1. Ki sityasyon David ti ladan?

 DAVID ti pe sove akoz en lerwa pwisan ti anvi touy li. Sa lerwa ti Sail ki ti lerwa Izrael. Ler David ti bezwen manze, i ti aret dan lavil Nob e demann zot senk dipen. (1 Sam. 21:1, 3) Pli tar i ti al kasyet dan en kavern ansanm avek son bann zonm. (1 Sam. 22:1) Akoz David ti dan sa sityasyon?

2. Ki move keksoz Sail ti fer? (1 Samyel 23:16, 17)

² Sail ti zalou David en kantite parski en kantite dimoun ti kontan David e zot ti felisit David akoz i ti ranport laviktwar dan en kantite lager. Sail ti osi konnen ki Zeova ti’n rezet li akoz i ti dezobei Zeova e ki Zeova ti’n swazir David pour vin lerwa. (Lir 1 Samyel 23:16, 17, NWT.) Me Sail ti ankor lerwa Izrael e i ti annan en gran larme ek en kantite siporter. Alor David ti bezwen sove. Eski Sail ti vreman krwar ki i ti pou kapab anpes Bondye fer David vin lerwa? (Iza. 55:11) Labib pa dir me en keksoz ki nou kapab asire, i ki Sail ti pe met son lekor dan en sityasyon danzere. Bann ki opoz Bondye i toultan perdi.

3. Ki mannyer David ti santi menm si i ti pe pas dan plizyer problenm?

³ David ti annan limilite. I pa ti swazir pour li vin lerwa Izrael. Zeova ki ti swazir li pour vin lerwa. (1 Sam. 16:1, 12, 13) Sail ti ay David en kantite me David pa ti blanm Zeova pour sa ki ti pe arive avek li. I pa ti konplent ler i ti annan en ptigin manze e i ti bezwen kasyet dan en kavern. O kontrer, i kapab ki ler i ti pe kasyet dan sa menm kavern ki i ti ekri sa zoli kantik pour loue Bondye. Sa kantik  i enkli sa bann parol ki dan nou teks pour lannen: “Bann ki pe rod Zeova pa pou mank okenn keksoz ki bon.”​—Ps. 34:10, NWT.

4. Ki kestyon ki nou pou vwar dan sa lartik e akoz sa bann kestyon i enportan?

⁴ Ozordi, i annan en kantite serviter Zeova ki parfwa napa ase manze oubyen keksoz ki zot bezwen pour viv. * Sa in arive sirtou pandan sa pandemi COVID-19. Keksoz pou vin pli difisil anmezir ki nou vin pli pros avek “gran ladetres.” (Mat. 24:21) Alor, i pou byen pour nou reponn sa kat kestyon swivan: Dan ki fason ki David pa ti “mank okenn keksoz ki bon”? Akoz nou devret aprann pour kontant nou avek sa ki nou annan? Akoz nou kapab annan konfyans ki Zeova pou pran swen avek nou? Ki mannyer nou kapab prepar nou depi la konmela pour sa ki pou arive dan lavenir?

5-6. Ki mannyer Psonm 23:1-6 i ed nou konpran sa ki David ti pe esey dir, ler i ti dir ki bann serviter Bondye “pa pou mank okenn keksoz ki bon”?

⁵ Ki David ti pe dir ler i ti dir ki bann serviter Zeova “pa pou mank okenn keksoz ki bon?” Ler David ti ekri Psonm 34:10, i ti servi bann lekspresyon ki en pe parey bann lekspresyon ki i ti’n servi dan Psonm 23. Alor sa psonm i kapab ed nou pour konpran Psonm 34:10. (Lir Psonm 23:1-6, NWT.) David i konmans sa psonm avek sa bann Parol: “Zeova i mon berze. Mon pa pou mank nanryen.” Dan lezot verse sa psonm, David i koz lo bann keksoz ki vreman enportan. Par egzanp, bann bon keksoz ki Zeova in donn li akoz i ti aksepte Zeova konman son Berze. Zeova i diriz David “dan bann santye ladrwatir” e i ed David dan bann bon moman e dan bann moman difisil. David i rekonnet ki menm si Zeova i fer li repoze “dan laplenn ranpli avek zerb,” i ti pou annan problenm. Menm si  parfwa David i dekouraze e santi konmsi i pe mars dan en vale ki fernwanr e i annan bann lennmi, David “pa per okenn keksoz mal” akoz Zeova i son Berze.

⁶ Alor, dan ki fason ki David pa ti mank okenn keksoz ki bon? David ti annan tou sa ki i ti bezwen pour reste pros avek Zeova. I pa ti bezwen en kantite keksoz materyel pour li ere. David ti satisfe avek sa ki Zeova ti donn li. Sa ki ti pli enportan pour li, ti lefet ki Zeova i rekonpans e protez li.

7. Dapre Lik 21:20-24, ki difikilte serten Zwif ki ti reste Zide ti fer fas avek?

⁷ Atraver sa ki David ti dir, nou kapab vwar ki i vreman enportan pour pa les bann keksoz materyel vin tro enportan pour nou. Nou kapab kontan pour annan sa bann keksoz me zot pa devret vin sa keksoz pli enportan dan nou lavi. Sa ti en laverite enportan ki serten Kretyen ki ti reste Zide ti konpran. (Lir Lik 21:20-24.) Zezi ti’n averti zot ki en zour, lavil Zerizalenm ti pou ganny “antoure avek bann kan larme.” Ler sa ti pou arive, zot ti pou bezwen “sov dan montanny.” Si zot ti kit sa lavil, zot pa ti pou mor me zot ti pou bezwen kit en kantite keksoz deryer. Detrwa lannen pase, en Latour Veyer ti dir: “Zot ti kit zot plantasyon ek lakour. Zot pa ti ni menm pran bann keksoz materyel dan zot lakaz. Zot ti annan konfyans ki Zeova ti pou protez e ed zot. Alor zot ti met ladorasyon Zeova avan okenn keksoz ki ti kapab paret enportan.”

8. Ki leson enportan nou kapab aprann avek sa ki ti arive avek bann Kretyen ki ti reste Zide?

⁸ Ki leson enportan nou kapab aprann avek sa ki ti arive avek bann Kretyen ki ti reste Zide? Sa Latour Veyer ki’n ganny mansyonnen pli boner i dir: “Dan lavenir nou kapab fer fas avek bann problenm ki pou montre ki degre bann keksoz materyel i enportan pour nou. Eski sa bann keksoz i pli enportan oubyen eski lefet ki Zeova pou sov bann ki lo son kote, i sa keksoz pli enportan pour nou? Ler lafen i arive, i kapab ki nou pou bezwen andir bann difikilte e fer bann sakrifis. Nou pou bezwen pare pour fer tou sa ki neseser parey sa bann Kretyen ki ti bezwen kit Zide.” *

9. Ki mannyer sa konsey ki zapot Pol ti donn bann Kretyen Ebre i ankouraz ou?

⁹ Eski ou kapab imazinen ki mannyer i ti difisil pour sa bann Kretyen kit tou sa ki zot ti annan deryer e konmans en nouvo lavi dan en nouvo landrwa? Zot ti bezwen annan lafwa pour zot kapab depan lo Zeova pour ganny sa ki zot ti bezwen pour viv. Me i ti annan en lot keksoz ki ti kapab ed zot. Senk an avan ki bann Romen ti anserkle Zerizalenm, zapot Pol ti donn bann Kretyen Ebre serten bon konsey. I ti dir: “Montre dan zot fason viv ki zot pa kontan larzan e kontant zot avek sa ki zot annan. Parski i’n dir: ‘Mon pa pou zanmen kit ou e mon pa pou zanmen abandonn ou.’ Pour sa rezon, pran kouraz e dir: ‘Zeova i mon led, mon pa pou per. Ki dimoun i kapab fer mwan?’” (Ebr. 13:5, 6) San dout, bann ki ti ekout konsey Pol ti vwar li pli fasil pour kontant zot avek pli ptigin keksoz materyel dan zot nouvo lakour. Zot ti asire ki Zeova ti pou donn zot sa ki zot bezwen pour viv. Sa ki Pol ti dir i montre ki nou osi nou kapab asire ki Zeova pou donn nou sa ki nou bezwen pour viv.

10. Ki sa “sekre” ki Pol ti koz lo la?

¹⁰ Pol ti donn Timote en konsey en pe parey e sa konsey i aplik pour nou osi. I ti dir: “Alor, si nou annan manze ek lenz, nou pou kontant nou avek sa bann keksoz.” (1 Tim. 6:8) Eski sa i vedir ki nou pa kapab apresye en bon repa, annan en landrwa konfortab pour reste oubyen tanzantan aste nouvo lenz? Pa sa ki Pol ti pe dir. Pol ti pe dir ki nou devret kontant nou avek sa ki nou annan. (Fili. 4:12) Sa i sa “sekre” ki Pol in aprann. Sa keksoz pli presye ki nou annan i nou lanmitye avek Bondye non pa bann keksoz materyel ki nou annan.​—Aba. 3:17, 18.

11. Ki leson nou aprann konsernan kontant nou avek sa ki nou annan avek sa ki Moiz ti dir bann Izraelit?

¹¹ Sa ki nou krwar nou bezwen i kapab diferan avek sa ki Zeova i konnen nou bezwen. Annou vwar sa ki Moiz ti dir bann Izraelit apre ki zot ti pas 40 an dan dezer. Moiz ti dir zot: “Parski Zeova zot Bondye in beni zot dan tou sa ki zot in fer. I konn tre byen ki mannyer zot in mars dan sa gran dezer. Pandan sa karant an, Zeova zot Bondye ti avek zot e zot pa’n mank nanryen.” (Det. 2:7, NWT) Pandan sa 40 an, Zeova ti donn bann Izraelit lamann pour manze. Zeova ti fer sir ki zot lenz pa ti ize. Alor zot ti kapab kontinyen servi sa lenz ki zot ti annan ler zot ti kit Lezip. (Det. 8:3, 4) Menm si  serten ti krwar ki sa bann keksoz pa ti ase, Moiz ti fer zot rapel ki zot ti annan tou sa ki zot ti bezwen. Si nou aprann pour kontant nou avek sa ki nou annan, sa pou fer Zeova plezir. Zeova i anvi ki nou rekonesan pour menm bann pti keksoz ki i donn nou e pour konpran ki sa bann keksoz i en kado sorti kot li.

12. Kwa ki montre ki David ti depan lo Zeova me pa lo son prop lekor?

¹² David ti konnen ki Zeova i fidel e i pran swen avek bann ki kontan li. Menm si David ti an danze ler i ti ekri Psonm 34, son lafwa ti sitan for ki i ti asire ki “lanz Zeova” ti pe kanpe “toultour” li. (Ps. 34:7, NWT) Petet David ti pe konpar lanz Zeova avek en solda ki pe kanpe dan en laplenn e ki pe toultan veye si lennmi pe vini. David ti en solda ki ti for e Zeova ti’n promet ki i ti pou vin lerwa. Me David pa ti depan lo son prop abilite pour servi en fles oubyen pour servi en lepe pour defet son lennmi. (1 Sam. 16:13; 24:12) David ti met son konfyans dan Zeova parski i ti asire ki lanz Zeova ti pou ‘delivre bann ki annan gran respe pour Zeova.’ Byensir nou pa ekspekte ki Zeova i fer en mirak pour protez nou. Me nou konnen ki tou sa ki met konfyans dan Zeova pou ganny lavi eternel menm si zot mor la konmela.

13. Ler Gog sorti Magog pou atak nou, akoz zot pou krwar ki nou san defans me akoz nou pa devret per? (Vwar portre lo kouvertir.)

¹³ Dan lavenir nou pou bezwen annan konfyans dan abilite Zeova pour protez nou. Ler Gog sorti Magog setadir plizyer nasyon ki ralye ansanm, pou atak pep Bondye, zot pou krwar ki zot pou kapab touy nou. Ler sa i arive nou pou bezwen konvenki ki Zeova i kapab e i pou delivre nou. Bann nasyon pou krwar ki napa personn pour protez nou. (Ezek. 38:10-12) Nou pou napa okenn zarm e nou pa pou’n aprann lager. Zot pou krwar ki i pou fasil pour ranport laviktwar lo nou. Zot pa konnen ki bann lanz Zeova i pare pour defann nou. Me nou, nou konn sa parski nou annan lafwa. Bann nasyon zot, zot napa lafwa dan Bondye. Zot pou sirprann ler bann lanz pou lager pour nou.​—Rev. 19:11, 14, 15.

14. Ki nou kapab fer pour prepare pour sa ki pou arive dan lavenir?

¹⁴ Ki nou kapab fer pour prepare pour sa ki pou arive dan lavenir? Premyerman, nou pa devret mazinen ki bann keksoz materyel i vreman enportan parski en zour nou pou bezwen kit sa bann keksoz deryer. Nou osi bezwen kontant nou avek sa ki nou annan e nou devret zwaye parski nou annan en bon lanmitye avek Zeova. Pli nou konn nou Bondye, pli nou pou asire ki i pou kapab protez nou ler Gog sorti Magog i atak nou.

15. Ki ti arive avek David ler i ti ankor zenn, ki ti montre David ki Zeova ti pou toultan avek li?

¹⁵ Annou vwar kwa ankor ki ti ed David e ki kapab ed nou pour prepar nou pour fer fas avek bann difikilte. David ti dir: “Goute e vwar ki Zeova i bon. Ere sa dimoun ki pran refiz dan li.” (Ps. 34:8, NWT) Sa parol i eksplike akoz David ti konnen ki i ti kapab depan lo Zeova. David ti souvan depan lo Zeova e Bondye pa ti zanmen dezapwent li. Ler David ti  ankor zenn, i ti lager avek Golyat ki ti en zean Filisten. I ti dir avek sa gerye: “Ozordi menm, Zeova pou donn ou dan mon lanmen.” (1 Sam. 17:46, NWT) Pli tar ler David ti travay pour Lerwa Sail, plizyer fwa Sail ti esey touy David. Me “Zeova ti avek” David. (1 Sam. 18:12) Vi ki David ti’n ganny led Zeova oparavan, David ti konnen ki Zeova ti pou ed li avek son bann problenm.

16. Dan ki fason ki nou kapab ‘gout’ labonte Zeova?

¹⁶ Pli nou depan lo Zeova pour gid nou, pli nou pou asire ki Zeova pou kapab ed nou dan lavenir. Nou bezwen annan lafwa e pare pour depan lo Zeova pour demann nou anplwayer konze pour nou asiste lasanble oubyen pour demande pour aziste nou progranm travay pour nou kapab asiste tou nou renyon e pas plis letan dan predikasyon. Meton nou anplwayer i refize aksepte nou demann e nou perdi nou travay, eski nou annan lafwa ki Zeova pa pou zanmen kit nou oubyen abandonn nou e ki i pou toultan donn nou sa ki nou bezwen? (Ebr. 13:5) Bann frer ek ser ki dan servis a plen tan i kapab rakont zot leksperyans ki montre ki Zeova in ed zot ler zot ti vreman bezwen li. Pa bezwen enkyet, Zeova i fidel.

17. Ki nou teks pour lannen 2022 e akoz i apropriye?

¹⁷ Avek Zeova dan nou kote, nou napa rezon pour per sa ki pou arive dan lavenir. Nou Bondye pou toultan ed nou si nou kontinyen met lentere Rwayonm premye dan nou lavi. Pour fer nou rapel sa lenportans pour prepar nou pour bann zour difisil ki pe vini e pour annan konfyans ki Zeova pa pou zanmen abandonn nou, Konsey Direkter in swazir Psonm 34:10 konman nou teks pour lannen 2022: “Bann ki pe rod Zeova pa pou mank okenn keksoz ki bon.”