1. Ki mannyer nou kapab pas letan avek Zeova?

 NOU kontan pas letan avek bann dimoun ki nou kontan. En msye ek en madanm ki’n marye i kontan pour pas letan avek kanmarad. Bann zenn i kontan pas letan avek zot bann zanmi. Nou tou, nou kontan sa letan ki nou pase avek nou bann frer ek ser. Me pli enportan ankor, nou kontan pas letan avek nou Bondye. Nou kapab fer sa ler nou koz avek li dan lapriyer, ler nou lir son Parol e ler nou medit lo son plan ek son bann zoli kalite. Sa letan ki nou pase avek Zeova i vreman presye.​—Ps. 139:17.

2. Ki difikilte nou fer fas avek?

² Menm si nou kontan pour pas letan avek Zeova, parfwa i kapab difisil pour fer sa. Nou telman bizi ki sa i kapab fer li difisil pour nou fer letan pour fer nou bann aktivite spirityel. Nou travay, nou fanmir ek lezot keksoz ki nou bezwen fer, i kapab pran en kantite nou letan ki nou santi ki nou tro bizi pour priye, pour etidye oubyen pour medite.

3. Ki en lot keksoz ki kapab pran nou letan?

 ³ I annan en lot keksoz ki kapab pran nou letan. Si nou pa fer atansyon, nou kapab les lezot aktivite ki pa mal, pran sa letan ki nou kapab servi pour vin pli pros avek Zeova. Par egzanp, i bon pran letan pour detann e i kapab ki sa ki nou fer i pa mal me si nou pas tro bokou letan pe detann, nou pou napa bokou letan pour ador Zeova. Nou bezwen rapel ki bann moman detant, i pa sa ki pli enportan.​—Prov. 25:27; 1 Tim. 4:8.

4. Ki nou pou vwar dan sa lartik?

⁴ Dan sa lartik, nou pou vwar akoz nou bezwen deside kwa ki pli enportan dan nou lavi. Nou pou osi vwar ki mannyer nou kapab servi byen sa letan ki nou pase avek Zeova e ki byenfe nou gannyen ler nou servi byen sa letan ki nou pase avek Zeova.

5. Ki mannyer Efezyen 5:15-17 i kapab ed en zenn pour fer sa pli bon swa dan lavi?

⁵ Fer sa pli bon swa dan lavi. Bann zenn i souvan mazin lo sa ki zot pou fer dan zot lavi. I kapab ki bann ansenyan ek manm fanmir ki pa Temwen Zeova i ankouraz zot pour al liniversite pour ki zot ganny en bon travay e ganny en kantite larzan. Si zot al liniversite, sa pou pran en kantite zot letan. De lot kote, bann paran ek zanmi dan kongregasyon i kapab ankouraz bann zenn pour servi Zeova tou zot lavi. Kwa ki kapab ed en zenn ki kontan Zeova pour fer sa pli bon desizyon? I ti pou bon pour li lir e reflesir lo Efezyen 5:15-17. (Lir.) Apre ki en zenn in lir sa bann verse, i kapab demann son lekor: ‘Kisisa “lavolonte Zeova”? Ki desizyon mon pou fer ki pou fer li plezir? Ki desizyon mon pou fer ki pou ed mwan pour servi byen mon letan?’ Gard antet ki “sa letan ki nou pe viv ladan i move” e sa lemonn dirize par Satan pou byento ganny detrir. I ti pou saz pour servi nou lavi pour fer bann keksoz ki fer Zeova kontan.

6. Ki desizyon Mari ti fer e akoz sa ti en desizyon ki saz?

⁶ Deside kwa ki pli enportan. Parfwa pour nou servi byen nou letan, nou bezwen deside ant de aktivite ki pa mal. Nou kapab vwar sa avek sa ki ti arive ler Zezi ti vizit Mari ek Mart. Mart ti sitan kontan pour akeyir Zezi ki i ti prepar en gran repa pour Zezi. Me Mari ti asiz avek Zezi e i ti ekout sa ki Zezi ti pe ansennyen. Sa ki Mart ti fer pa ti mal me Zezi ti dir ki Mari ti’n “fer sa bon swa.” (Lik 10:38-42) I kapab ki avek letan Mari ti oubliye ki i ti manze sa zour me nou kapab asire ki i pa ti zanmen oubliy sa ki i ti aprann avek Zezi. Zis parey Mari ti apresye sa letan ki i ti pase avek Zezi, nou osi nou apresye sa letan ki nou pase avek Zeova. Ki mannyer nou kapab servi byen nou letan?

7. Akoz i vreman enportan pour priye, etidye Labib e medite?

⁷ Ou bezwen konpran ki lapriyer, letid Labib ek meditasyon i form parti nou ladorasyon. Ler nou priye, nou pe koz avek nou Papa ki dan lesyel ki kontan nou en kantite. (Ps. 5:7) Ler nou etidye Labib, nou pe aprann “konn Bondye” ki Sours tou lasazes. (Prov. 2:1-5, NWT) Ler nou medite, nou reflesir lo bann zoli  kalite ki Zeova i annan e nou mazin lo bann keksoz merveye ki Zeova i anvi fer pour nou e pour tou dimoun. Sa i sa pli bon fason pour servi nou letan. Me kwa ki kapab ed nou pour fer sa?

8. Ki nou kapab aprann avek lafason ki Zezi ti servi son letan dan dezer?

⁸ Si i posib, swazir en landrwa ki trankil. Annou vwar legzanp Zezi. Avan ki i ti konmans son minister lo later, Zezi ti pas 40 zour dan dezer. (Lik 4:1, 2) Laba i ti trankil. Zezi ti kapab priy Zeova e medit lo sa ki son Papa ti anvi i fer. Sa ti prepar li pour bann problenm ki i ti pou rankontre. Ki ou kapab aprann avek legzanp Zezi? Si ou sorti dan en gran fanmir, i kapab difisil pour trouv en landrwa ki trankil dan ou lakour. Dan en sityasyon koumsa, ou kapab rod en landrwa deor ki trankil. I sanmenm sa ki Julie ti fer ler i ti anvi priy Zeova. Julie ek son msye i reste Lafrans dan en pti apartman e i difisil pour ganny en moman trankilite li tousel. Julie i dir: “Toulezour mon al marse dan en zarden. Laba, mwan mon tousel. Mon kapab konsantre e koz avek Zeova.”

9. Menm si Zezi ti vreman bizi, ki mannyer i ti montre ki son relasyon avek Zeova ti vreman presye?

⁹ Zezi ti vreman bizi. Ler i ti lo later, dimoun ti swiv li partou kot i ti ale e zot tou zot ti anvi son latansyon. En fwa ler i ti dan en lavil, “tou zabitan sa lavil ti rasanble la devan laport” pour vwar li. Kantmenm sa, Zezi ti fer sir ki i toultan fer letan pour priy Zeova. Avan soley ti leve, i ti al dan “en landrwa izole” kot i ti kapab pas letan avek son Papa li tousel.​—Mark 1:32-35.

10-11. Dapre Matye 26:40, 41, ki konsey Zezi ti donn son bann disip dan zarden Zetsemane me ki ti arive?

¹⁰ Sa zour swar avan i mor, avan i fini son minister, ankor enn fwa Zezi ti rod en landrwa trankil pour li kapab medite e priye. I ti al dan zarden Zetsemane. (Mat. 26:36) Ler i ti laba, Zezi ti donn son bann disip en konsey enportan konsernan lapriyer.

¹¹ Annou vwar sa ki ti arive. I ti vreman tar ler zot ti ariv dan zarden Zetsemane e petet minwi ti’n sonnen. Zezi ti demann son bann zapot pour “kontinyen veye” e li i ti al priye. (Mat. 26:37-39) Me pandan ki Zezi ti pe priye, son bann zapot ti tonm dormi. Ler Zezi ti vwar zot pe dormi, i ti demann zot ankor enn fwa pour “kontinyen veye e kontinyen priye.” (Lir Matye 26:40, 41.) I ti realize ki zot ti anba en kantite presyon e zot  ti fatige. Alor, avek konpasyon i ti dir ki “lekor enparfe i feb.” Apre sa, Zezi ti al ankor de fwa pour li priye e sak fwa ler i ti retournen, i ti vwar son bann disip pe dormi olye priye.​—Mat. 26:42-45.

12. Ki ou kapab fer si parfwa ou tro strese ouswa tro fatige pour priye?

¹² Swazir sa bon moman. I kapab ki parfwa nou tro strese oubyen tro fatige pour priye. Si sa i ariv avek ou, ou pa tousel. Ki ou kapab fer? Serten ki ti abitye fer lapriyer a lafen lazournen, in vwar ki i pli bon pour fer lapriyer en pe pli boner ler zot pa tro fatige. Lezot in vwar ki zot konsantre pli byen ler zot fer lapriyer dan en pozisyon spesifik, par egzanp ler zot asize ouswa azenou. Me ki ou kapab fer si ou tro enkyet ouswa tro dekouraze pour priye? Dir Zeova ki mannyer ou pe santi. Ou kapab asire ki nou Papa ki annan konpasyon pou konpran ou.​—Ps. 139:4.

13. Ki mannyer bann lekipman elektronik i kapab distrer nou ler nou pe pas letan avek Zeova?

¹³ Pa les ou ganny distrer ler ou pe etidye Labib. Lapriyer pa sa sel fason ki kapab ed nou pour ranforsi nou lanmitye avek Zeova. Ler nou etidye Parol Bondye e nou asiste renyon dan kongregasyon, sa i osi kapab ed nou vin pli pros avek Zeova. Eski i annan okenn keksoz ki ou kapab fer pour servi byen sa letan ki ou etidye e ki ou asiste renyon? Demann ou lekor: ‘Kwa ki distrer mwan pandan renyon oubyen ler mon pe etidye Labib?’ Eski pandan sa bann moman dimoun i telefonn ou, anvoy ou email ouswa bann mesaz lo ou telefonn oubyen lo bann lezot lekipman elektronik? Ozordi, plizyer bilyon dimoun i annan sa bann lekipman elektronik. Serten serser i dir ki si nou annan en telefonn o bor nou ler nou pe esey konsantre, sa i kapab distrer nou. En profeser psikolozi i dir: “Ou pa konsantre lo sa ki ou pe fer. Me ou lespri i lwen.” Avan lasanble i konmanse, nou souvan ganny dir pour aziste nou lekipman elektronik pour pa deranz lezot. Eski nou kapab fer parey ler nou tousel pour ki nou bann lekipman elektronik pa distrer nou e enteronp nou ler nou pe pas letan avek Zeova?

14. Dapre Filipyen 4:6, 7, ki mannyer Zeova pou ed nou konsantre?

 ¹⁴ Demann Zeova pour ed ou konsantre. Ler ou remarke ki ou pe konmans mazin lezot keksoz pandan ki ou pe etidye ouswa pandan ki ou dan renyon, demann Zeova pour ed ou. Si ou enkyet, petet ou pa kapab aret mazin ou problenm e konsantre lo Parol Bondye me i vreman enportan ki ou fer sa. Priy Zeova e demann li pour donn ou sa lape ki pou protez ou leker ‘ek lespri.’​—Lir Filipyen 4:6, 7.

15. Ki en byenfe nou gannyen ler nou pas letan avek Zeova?

¹⁵ Si ou pran letan pour koz avek Zeova, pour ekout li e pour medit lo son bann zoli kalite ek son plan, ou pou ganny en kantite byenfe. Ki mannyer sa? Premyerman, ou pou fer bann pli bon desizyon. Labib i asir nou ki “sa ki mars avek dimoun saz pou vin saz.” (Prov. 13:20, NWT) Alor, anmezir ki ou pas letan avek Zeova ki Sours tou lasazes, avek letan ou pou vin pli saz. Ou pou konpran pli byen ki mannyer pour fer li plezir e evite fer bann desizyon ki i pa kontan.

16. Ki mannyer ler nou pas letan avek Zeova, sa i ed nou pour vin en pli bon ansenyan?

¹⁶ Dezyenmman, ou pou vin en pli bon ansenyan. Ler nou fer letid Labib avek en dimoun, enn bann lobzektif pli enportan ki nou annan i pour ed sa etidyan vin pli pros avek Zeova. Pli nou fer lapriyer e nou aprann lo Zeova, nou kontan li plis e nou pou pli kapab ansenny sa etidyan pour kontan Zeova. Annou vwar legzanp Zezi. Lafason ki Zezi ti koz lo Zeova ti montre ki i ti kontan Zeova e sa ti ed son bann disip pour kontan Zeova zot osi.​—Zan 17:25, 26.

17. Akoz lapriyer ek letid personnel i kapab ed nou ranforsi nou lafwa?

¹⁷ Trwazyenmman, ou lafwa pou vin pli for. Mazin sa ki arive ler ou demann Bondye pour gid ou, pour rekonfort ou ouswa pour ed ou. Sak fwa ki Zeova i reponn sa bann lapriyer, ou lafwa i vin pli for. (1 Zan 5:15) Kwa ankor ki kapab ed ou pour ranforsi ou lafwa? Ler ou fer letid personnel. Rapel ki “en dimoun i ganny lafwa apre ki i’n tann mesaz.” (Rom. 10:17) Me nou bezwen fer plis ki zis etidye. Kwa ankor ki nou bezwen fer?

18. Akoz nou bezwen medite? Donn en legzanp.

¹⁸ Nou bezwen medit lo sa ki nou pe aprann. Annou vwar leksperyans sa  psalmis ki ti ekri Psonm 77. I ti enkyet parski i ti krwar ki li ek bann lezot Izraelit ti’n perdi laprouvasyon Zeova. I ti sitan enkyet ki i pa ti dormi aswar. (Verse 2-8) Ki i ti fer? I ti dir Zeova: “Mon pou medit lo tou ou bann aksyon e reflesir lo lafason ki ou azir.” (Verse 12) Byensir, sa psalmis ti konn konsernan bann keksoz ki Zeova ti’n fer pour son pep dan lepase me kantmenm sa, i ti demande: “Eski Bondye in oubliye pour demontre son labonte anver nou oubyen eski son lakoler in fer disparet son pitye anver nou?” (Verse 9) Sa psalmis ti medit lo tou sa ki Zeova ti’n fer e lefet ki Zeova ti’n demontre konpasyon dan lepase. (Verse 11) Ki ti arive apre? Sa psalmis ti konvenki ki Zeova pa ti pou abandonn Son pep. (Verse 15) Dan menm fason, ou lafwa i vin pli for anmezir ou medit lo sa ki Zeova in fer pour son pep e lo sa ki i’n fer pour ou personnelman.

19. Ki lezot byenfe nou pou gannyen ler nou pas letan avek Zeova?

¹⁹ Katriyenmman e pli enportan, ou lanmour pour Zeova pou ogmante. Lanmour pou motiv ou pour obei Zeova, pour fer bann sakrifis ki pou fer li plezir e pour andir nenport ki difikilte. (Mat. 22:37-39; 1 Kor. 13:4, 7; 1 Zan 5:3) I napa nanryen ki pli presye ki en lanmitye pros avek Zeova.​—Ps. 63:1-8.

20. Ki mannyer ou pou fer sir ki ou annan letan pour pas avek Zeova?

²⁰ Rapel ki lapriyer, letid Labib ek meditasyon i form parti nou ladorasyon. Parey Zezi, rod en landrwa ki trankil pour pas letan avek Zeova. Anpes okenn keksoz distrer ou. Demann Zeova pour ed ou konsantre pandan bann aktivite spirityel. Si ou servi byen ou letan la konmela, Zeova pou rekonpans ou e ou pou viv pour touzour dan nouvo lemonn.​—Mark 4:24.