DAN Bible Lands Museum Zerizalenm, i annan en ros ki lo la i annan en lekritir ki’n ganny ekrir ant lannen 700 ek lannen 600 avan Kris. Sa ros ti ganny trouve dan en kavern pa lwen avek Ebronn Izrael. Sa kavern ti ganny servi konman latonm. Lo sa ros i ekri: “Ki Hagaf garson Hagav i ganny modi par Yahweh Sabaot.” Ki mannyer sa lekritir i konfirm sa ki Labib i dir? I montre ki dan letan Labib, non Bondye, setadir Zeova ki dan langaz Ebre i YHWH, ti ganny servi toulezour. Lo miray sa kavern, i annan lezot lekritir ki bann dimoun ti ekri ler zot ti zwenn e kasyet dan sa landrwa. Zot ti souvan ekri non Bondye e osi zot prop non ki ti annan non Bondye ladan.

Dokter Rachel Nabulsi ki travay dan University of Georgia ti dir konsernan sa bann lekritir: “Sa non YHWH i aparet plizyer fwa dan sa bann lekritir. Sa i ansenny nou en kantite keksoz. . . . Sa bann teks ek lekritir i montre ki YHWH ti vreman enportan pour pep Izrael ek Zida.” Sa i siport sa ki Labib i dir parski non Bondye YHWH dan bann let Ebre, i aparet plizyer milye fwa. Sa letan, non bann dimoun ti souvan enkli non Bondye avek.

Sa lekspresyon “Yahweh Sabaot” ki ti’n ganny ekri lo sa ros, i vedir “Zeova sef larme.” Alor i paret ki bann dimoun dan Labib ti souvan servi non Bondye e osi sa lekspresyon “Zeova sef larme.” I osi fer sans ki Labib i servi sa lekspresyon “Zeova sef larme” 283 fwa dan Lekritir Ebre, sirtou dan bann liv ki Izai, Zeremi ek Zekarya ti ekri.