1-2. Ki nou bezwen kontinyen fer apre ki nou’n batize? Eksplike.

 KI KANTITE fwa ou netway ou lakaz? Petet avan ki ou ti al reste dan sa lakaz, ou ti netway li byen prop. Me ki pou arive si apre ou pa netway li ankor? I pa pou pran bokou letan avan i revin sal. Pour ki ou lakaz i reste prop e annord, ou bezwen netway li tanzantan.

² Nou bezwen fer en keksoz en pe parey konsernan nou fason panse ek nou personnalite. Byensir avan ki nou ti batize, nou ti travay dir pour fer bann sanzman pour nou kapab “pirifye nou avek tou sa ki sali lekor ek lespri.” (2 Kor. 7:1) Me aprezan, nou bezwen obei sa konsey zapot Pol pour “kontinyen renouvle [nou] fason panse.” (Efe. 4:23) Akoz nou bezwen kontinyen fer sa? Parski sa lemonn i kapab vitman enfliyans nou e fer nou vin sal dan lizye Zeova. Pour nou kapab kontinyen fer plezir Zeova, nou bezwen regilyerman egzamin nou fason panse, nou personnalite ek nou bann dezir.

3. Ki savedir ‘sanz nou fason panse’? (Romen 12:2)

³ Ki nou bezwen fer pour sanz nou fason panse? (Lir Romen 12:2.) Sa lekspresyon Grek ki’n ganny tradwir “sanz zot fason panse” i kapab osi ganny tradwir konman “fer en renovasyon dan ou lespri.” Sa pa vedir ki nou devret zis dekore setadir ki nou zis fer detrwa bon keksoz. Nou bezwen reflesir lo ki kalite dimoun ki nou vreman ete e fer bann sanzman neseser pour ki nou kapab obei bann standar Zeova pli pros ki nou kapab. Nou pa devret fer sa zis enn fwa me nou devret kontinyen fer li.

4. Ki mannyer nou kapab anpes sa move lemonn enfliyans nou fason panse?

 ⁴ Ler nou vin parfe, nou pou toultan kapab fer plezir Zeova dan tou sa ki nou fer. Me antretan, nou bezwen kontinyen travay dir pour fer li plezir. Remarke ki dan Romen 12:2, Pol i dir ki nou bezwen sanz nou fason panse pour nou kapab konnen ki Bondye i anvi nou fer. Olye zis les nou ganny enfliyanse par sa move lemonn, nou devret premyerman egzamin nou lekor pour konnen ki lefe fason panse Bondye i annan lo nou bann lobzektif ek desizyon.

5. Ki mannyer nou kapab egzamin nou fason panse pour nou konnen si nou pe viv dan en fason ki montre ki nou pe gard antet ki zour Zeova i pros? (Vwar portre.)

⁵ Annou vwar en legzanp. Zeova i anvi ki nou “toultan gard antet zour Zeova.” (2 Pyer 3:12) Demann ou lekor sa bann kestyon swivan: ‘Eski lafason ki mon viv mon lavi i montre ki mon konpran ki nou pros avek lafen sa move lemonn? Eski mon desizyon konsernan ledikasyon e konsernan ki travay mon pou swazir, i montre ki sa keksoz pli enportan dan mon lavi i pour servi Zeova? Eski mon annan konfyans ki Zeova pou pran swen avek mwan ek mon fanmir oubyen eski mon toultan enkyet konsernan keksoz materyel?’ Zeova i vreman kontan ler i vwar nou pe esey fer son lavolonte dan tou sa ki nou fer.​—Mat. 6:25-27, 33; Fili. 4:12, 13.

6. Ki nou bezwen kontinyen fer?

⁶ Nou bezwen egzamin nou fason panse regilyerman e apre fer bann sanzman neseser. Pol ti dir bann Kretyen dan lavil Korent: “Kontinyen teste zot lekor pour vwar si zot dan lafwa, kontinyen fer sir  ki kalite dimoun zot ete.” (2 Kor. 13:5) Ler nou “dan lafwa” nou bezwen fer plis ki zis asiste renyon e partisip dan predikasyon tanzantan. I osi annan pour fer avek sa ki nou mazinen, sa ki nou vreman anvi e avek nou motivasyon. Alor, nou bezwen kontinyen sanz nou fason panse par lir Parol Bondye, aprann pour annan menm fason panse avek Bondye e apre fer tou sa ki neseser pour fer li plezir.​—1 Kor. 2:14-16.

7. Dapre Efezyen 4:31, 32, kwa ankor ki nou bezwen fer e akoz i kapab difisil pour fer sa?

⁷ Lir Efezyen 4:31, 32. Apard ki sanz nou fason panse, nou bezwen “devlop sa nouvo personnalite.” (Efe. 4:24) Nou bezwen travay dir pour fer sa e i annan plizyer keksoz pour nou fer. Par egzanp, nou bezwen debaras nou avek bann move kalite parey rankin, lakoler ek firer. Akoz i kapab difisil pour nou fer sa? Parski serten move tre in byen anrasinen dan nou. Par egzanp, Labib i dir ki serten dimoun i “ankoler fasilman” e zot “pran bann gran lakoler.” (Prov. 29:22) I tre probab ki en dimoun ki annan sa bann move tre pou bezwen kontinyen travay dir pour fer sanzman menm apre ki i’n batize. I sanmenm ki nou pou vwar dan sa leksperyans ki swiv.

8-9. Ki mannyer legzanp Stephen i montre ki nou bezwen kontinyen debaras nou avek sa vye personnalite?

⁸ En frer ki apel Stephen ti vwar li difisil pour kontrol son lakoler. I dir: “Menm apre ki mon ti’n batize, mon ti bezwen kontinyen fer bokou zefor pour kontrol mon lakoler. Par egzanp, en fwa ler mon ti pe fer predikasyon kazankaz, mon ti tay deryer en voler ki ti’n fek vol radyo dan mon loto. Ler mon ti ariv pros avek li, i ti zet radyo ater e i ti taye. Ler mon ti pe rakont lezot ki mannyer mon ti’n fer pour reganny mon radyo, en ansyen dan mon group ti demann mwan, ‘Stephen, ki ou ti pou’n fer si ou ti’n atrap sa voler?’ Sa kestyon ti fer mwan reflesir e i ti motiv mwan pour kontinyen fer zefor pour fer lape.” b

⁹ Legzanp Stephen i montre ki i kapab arive ki nou demontre en move tre dan nou personnalite san ekspekte. Menm apre ki nou krwar ki nou’n debaras nou avek sa move tre. Si sa i arive avek ou, pa bezwen dekouraze e mazinen ki ou pa’n reisi devlop bann kalite Kretyen. Menm zapot Pol ti dir: “Ler mon ti a kontan fer sa ki byen, sa tandans pour fer sa ki mal i dan mwan.” (Rom. 7:21-23) Tou serviter Zeova i enparfe e nou annan serten move tre ki kontinyen retournen parey salte ki akimile dan nou lakaz. Nou bezwen kontinyen fer zefor pour reste prop. Ki mannyer nou kapab fer sa?

10. Ki mannyer nou kapab lalit avek bann move tre? (1 Zan 5:14, 15)

¹⁰ Koz avek Zeova konsernan en move tre ki ou vwar li difisil pour tire. Annan konfyans ki i pou ekout ou e i pou ed ou. (Lir 1 Zan 5:14, 15.) Menm si Zeova pa pou fer mirak e tir sa move tre, i kapab donn ou lafors pour ki ou pa demontre sa move tre. (1 Pyer 5:10) Antretan azir an armoni avek ou lapriyer e pa fer bann keksoz ki kapab fer sa vye personnalite retournen. Par egzanp, veye ki kalite film ki ou gete, ki kalite progranm televizyon  ki ou gete ouswa ki kalite zistwar ki ou lir parski serten sa bann keksoz i kapab fer li paret normal pour annan sa move tre ki ou pe esey tire. Osi pa kontinyen mazin lo bann move dezir.​—Fili. 4:8; Kol. 3:2.

11. Ki nou kapab fer pour kontinyen devlop sa nouvo personnalite?

¹¹ Menm si ou’n debaras ou avek sa vye personnalite, i enportan ki ou devlop sa enn ki nouvo. Ki mannyer ou kapab fer sa? Anmezir ki ou aprann konsernan bann kalite ki Zeova i annan, fer li en lobzektif pour swiv son legzanp. (Efe. 5:1, 2) Par egzanp, ler ou lir en resi Labib ki koz lo lafason ki Zeova i pardonnen, demann ou lekor, ‘Eski mon pardonn lezot?’ Ler ou lir konsernan lafason ki Zeova i demontre konpasyon anver bann ki pov, demann ou lekor, ‘Eski mon demontre konpasyon parey Zeova anver mon bann frer ek ser ki dan bezwen?’ Kontinyen sanz ou fason panse par devlop sa nouvo personnalite e anmezir ou fer sa, annan pasyans avek ou menm.

12. Ki mannyer legzanp Stephen i montre ki Labib i kapab sanz lavi?

¹² Stephen ki’n ganny mansyonnen pli boner ti vwar ki avek letan, i ti kapab devlop sa nouvo personnalite. I dir: “Depi ki mon’n batize, mon’n vwar mwan dan plizyer sityasyon kot mon’n bezwen kontrol mon lakoler. Mon’n aprann pour zis ale ler dimoun i esey fer mwan ankoler oubyen mon rod lezot fason pour anpes sa sityasyon vin pli grav. Bokou dimoun, enkli mon madanm ti felisit mwan lo lafason ki mon’n fer fas avek sa bann sityasyon. Mwan menm mon’n sirprann avek mon reaksyon. Mon pa krwar ki mon’n reisi fer sa bann sanzman mwan tousel. O kontrer mon krwar ki sa i montre ki Labib i kapab sanz dimoun.”

13. Kwa ki pou ed nou pour fer sa ki byen? (Galat 5:16)

¹³ Lir Galat 5:16. Zeova i donn nou son lespri sen pour ed nou reisi fer sa ki drwat. Ler nou etidye Parol Bondye, nou pe les nou ganny gide par lespri sen. Nou osi ganny lespri sen ler nou asiste renyon. Dan sa bann renyon, nou kapab pas letan avek bann frer ek ser ki pe travay dir pour fer sa ki byen parey nou. Sa i vreman ankourazan. (Ebr. 10:24, 25; 13:7) Ler nou koz avek Zeova dan lapriyer e nou sipliy li pour ed nou fer fas avek nou bann febles, i pou donn nou son lespri sen pour nou annan lafors pour kontinyen lalit. Menm si sa bann aktivite pa pou fer nou aret annan bann move dezir, zot pou ed nou reziste sa bann dezir. Galat 5:16 i dir ki sa bann ki viv dapre gidans lespri sen “pa pou satisfer okenn move dezir.”

14. Akoz i enportan pour kontinyen fer sa ki byen?

¹⁴ Enn fwa ki nou’n konmans fer bann keksoz ki pou ed nou annan en bon lanmitye avek Zeova, i enportan ki nou kontinyen fer sa bann keksoz e kontinyen fer sa ki byen. Akoz sa? Parski enn nou bann lennmi, setadir sa tantasyon pour fer sa ki mal, i toultan pe lager avek nou. Menm apre ki nou’n batize, i kapab ki nou anvi fer bann keksoz ki nou devret evite fer, par egzanp, zwe larzan, abiz lalkol oubyen get pornografi. (Efe. 5:3, 4) En zenn frer i dir: “Enn bann  keksoz pli difisil ki mon ti lalit avek i sa latraksyon ki mon annan anver dimoun menm sèks. Mon ti krwar ki avek letan sa bann santiman ti pou ale me mon ankor annan sa bann santiman.” Kwa ki kapab ed ou si ou annan en move dezir ki vreman for?

15. Akoz ler nou konnen ki lezot osi i ganny bann move dezir, sa i ankouraz nou? (Vwar portre.)

¹⁵ Ler ou pe lalit avek en move dezir ki vreman for, rapel ki ou pa tousel. Labib i dir: “Napa tantasyon ki zot in gannyen ki lezot pa’n gannyen.” (1 Kor. 10:13a) Sa parol ti ganny ekrir pour tou Kretyen ki ti reste Korent. Oparavan i annan serten ki ti komet adilter, ki ti bann omoseksyel e ki ti bann soular. (1 Kor. 6:9-11) Eski ou krwar ki apre ki zot ti’n batize zot pa ti bezwen lalit avek bann move dezir? Sa pa ti kapab leka parski menm si zot ti bann Kretyen swazir, zot ti bann imen enparfe. San dout, zot ti bezwen lalit avek bann move dezir tanzantan. Sa i ankourazan pour nou. Akoz sa? Parski sa i montre ki nenport move dezir ki nou pe lalit avek, i annan en dimoun ki’n reziste sa move dezir. Alor ou kapab “reste solid dan lafwa, parski [ou] konnen ki lasosyasyon tou bann frer dan lemonn pe pas atraver menm soufrans.”​—1 Pyer 5:9.

16. Ki danze nou devret evite e akoz?

¹⁶ I annan en danze ki ou bezwen evite. Ou bezwen evite mazinen ki personn pa konpran sa problenm ki ou pe fer fas avek. Ler ou mazinen ki personn pa konpran sa problenm ki ou pe fer fas avek, sa i kapab fer ou krwar ki ou pa kapab fer nanryen pour amelyor ou sityasyon e ki ou pa kapab reziste bann move dezir. Me i pa sa ki Labib i dir. Labib i dir: “Bondye i fidel e i pa pou permet ki zot ganny  tante plis ki zot kapab siporte. Me ler zot ganny tante, i pou osi donn zot semen sorti pour ki zot kapab andire.” (1 Kor. 10:13b) Alor menm ler nou annan en move dezir ki for, nou kapab reziste sa move dezir e reste fidel avek Zeova. Avek led Zeova, nou kapab evite fer sa ki mal.

17. Ki nou kapab fer menm si nou pa kapab evite ganny bann move dezir?

¹⁷ Ou devret toultan gard antet ki konman en imen enparfe, ou pa kapab evite ganny bann move dezir. Ler ou ganny bann move dezir, ou kapab rezet zot deswit parey Zozef ti fer ler madanm Potifar ti anvi dormi avek li. (Zen. 39:12) Ler ou ganny bann move dezir, ou pa bezwen fer sa ki mal.

18-19. Ki bann kestyon nou kapab demann nou lekor anmezir ki nou fer zefor pour sanz nou fason panse?

¹⁸ Dan sa lartik, nou’n aprann ki pour sanz nou fason panse nou bezwen kontinyen fer zefor pour fer sir ki nou fason panse ek nou aksyon i fer plezir Zeova. Alor nou bezwen egzamin nou lekor e demann sa bann kestyon: ‘Eski lafason ki mon viv mon lavi i montre ki mon konpran ki nou pros avek lafen sa move lemonn? Eski mon pe devlop sa nouvo personnalite? Eski mon pe les lespri sen Zeova gid mwan pour mon kapab reziste bann move dezir?’

¹⁹ Anmezir ki ou egzamin ou lekor, pa ekspekte ki ou pou fer keksoz dan en fason ki parfe. Me konsantre lo bann progre ki ou’n fer. Pa bezwen dekouraze si ou vwar ki ou bezwen fer serten sanzman. Me swiv sa konsey ki dan Filipyen 3:16 ki dir: “Nenport ki progre ki nou’n fer, annou kontinyen al annavan dan sa menm direksyon e dan en fason annord.” Ler ou fer sa, ou kapab asire ki Zeova pou beni bann zefor ki ou pe fer pour kontinyen sanz ou fason panse.