1. Ki mannyer ou ti pou dekri fanmir Zak?

 ZAK frer Zezi, ti grandi dan en fanmir ki ti fidel avek Zeova. b Son paran, Zozef ek Mari, ti kontan Zeova en kantite e zot ti fer zot mye pour servi Li. Zak ti annan en lot privilez, son gran frer ti vin Mesi. I ti en gran loner pour Zak form parti sa fanmir.

2. Ki rezon Zak ti annan pour vwar son gran frer konman en legzanp?

² Zak ti annan en kantite rezon pour vwar son gran frer konman en legzanp. (Mat. 13:55) Par egzanp, ler Zezi ti annan 12 an, i ti konn Lekritir telman byen e sa ti fer bann ansenyan Zerizalenm vreman etonnen. (Lik 2:46, 47) I kapab ki Zak ti travay konman en sarpantye ansanm avek Zezi. Si sa ti leka, Zak ti konn son frer tre byen. Nathan Knorr ti souvan dir: “Ou aprann en kantite lo en dimoun ler ou travay avek li.” c I tre probab ki Zak ti vwar ki mannyer “Zezi ti kontinyen grandi, vin deplizanpli saz e i ti kontinyelman fer plezir Bondye ek zonm.” (Lik 2:52) Alor, sa i kapab fer nou krwar ki Zak ti enn bann premye dimoun pour vin disip Zezi. Me i pa sa ki ti arive.

3. Ki mannyer Zak ti reazir ler Zezi ti konmans son minister?

 ³ Ler Zezi ti lo later, Zak pa ti vin enn son disip. (Zan 7:3-5) Anfet i kapab ki Zak ti enn parmi bann fanmir Zezi ki ti krwar ki Zezi ti’n “perdi latet.” (Mark 3:21) Osi, Labib pa dir ki Zak ti ansanm avek zot manman Mari, ler Zezi ti ganny met amor lo en poto.​—Zan 19:25-27.

4. Ki leson nou pou vwar dan sa lartik?

⁴ Pli tar, Zak ti demontre lafwa dan Zezi. I ti vin en manm kongregasyon Kretyen e i ti ganny byen respekte. Dan sa lartik, nou pou vwar de leson ki nou kapab aprann avek Zak: (1) Akoz nou devret annan limilite e (2) ki mannyer nou kapab vin bann bon ansenyan?

5. Ki Zak ti fer apre ki Zezi ti ganny resisite e aparet avek li?

⁵ Kan ki Zak ti vin en disip fidel Zezi? Apre ki Zezi ti ganny resisite, “i ti aparet avek Zak, answit avek tou bann zapot.” (1 Kor. 15:7) Apre sa, Zak ti vin en disip Zezi. I ti la ler bann zapot ti Zerizalenm dan en lasanm anler pe espere pour ganny lespri sen. (Akt 1:13, 14) Pli tar, Zak ti servi konman en manm konsey direkter. (Akt 15:6, 13-22; Gal. 2:9) Avan lannen 62, i ti ganny enspire pour ekri en let pour bann Kretyen swazir. Sa let i ed nou ozordi, ki swa nou annan sa lespwar pour viv pour touzour dan lesyel oubyen lo later. (Zak 1:1) En istoryen Zwif ki ti apel Josephus, ti dir ki Granpret Ananyas garson Anas, ti donn lord pour touy Zak. Zak ti reste fidel anver Zeova ziska son lanmor.

6. Dan ki fason ki Zak ti diferan avek bann sef relizye dan son letan?

⁶ Zak ti annan limilite. Akoz nou kapab dir sa? Annou vwar diferans ant lafason ki Zak ti reazir anver Zezi ek lafason ki en kantite sef relizye ti reazir. Ler Zak ti vwar laprev ki Zezi i Garson Bondye, avek limilite i ti aksepte. Me sa bann sef pret Zerizalenm pa ti azir parey Zak. Par egzanp, zot pa ti kapab dir ki Zezi pa ti’n resisit Lazar me kantmenm sa, zot pa ti aksepte ki Zezi ti’n ganny anvoye par Zeova. O kontrer zot ti esey touy Zezi ek Lazar. (Zan 11:53; 12:9-11) Pli tar, ler Zezi ti’n ganny resisite, sa bann sef pret ti esey anpes dimoun konnen ki Zezi ti’n resisite. (Mat. 28:11-15) Vi ki sa bann sef relizye ti orgeye, zot ti rezet Mesi.

7. Akoz nou pa devret vin en dimoun ki orgeye?

 ⁷ Ki leson nou aprann? Pa vin en dimoun ki orgeye e les Zeova ansenny ou. Zis parey en maladi i kapab fer li difisil pour leker en dimoun fonksyonn byen, lorgey i kapab fer li difisil pour nou obei Zeova. Bann Farizyen ti sitan orgeye ki zot ti refize krwar bann laprev ki Zezi ti annan lespri sen Bondye e ki i ti Garson Bondye. (Zan 12:37-40) Sa ti danzere pour zot parski i ti pou anpes zot ganny lavi eternel. (Mat. 23:13, 33) I vreman enportan ki nou kontinyen les Parol Bondye ek son lespri sen sanz nou personnalite, ed nou kontrol nou fason panse e fer bann bon desizyon. (Zak 3:17) Vi ki Zak ti annan limilite, i ti les Zeova ansenny li. Parey nou pou vwar, i akoz Zak ti annan limilite ki i ti vin en bon ansenyan.

8. Kwa ki pou ed nou vin bann bon ansenyan?

⁸ Zak pa ti’n fer bann letid avanse. I tre probab ki bann sef relizye dan son letan ti vwar li konman en dimoun ki “ti napa bokou ledikasyon e ki [i] ti [en] zonm ordiner,” parey zapot Pyer ek Zan. (Akt 4:13) Me Zak ti aprann pour li vin en bon ansenyan. Nou kapab vwar sa ler nou lir liv Zak ki dan Labib. Parey Zak, i kapab ki nou pa’n fer bann letid avanse. Kantmenm sa, avek led lespri sen Zeova ek bann formasyon ki nou gannyen atraver son lorganizasyon, nou osi nou kapab vin bann bon ansenyan. Aprezan annou vwar legzanp ki Zak in kite konman en bon ansenyan e ki leson nou kapab aprann.

9. Ki mannyer ou ti pou dekri lafason ki Zak ti ansennyen?

⁹ Zak pa ti servi bann mo ouswa bann leksplikasyon ki ti difisil pour konpran. Sa ti fer ki bann dimoun ki ti ekout li ti konnen ki zot ti bezwen fer e ki mannyer pour fer li. Par egzanp, annou vwar lafason ki Zak ti ansenny bann Kretyen ki zot devret pare pour soufer akoz lenzistis san gard rankin. I ti ansenny zot dan en fason senp. I ti dir: “Nou dir ki bann  ki’n andire in ganny beni. Zot in tann koz lo landirans Zob. Zot in vwar ki mannyer Zeova ti beni li finalman e ki Zeova i annan en kantite konpasyon ek mizerikord.” (Zak 5:11) Remarke ki sa leson ki Zak ti pe ansenny son bann frer ek ser, ti baze lo Lekritir. I ti servi Parol Bondye pour ed bann ki ti pe ekout li, pour vwar ki Zeova i toultan rekonpans bann ki fidel anver li, parey Zob. Zak ti ansenny sa leson dan en fason ki lozik par servi bann mo ki senp. Dan sa fason, i pa ti atir latansyon lo li me lo Zeova.

10. Ki en fason ki nou kapab swiv legzanp Zak ler nou pe ansennyen?

¹⁰ Ki leson nou aprann? Gard ou mesaz senp e servi Parol Bondye pour ansennyen. Ler nou ansenny lezot, nou pa devret esey montre zot ki kantite nou konnen me nou devret montre zot ki kantite Zeova i konnen e ki kantite Zeova i kontan zot. (Rom. 11:33) Nou kapab fer sa ler nou fer sir ki tou sa ki nou dir i baze lo Labib. Par egzanp, olye dir nou etidyan Labib ki nou ti pou fer si nou ti dan zot plas, nou devret ed zot pour reflesir lo bann legzanp ki dan Labib e pour konpran fason panse Zeova ek lafason ki i santi. Apre, zot pou aplik sa ki zot pe aprann, non pa akoz zot anvi fer nou plezir me akoz zot anvi fer plezir Zeova.

11. Ki problenm serten Kretyen ki ti pe viv dan menm letan avek Zak ti annan e ki konsey Zak ti donn zot? (Zak 5:13-15)

¹¹ Zak ti en dimoun realistik. Dan son let ki i ti ekri, Zak ti montre ki i ti konn bann problenm ki bann frer ek ser Kretyen ti annan e i ti donn zot lenstriksyon lo sa ki zot bezwen fer. Par egzanp, serten Kretyen ti tarde aplik konsey. (Zak 1:22) Lezot ti fer lapreferans pour bann ki ris. (Zak 2:1-3) I ti annan lezot ankor ki ti vwar li difisil pour zot vey sa ki zot dir. (Zak 3:8-10) Sa bann Kretyen ti annan bann problenm grav me Zak ti krwar ki zot ti kapab sanze. I ti donn zot konsey dan en fason zantiy me fran e i ti ankouraz bann ki ti bezwen led pour demann bann ansyen pour ed zot fer bann sanzman neseser.​—Lir Zak 5:13-15.

12. Ki mannyer nou kapab reste pozitif ler nou pe ed nou bann etidyan Labib?

¹² Ki leson nou aprann? Nou bezwen realistik me gard en pwennvi pozitif lo lezot. I kapab difisil pour serten etidyan Labib aplik bann konsey ki dan Labib. (Zak 4:1-4) I kapab pran letan pour zot aret bann move labitid e pour devlop bann kalite Kretyen. Parey Zak, nou devret annan kouraz pour dir nou etidyan Labib kote zot devret amelyore. Nou bezwen osi reste pozitif e annan konfyans ki Zeova pou atir bann dimoun ki annan limilite anver li e i pou donn zot sa lafors pour fer bann sanzman dan zot lavi.​—Zak 4:10.

13. Dapre Zak 3:2, ki Zak ti rekonnet?

¹³ Zak ti annan en lopinyon rezonnab lo son lekor. Zak pa ti krwar ki i ti pli enportan ki lezot Kretyen akoz i ti frer Zezi oubyen akoz i ti annan bann responsabilite enportan. I ti refer avek lezot Kretyen konman ‘son bann frer ki i kontan.’ (Zak 1:16, 19; 2:5) I pa ti esey fer lezot krwar ki i ti parfe. O kontrer i ti enkli son prop lekor ler i ti dir: “Nou tou nou souvan fer fot.”​—Lir Zak 3:2.

14. Akoz nou devret pare pour admet nou bann fot?

¹⁴ Ki leson nou aprann? Rapel ki nou tou nou fer pese. Nou pa devret krwar ki nou pli enportan ki nou etidyan Labib.  Akoz non? Si nou fer nou etidyan Labib krwar ki nou pa fer fot, i kapab dekouraze parski i kapab krwar ki i pa pou zanmen kapab obei Bondye parfetman. Me ler nou onnet e nou admet ki i pa’n toultan fasil pour nou aplik bann prensip Labib e ler nou eksplik lafason ki Zeova in ed nou sirmont nou bann difikilte, nou pou ed nou etidyan krwar ki li osi i kapab servi Zeova.

15. Ki mannyer ou pou dekri bann legzanp ki Zak ti servi? (Zak 3:2-6, 10-12)

¹⁵ Zak ti servi bann legzanp pour tous leker. Nou napa dout ki lespri sen ti ed li. Me i tre probab ki i ti osi aprann en kantite lo ki mannyer pour ansennyen par etidye bann legzanp ki son gran frer Zezi ti’n servi. Bann legzanp ki Zak ti servi dan son let ti senp e bann leson ki nou aprann avek sa bann legzanp i kler.​—Lir Zak 3:2-6, 10-12.

16. Akoz nou devret servi bann legzanp ki tous leker?

¹⁶ Ki leson nou aprann? Servi bann legzanp ki tous leker. Ler ou servi bann bon legzanp, ou kapab ed dimoun pour imazin sa ki ou pe ansenny zot. Sa i kapab ed zot pour rapel bann laverite enportan ki dan Labib. Zezi ti en eksper dan servi bann legzanp ki tous leker e son frer Zak ti swiv son legzanp. Annou vwar en legzanp ki Zak ti servi e annou vwar akoz sa ti en bon legzanp.

17. Akoz sa legzanp dan Zak 1:22-25, i en bon legzanp?

¹⁷ Lir Zak 1:22-25. Sa legzanp konsernan laglas, i en bon legzanp pour plizyer rezon. Zak ti pe ansenny en leson spesifik. I ti pe dir ki pour nou ganny bann byenfe avek Parol Bondye, nou pa devret zis lir me nou devret aplik sa ki nou pe lir. Zak ti servi en legzanp ki dimoun ti pou fasilman konpran. Sa legzanp i konsernan en dimoun ki pe get dan en laglas. Ki leson Zak ti ansennyen? I ti pou bet pour en zonm get dan en laglas, i vwar en defo ki i kapab aranze me i pa fer nanryen pour aranz sa defo. Pareyman i ti pou bet pour en dimoun lir Parol Bondye, vwar en keksoz ki i bezwen sanze konsernan son personnalite e i pa fer nanryen pour aranze.

18. Ki trwa keksoz ki nou devret fer ler nou pe servi en legzanp?

 ¹⁸ Ler nou servi en legzanp, nou kapab fer parey Zak par fer trwa keksoz: (1) Fer sir ki sa legzanp pou ed nou ansenny sa leson ki nou pe diskite. (2) Servi en legzanp ki fasil pour sa dimoun konpran. (3) Fer laplikasyon sa legzanp kler. Si ou vwar li difisil pour trouv en bon legzanp, get dan Watch Tower Publications Index an Angle, anba tit “Illustrations,” ou pou vwar en kantite legzanp ki ou kapab servi. Rapel ki bann legzanp i parey en mikro, setadir zot pou fer sa leson ki ou pe ansennyen vin pli kler. Alor, servi legzanp zis pour fer resorti bann pwen enportan ki ou pe ansennyen. Byensir sa rezon pli enportan ki nou anvi amelyor nou abilite pour ansennyen, i pa pour atir latansyon lo nou menm me pour ed otan dimoun posib pour form parti fanmir Zeova ki ere.

19. Ki mannyer nou montre ki nou kontan nou bann frer ek ser?

¹⁹ Zak ti annan en gran frer ki ti parfe me nou nou napa. Par kont, nou’n annan sa loner pour servi Zeova parmi nou bann frer ek ser Kretyen ki parey en gran fanmir. Nou demontre nou lanmour pour zot ler nou pas letan avek zot, aprann avek zot e ler nou travay avek zot dan predikasyon. Ler nou fer zefor pour swiv legzanp Zak dan nou latitid, konportman e dan lafason ki nou ansennyen, nou pe onor Zeova e nou pe ed bann dimoun senser pour vin pli pros avek nou Papa dan lesyel ki kontan nou.