1-2. (a) Ki ti pe arive Zide ler Pol ti ekri sa let pour bann Ebre? (b) Akoz sa let ti vin dan sa bon moman?

 APRE lanmor Zezi, bann Kretyen Ebre ki ti reste Zerizalenm ek Zide ti pas dan en kantite difikilte. Pa bokou letan apre ki kongregasyon Kretyen ti’n ganny formen, bann Kretyen ti sibir en gran persekisyon. (Akt 8:1) Apepre 20 an pli tar, bann disip Kris ti fer fas avek bann gro problenm ekonomik, ki tre probab ti arive akoz lafamin. (Akt 11:27-30) Ver lannen 61, i ti annan en serten letan kot bann Kretyen ti anpe e kot zot pa ti sitan ganny persekite parey zot ti pou gannyen dan lavenir. Pandan sa peryod letan, Zeova ti enspir zapot Pol pour ekri zot en let. Dan sa let, i ti annan bann konsey ki sa bann Kretyen ti bezwen pour prepar zot pour sa ki ti pou arive byento.

² Sa let ki zapot Pol ti ekri pour bann Kretyen Ebre, ti vin dan sa bon moman parski sa lape ki sa bann Kretyen ti pe eksperyanse pa ti pou dire. Pol ti donn sa bann Kretyen konsey ki ti pou ed zot fer fas avek bann problenm ki zot ti pou pas ladan byento. Byento, Zerizalenm ti pou ganny detrir parey Zezi ti’n predir. (Lik 21:20) Byensir, Pol ek bann Kretyen Zide pa ti konnen kan sa destriksyon ti pou arive. Me sa bann Kretyen ti kapab servi sa letan ki ti reste pour prepar zot par devlop plis lafwa ek landirans.—Ebr. 10:25; 12:1, 2.

3. Akoz bann Kretyen dan nou letan i devret enterese avek sa ki’n ganny ekrir dan sa let pour bann Ebre?

³ Byento, nou pou pas dan en gran ladetres, enn ki pli difisil ki bann Kretyen Ebre ti pas ladan. (Mat. 24:21; Rev. 16:14, 16) Alor annou vwar serten konsey ki Zeova ti donn sa bann Kretyen ki kapab ed nou osi.

 “FER ZEFOR POUR VIN BANN DIMOUN MATIR”

4. Ki problenm bann Zwif ki ti’n vin Kretyen ti fer fas avek? (Vwar portre.)

⁴ Bann Zwif ki ti’n vin Kretyen ti bezwen fer bann gran sanzman e sa pa ti fasil. Oparavan, bann Zwif ti sa pep ki Zeova ti’n swazir. Pour en kantite lannen, Zerizalenm ti en landrwa ki ti vreman enportan. Sa lerwa ki ti reprezant Zeova ti baze Zerizalenm e si dimoun ti anvi ador Zeova, zot ti fer li dan tanp Zerizalenm. Tou bann Zwif fidel ti swiv Lalwa Moiz ek bann lareg ki zot bann sef larelizyon ti ansenny zot. Sa bann lareg ti annan pour fer avek sa ki zot ti kapab manze, sirkonsizyon e lafason ki zot ti devret tret bann dimoun ki pa ti Zwif. Me apre lanmor Zezi, Zeova ti nepli aksepte bann sakrifis ki bann Zwif ti fer. Alor bann Zwif ki ti’n vin Kretyen, ti bezwen sanz lafason ki zot ti ador Zeova e sa pa ti fasil pour zot. (Ebr. 10:1, 4, 10) Menm bann Kretyen matir paret zapot Pyer, ti vwar li difisil pour fer serten sa bann sanzman. (Akt 10:9-14; Gal. 2:11-14) Vi ki sa bann Zwif ti’n vin bann Kretyen aprezan, bann sef larelizyon Zwif ti persekit zot.

5. Ki bann Kretyen ti bezwen fer atansyon?

⁵ Bann Kretyen Ebre ti ganny opoze dan de fason. Vi ki zot ti’n vin Kretyen, bann sef larelizyon Zwif ti tret zot konman bann aposta. Osi, serten dan kongregasyon ti ensiste ki bann Kretyen i devret kontinyen swiv serten keksoz dan Lalwa Moiz e petet zot ti fer sa pour zot pa ganny persekite. (Gal. 6:12) Kwa ki ti pou ed sa bann Kretyen pour reste fidel avek Zeova?

6. Ki Pol ti ankouraz bann frer ek ser pour fer? (Ebre 5:14–6:1)

⁶ Dan sa let ki Pol ti ekri pour bann Kretyen Ebre, i ti ankouraz bann frer ek ser pour etidye Parol Bondye pli o profon. (Lir Ebre 5:14–6:1.) Pol ti servi Lekritir Ebre pour eksplik zot rezon akoz lafason ki bann Kretyen i ador Zeova i pli siperyer ki lafason ki bann Zwif ti pe  ador Zeova. a Pol ti konnen ki si sa bann Kretyen i ganny plis konnesans e zot konpran pli byen laverite, sa pou ed zot kapab idantifye e rezet bann fo rezonnman.

7. Ki difikilte nou fer fas avek ozordi?

⁷ Ozordi, nou osi fer fas avek bann dimoun ki partaz bann lenformasyon oubyen rezonnman ki pa annakor avek bann standar Zeova. Serten dimoun i opoz nou akoz nou obei bann lord dan Labib konsernan sèks. I kler ki fason panse bann dimoun dan lemonn pe vin deplizanpli diferan avek fason panse Zeova. (Prov. 17:15) Alor, i vreman enportan ki nou rekonnet e rezet sa kalite fason panse. Osi, nou pa devret les okenn dimoun ki opoz nou fer nou perdi kouraz e aret servi Zeova.—Ebr. 13:9.

8. Ki mannyer nou kapab kontinyen fer zefor pour vin bann dimoun matir?

⁸ I ti pou byen ki nou aplik sa konsey ki Pol ti donn bann Kretyen Ebre e fer zefor pour vin bann dimoun matir. Sa i vedir ki nou bezwen etidye Labib o profon pour nou kapab konn Zeova ek son fason panse pli byen. Nou bezwen kontinyen fer sa, menm apre ki nou’n dedye nou lavi avek Zeova e batize. Nenport ki kantite letan nou dan laverite, nou tou nou bezwen lir e etidye Parol Bondye regilyerman. (Ps. 1:2) Si nou annan en bon progranm letid personnel, sa pou ed nou pour annan plis lafwa, ki en kalite ki Pol ti dir bann Kretyen Ebre zot bezwen annan.—Ebr. 11:1, 6.

“ANNAN LAFWA KI SOV NOU LAVI”

9. Akoz bann Kretyen Ebre ti bezwen annan lafwa for?

⁹ Bann Kretyen Ebre ti pou bezwen annan lafwa for pour fer fas avek sa ki ti pou arive Zide byento. (Ebr. 10:37-39) Zezi ti’n dir son bann disip ki ler zot ti vwar ki bann larme in antour Zerizalenm, zot ti pou bezwen sov dan montanny. Sa konsey ti aplik pour tou Kretyen ki swa zot ti reste dan lavil oubyen dan lakanpanny. (Lik 21:20-24) Sa letan, ler en larme ti vin atake, bann dimoun ki ti reste dan lakanpanny ti al dan en lavil parski miray sa lavil ti kapab vin en proteksyon pour zot. Si zot ti sov dan montanny, sa ti pou paret bet alor zot ti bezwen annan bokou lafwa pour obei Zezi.

10. Ki bann Kretyen Ebre ti pou bezwen fer? (Ebre 13:17)

¹⁰ Bann Kretyen Ebre ti pou osi bezwen annan konfyans dan bann dimoun ki Zezi ti pe servi pour diriz kongregasyon. I tre probab ki bann ki ti pe diriz kongregasyon ti donn bann lenstriksyon spesifik konsernan kan ki bann frer ek ser ti pou bezwen sov dan montanny e ki mannyer zot ti pou fer sa. (Lir Ebre 13:17.) Sa mo Grek ki’n ganny tradwir “obei” dan Ebre 13:17 i montre ki zapot Pol ti pe dir bann frer ek ser ki zot devret obei bann ansyen akoz zot annan konfyans dan sa bann frer e pa zis akoz zot bezwen obei bann ki’n ganny apwente pour diriz kongregasyon. Alor bann Kretyen Ebre ti bezwen devlop konfyans dan bann ki pe dirize dan kongregasyon avan sa ladetres i arive. Si pandan letan ki bann Kretyen ti anpe, zot ti obei bann lenstriksyon ki zot ti gannyen avek bann ki ti pe diriz kongregasyon, sa ti pou fer li pli fasil pour zot obei  bann lenstriksyon dan bann moman ki pli difisil.

11. Akoz i enportan pour bann Kretyen ozordi annan en lafwa for?

¹¹ Ozordi, nou osi nou bezwen annan lafwa parey bann Kretyen Ebre. Nou pe viv dan en letan kot laplipar dimoun i rezet sa ki Labib i dir konsernan lafen sa move lemonn e zot menm sikann nou akoz nou krwar ladan. (2 Pyer 3:3, 4) Osi, menm si Labib i donn serten lenformasyon konsernan sa ki pou arive pandan gran ladetres, i annan en kantite keksoz ki nou pa konnen. Nou bezwen annan en lafwa for e annan konfyans ki Zeova in fini deside kan lafen sa move lemonn pou vini e ki Zeova pou pran swen avek nou pandan sa letan difisil.—Aba. 2:3.

12. Kwa ki pou ed nou pour sirviv pandan gran ladetres?

¹² Nou bezwen osi devlop plis lafwa dan sa mwayen ki Zeova pe servi pour gid nou ozordi, setadir “sa lesklav fidel e pridan.” (Mat. 24:45) Ler larme Romen ti anserkle Zerizalenm, i kapab ki bann Kretyen Ebre ti ganny bann lenstriksyon spesifik. Dan menm fason, i kapab ki ler gran ladetres i konmanse, nou ganny bann lenstriksyon spesifik ki pou sov nou lavi. Alor, i vreman enportan ki depi la konmela, nou devlop plis konfyans dan bann ki pe dirize dan lorganizasyon Zeova. Si depi konmela nou vwar li difisil pour swiv lenstriksyon bann ki pe dirize dan lorganizasyon Zeova, pandan gran ladetres i pou pli difisil pour obei bann lenstriksyon ki nou gannyen.

13. Akoz bann Kretyen Ebre ti bezwen sa konsey dan Ebre 13:5?

¹³ Anmezir ki bann Kretyen Ebre ti pe esper sa letan kot zot ti pou bezwen sove, zot ti osi bezwen kontinyen annan en lavi senp e fer sir ki zot “pa kontan larzan.” (Lir Ebre 13:5.) Serten parmi zot ti’n viv dan bann letan kot i ti annan lafamin ek lapovrete. (Ebr. 10:32-34) Menm si oparavan zot ti pare pour andir bann difikilte pour sa bon nouvel, i kapab ki serten ti’n konmans konsantre lo ganny plis larzan pour protez zot kont danze oubyen lapovrete. Me larzan pa ti pou sov zot lavi ler Zerizalenm ti ganny detrir. (Zak 5:3) Anfet, i kapab ki bann ki ti kontan keksoz materyel ti pou vwar li difisil pour sove e kit zot lakour ek keksoz materyel deryer.

14. Si nou annan en lafwa for, ki bann desizyon ki nou pou fer la konmela konsernan bann keksoz materyel?

¹⁴ Si nou annan en lafwa for e nou annan konfyans ki byento Zeova pou detri sa move lemonn, nou pa pou krwar ki pour annan plis larzan ek keksoz materyel i sa keksoz pli enportan. Pandan gran ladetres, larzan pou napa okenn valer. Labib i dir ki bann dimoun pou “zet zot larzan dan bann semen” parski zot pou realize ki “ni zot larzan, ni zot lor pa pou kapab sov zot zour gran lakoler Zeova i arive.” (Ezek. 7:19) Olye konsantre lo fer maksimonm larzan ki nou kapab, nou bezwen fer bann desizyon ki pou ed nou viv en lavi senp e an menm tan pran swen avek nou lekor, nou fanmir e pour servi Zeova. I ti pou bet pour nou fer bann det ki pa neseser oubyen pas en kantite nou letan pe pran swen avek bann keksoz materyel. Nou osi fer atansyon ki bann keksoz materyel ki nou annan pa vin sa keksoz pli enportan dan nou lavi. (Mat. 6:19, 24) Anmezir lafen sa move lemonn i aprose, nou pou bezwen swazir  si nou pou met konfyans dan Zeova oubyen dan bann keksoz materyel ki nou annan.

“ZOT BEZWEN LANDIRANS”

15. Akoz bann Kretyen ti sirtou bezwen landirans?

¹⁵ Bann Kretyen Ebre ti pou bezwen andire dan zot servis pour Zeova anmezir ki lavi dan Zide ti vin pli difisil. (Ebr. 10:36) Menm si serten Kretyen Ebre ti fer fas avek en gran persekisyon dan lepase, en kantite ti’n vin Kretyen pandan en letan kot i ti napa bokou persekisyon. Pol ti dir zot ki menm si dan lepase zot ti’n fer fas avek persekisyon, ziska aprezan zot pa ti’n soufer parey Zezi in soufer, setadir ziska lanmor. (Ebr. 12:4) Me en kantite dimoun ti pe vin Kretyen e sa ti fer en kantite Zwif ankoler e vyolan. Zis detrwa lannen pli boner, en lafoul ti atak Pol ler i ti pe fer predikasyon Zerizalenm. Plis ki 40 Zwif ti “fer serman ki zot pa ti pou manze oubyen bwar tan ki zot pa touy Pol, si non zot [ti] pou ganny en malediksyon.” (Akt 22:22; 23:12-14) Menm si dimoun ti pou ay zot e persekit zot, sa bann Kretyen ti bezwen kontinyen zwenn ansanm pour ador Zeova, anons sa bon nouvel e gard zot lafwa for.

16. Ki mannyer sa let pour bann Ebre i kapab ed nou pour annan sa bon pwennvi lo persekisyon? (Ebre 12:7)

¹⁶ Kwa ki ti pou ed bann Kretyen Ebre pour andire ler dimoun i opoz zot? Pol ti anvi ed bann Kretyen vwar bann byenfe ki zot gannyen ler zot andire. I ti eksplike ki Bondye i kapab les son bann serviter pas dan difikilte e sa i kapab vin en formasyon pour zot. (Lir Ebre 12:7.) Bann formasyon koumsa i kapab ed en Kretyen pour devlop e demontre bann kalite ki fer Bondye plezir. Ler bann Kretyen Ebre ti konsantre lo bann bon keksoz ki arive ler zot pas dan bann problenm, sa ti fer li pli fasil pour zot andire.—Ebr. 12:11.

17. Ki Pol ti’n aprann konsernan andire ler ou pe ganny persekite?

 ¹⁷ Pol ti ankouraz bann Kretyen Ebre pour demontre kouraz e andire ler zot pas dan problenm. Pol ti dan sa pli bon pozisyon pour donn zot sa konsey. Vi ki oparavan i ti persekit bann Kretyen, i ti konnen ki i ti kapab arive avek zot. I ti osi konnen ki mannyer pour andir persekisyon. Apre tou, apre ki i ti’n vin en Kretyen, i ti ganny persekite dan diferan fason. (2 Kor. 11:23-25) Alor Pol ti konn tre byen ki en dimoun i bezwen fer pour li andire. I ti fer sa bann Kretyen rapel ki ler zot fer fas avek problenm, zot ti bezwen depan lo Zeova e pa lo zot lekor. Pol ti kapab dir avek kouraz: “Zeova i mon led, mon pa pou per.”—Ebr. 13:6.

18. Ki pou arive avek tou serviter Zeova dan lavenir e ki nou bezwen fer la konmela?

¹⁸ Ozordi, i annan serten nou bann frer ek ser ki pe fer fas avek persekisyon e zot pe andire. En fason ki nou kapab montre ki nou kontan zot i par priy pour zot e parfwa nou kapab ed zot dan bann fason pratik. (Ebr. 10:33) Par kont, Labib i dir ki “tou bann ki oule vin disip Kris Zezi e demontre devosyon pour Bondye dan zot lavi pou osi ganny persekite.” (2 Tim. 3:12) I pour sa rezon ki nou tou nou bezwen prepar nou pour sa ki pou arive byento. Nou bezwen kontinyen met tou nou konfyans dan Zeova la konmela e annan konfyans ki i pou ed nou andir okenn difikilte ki nou kapab gannyen. Dan sa moman apropriye, Zeova pou soulaz tou son bann serviter fidel.—2 Tesa. 1:7, 8. 

19. Ki nou devret fer pour prepar nou pour gran ladetres? (Vwar portre.)

¹⁹ Nou kapab asire ki sa let ki zapot Pol ti ekri pour bann Kretyen Ebre ti ed zot pour prepare pour bann problenm ki zot ti pou fer fas avek. Pol ti ankouraz son bann frer ek ser pour etidye Parol Bondye o profon e pour konpran Parol Bondye. Ler zot ti pou fer sa, sa ti pou ed zot pour rekonnet e rezet bann fo lansennyman ki kapab afebli zot lafwa. I ti ankouraz zot pour devlop plis lafwa pour ki zot vitman swiv lenstriksyon Zezi ek bann ki pe dirize dan kongregasyon. I ti ed bann Kretyen pour andire par ed zot pour annan en bon pwennvi konsernan zot bann problenm e pour vwar zot bann problenm konman en loportinite pour ganny formen par zot Papa ki kontan zot. Nou osi nou bezwen aplik sa konsey ki sorti dan Labib. Sa pou ed nou andire e reste fidel ziska lafen.—Ebr. 3:14.