1-2. (a) Kan ki nou sirtou mazin en dimoun ki nou kontan ki’n mor? (b) Ki Zezi ti fer sa zour swar avan i ti mor?

 NENPORT ki kantite letan ki en dimoun ki nou kontan in mor, nou ankor mazin li. Nou mazin li sirtou lo sa dat ki i ti mor.

² Tou le lannen, nou parmi plizyer milyon dimoun ki zwenn ansanm sa dat ki en dimoun ki nou kontan ti mor. Nou zwenn ansanm pour komemor lanmor Zezi. (1 Pyer 1:8) Nou rasanble pour mazin sa enn ki ti donn son lavi konman en ranson pour sov nou dan pese ek lanmor. (Mat. 20:28) Anfet, Zezi ti anvi ki son bann disip i mazin son lanmor. Sa zour swar avan son lanmor, i ti entrodwir en repa spesyal e i ti donn sa lord: “Kontinyen fer sa pour montre ki zot pe mazin mwan.”​—Lik 22:19.

3. Ki nou pou diskite dan sa lartik?

³ Parmi bann dimoun ki asiste Memoryal lanmor Kris, i annan en pti group ki annan sa lespwar pour viv dan lesyel  pour touzour e i osi annan plizyer milyon dimoun ki annan lespwar pour viv lo later pour touzour. Dan sa lartik, nou pou vwar bann rezon akoz tou le de group i vreman kontan pour asiste Memoryal tou le lannen. Nou pou osi vwar ki byenfe nou gannyen ler nou asiste Memoryal. Aprezan, annou vwar akoz bann Kretyen swazir i asiste Memoryal.

4. Akoz bann Kretyen swazir i manz sa dipen e bwar sa diven zour Memoryal?

⁴ Tou le lannen, bann Kretyen swazir ki asiste Memoryal i manz sa dipen e bwar sa diven. Akoz zot fer sa? Pour reponn sa kestyon, annou vwar sa ki ti arive sa dernyen lannwit avan Zezi i mor. Apre ki zot ti’n selebre Lapak, Zezi ti entrodwir sa ki nou apel Repa Senyer. I ti pas dipen ek diven avek son 11 zapot fidel e i ti dir zot pour manze e bwar. Zezi ti koz avek zot konsernan sa nouvo lalyans ek sa lalyans pour en Rwayonm. * (Lik 22:19, 20, 28-30) Sa de lalyans i fer li posib pour sa bann zapot ek en pti group dimoun vin bann lerwa ek pret dan lesyel. (Rev. 5:10; 14:1) Zis bann Kretyen swazir ki ankor lo later e ki enplike dan sa de lalyans ki manz sa dipen e bwar sa diven zour Memoryal.

5. Ki bann Kretyen swazir i rekonnet konsernan sa lespwar ki zot annan?

⁵ Annou vwar en lot rezon akoz bann Kretyen swazir i vreman kontan pour asiste Memoryal. Memoryal i donn zot sa loportinite pour reflesir lo zot lespwar. Zeova in donn zot en zoli lespwar setadir pour zot vin imortel e annan en lekor ki pa pouri pour zot kapab dirize ansanm avek Zezi ek larestan sa 144,000 ki deza dan lesyel. Me sa pli gran lespwar ki zot annan i pour vwar Zeova! (1 Kor. 15:51-53; 1 Zan 3:2) Sa bann Kretyen swazir i rekonnet ki i en privilez pour zot al dan lesyel. Me pour zot kapab al dan lesyel, zot bezwen reste fidel ziska lanmor. (2 Tim. 4:7, 8) Bann Kretyen swazir i vreman kontan ler zot reflesir lo zot lespwar. (Tit 2:13) Me ki serten rezon “lezot mouton” i asiste Memoryal?​—Zan 10:16.

6. Akoz lezot mouton i asiste Memoryal tou le lannen?

⁶ Lezot mouton i kontan pour asiste Memoryal me zot pa manz sa dipen e bwar sa diven pandan Memoryal. I ti apartir 1938 ki lezot mouton ti asiste Memoryal me zot pa ti manz sa dipen e bwar sa diven. Latour Veyer le 1 Mars 1938 an Angle i dir: “I pou byen pour lezot mouton asiste Memoryal e obzerv sa ki pe arive. . . . I devret e i en letan kot zot zwaye zot osi.” Parey bann envite dan en maryaz i kontan pour obzerv sa seremoni, lezot mouton i kontan pour zot osi la zour Memoryal.

7. Akoz lezot mouton i vreman kontan pour ekout diskour Memoryal?

⁷ Lezot mouton osi i reflesir lo zot lespwar. Zot kontan pour ekout diskour Memoryal parski i koz prensipalman lo sa ki Kris ek sa 144,000 ki pou dirize ansanm avek li, pou fer pour bann imen  fidel pandan Renny Mil an Kris. Avek Zezi Kri konman zot lerwa, sa 144,000 Kretyen swazir pou fer later vin en paradi e zot pou ed bann imen pour vin parfe. Sa plizyer milyon lezot mouton ki asiste Memoryal i vreman kontan pour imazin lakonplisman bann profesi Labib, par egzanp bann profesi ki dan Izai 35:5, 6; 65:21-23 ek Revelasyon 21:3, 4. Ler zot imazin zot ansanm avek bann dimoun ki zot kontan dan sa paradi, sa i fer zot lespwar vin pli reel e zot determinen pour pa zanmen aret servi Zeova.​—Mat. 24:13; Gal. 6:9.

8. Ki en lot rezon ki lezot mouton i asiste Memoryal?

⁸ Annou vwar en lot rezon akoz lezot mouton i asiste Memoryal. Zot anvi demontre zot lanmour ek sipor pour bann Kretyen swazir. Parol Bondye ti predir ki bann Kretyen swazir ek bann ki annan lespwar pour viv pour touzour lo later pou travay ansanm. Ki mannyer sa? Annou vwar detrwa legzanp.

9. Ki sa profesi dan Zekarya 8:23 i montre konsernan lafason ki lezot mouton i santi anver bann Kretyen swazir?

⁹ Lir Zekarya 8:23, NWT. Sa profesi i montre byen lafason ki lezot mouton i santi konsernan bann frer ek ser ki bann Kretyen swazir. Sa lekspresyon “en Zwif” ek “zot” i refer avek menm group, setadir bann Kretyen swazir ki ankor lo later. (Rom. 2:28, 29) Sa “dis zonm ki koz langaz tou nasyon” i reprezant lezot mouton. Zot “tyonbo for” setadir zot fidelman siport bann Kretyen swazir e zwenn ansanm avek zot dan ladorasyon pir. Alor, lezot mouton i montre ki zot siport bann Kretyen swazir par asiste Memoryal.

10. Ki Zeova in fer pour akonpli sa profesi ki dan Ezekyel 37:15-19, 24, 25?

¹⁰ Lir Ezekyel 37:15-19, 24, 25. Zeova in akonpli sa profesi par fer bann Kretyen swazir ek lezot mouton travay pros ansanm. Sa profesi ti koz lo de dibwa. Bann ki annan lespwar pour al dan lesyel i parey sa dibwa ki “pour Zida” (sa tribi ki bann lerwa Izrael ti sorti ladan) e bann ki annan lespwar pour viv lo later i parey sa dibwa ki pour “Efraim.” * Zeova pou ini sa de group pour ki zot vin en ‘sel dibwa.’ Sa i vedir ki zot servi Zeova anba zot Lerwa Zezi Kri. Tou le lannen, bann Kretyen swazir ek lezot mouton i asiste Memoryal pa konman de group me konman “en sel troupo” anba “en sel berze.”​—Zan 10:16.

11. Ki mannyer bann “mouton” ki ganny mansyonnen dan Matye 25:31-36, 40 i siport bann frer Kris ki ankor lo later?

¹¹ Lir Matye 25:31-36, 40. Bann “mouton” ki Zezi i koz lo la i reprezant bann dimoun drwat dan bann dernyen zour ki annan sa lespwar pour viv lo later pour touzour, setadir lezot mouton. Zot siport fidelman bann frer Kris ki ankor lo later par ed zot pour akonpli sa gro responsabilite pour anons sa bon nouvel e fer disip partou lo later.​—Mat. 24:14; 28:19, 20.

12-13. Ki lezot fason ki lezot mouton i siport bann frer swazir Kris?

¹² Tou le lannen pandan bann semenn avan Memoryal, lezot mouton i siport bann frer Kris par partisip dan en kanpanny pour envit dimoun Memoryal. Sa kanpanny i ganny fer partou dan  lemonn. (Vwar sa bwat “ Ki ou kapab fer pandan sezon Memoryal?”) Zot osi fer sir ki tou keksoz i pare pour Memoryal, menm si dan zot kongregasyon napa personn ki en Kretyen swazir. Lezot mouton i kontan pour siport bann frer Kris dan sa bann fason. Zot konnen ki Zezi i vwar sa ki zot fer pour son bann frer swazir konmsi zot pe fer sa pour li.​—Mat. 25:37-40.

¹³ Ki swa nou annan lespwar pour viv pour touzour dan lesyel oubyen lo later, ki lezot rezon ki nou tou nou asiste Memoryal?

14. Ki mannyer Zeova ek Zezi in demontre en gran lanmour pour nou?

¹⁴ Nou rekonesan pour sa lanmour ki Zeova ek Zezi in demontre pour nou. Zeova in demontre son lanmour pour nou dan en kantite fason. Me sa pli gran fason ki Zeova in demontre son lanmour pour nou i ler i ti anvoy son Garson pour soufer e mor pour nou. (Zan 3:16) Zezi osi in demontre en gran lanmour par pare pour donn son lavi pour nou. (Zan 15:13) I napa nanryen ki nou kapab donn Zeova ek Zezi an retour pour sa lanmour ki zot in demontre pour nou. Me nou kapab demontre nou rekonesans par lafason ki nou viv nou lavi sak zour. (Kol. 3:15) Nou asiste Memoryal parski nou anvi reflesir lo sa gran lanmour ki zot in demontre pour nou e pour nou demontre nou lanmour pour zot.

15. Akoz bann Kretyen swazir ek lezot mouton i vreman apresye sa ranson?

¹⁵ Nou vreman apresye sa ranson ki en kado. (Mat. 20:28) Bann Kretyen swazir i vreman apresye sa ranson parski sa ranson i fer li posib pour zot annan sa lespwar pour al viv dan lesyel pour touzour. Zot annan lafwa dan sakrifis Zezi e sa i fer ki zot in ganny aprouve konman drwat par Zeova e Zeova in adopte zot konman son bann zanfan. (Rom. 5:1; 8:15-17, 23) Lezot mouton osi i rekonesan pour sa ranson. Vi ki zot annan lafwa dan sakrifis Zezi, zot annan en konsyans kler, zot annan laprouvasyon Bondye, zot kapab servi li e zot annan sa lespwar pour “pas atraver sa gran ladetres.” (Rev. 7:13-15) En fason ki bann Kretyen swazir ek lezot mouton i demontre zot lapresyasyon pour sa ranson i ler zot asiste Memoryal tou le lannen.

16. Ki en lot rezon akoz nou asiste Memoryal?

¹⁶ En lot rezon akoz nou asiste Memoryal i akoz nou anvi obei Zezi. Ki swa nou annan lespwar pour viv pour touzour dan lesyel oubyen lo later, nou tou nou anvi obei sa lord ki Zezi ti donnen sa zour swar ler i ti entrodwir Memoryal. I ti dir: “Kontinyen fer sa pour montre ki zot pe mazin mwan.”​—1 Kor. 11:23, 24.

17. Ki mannyer Memoryal i ed nou vin pli pros avek Zeova?

¹⁷ Nou vin pli pros avek Zeova. (Zak 4:8) Parey nou’n aprann, Memoryal i donn nou sa loportinite pour reflesir lo sa lespwar ki Zeova in donn nou e pour medit lo sa gran lanmour ki i’n demontre pour nou. (Zer. 29:11; 1 Zan 4:8-10) Ler nou reflesir lo sa lespwar ki nou  annan pour lavenir e lo lanmour fidel ki Bondye i annan pour nou, nou lanmour pour Zeova i vin pli for e nou ranforsi nou lanmitye avek li.​—Rom. 8:38, 39.

18. Ler nou medit lo legzanp Zezi, ki sa i motiv nou pour fer?

¹⁸ Nou anvi swiv legzanp Zezi. (1 Pyer 2:21) Dan bann zour avan Memoryal, nou konsantre lo bann verse Labib ki koz lo dernyen semenn ki Zezi ti pase lo later, son lanmor ek son rezireksyon. Pandan Memoryal, sa diskour i fer nou rapel sa lanmour ki Zezi i annan pour nou. (Efe. 5:2; 1 Zan 3:16) Ler nou lir e medit lo lafason ki Zezi ti sakrifye son lavi, nou anvi “kontinyen viv parey li i ti viv.”​—1 Zan 2:6.

19. Ki mannyer nou kapab reste dan lanmour Bondye?

¹⁹ Nou pli determinen pour reste dan lanmour Bondye. (Zid 20, 21) Nou reste dan lanmour Bondye ler nou fer tou sa ki nou kapab pour obei li, sanktifye son non e fer li kontan. (Prov. 27:11, NWT; Mat. 6:9; 1 Zan 5:3) Ler nou asiste Memoryal, sa i motiv nou pour pli determinen pour viv sak zour, dan en fason ki fer plezir Zeova konmsi nou pe dir li, ‘Mon anvi reste dan ou lanmour pour touzour!’

20. Ki bann bon rezon nou annan pour asiste Memoryal?

²⁰ Ki swa nou annan lespwar pour viv pour touzour dan lesyel oubyen lo later, nou annan bann bon rezon pour asiste Memoryal. Tou le lannen, ler nou rasanble ansanm pour Memoryal, nou rapel lanmor en dimoun ki nou kontan e sa i Zezi Kri. Pli enportan ankor, nou rapel sa pli gran lanmour ki’n deza ganny demontre e sa i sa lanmour ki Zeova ti demontre ler i ti donn son Garson konman en ranson. Sa lannen, Memoryal pou ganny fer Vandredi le 15 Avril 2022. Nou kontan Zeova ek son Garson, alor zour Memoryal, i napa nanryen ki pli enportan ki asiste Memoryal.