1. Akoz bokou dimoun ozordi napa konfyans dan Labib?

 LAPLIPAR dimoun ozordi pa konnen lekel ki zot kapab annan konfyans ladan. Zot pa asire si bann dimoun ki zot respekte, par egzanp bann politisyen, syantis ek biznesmenn, i toultan esey fer sa ki pli bon pour zot. An plis, zot napa respe pour bann sef relizye ki dir ki zot Kretyen. Alor nou pa sirprann ki sa bann dimoun napa konfyans dan Labib, sa liv ki sa bann sef relizye i dir zot pe swiv.

2. Dapre Psonm 119:160, ki nou devret konvenki?

² Konman serviter Zeova, nou konvenki ki Zeova i sa “Bondye laverite” e ki i toultan anvi sa ki pli bon pour nou. (Ps. 31:5; Iza. 48:17) Nou konnen ki nou kapab annan konfyans dan sa ki nou lir dan Labib. Nou krwar ki “tou parol [Bondye] i laverite.” (Lir Psonm 119:160.) Nou dakor avek sa ki en spesyalis Labib ti dir: “Napa nanryen ki Bondye in dir ki pa vre oubyen ki pa pou vin vre. Pep Bondye i annan konfyans dan sa ki Bondye i dir parski zot annan konfyans dan sa Bondye ki’n dir sa bann parol.”

3. Ki nou pou vwar dan sa lartik?

³ Ki mannyer nou kapab ed lezot pour annan konfyans dan Parol Bondye parey nou, nou annan? Annou vwar trwa rezon akoz nou kapab annan konfyans dan Labib. Nou pou vwar ki sa ki Labib in dir pa’n sanze, ki bann profesi Labib in ganny akonplir e ki Labib i kapab ed dimoun pour sanz zot lavi.

4. Akoz serten dimoun i krwar ki sa ki dan Labib ozordi i pa parey avek sa ki Zeova ti fer bann zonm fidel ekri?

⁴ Bondye in servi apepre 40 zonm pour ekri Labib. Me napa enn sa bann lekritir orizinal ki ankor egziste. b Nou annan zis kopi sa ki’n ganny kopye plizyer fwa. Sa i fer serten dimoun demande si sa ki nou lir dan Labib ozordi, i egzakteman sa ki sa bann zonm ki Zeova ti servi ti ekri. Eski ou’n deza mazinen ki mannyer nou asire ki i sanmenm ki Zeova ti fer sa bann zonm ekri?

5. Ki mannyer Lekritir Ebre ti ganny kopye? (Vwar portre lo kouvertir.)

⁵ Pour prezerv sa mesaz ki dan Labib, Zeova ti donn lord son pep pour kopye Labib. I ti donn lord bann lerwa Izrael pour fer zot prop kopi Lalwa Moiz e i ti apwent bann Levit pour ansenny pep Izrael konsernan sa bann Lalwa. (Det. 17:18; 31:24-26; Nee. 8:7) Apre ki bann Zwif ti’n al an egzil Babilonn, en group dimoun ti konmans fer plizyer kopi Lekritir Ebre. (Ezra 7:6) Sa bann zonm ti fer byen atansyon ler zot ti pe kopye Lekritir Ebre. Avek letan, bann dimoun ki ti pe kopye Parol Bondye, pa ti zis kont bann mo me zot ti menm kont bann let pour fer sir ki zot pa ti mank nanryen e ki zot ti pe ekri tou keksoz korekteman. Me sa bann zonm ti enparfe e sa ti fer ki i ti annan bann pti fot dan serten sa bann kopi. Me vi ki i ti annan plizyer kopi bann menm teks, pli tar zot ti kapab vwar kote ki i annan bann fot. Ki mannyer zot ti fer sa?

6. Ki mannyer bann spesyalis Labib ti kapab trouv bann fot dan bann kopi Labib?

⁶ Bann spesyalis Labib dan nou letan i annan en bon fason pour trouv bann fot ki bann ki’n kopye Labib in fer. Annou vwar en legzanp ki pou ed nou konpran sa. Meton en group 100 zonm i ganny demande pour kopye bann lekritir ki lo en paz. Enn sa bann zonm in fer en pti fot ler i pe kopye. En fason ki nou kapab vwar sa fot i par konpar sa kopi ki sa zonm in fer avek lezot kopi. Pareyman ler bann spesyalis Labib in konpar plizyer kopi Labib avek kanmarad, zot ti kapab trouv bann fot oubyen bann keksoz ki bann ki’n kopye Labib pa’n mete.

7. Eski bann ki ti kopye Labib ti fer atansyon ler zot ti pe kopi Labib? Eksplike.

⁷ Bann ki ti kopye Labib ti travay dir pour fer sir ki zot kopye li dan en fason egzakt. Annou vwar en legzanp ki montre sa. Sa pli vye kopi Lekritir Ebre an antye ti ganny fer lannen 1008 oubyen 1009 e i apel Leningrad Codex. Me tou resaman, in annan plizyer kopi Labib ek bann bout kopi Labib ki’n ganny dekouver ki apepre 1,000 lannen pli vye ki Leningrad Codex. Vi ki sa bann vye kopi Labib in ganny kopye e rekopye plizyer fwa pandan 1,000 an, serten i kapab krwar ki sa ki dan Leningrad Codex i vreman diferan avek sa bann kopi Labib ki pli vye. Me sa i pa leka. Ler bann spesyalis Labib in konpar bann vye kopi Labib avek bann ki pli resan, zot in vwar ki menm si i annan serten mo ki diferan, sa mesaz ki dan Labib pa’n sanze.

8. Ki diferans i annan ant bann kopi Lekritir Grek Kretyen ek bann kopi lezot liv ki ti ganny ekrir sa letan?

⁸ Bann Kretyen dan premye syek osi ti fer bann kopi Lekritir. Zot ti fer bann  kopi sa 27 liv ki dan Lekritir Grek ki zot ti servi dan zot bann renyon e dan predikasyon. En spesyalis Labib ki ti konpar bann kopi Lekritir Grek avek lezot liv ki ti’n ganny ekrir sa letan, i dir sa konsernan bann kopi Labib: “An zeneral i annan plis bann kopi Lekritir Grek ozordi ki sa bann lezot liv, . . . e sa bann kopi Lekritir Grek i tant pour pli konplet.” Sa liv Anatomy of the New Testament i dir: “Nou kapab annan konfyans ki sa ki nou lir dan en bon tradiksyon modern Lekritir Grek i sanmenm sa ki bann ekriven sa bann liv ti ekri.”

9. Dapre Izai 40:8, ki nou kapab asire konsernan sa mesaz ki dan Labib?

⁹ Pour plizyer santenn lannen, en kantite dimoun ki kopi Labib in travay dir pour fer bann bon kopi Labib. I pour sa rezon ki ozordi nou annan en Labib ki egzakt pour nou kapab lir e etidye. c Nou konnen ki Zeova ki’n fer sir ki nou annan son Parol ozordi e ki son Parol i egzakt. (Lir Izai 40:8.) Me serten i kapab dir ki zis akoz sa mesaz ki dan Labib pa’n ganny sanze, sa pa vedir ki in ganny enspire par Bondye. Aprezan, annou vwar levidans ki montre ki Labib in ganny enspire par Bondye.

10. Donn legzanp en profesi ki’n ganny akonplir ki montre ki sa parol dan 2 Pyer 1:21 i vre. (Vwar portre.)

¹⁰ Dan Labib i annan en kantite profesi ki’n ganny akonplir. Serten sa bann profesi ti ganny ekrir plizyer santenn lannen avan ki zot ganny akonplir e listwar i konfirmen ki sa bann profesi in ganny akonplir. Nou pa sirprann parski nou konnen ki tou bann profesi Labib i sorti kot Zeova. (Lir 2 Pyer 1:21.) Mazin bann profesi konsernan destriksyon Babilonn. Ant lannen 778 avan Kris ek lannen 732 avan Kris, profet Izai ti predir ki lavil Babilonn ki sa letan ti vreman pwisan, ti pou ganny detrir. I ti menm dir ki en  zonm ki apel Siris ti pou atak sa lavil e i ti osi eksplike ki mannyer Siris ti pou fer sa. (Iza. 44:27–45:2) Izai ti osi predir ki Babilonn ti pou ganny detrir e ganny abandonnen. (Iza. 13:19, 20) Sanmenm ki ti arive. An 539 avan Kris, bann Med ek Pers ti detri Babilonn e sa landrwa kot lavil Babilonn ti ete i aprezan en landrwa abandonnen.​—Vwar sa video Labib ti predir latak Babilonn dan versyon elektronik liv Viv ere pour touzour! leson 3 pwen 5.

11. Ki mannyer Danyel 2:41-43 pe ganny akonplir ozordi? Eksplike.

¹¹ Bann profesi Labib pa ti ganny akonplir zis dan lepase. Ozordi osi nou pe vwar bann profesi pe ganny akonplir. Par egzanp, reflesir lo lafason ki profesi Danyel konsernan Pouvwar Mondyal Angle ek Ameriken pe ganny akonplir. (Lir Danyel 2:41-43.) Sa profesi ti dir ki Pouvwar Mondyal Angle ek Ameriken ti “pou for” parey feray e “an menm tan fay” parey larzil. I sanmenm ki nou pe vwar. Grannbretanny ek Lanmerik in montre ki zot vreman for parey feray par zwe en rol enportan pour ede ranport laviktwar dan tou le de Lager Mondyal e zot ankor annan en lafors militer ki pwisan. Me zot in osi perdi en pe zot pouvwar parski zot sitwayen i souvan fer bann protestasyon kont bann biznes e kont gouvernman. En msye ki’n etidye politik sa lemonn e ki en eksper dan sa domenn i dir: “Napa en pei demokratik ki pli divize dan domenn politik ki Leta-z-ini.” Grannbretanny, sa lot parti sa pouvwar mondyal in osi fer fas avek divizyon parmi son bann sitwayen sirtou pandan sa bann dernyen lannen ki’n pase. Sa i akoz zot pa kapab tonm dakor lo ki relasyon zot devret annan avek bann pei ki dan Linyon Eropeen. Sa bann divizyon in fer li preski enposib pour Pouvwar Mondyal Angle ek Ameriken fer sa ki zot anvi.

12. Ki bann profesi Labib i fer nou asire?

¹² Bann profesi Labib ki’n fini ganny akonplir i fer nou annan plis konfyans ki bann promes Bondye pour lavenir pou vin vre. Nou santi parey sa psalmis ki ti priy Zeova e dir: “Mon esper ou delivrans, parski ou parol i mon lespwar.” (Ps. 119:81) Dan Labib, Zeova in donn nou “en lavenir ek en lespwar.” (Zer. 29:11) Nou lespwar pour lavenir i baze lo bann promes Bondye me pa lo bann keksoz ki zonm i kapab fer. Annou kontinyen devlop plis konfyans dan Parol Bondye par kontinyen etidye bann profesi Labib.

13. Dapre Psonm 119:66, 138, ki en lot rezon akoz nou kapab annan konfyans dan Labib?

¹³ En lot rezon ki nou kapab annan konfyans dan Labib, i ler nou vwar bann byenfe ki dimoun i gannyen ler zot swiv konsey ki Labib i donnen. (Lir Psonm 119:66, 138.) Par egzanp, bann koup marye ki ti pros pour divorse, i aprezan ere parski zot in aplik konsey Labib. Zot zanfan i kontan pour grandi dan en fanmir Kretyen avek bann paran ki pran swen avek zot e ki kontan zot.​—Efe. 5:22-29.

14. Donn en legzanp ki montre ki mannyer ler en dimoun i aplik konsey Labib, sa i ed li pour vin en pli bon dimoun.

¹⁴ En kantite dimoun in fer bann sanzman dan zot lavi ler zot in aplik bann konsey saz ki dan Labib. Menm bann kriminel in fer bann gran sanzman dan zot lavi. Annou vwar ki mannyer bann konsey dan Labib ti ed en prizonnyen ki apel  Jack. d I ti en dimoun vyolan e i ti parmi bann prizonnyen pli danzere ki ti’n ganny kondannen amor. En zour Jack ti asiste en letid Labib. Lafason ki sa bann frer ti demontre labonte ti tous Jack e li osi i ti konmans etidye Labib. Son konportman ek son personnalite ti konmans sanze e i ti menm konmans demontre labonte. Avek letan, Jack ti vin en proklanmater non batize e pli tar i ti batize. I ti determinen pou anons sa bon nouvel konsernan Rwayonm Bondye avek lezot prizonnyen e i ti ed kat parmi zot pour etidye Labib. Ler sa zour ti arive pour Jack ganny egzekite, i ti’n vreman sanze. Enn parmi son bann avoka ti dir: “Jack nepli sa menm dimoun ki mon ti konnen 20 an pase. Sa ki bann Temwen Zeova in ansenny li, in sanz son lavi.” Menm si Jack in ganny egzekite, son legzanp i montre ki nou kapab annan konfyans dan Parol Bondye e ki Parol Bondye i annan sa pouvwar pour fer en dimoun vin en pli bon dimoun.​—Iza. 11:6-9.

15. Ki mannyer ler pep Zeova i aplik konsey Labib, sa i fer zot diferan avek lezot dimoun ozordi? (Vwar portre.)

¹⁵ Pep Zeova i ini parski zot aplik bann konsey ki Labib i donnen. (Zan 13:35; 1 Kor. 1:10) Dan en lemonn kot i annan divizyon akoz politik, ras ek ran sosyal, dimoun i kapab vwar sa lape ek linite ki egziste parmi pep Zeova. Ler en garson ki apel Jean ti vwar sa lape ek linite ki egziste parmi Temwen Zeova, sa ti enpresyonn li. Jean in grandi dan en pei Lafrik. Ler lager sivil ti deklare dan son pei, i ti antre dan larme. Me pli tar i ti sove e al dan en pei vwazen. Ler i ti laba, i ti zwenn bann Temwen Zeova. Jean i dir: “Mon ti aprann ki bann ki form parti sa vre larelizyon pa mel dan politik e i napa divizyon parmi zot. O kontrer, zot kontan kanmarad.” I osi dir: “Oparavan mon ti dedye mon lavi pou defann en pei me ler mon ti  aprann bann laverite ki dan Labib, mon ti deside pour dedye mon lavi avek Zeova.” Jean in sanz konpletman. I nepli lager avek dimoun ki sorti dan en lot pei oubyen ki annan en lot ras. Aprezan i koz avek tou dimoun ki i zwenn lo sa mesaz lape ki dan Labib. Lefet ki konsey ki Labib i donnen i kapab ed dimoun ki annan diferan nasyonalite, sa i en laprev ki nou kapab annan konfyans dan Parol Bondye.

16. Akoz i enportan pour nou devlop plis konfyans dan Parol Bondye?

¹⁶ Anmezir ki sa lemonn i vin deplizanpli pli move, i pou vin pli difisil pour nou annan konfyans dan Parol Bondye. I kapab ki dimoun pou esey fer nou annan dout konsernan sa ki Labib i dir e konsernan si Zeova in apwent sa lesklav fidel e pridan pour gid son bann serviter ozordi. Me si nou konvenki ki Parol Zeova i toultan laverite, nou pou kapab anpes sa bann keksoz afebli nou lafwa. Nou pou pli ‘determinen pour obei bann lalwa Zeova toultan, ziska lafen.’ (Ps. 119:112) Nou “pa pou onte” pour koz lo sa laverite ki dan Labib avek lezot e pour ankouraz zot pour aplik konsey Labib dan zot lavi. (Ps. 119:46) Nou pou kapab andir menm bann sityasyon pli difisil parey persekisyon, “avek pasyans ek lazwa.”​—Kol. 1:11; Ps. 119:143, 157.

17. Ki nou teks pour lannen pou fer nou rapel?

¹⁷ Nou vreman rekonesan ki Zeova in fer nou konn laverite. Sa laverite i ed nou pour nou santi nou kalm e vin pli konfidan. I osi ansenny nou lafason ki nou devret viv dan en lemonn ki pe vin pli konfize e pli move. I donn nou lespwar pour en meyer lavenir anba Rwayonm Bondye. Nou teks pour lannen 2023 pou ed nou annan konfyans ki Parol Bondye i laverite.​—Ps. 119:160.