1. Ki serten problenm nou bezwen andire, me akoz Zeova i pran plezir dan son bann serviter fidel? (Vwar portre o konmansman sa lartik.)

DAN sa lemonn, lavi pa fasil. Par egzanp, bokou frer ek ser pe soufer avek bann maladi grav. Lezot ki deza aze, pe bezwen pran swen avek zot manm fanmir pli aze. I annan lezot ki pe lite pour donn zot fanmir sa ki zot bezwen lo plan materyel. Nou osi konnen ki bokou parmi zot pa pe fer fas avek zis enn sa bann problenm, me avek plizyer sa bann problenm an menm tan. Sa i demann bokou letan, lenerzi ek larzan. Kantmenm sa, ou san poursan asire ki Zeova pou ed ou. Ou konnen ki keksoz pou amelyore parski sanmenm sa ki i’n promet. Pa ou lafwa i vreman fer Zeova plezir!

2. Ki mannyer Izai 40:29 i ankouraz nou, me ki gro fot nou ti kapab fer?

² Me par ler, eski ou santi ki ou bann problenm i tro difisil pour andire? Si ou santi koumsa, ou pa tousel. Dan lepase, serten serviter fidel Bondye ti osi santi parey. (1 Lerwa 19:4; Zob 7:7) Kwa ki ti ed zot pour kontinyen  andire? Zot ti depan lo Zeova pour ganny lafors. Labib i dir ki Bondye “i donn lafors sa enn ki fatige.” (Izai 40:29) Me malerezman, serten parmi pep Bondye ozordi i santi ki si zot aret servi Zeova pour en pe letan, sa i sa pli bon fason pour andir zot bann problenm. Zot santi ki servi Zeova i en fardo plito ki en benediksyon. Alor zot aret lir Labib, aret al renyon e aret al prese. Sa i egzakteman sa ki Satan pe swete zot fer.

3. (a) Ki mannyer nou kapab anpes Satan fer nou vin feb spirityelman? (b) Ki nou pou diskite dan sa lartik?

³ Dyab pa anvi ki nou reste for e i konnen ki nou vin pli for ler nou vreman okipe dan servis Zeova. Alor, ler ou santi ou epwize fizikman e emosyonnelman, pa elwanny ou avek Zeova. Vin pli pros avek li. Labib i dir: “I pou fer zot ferm, i pou fer zot for.” (1 Pyer 5:10; Zak 4:8) Dan sa lartik, nou pou aprann lo abilite ki Zeova i annan pour fortifye nou par diskit lo Izai 40:26-31. Apre, nou pou diskit lo de sityasyon ki kapab fer nou fer mwens dan nou servis pour Zeova e nou pou aprann ki mannyer ler nou aplik bann prensip Labib, sa i kapab ed nou pour andire.

4. Ki leson nou kapab aprann avek Izai 40:26?

⁴ Lir Izai 40:26. Personn pa’n kapab kont tou bann zetwal ki dan liniver. Bann syantis i krwar ki i kapab annan 400 bilyon zetwal dan zis nou galaksi. Kantmenm sa, Zeova in donn sak zetwal en non. Ki sa i ansenny nou lo Zeova? Si i annan en lentere personnel dan bann zetwal ki pa vivan, zis mazinen ki mannyer i santi anver ou! Ou pa servi li akoz ou oblize, me akoz ou kontan li. (Psonm 19:1, 3, 14) Nou Papa i konn tou keksoz lo ou. Labib i dir ki “i menm konnen konbyen bren seve i annan lo zot latet.” (Matye 10:30) Zeova i oule nou konnen ki “i konn lavi bann dimoun ki kondwir zot byen.” (Psonm 37:18) I kler ki Zeova i vwar tou problenm ki ou annan e i kapab donn ou lafors ki ou bezwen pour andir sak sa bann problenm.

5. Ki mannyer nou kapab asire ki Zeova i annan sa abilite pour fortifye nou?

⁵ Lir Izai 40:28. Zeova i Sours tou lenerzi. Par egzanp, zis mazin sa kantite lenerzi ki i donn nou soley. En ekriven lasyans ki apel David Bodanis ti dir ki sak segonn soley i prodwir menm kantite lenerzi ki plizyer bilyon bonm atomik i prodwir ler zot eksploze. En lot serser in kalkile ki sa kantite lenerzi ki soley i prodwir dan zis en segonn i ase pour donn tou dimoun lo later lenerzi pour 200,000 lannen! Nou kapab asire ki Zeova, sa enn ki donn soley lenerzi, i kapab donn nou sa lafors ki nou bezwen pour andir nou bann problenm.

6. Dan ki sans i fasil pour anmenn zoug Zezi e ki lefe sa i annan lo nou?

 ⁶ Lir Izai 40:29. Nou ganny bokou lazwa dan nou servis pour Zeova. Zezi ti dir son bann disip: “Pran mon zoug lo zot zepol.” I ti osi azoute: “Zot pou reganny lafors. Parski i fasil pour anmenn mon zoug e sa ki mon demann zot pour anmennen i pa lour.” (Matye 11:28-30, not) Pa sa i vre! Parfwa, nou kapab santi nou epwize ler nou kit lakour pour al renyon ouswa pour al prese. Me ki mannyer nou santi ler nou retourn kot nou? Nou santi ki nou’n reganny lafors e pli pare pour fer fas avek nou bann problenm. Vreman, i fasil pour anmenn zoug Zezi.

7. Donn en leksperyans ki montre ki Matye 11:28-30 i vre.

⁷ Annou vwar leksperyans enn nou bann ser. I ganny en maladi ki fer li toultan fatige (chronic fatigue syndrome), i ganny depresyon ek latet fermal. Alor parfwa i vwar li difisil pour al renyon. Par kont, en zour, apre ki i ti’n fer bokou zefor pour asiste en renyon, i ti ekri: “Sa diskour ti lo dekourazman. Sa lenformasyon ti telman ganny prezante dan en fason ki montre ki lezot i konpran e enterese avek nou santiman, ki mon ti konmans plere. Sa ti fer mwan rapel ki mon bezwen asiste bann renyon.” Sa ser ti byen kontan ki i ti’n fer zefor pour asiste renyon!

8, 9. Ki Pol ti oule dir ler i ti ekri: “Ler mon feb, lanmenm ler ki mon for”?

⁸ Lir Izai 40:30. I kapab ki nou annan plizyer abilite, me i annan en limit lo sa ki nou kapab fer avek nou prop lafors. Sa i en leson ki nou tou nou bezwen aprann. Zapot Pol ti kapab fer bokou keksoz, me i pa ti kapab fer tou sa ki i ti anvi fer. Ler i ti dir Zeova ki mannyer i santi, Zeova ti dir li: “Mon pwisans i vin pli for ler ou feb.” Pol ti konpran sa ki Zeova ti dir li. I pour sa rezon ki Pol ti dir: “Ler mon feb, lanmenm ler ki mon for.” (2 Korentyen 12:7-10) Ki i ti pe esey dir?

⁹ Pol ti realize ki i ti annan en limit lo sa ki i ti kapab fer lo li menm. I ti bezwen led avek enn ki pli for ki li. Lespri sen Bondye ti kapab donn Pol lafors ler i ti santi li feb. Lespri sen ti menm kapab fer plis ki sa. Lespri sen Bondye ti osi kapab donn Pol lafors pour akonpli bann keksoz ki i pa ti kapab fer avek son prop lafors. Menm keksoz i kapab arive avek nou. Ler Zeova i donn nou son lespri sen, nou pou vin for!

10. Ki mannyer Zeova ti ed David pour andir son bann problenm?

¹⁰ Souvandfwa, psalmis David ti eksperyans lafason ki lespri sen Bondye ti fer li for. I ti sante: “Avek ou led, mon kapab kraz en larme; avek mon Bondye, mon kapab sot en miray.” (Psonm 18:29) Parey en miray ki sitan o ki i enposib pour nou sote, parfwa nou bann problenm i sitan gro ki nou pa kapab rezourd zot lo nou menm. Nou bezwen led Zeova.

11. Ki mannyer lespri sen i ed nou andir nou bann problenm?

¹¹ Lir Izai 40:31. Bann leg pa reste dan lezer par servi zis zot prop lafors. Se bann kouran ler so ki pe monte ki  fer en leg mont dan lezer. Sa i permet en leg pour anvol bann gran zistans e pour prezerv lenerzi. Alor, ler ou annan en problenm difisil, mazin sa leg. Sipliy Zeova pour donn ou plis lafors par mwayen “sa led, lespri sen.” (Zan 14:26) Nou kapab demann Zeova son lespri sen nenport ki ler, 24 lo 24. Nou kapab santi ki nou pli bezwen demann Zeova son led ler nou annan bann dezakor avek nou frer oubyen ser dan kongregasyon. Me akoz sa bann dezakor i arive?

12, 13. (a) Akoz par ler i annan bann dezakor parmi bann Kretyen? (b) Ki lavi Zozef i ansenny nou lo Zeova?

¹² Bann dezakor i arive akoz nou tou nou enparfe. Par ler nou kapab irite par sa ki lezot i dir e fer oubyen nou osi nou kapab irit lezot. Sa i kapab teste nou, me i donn nou en loportinite pour demontre nou fidelite anver Zeova. Ki mannyer? Par aprann travay ansanm dan larmoni avek nou bann frer ek ser. Zeova i kontan zot menm si zot enparfe e nou osi nou devret fer parey.

¹³ Zeova pa anpes son bann serviter ganny teste. Legzanp Zozef i montre nou ki sa i leka. Ler Zozef ti en zenn onm, son bann demi frer ti zalou li. Zot ti vann li konman en lesklav e i ti ganny anmennen Lezip. (Zenez 37:28) Zeova ti vwar tou sa ki ti pe pase e san dout son leker ti’n bezwen fermal pour vwar ki mannyer son zanmi Zozef ki ti en serviter fidel ti pe ganny trete. Kantmenm sa, Zeova pa ti anpes sa arive. Menm en pe letan apre, ler Zozef ti ganny akize konmkwa i ti’n esey vyol madanm Potifar e ganny met dan prizon, Zeova pa ti sov Zozef. Eski i ti annan okenn moman kot Bondye ti abandonn Zozef? Non. Labib i dir ki “[Zeova] ti avek li e i ti fer li reisi dan tou sa ki i ti antreprann.”​—Zenez 39:21-23.

14. Ki byenfe nou gannyen ler nou aret ankoler?

¹⁴ David i en lot legzanp. Laplipar dimoun pa’n zanmen ganny trete sitan mal parey David ti ganny trete. Kantmenm sa, sa zanmi Bondye pa ti les sa  fer li ankoler. I ti ekri: “Aret ankoler e rezet firer. Pa bezwen fristre e fer sa ki mal.” (Psonm 37:8, NWT) Sa pli bon rezon pour “aret” ankoler i akoz nou anvi imit Zeova. I “pa tret nou dapre nou pese” me i’n pardonn nou. (Psonm 103:10) I annan lezot byenfe pratik ki nou gannyen ler nou aret ankoler. Par egzanp, lakoler i kapab fer nou ganny tansyon ek problenm respiratwar. I kapab andomaz lefwa, pankreas e i kapab fer nou ganny bann problenm dizestif. Osi, ler nou ankoler i difisil pour reflesi byen. Nou kapab dir oubyen fer bann keksoz ki bles santiman lezot e sa i kapab fer nou santi nou mal pour en bon pe letan. I pli bon reste kalm. Labib i dir: “En lespri trankil i favoriz lasante.” (Proverb 14:30) Alor, ki nou kapab fer ler lezot i bles nou santiman e ki mannyer nou kapab fer lape avek nou bann frer ek ser? Nou kapab aplik bann konsey saz ki dan Labib.

15, 16. Ki nou devret fer ler en dimoun i bles nou santiman?

¹⁵ Lir Efezyen 4:26. Nou pa sirprann ler bann dimoun ki pa servi Zeova i tret nou dan en move fason. Me ler en frer oubyen en ser Kretyen ouswa en manm fanmir i dir oubyen fer en keksoz ki bles nou santiman, sa i kapab tap nou en kantite. Me ki pou arive si nou zis pa kapab oubliy sa ki’n arive? Eski nou pou reste ankoler, petet menm pour plizyer lannen? Oubyen eski nou pou swiv sa konsey Labib ki ankouraz nou pour rezourd problenm vitman? Pli nou les letan pase avan koz avek sa lot dimoun, pli i pou difisil pour fer lape.

¹⁶ Ki pou arive si en frer in bles ou santiman e ou pa kapab oubliy sa ki’n arive? Ki ou kapab fer pour fer lape? Premyerman, ou kapab priy Zeova. Sipliy li pour ed ou fer en bon konversasyon avek ou frer. Rapel ki ou frer osi i en zanmi Zeova. (Psonm 25:14, NWT) Bondye i kontan li. Zeova i demontre labonte anver tou son bann zanmi e i ekspekte ki nou fer parey. (Proverb 15:23; Matye 7:12; Kolosyen 4:6) Dezyenmman, reflesi byen lo sa ki ou pou dir ou frer. Pa mazinen ki i ti anvi bles ou. Petet i pa’n fer par ekspre oubyen ou’n mal konpran sa sityasyon. Pare pour aksepte ki petet ou osi ou’n zwe en rol pour sa problenm arive. Petet ou kapab konmans sa konversasyon par dir, “Petet mwan ki en pti pe tro sansib, me ler ou ti koz avek mwan yer, mon ti santi . . . ” Si sa konversasyon pa ede pour anmenn lape ant ou ek ou frer, kontinyen eseye. Priy pour ou frer. Demann Zeova pour beni li e pour ed ou konsantre lo son bann bon kalite. Ou kapab asire ki Zeova pou pran plezir dan ou zefor senser pour fer lape avek ou frer ki enn parmi bann zanmi Bondye.

17. Ki mannyer Zeova i ed nou pour reganny nou bon relasyon avek li ler nou’n fer pese e akoz nou devret aksepte sa led?

¹⁷ Serten i santi ki zot pa diny pour servi Zeova akoz zot in fer en pese  grav. Ler nou santi nou koupab, sa i kapab pran tou nou lape, lazwa ek lenerzi. Ler Lerwa David ti santi li koupab, i ti dir: “Ler mon ti reste trankil, mon ti perdi tou mon lafors e mon ti pe plennyen tou dilon lazournen. Akoz lizour konman aswar ou lanmen ti lour lo mwan.” Erezman, David ti annan sa kouraz pour fer sa ki Zeova i oule son bann serviter i fer. I ti ekri: “Finalman mon ti konfes mon pese avek ou” e “ou ti pardonn mon bann pese.” (Psonm 32:3-5, NWT) Si ou’n fer en pese grav, Zeova i pare pour pardonn ou. I anvi ed ou reganny ou bon relasyon avek li. Selman ou bezwen aksepte sa led ki i donn ou atraver bann ansyen. (Proverb 24:16; Zak 5:13-15) Alor pa tarde! Ou lavi eternel i depan lo la. Me meton ou ankor santi ou koupab en bon pe letan apre ki ou pese in ganny pardonnen, ki ou devret fer?

18. Ki mannyer legzanp Pol i kapab ed bann ki santi ki zot pa diny pour servi Zeova?

¹⁸ I ti annan letan kot zapot Pol ti dekouraze akoz bann pese ki i ti’n fer dan lepase. I ti dir: “Mon pli pti parmi tou bann zapot e mon pa merite ganny apele zapot parski mon ti persekit kongregasyon Bondye.” Kantmenm sa, Pol ti dir: “Me gras a labonte ekstraordiner Bondye, mon sa ki mon ete.” (1 Korentyen 15:9, 10) Zeova ti konnen ki Pol ti enparfe. Me i ti aksepte Pol pour sa ki i ti ete e i ti oule ki Pol i asire ki sa i leka. Si ou vreman regret sa ki ou’n fer e ou’n koz lo la avek Zeova e avek bann ansyen si i neseser, Zeova pou definitivman pardonn ou. Krwar ki Zeova in pardonn ou e aksepte son pardon!​—Izai 55:6, 7.

19. Ki nou teks pour lannen 2018 e akoz nou bezwen li?

¹⁹ Anmezir ki lafen sa lemonn i aprose, nou kapab ekspekte ki nou pou ganny plis problenm. Me nou devret rapel ki Zeova, sa enn ki “donn lafors sa enn ki fatige e kouraz sa enn ki’n randi,” i kapab donn ou nenport kwa ki ou bezwen pour kontinyen servi li fidelman. (Izai 40:29; Psonm 55:22; 68:19) Pandan lannen 2018, sak fwa ki nou vin renyon kot Lasal Rwayonm, nou pou kapab rapel sa laverite enportan ler nou vwar nou teks pour lannen: “Sa bann ki met zot konfyans dan [Zeova] ava reganny zot lafors.”​—Izai 40:31.