1-2. (a) Ki mannyer nou kapab santi ler nou medit lo lavi ek minister Zezi? (b) Ki nou pou diskite dan sa lartik?

 LER en dimoun ki nou kontan i mor, nou mank li en kantite. Petet o konmansman nou leker i fermal ler nou mazin bann zour avan ki i ti mor, sirtou si i’n soufer avan i mor. I kapab ki apre serten letan nou rekonmans santi nou zwaye ler nou mazin en keksoz ki i’n ansenny nou oubyen en keksoz ki i’n fer ouswa dir pour ankouraz nou oubyen fer nou sourir.

² Dan sa menm fason, nou sagren ler nou lir konsernan soufrans ki Zezi in pas ladan ek son lanmor. Pandan sezon Memoryal, nou pran letan pour medit lo ki kantite sakrifis Zezi i presye. (1 Kor. 11:24, 25) Me nou osi santi nou zwaye ler nou reflesir lo tou bann keksoz ki Zezi ti dir e fer ler i ti lo later. Ler nou reflesir lo sa ki Zezi pe fer la konmela e lo sa ki i pou fer pour nou dan lavenir, sa i ankouraz nou. Parey nou pou vwar dan sa lartik, ler nou medit lo sa bann keksoz e lo sa lanmour ki Zezi i annan pour nou, sa i kapab motiv nou pour demontre nou lapresyasyon dan diferan fason.

3. Akoz nou rekonesan pour sa ranson?

³ Nou santi nou rekonesan ler nou reflesir lo lavi ek lanmor Zezi. Ler Zezi ti lo later, i ti ansenny dimoun konsernan bann bon keksoz ki Rwayonm Bondye pou fer. Nou vreman apresye sa bann laverite ki Zezi in ansennyen. Nou rekonesan pour sa ranson parski i fer li posib pour nou annan en bon lanmitye avek Zeova ek Zezi. Bann ki demontre lafwa dan Zezi i osi annan sa lespwar pour viv pour touzour e pour revwar bann dimoun ki zot kontan  ki’n mor. (Zan 5:28, 29; Rom. 6:23) Nou pa’n fer nanryen pour merit sa bann benediksyon e nou pa pou zanmen kapab repey Bondye ek Kris pour sa ki zot in fer pour nou. (Rom. 5:8, 20, 21) Me nou kapab montre zot ki kantite nou rekonesan pour sa ki zot in fer. Ki mannyer?

4. Ki mannyer Mari Magdalenn ti demontre lapresyasyon pour sa ki Zezi in fer pour li? (Vwar portre.)

⁴ Annou vwar legzanp en madanm Zwif ki ti apel Mari Magdalenn. I ti pe soufer en kantite parski i ti annan set demon ki ti pe tourmant li. I tre probab ki i ti santi ki personn pa kapab ed li. Alor nou kapab imazinen ki i ti vreman rekonesan ler Zezi ti liber li anba lenfliyans sa bann demon. Sa ti motiv li pour vin en disip Zezi e pour servi son letan, lenerzi ek son bann keksoz materyel pour siport Zezi dan predikasyon. (Lik 8:1-3) Menm si Mari ti vreman rekonesan pour sa ki Zezi in fer pour li personnelman, i kapab ki i pa ti konnen ki Zezi ti pou fer bokou plis pour li dan lavenir. Zezi ti pou donn son lavi “pour ki nenport ki ki demontre lafwa dan li” i kapab viv pour touzour. (Zan 3:16) Me kantmenm sa, Mari ti demontre son lapresyasyon par reste fidel avek Zezi. Ler Zezi ti pe soufer lo poto, Mari ti pe debout lanmenm o bor parski i ti kontan Zezi e i ti anvi rekonfort bann ki ti la. (Zan 19:25) Apre ki Zezi ti mor, Mari ek de lezot madanm ti anmenn zepis santi bon kot latonm Zezi pour prepar lekor Zezi. (Mark 16:1, 2) Zeova ti rekonpans Mari pour son fidelite. Mari ti ganny sa privilez pour zwenn e pour koz avek Zezi apre ki Zezi ti’n resisite. Sa i en loportinite ki pa bokou disip Zezi ki ti gannyen.​—Zan 20:11-18.

5. Ki mannyer nou kapab demontre nou lapresyasyon pour tou sa ki Zeova ek Zezi in fer pour nou?

⁵ Nou osi nou kapab demontre nou  lapresyasyon pour tou sa ki Zeova ek Zezi in fer pour nou par servi nou letan, nou lenerzi ek nou keksoz materyel pour siport sa travay Rwayonm. Par egzanp, nou kapab ede pour konstri e mentenir bann batiman ki ganny servi dan ladorasyon Zeova.

6. Akoz nou kapab dir ki ranson i en kado pour sakenn parmi nou?

⁶ Ler nou reflesir lo ki kantite Zeova ek Zezi i kontan nou, sa i motiv nou pour kontan zot nou osi. (1 Zan 4:10, 19) Ler nou realize ki Zezi in mor pour nou personnelman, sa i fer nou kontan zot plis ankor. Zapot Pol ti rekonnet sa e i ti eksprim son lapresyasyon ler i ti ekri bann Kretyen dan lavil Galat. I ti dir: “Garson Bondye [in] kontan mwan e donn son lavi pour mwan.” (Gal. 2:20) Gras a sa ranson, Zeova in atir ou ver li pour ki ou kapab vin son zanmi. (Zan 6:44) Pa ou vreman kontan ler ou konnen ki Zeova in vwar en keksoz bon dan ou e i’n pey en pri vreman ser pour ou kapab vin son zanmi? Eski pa sa i fer ou kontan Zeova ek Zezi plis ankor? Alor nou devret demann nou lekor: ‘Ki mon lanmour pour Zeova ek Zezi i motiv mwan pour fer?’

7. Parey nou vwar dan portre, ki mannyer nou tou nou kapab demontre nou lanmour pour Zeova ek Zezi? (2 Korentyen 5:14, 15; 6:1, 2)

⁷ Sa lanmour ki nou annan pour Bondye ek pour Kris i motiv nou pour demontre lanmour pour lezot. (Lir 2 Korentyen 5:14, 15; 6:1, 2.) En fason ki nou demontre nou lanmour i par fer tou sa ki nou kapab dan sa travay predikasyon. Nou koz avek tou dimoun ki nou zwenn, nenport ras oubyen tribi ki zot sorti ladan, ki swa zot ris, pov, edike oubyen pa edike. Dan sa fason, nou  pou pe fer lavolonte Zeova parski i son lavolonte “ki tou sort kalite dimoun i ganny sove e ganny konnesans egzakt lo laverite.”​—1 Tim. 2:4.

8. Ki mannyer nou kapab demontre lanmour pour nou bann frer ek ser?

⁸ Nou osi montre ki nou kontan Bondye ek Kris par demontre lanmour pour nou bann frer ek ser. (1 Zan 4:21) Nou demontre lentere dan zot e nou ed zot ler zot dan problenm. Nou rekonfort zot ler en dimoun ki zot kontan i mor, nou vizit zot ler zot malad e nou fer nou mye pour ankouraz zot ler zot dekouraze. (2 Kor. 1:3-7; 1 Tesa. 5:11, 14) Nou kontinyen priy pour zot parski nou konnen ki “siplikasyon en zonm drwat i annan bokou lefe.”​—Zak 5:16.

9. Ki en lot fason nou kapab montre ki nou kontan nou bann frer ek ser?

⁹ Nou osi demontre lanmour pour nou bann frer ek ser par fer bokou zefor pour gard lape avek zot. Nou esey swiv legzanp Zeova e pardonn lezot. Si Zeova ti pare pour donn son Garson pour mor pour nou pese, pa nou devret pare pour pardonn nou bann frer ek ser ler zot fer keksoz ki ofans nou? Nou pa pou anvi vin parey sa move lesklav ki Zezi ti koz lo la dan en legzanp. Menm apre ki son met ti’n kennsel sa gro det ki i ti annan, sa lesklav pa ti oule pardonn en lot lesklav ki ti dwa li mwens larzan. (Mat. 18:23-35) Si i annan en problenm ant ou ek en dimoun dan kongregasyon, eski ou kapab pran linisyativ e apros sa dimoun pour fer lape avan ki ou asiste Memoryal? (Mat. 5:23, 24) Si ou fer sa, ou pou pe montre ki ou kontan Zeova ek Zezi en kantite.

10-11. Ki mannyer bann ansyen i kapab montre ki zot kontan Zeova ek Zezi? (1 Pyer 5:1, 2)

¹⁰ Ki mannyer bann ansyen i kapab montre ki zot kontan Zeova ek Zezi? En fason ki zot kapab fer sa i par pran swen avek bann mouton Zezi. (Lir 1 Pyer 5:1, 2.) Zezi ti fer zapot Pyer konpran sa. Apre ki Pyer ti’n dir ki i pa konn Zezi trwa fwa, i tre probab ki Pyer ti vreman anvi montre ki i kontan Zezi. Apre ki Zezi ti’n resisite, i ti demann Pyer: “Simon garson Zan, eski ou kontan mwan?” Nou kapab asire ki Pyer ti pou fer tou sa ki i kapab pour montre ki i kontan son Met. Zezi ti dir Pyer: “Pran swen avek mon bann pti mouton.” (Zan 21:15-17) Pour larestan son lavi, Pyer ti montre ki i kontan Zezi par pran byen swen avek bann mouton Zezi.

¹¹ Ansyen, pandan sa sezon Memoryal, ki mannyer ou kapab montre ki sa ki Zezi ti dir zapot Pyer i enportan pour ou? Ou kapab montre ki kantite ou kontan Zeova ek Zezi par fer letan pour ankouraz ou bann frer ek ser e par fer plis pour ed bann ki inaktif pour retourn kot Zeova. (Ezek. 34:11, 12) Ou kapab osi demontre lentere dan bann etidyan Labib e dan bann ki asiste Memoryal pour premye fwa. Nou anvi zot santi zot alez parski nou anvi ki zot osi zot vin en disip Zezi.

12. Akoz ler nou reflesir lo sa ki Zezi ti dir sa zour swar avan i mor, sa i donn nou kouraz? (Zan 16:32, 33)

¹² Sa zour swar avan Zezi i mor, i ti dir son bann disip: “Zot pou bezwen soufer dan sa lemonn, me pran kouraz! Mon’n  ranport laviktwar lo lemonn!” (Lir Zan 16:32, 33.) Kwa ki ti ed Zezi pour demontre kouraz ler son bann lennmi ti menas li e pour reste fidel ziska ki i mor? I ti depan lo Zeova. I ti konnen ki son bann disip ti pou fer fas avek bann problenm parey, alor i ti demann Zeova pour vey lo son bann disip. (Zan 17:11) Sa i donn nou kouraz parski Zeova i pli for ki tou nou bann lennmi. (1 Zan 4:4) Zeova i vwar tou keksoz. Nou asire ki si nou depan lo Zeova, i pou ed nou pour sirmont nou bann lafreyer e pour demontre kouraz.

13. Ki mannyer Zozef ki sorti Arimate ti demontre kouraz?

¹³ Annou vwar legzanp Zozef ki sorti Arimate. I ti en zonm ki ti ganny byen respekte par bann Zwif. I ti en manm Sannedren, ki ti lakour siprenm Zwif. Ler Zezi ti lo later, Zozef pa ti demontre kouraz. Zan ti dir ki Zozef ti “en disip Zezi me an sekre akoz i ti per bann Zwif.” (Zan 19:38) Menm si Zozef ti kontan pour tann sa mesaz konsernan Rwayonm, i ti kasyet ki i ti annan lafwa dan Zezi. I kapab ki i ti per ki si dimoun i konnen ki i en disip Zezi, zot ti pou nepli annan respe pour li. Me Labib i dir ki apre ki Zezi ti mor, Zozef ti ‘pran kouraz e al demann Pilat lekor Zezi.’ (Mark 15:42, 43) Aprezan, Zozef ti nepli kasyet ki i ti en disip Zezi.

14. Ki ou devret fer si ou annan lafreyer zonm?

¹⁴ Eski parey Zozef, ou annan lafreyer zonm? Ler ou kot lekol oubyen kot travay, eski parfwa ou kanmi pour dir lezot ki ou en Temwen Zeova? Eski ou per pour vin en proklanmater oubyen pour batize parski ou per sa ki lezot i kapab mazinen lo ou? Pa les bann santiman koumsa anpes ou fer sa ki ou konnen i byen. Dir Zeova ki mannyer ou pe santi. Demann li pour donn ou sa kouraz pour fer son lavolonte. Anmezir ki ou vwar ki mannyer Zeova i reponn ou lapriyer, ou pou vin pli for e ou pou annan plis kouraz.​—Iza. 41:10, 13.

15. Apre ki Zezi ti aparet avek son bann disip, ki zot lazwa ti motiv zot pour fer? (Lik 24:52, 53)

¹⁵ Ler Zezi ti mor, bann disip ti sagren. Met ou dan plas sa bann disip. Zot ti’n perdi en zanmi ki zot kontan e zot ti’n osi perdi lespwar. (Lik 24:17-21) Me ler Zezi ti aparet avek zot, i ti pran letan  pour ed zot konpran lafason ki in akonpli profesi Labib. I ti osi donn zot en travay enportan pour fer. (Lik 24:26, 27, 45-48) Ler Zezi ti mont dan lesyel 40 zour pli tar, bann disip ti nepli sagren me zot ti zwaye. Zot ti zwaye parski zot ti konnen ki Zezi i vivan e ki i ti pou ed zot pour fer sa travay ki i’n donn zot pour fer. Zot lazwa ti motiv zot pour loue Zeova san arete.​—Lir Lik 24:52, 53; Akt 5:42.

16. Ki mannyer nou kapab swiv legzanp bann disip Zezi?

¹⁶ Ki mannyer nou kapab swiv legzanp bann disip Zezi? Nou kapab trouv lazwa dan nou servis pour Zeova pa zis pandan sezon Memoryal me tou dilon lannen. Pour nou fer sa, nou bezwen met Rwayonm Bondye premye dan nou lavi. Par egzanp, en kantite proklanmater in sanz zot ler travay pour zot kapab partisip dan predikasyon, al renyon e fer ladorasyon fanmir regilyerman. Serten in deside pour pa annan bann keksoz materyel ki lezot i krwar i neseser. Zot in fer sa pour zot kapab fer plis dan kongregasyon ouswa pour zot kapab al servi dan bann landrwa kot i annan bezwen pour plis proklanmater. Menm si nou bezwen andire dan nou servis pour Zeova, Zeova i promet ki i pou beni nou si nou met Rwayonm premye dan nou lavi.​—Prov. 10:22; Mat. 6:32, 33.

17. Ki ou determinen pour fer pandan sa sezon Memoryal? (Vwar portre.)

¹⁷ Nou pe esper avek pasyans pour selebre Memoryal Mardi le 4 Avril. Me pa esper ziska sa zour pour medit lo lavi ek lanmor Zezi e pour medit lo sa lanmour ki Zezi ek Zeova in demontre anver nou. Servi tou loportinite ki ou annan pandan sezon Memoryal pour reflesir lo sa bann keksoz. Par egzanp, pran letan e medit lo bann levennman ki lo sa latab ki annan pour tit “Dernyen semenn lavi Zezi lo later” dan latab 16 ki dan brosir En led pour etidye Parol Bondye. Anmezir ki ou fer sa, remark bann verse Labib ki pou fer ou annan plis lapresyasyon, lanmour, kouraz ek lazwa. Apre, esey reflesir lo bann diferan fason ki ou kapab montre ou rekonesans. Ou kapab asire ki Zezi pou apresye tou sa ki ou fer pour mazin li pandan sezon Memoryal.​—Rev. 2:19.