1-2. Ki en lanz ti dir bann madanm kot latonm Zezi e ki Zezi ti dir zot?

I GRANMATEN, le 16 Nizan lannen 33. Serten madanm vreman sagren e ki kontan Bondye i al kot latonm kot lekor Zezi in ganny mete plis ki en zour pase. Ler zot ariv kot latonm pour prepar lekor Zezi avek bann zepis santi bon ek delwil, zot sirprann pour vwar latonm vid! En lanz i dir sa bann disip ki Zezi in resisite. I osi dir: “I pe al esper zot Galile. Zot pou vwar li laba.”​—Mat. 28:1-7; Lik 23:56; 24:10.

² Apre ki sa bann madanm i kit latonm, Zezi i apros zot e i dir zot: “Al dir mon bann frer pour ki zot al Galile e zot a vwar mwan laba.” (Mat. 28:10) Premye keksoz ki Zezi ti fer apre ki i ti’n resisite, i ti rasanble son bann disip e la i ti donn zot serten lenstriksyon vreman enportan.

3-4. Akoz nou kapab dir ki sa lord dan Matye 28:19, 20 pa ti ganny donnen zis avek bann zapot? (Vwar portre lo kouvertir.)

³ Lir Matye 28:16-20. Ler Zezi ti zwenn son bann disip kot sa montanny Galile, i ti koz avek zot konsernan sa travay enportan ki zot ti pou fer dan premye syek. Sa i menm travay ki nou pe fer ozordi. Zezi ti dir: “Alor, al kot bann dimoun dan tou nasyon e fer zot vin mon disip, . . . ansenny zot pour obei tou sa ki mon’n donn zot lord pour fer.”

⁴ Zezi i anvi ki tou son bann disip i anons sa bon nouvel. I pa ti donn sa lord zis avek son onz zapot fidel. Ki  mannyer nou kapab asire? I ti napa zis bann zapot ki ti la lo sa montanny Galile ler Zezi ti donn sa lord. Rapel ki sa lanz ti dir sa bann madanm: “Zot pou vwar li [Galile].” Alor, i tre probab ki i ti annan bann madanm fidel ki ti la sa zour. Me pa se tou. Zapot Pol ti dir ki Zezi ti “aparet avek plis ki 500 frer an menm tan.” (1 Kor. 15:6) Kote sa ti arive?

5. Akoz nou krwar ki 1 Korentyen 15:6 pe refer avek Matye sapit 28, kot Zezi ti zwenn ansanm avek son bann disip Galile?

⁵ Nou annan bon rezon pour krwar ki dan 1 Korentyen 15:6 Pol ti pe refer avek Matye sapit 28, kot Zezi ti zwenn ansanm avek son bann disip Galile. Akoz nou dir sa? Premyerman, laplipar disip Zezi ti bann Galileen. Alor, i ti pou pli fasil pour en kantite dimoun zwenn ansanm lo en montanny Galile olye dan lakour en dimoun Zerizalenm. Dezyenmman, Zezi ti’n fini zwenn son onz zapot dan en lakour prive Zerizalenm apre ki i ti’n resisite. Si Zezi ti anvi donn zis son bann zapot sa lord pour prese e fer disip, i ti’n kapab fer sa Zerizalenm olye demann son bann zapot, sa bann madanm ek lezot pour zwenn li Galile.​—Lik 24:33, 36.

6. Ki mannyer Matye 28:20 i montre ki sa lord pour fer disip i aplik pour nou letan e ki mannyer dimoun pe obei sa lord?

⁶ Annou vwar en trwazyenm rezon enportan. Zezi pa ti donn sa lord pour fer disip zis avek bann Kretyen dan premye syek. Ki mannyer nou konnen? Parski Zezi ti dir sa dernyen parol avek son bann disip: “Mon avek zot tou le zour ziska lafen sa lemonn.” (Mat. 28:20) Zis parey Zezi ti dir, ozordi bokou plis dimoun pe fer disip. Zis mazin sa! Apepre 300,000 dimoun sak lannen i vin disip Zezi Kri, zot batize e vin Temwen Zeova!

7. Ki nou pou koz lo la e akoz?

⁷ En kantite dimoun ki etidye Labib i progrese e batize. Me i paret ki serten ki etidye Labib avek nou i per pour vin bann disip. Zot kontan pour etidye me zot pa pe fer progre pour batize. Si ou annan en letid Labib, ou anvi ed li pour aplik sa ki i pe aprann e vin en disip Kris. Dan sa lartik, nou pou vwar ki mannyer nou kapab ed nou etidyan pour kontan Zeova e progrese spirityelman. Akoz nou bezwen koz lo sa topik? Akoz parfwa nou bezwen deside si nou pou kontinyen sa letid ouswa non.

8. Akoz i kapab difisil pour ed nou etidyan kontan Zeova?

⁸ Zeova i anvi dimoun i servi li akoz zot kontan li. Alor nou lobzektif i pour ed nou etidyan konpran ki Zeova i vreman enterese avek zot personnelman e ki i kontan zot en kantite. Nou anvi ed zot vwar ki Zeova i “en papa pour bann orfelen e i protez bann vev.” (Ps. 68:5) Ler ou bann etidyan i realize ki kantite Zeova i kontan zot, i tre probab ki zot pou konmans kontan li zot osi. Serten etidyan i kapab vwar li difisil pour vwar Zeova konman en Papa lanmour, parski zot prop papa pa’n demontre lanmour ek lafeksyon anver zot. (2 Tim. 3:1, 3) Anmezir ou fer sa letid, met lanfaz lo bann zoli kalite ki Zeova i annan. Ed ou etidyan pour konpran ki nou Bondye ki kontan nou i anvi zot ganny lavi eternel  e i pare pour ed zot atenn sa lobzektif. Ki nou kapab fer ankor?

9-10. Ki liv nou devret servi pour fer letid Labib e akoz nou devret servi sa bann liv?

⁹ Servi liv “Ki Labib i dir?” ek “Annou reste dan lanmour Bondye.” Sa bann liv in ganny fer espesyalman pour ed nou bann etidyan kontan Zeova. Par egzanp, sapit 1 dan liv Ki Labib i reponn sa bann kestyon: Eski Bondye i enterese avek nou?, Ki mannyer Bondye i santi ler i vwar dimoun pe soufer? e Eski ou kapab vin zanmi Zeova? Sa liv Dan lanmour Bondye pou ed sa etidyan konpran ki mannyer ler i aplik bann prensip Labib sa i kapab amelyor son lavi e fer li vin pli pros avek Zeova. Menm si ou’n deza fer letid dan sa bann liv avek lezot etidyan, prepar byen pour sak letid pour ki ou kapab aplik li avek bezwen sak etidyan.

¹⁰ Ki ou devret fer si ou etidyan i enterese dan en lot topik me ki sa piblikasyon pa form parti nou Zouti predikasyon?  Petet ou kapab ankouraz li pour lir sa piblikasyon lo li menm pour ki ou kapab kontinyen fer son letid dan enn sa bann liv ki nou’n deza mansyonnen.

11. Kan ki nou devret konmans fer lapriyer dan en letid Labib e ki mannyer nou kapab ed sa etidyan pour konpran lenportans lapriyer?

¹¹ Konmans letid avek en lapriyer. Normalman i pli bon pour fer lapriyer dan bann premye semenn apre ki ou’n konmans en letid. Nou devret ed nou etidyan realize ki nou kapab konpran Parol Bondye zis avek led lespri sen Bondye. Serten ansenyan i eksplike akoz nou fer lapriyer par lir Zak 1:5 ki dir: “Si enn parmi zot i mank lasazes, i devret kontinyen demann Bondye.” Apre, sa ansenyan i demann sa etidyan, “Ki mannyer nou kapab demann Bondye lasazes?” I tre probab ki sa etidyan pou dakor ki nou devret priy Bondye.

12. Ki mannyer ou kapab servi Psonm 139:2-4 pour ed ou etidyan koz avek Zeova dan lapriyer lo lafason ki i santi?

¹² Montre ou etidyan ki mannyer pour priye. Eksplik li ki Zeova i anvi ekout son bann lapriyer senser. Eksplik li ki dan nou lapriyer personnel nou kapab dir Zeova lafason ki nou santi e dir li bann keksoz ki nou pa ti pou dir avek personn. Apre tou, Zeova i konn byen sa ki nou pe panse. (Lir Psonm 139:2-4.) Nou kapab osi ankouraz nou etidyan pour demann Bondye pour ed li retir bann move panse ki i annan e pour aret bann move labitid. Meton en dimoun ki’n etidye pour en pe letan i kontan bann lafet ki bann Kretyen pa devret partisip ladan. I konnen ki sa i mal me i zis ki i annan serten keksoz ki i kontan avek sa bann lafet. Ankouraz li pour dir Zeova egzakteman lafason ki i santi e pour sipliy Zeova pour ed li kontan zis sa ki I kontan.​—Ps. 97:10.

13. (a) Akoz nou devret envit nou bann etidyan pour asiste renyon o pli vit posib? (b) Ki mannyer nou kapab fer nou etidyan santi li pli alez kot Lasal Rwayonm?

¹³ Envit ou etidyan pour asiste renyon o pli vit posib. Sa ki ou etidyan i tande e obzerve dan renyon, i kapab motiv li pour servi Zeova e pour progrese spirityelman. Montre li sa video Kwa ki pase dan Lasal Rwayonm? e zantiman envit li pour vin avek ou. Si i posib fer laranzman transpor pour li ariv kot lasal. I en bon nide pour envit diferan proklanmater pour vin avek ou pour fer sa letid. Dan sa fason, ou etidyan pou aprann konn lezot dan kongregasyon e i tre probab ki i pou santi li pli alez ler i asiste renyon.

14. Kwa ki kapab ed en dimoun pour progrese spirityelman?

¹⁴ Nou lobzektif i pour ed nou etidyan progrese spirityelman. (Efe. 4:13) Ler en dimoun i dakor pour etidye Labib avek nou, i kapab ki i zis enterese pour konnen ki mannyer en letid Labib pou ed li personnelman. Me pli son lanmour pour Zeova i vin pli for, i tre probab i pou konmans mazin lo ki mannyer i kapab ed lezot, enkli bann frer ek ser dan kongregasyon. (Mat. 22:37-39) Dan sa moman apropriye, pa ezite pour koz lo sa privilez ki nou annan pour siport sa travay Rwayonm finansyerman.

15. Ki mannyer nou kapab ed en etidyan pour fer sa ki byen ler i rankontre problenm?

¹⁵ Montre ou etidyan ki i pou fer ler i  rankontre problenm dan kongregasyon. Meton ou etidyan ki en proklanmater ki pa ankor batize, i dir ou ki en dimoun dan kongregasyon in ofans li. Dan plas dir li lekel ki annan rezon oubyen tor, montre li ki Labib i dir i devret fer. I kapab pardonn sa frer e oubliy sa ki’n arive oubyen si i pa kapab fer sa, i bezwen koz avek sa dimoun zantiman avek bi pour aranz keksoz antre zot. (Konpar Matye 18:15.) Ed ou etidyan pour prepar sa ki i pou dir. Montre li ki mannyer pour servi JW Library^® app, Liv resers pour Temwen Zeova ek jw.org^® pour li aprann bann fason pratik pour fer fas avek sa sityasyon. Si i aprann ki mannyer pour rezourd bann problenm avek lezot avan i batize, i tre probab ki i pou annan en bon lanmitye avek lezot dan kongregasyon apre ki i’n batize.

16. Akoz i bon pour envit lezot proklanmater pour vin avek ou pour fer en letid?

¹⁶ Envit lezot dan kongregasyon e osi sirveyan rezyonal ler i vizit kongregasyon pour vin sa letid avek ou. Akoz? Parski lezot proklanmater i kapab ed ou etidyan dan bann fason ki ou pa kapab fer. Meton, sa etidyan in esey aret fimen plizyer fwa me i pa’n reisi. Envit en frer oubyen en ser dan kongregasyon ki ti fimen e ki ti arete apre plizyer lesey pour asiste ou lo sa letid. Sa frer oubyen ser i kapab donn sa etidyan bann bon konsey ki kapab ed li. Si ou pa konfortab pour fer sa letid dan prezans en frer pli eksperyanse, demann li pour fer letid sa zour. Ler ou envit lezot pour vin avek ou pour fer letid, ou etidyan i kapab benefisye avek zot leksperyans. Rapel ki nou lobzektif i pour ed sa etidyan pour progrese spirityelman.

17-18. Ki ou devret reflesir lo la ler ou pe deside si ou pou aret en letid?

¹⁷ Si ou etidyan pa pe fer bann sanzman dan son lavi, a en serten moman ou pou bezwen demann ou lekor, ‘Eski mon pou aret sa letid?’ Avan ou fer sa desizyon, ou bezwen reflesir lo abilite sa dimoun. I pran plis letan pour serten dimoun progrese ki lezot. Demann ou lekor: ‘Eski mon etidyan pe progrese dapre son abilite?’ ‘Eski i pe konmans “obei” ouswa aplik sa ki i pe aprann?’ (Mat. 28:20) I kapab pran bokou letan pour en etidyan vin en disip me i devret pe dousman dousman fer bann sanzman dan son lavi.

¹⁸ Me ki nou pou fer si nou’n fer letid avek en dimoun pour en pe letan e i pa’n montre ki sa letid i enportan pour li? Meton ou annan en etidyan ki’n fini etidye sa liv Ki Labib e petet osi in menm konmans etidye sa liv Dan lanmour Bondye me i pa’n zanmen asiste renyon, ni  menm Memoryal! I souvandfwa kennsel son letid pour bann rezon ki pa enportan. Si ou etidyan i koumsa, ou devret koz fran avek li. *

19. Ki ou kapab dir avek en dimoun si i paret ki i pa vwar son letid Labib enportan e ki ou bezwen mazin lo la?

¹⁹ Ou kapab konmans sa konversasyon par demann li, ‘Ki sa keksoz pli difisil ki ou vwar ou bezwen fer pour vin en Temwen Zeova?’ I kapab ki sa etidyan pou reponn, ‘Mon kontan etidye Labib me mon pa pou zanmen vin en Temwen Zeova!’ Si i rezonn koumsa apre ki i’n etidye pour en serten letan, eski i vo lapenn kontinyen sa letid? Par kont, i kapab ki pour premye fwa ou etidyan i dir ou kwa ki anpes li progrese. Par egzanp, i kapab i santi ki i pa pou zanmen kapab pres kazankaz. La ki ou konnen ki mannyer i santi, ou pou kapab konpran pli byen ki mannyer pour ed li.

20. Ki mannyer Akt 13:48 i kapab ed nou konnen si nou pou aret en letid Labib ouswa non?

²⁰ I domaz ki serten etidyan i parey bann Izraelit dan letan Ezekyel. Remarke ki Zeova ti dir Ezekyel lo zot: “Zot pou pran ou zis koman en bon santer avek en zoli lavwa, ek lakonpannyman lanmizik. Zot antann sa ki ou dir, me zot pa met li an pratik.” (Ezek. 33:32) I kapab difisil pour nou dir en dimoun ki nou pou aret fer son letid. Par kont, “sa letan ki reste i kourt.” (1 Kor. 7:29) I pli bon pour aret en letid ki pa progrese. Nou devret esey rod en dimoun ki montre ki i annan “sa bon kondisyon leker pour ganny lavi eternel.”​—Lir Akt 13:48.

21. Ki nou teks pour lannen 2020 e ki i pou ed nou fer?

²¹ Pandan lannen 2020, nou teks pour lannen pou ed nou vwar ki mannyer nou kapab fer pli byen sa travay pour fer disip. I enkli serten parol ki Zezi ti dir ler i ti zwenn ansanm avek son bann disip lo en montanny Galile. I ti dir: ‘Alor, ale e fer dimoun vin mon disip, batiz zot.’​—Mat. 28:19.