONNAB

11. Akoz parfwa ou kapab santi ou dekouraze avek ou lektir Labib? Donn en legzanp.

¹¹ Ler ou lir Labib, parfwa ou kapab santi ou dekouraze parski ou realize ki i annan en kantite keksoz ki ou bezwen amelyore. Annou vwar en legzanp. Meton ozordi ou pe lir Labib e ou vwar sa konsey konsernan pa fer lapreferans. (Zak 2:1-8) Ou vwar ki ou kapab amelyore dan lafason ki ou tret lezot. Alor ou deside pour fer serten sanzman e sa i byen. Son lannmen ou lir en resi ki montre ki i enportan pour vey sa ki ou dir. (Zak 3:1-12) Ou realize ki parfwa ou dir bann parol blesan oubyen bann parol ki dekourazan. Alor ou deside ki ou pou dir bann parol ankourazan avek lezot. Dan ou lektir Labib son zour apre, ou lir ki ou pa devret vin zanmi avek lemonn. (Zak 4:4-12) Ou remarke ki ou bezwen fer plis atansyon konsernan sa ki ou lir, gete e ekoute. Ver son katriyenm zour, ou kapab santi ki i annan en kantite keksoz pour ou travay lo la e sa i kapab fer ou dekouraze.

12. Akoz ou pa devret dekouraze si ler ou lir Labib, ou realize ki ou bezwen fer serten sanzman? (Vwar not.)

 ¹² Si ou realize ki i annan plizyer keksoz ki ou bezwen amelyore oubyen ki i annan bann sanzman ki ou bezwen fer, pa bezwen dekouraze. Sa i montre ki ou en dimoun ki annan limilite e ki ou annan sa bon motivasyon. En dimoun ki annan limilite e ki onnet avek son lekor, i lir Labib avek sa lobzektif pour vwar kote i bezwen amelyore. a Osi gard antet ki nou bezwen kontinyen devlop “sa nouvo personnalite.” (Kol. 3:10; vwar sa not letid “is being made new” dan nwtsty.) Kwa ki pou ed nou pour kontinyen aplik sa ki nou aprann dan Parol Bondye?

13. Ki en bon fason ki ou kapab aplik sa ki ou lir? (Vwar portre.)

¹³ Olye esey aplik tou sa ki ou lir en sel kou, ou kapab esey aplik zis enn oubyen de keksoz alafwa. (Prov. 11:2) Ou kapab esey fer sa: Fer en lalis bann keksoz ki ou bezwen travay lo la e swazir enn oubyen de parmi sa bann keksoz pour ou fer premye. Ou kapab travay lo sa bann lezot keksoz pli tar. Me lo kwa ki ou devret travay lo la premye?

14. Ki premye lobzektif ou kapab annan?

¹⁴ Ou kapab deside pour travay lo en keksoz ki pli fasil pour ou fer. Oubyen ou kapab swazir pour travay lo en keksoz ki ou santi ou pli bezwen amelyore. Ler ou fini deside ki ou anvi travay lo la, ou kapab fer resers dan nou bann piblikasyon. Petet ou kapab servi Watch Tower Publications Index oubyen Liv resers  pour Temwen Zeova. Koz avek Zeova dan lapriyer konsernan sa lobzektif e demann Zeova pour donn ou “sa dezir ek lafors pour azir.” (Fili. 2:13) Apre sa, esey aplik sa ki ou’n aprann. Ler ou vwar ki ou’n reisi atenn ou premye lobzektif, i tre probab ki sa pou motiv ou pour fer zefor pour atenn en lot lobzektif. Anfet, ler ou reisi fer en sanzman oubyen ou reisi devlop en bon kalite, sa pou ankouraz ou pour kontinyen fer sanzman e i tre probab ki i pou vin pli fasil pour ou fer lezot sanzman.

LES PAROL BONDYE “AZIR” DAN OU

15. Ki mannyer pep Zeova i diferan avek serten dimoun ki zot osi zot lir Labib? (1 Tesalonisyen 2:13)

¹⁵ Serten dimoun i dir ki zot in lir Labib plizyer fwa. Me eski zot vreman krwar sa ki Labib i ansennyen? Eski zot in esey aplik sa ki zot in aprann e les Labib annan en lefe dan zot lavi? Malerezman laplipar dimoun pa fer sa. Me pep Zeova i diferan avek zot. Parey bann Kretyen dan premye syek, nou aksepte Labib “konman parol Bondye parey i vreman ete.” Osi, nou fer tou sa ki nou kapab pour aplik bann konsey ki dan Labib.—Lir 1 Tesalonisyen 2:13.

16. Kwa ki kapab ed nou pour aplik sa ki nou aprann dan Parol Bondye?

¹⁶ I pa toultan fasil pour lir e aplik Parol Bondye. I kapab ki nou vwar li difisil pour trouv letan pour lir. Oubyen i kapab ki nou lir Labib tro vit e nou pa pran letan pour reflesir lo sa ki nou lir. Osi, i kapab ki nou dekouraze akoz i annan en kantite sanzman ki nou bezwen fer. Nenport difikilte ki ou annan, ou kapab sirmont li avek led Zeova. Annou determinen pour aksepte led Zeova e pa vin en dimoun ki oubliye apre ki i’n ekoute. O konter annou vin en dimoun ki met an pratik sa ki nou aprann dan Parol Bondye. Nou kapab asire ki pli nou lir Parol Bondye e nou met li an pratik dan nou lavi, pli nou pou ere.—Zak 1:25.