1-2. Akoz nou asiste Memoryal tou le lannen?

 APEPRE 2,000 an pase, Zezi ti sakrifye son lavi pour nou e sa in fer li posib pour nou ganny lavi eternel. Sa zour swar avan Zezi ti mor, i ti donn son bann disip en lord. I ti demann zot pour mazin son sakrifis par fer en seremoni avek dipen ek diven.​—1 Kor. 11:23-26.

² Nou obei sa lord ki Zezi ti donnen parski nou kontan li en kantite. (Zan 14:15) Tou le lannen pandan sezon Memoryal, nou montre ki nou rekonesan pour sa ki Zezi in fer par pran letan pour priye e medit lo sa ki lanmor Zezi i vedir pour bann imen. Nou kontan pour fer plis dan predikasyon pour ankouraz maksimonm dimoun posib pour vin sa levennman spesyal. Nou osi determinen pour pa les nanryen anpes nou asiste Memoryal.

3. Ki nou pou vwar dan sa lartik?

³ Dan sa lartik, nou pou vwar ki mannyer pep Zeova in fer zefor pour selebre Memoryal lanmor Kris. Nou pou vwar ki mannyer pep Bondye in: (1) swiv sa model ki Zezi in kite, (2) envit lezot pour asiste Memoryal e (3) selebre Memoryal menm dan bann sityasyon difisil.

4. Ki bann kestyon ki ganny reponn tou le lannen pandan Memoryal e akoz larepons sa bann kestyon i devret enportan pour nou? (Lik 22:19, 20)

⁴ Tou le lannen pandan Memoryal, nou ekout en diskour baze lo Labib ki donn bann larepons kler pour plizyer  kestyon. Nou aprann akoz imen i bezwen ranson e ki mannyer lanmor en zonm i kapab pey pour pese plizyer dimoun. Sa diskour i fer nou rapel ki sa dipen ek sa diven i reprezante e lekel ki devret manz sa dipen e bwar sa diven. (Lir Lik 22:19, 20.) Nou medit lo sa zoli lavenir ki bann ki annan lespwar pour viv lo later i annan. (Iza. 35:5, 6; 65:17, 21-23) Nou devret apresye sa bann laverite. Plizyer bilyon dimoun pa konn sa bann laverite e zot pa konpran valer ki sakrifis Zezi i annan. Zot osi pa selebre Memoryal dapre sa model ki Zezi in kite. Akoz sa?

5. Apre ki laplipar zapot ti’n mor, ki mannyer dimoun ti konmans komemor lanmor Zezi?

⁵ Pa bokou letan apre ki laplipar zapot ti mor, bann swadizan Kretyen ti antre dan kongregasyon. (Mat. 13:24-27, 37-39) Zot ti “devir laverite e fer bann disip swiv zot.” (Akt 20:29, 30) Enn bann keksoz ki bann swadizan Kretyen ti pli tar konmans ansennyen i ki Zezi pa ti’n sakrifye son lekor “enn fwa pour tou pour anmenn pese en kantite dimoun” parey Labib i dir. (Ebr. 9:27, 28) Me zot ti ansennyen ki sakrifis Zezi ti bezwen ganny repete plizyer fwa. Ozordi, en kantite dimoun i krwar sa fo lansennyman. Zot al legliz tou le semenn, parfwa tou le zour, pour selebre lanmes (Sacrifice of the Mass). b Lezot larelizyon pa komemor lanmor Zezi souvan me zot pa vreman konpran ki sakrifis Zezi i vedir. Serten i kapab demande, ‘Eski lanmor Zezi i vedir ki mon pese i kapab ganny pardonnen?’ Akoz zot demann sa kestyon? Dan serten ka, zot in ganny enfliyanse avek bann ki pa krwar ki sakrifis Zezi i fer li posib pour pese ganny pardonnen. Ki mannyer bann vre disip Zezi in ed dimoun pour konpran ki sakrifis Zezi i vedir e ki sa bon fason pour komemor lanmor Zezi?

6. Ver 1872, ki en group Etidyan Labib ti’n konpran?

⁶ An 1870, en group Etidyan Labib dirize par Charles Taze Russell ti konmans etidye Labib o profon. Zot ti anvi konnen ki sakrifis Zezi i vreman vedir e ki mannyer son lanmor i devret ganny komemore. Ver 1872, zot ti’n konpran ki Zezi ti’n vreman donn son lavi konman en ranson pour tou imen. Zot pa ti gard sa ki zot ti’n aprann pour zot menm. O kontrer, zot ti fer lezot dimoun konnen atraver bann liv, zournal ek magazin. Pa bokou letan apre, zot ti swiv legzanp bann Kretyen dan premye syek e zot ti konmans selebre Memoryal zis en fwa dan en lannen.

7. Ki byenfe nou pe gannyen avek resers ki bann Etidyan Labib ti fer?

⁷ Bann resers ki sa bann Kretyen ti fer plizyer lannen pase, i anmenn byenfe pour nou ozordi. Ki mannyer sa? Zeova in ed nou pour konpran ki sakrifis Zezi i vedir e ki sa sakrifis pou fer pour nou e pour tou dimoun. (1 Zan 2:1, 2) Nou’n osi aprann ki Labib i koz lo de lespwar ki Bondye in promet bann ki fer li plezir, setadir ki serten i annan sa lespwar pour ganny lavi imortel dan lesyel e serten i annan sa lespwar pour viv pour touzour lo later. Ler nou medit lo ki kantite Zeova i kontan nou e lo bann byenfe ki nou  gannyen gras a sakrifis Zezi, sa i fer nou vin pli pros avek Zeova. (1 Pyer 3:18; 1 Zan 4:9) Alor, zis parey bann frer ek ser dan lepase, nou osi nou envit lezot pour komemor Memoryal dapre sa model ki Zezi in kite.

8. Ki pep Zeova in fer pour envit lezot pour asiste Memoryal? (Vwar portre.)

⁸ Pour plizyer lannen, pep Zeova pe envit bann dimoun pour asiste Memoryal. An 1881, i ti annan en lanons dan Latour Veyer ki ti envit bann frer ek ser Leta-z-ini pour zwenn ansanm dan lakour en frer Allegheny, Pennsylvania pour sa lokazyon spesyal. Pli tar, sak kongregasyon ti konmans fer son prop Memoryal. An Mars 1940, bann proklanmater ti ganny dir ki zot ti kapab envit bann dimoun dan zot teritwar ki ti demontre lentere. I ti an 1960, ki Betel ti donn bann kongregasyon bann lenvitasyon enprimen pour premye fwa. Depi sa letan, plizyer bilyon lenvitasyon Memoryal in ganny distribye. Me akoz nou fer sitan bokou zefor pour envit lezot?

9-10. Lekel ki nou envite pour asiste Memoryal? (Zan 3:16)

⁹ En rezon akoz nou envit lezot pour asiste Memoryal ansanm avek nou i parski nou anvi ki tou bann ki asiste pour premye fwa i aprann laverite konsernan sa ki Zeova ek Zezi in fer pour tou dimoun. (Lir Zan 3:16.) Nou anvi ki sa ki zot vwar e tande pandan Memoryal i motiv zot pour aprann plis e pour vin  en serviter Zeova. Me pa zis bann ki asiste Memoryal pour premye fwa ki ganny bann byenfe.

¹⁰ Nou osi envit bann inaktif ki nepli servi Zeova. Nou fer sa pour rapel zot ki Zeova i ankor kontan zot. En kantite i aksepte nou lenvitasyon e nou kontan pour vwar zot pandan Memoryal. Ler zot asiste Memoryal, sa i fer zot rapel sa lazwa ki zot ti annan ler zot ti pe servi Zeova. Annou vwar leksperyans Monica. c Pandan pandemi COVID-19, i ti revin en proklanmater. Apre ki i ti asiste Memoryal an 2021, i ti dir: “Sa Memoryal in enn ki vreman spesyal pour mwan. Pour premye fwa apre 20 an, mon’n kapab anons sa bon nouvel avek dimoun e envit zot pour Memoryal. Mon ti fer tou sa ki mon kapab pour envit lezot parski mon vreman rekonesan pour sa ki Zeova ek Zezi in fer pour mwan.” (Ps. 103:1-4) Ki swa dimoun i aksepte nou lenvitasyon oubyen non, nou fer nou mye pour envit zot pour Memoryal parski nou konnen ki Zeova i apresye nou zefor.

11. Ki mannyer Zeova in beni nou zefor pour envit dimoun pour asiste Memoryal? (Agay 2:7)

¹¹ Zeova in beni zefor ki nou’n fer pour envit lezot pour asiste Memoryal. An 2021, i ti annan 21,367,603 dimoun ki ti asiste Memoryal menm si i ti annan restriksyon akoz pandemi COVID-19. Sa i de fwa plis ki lakantite Temwen Zeova ki annan partou dan lemonn. Byensir Zeova pa zis enterese avek lakantite dimoun ki asiste Memoryal. Me i enterese avek sakenn parmi sa bann dimoun ki asiste. (Lik 15:7; 1 Tim. 2:3, 4) Nou kapab asire ki ler nou donn lezot lenvitasyon pour asiste Memoryal, Zeova i ed nou pour trouv bann ki annan leker senser.​—Lir Agay 2:7.

12. Kwa ki kapab fer li difisil pour nou selebre Memoryal? (Vwar portre.)

¹² Zezi ti predir ki pandan bann dernyen zour, nou pou fer fas avek bann sityasyon difisil. I ti dir ki nou fanmir pou opoz nou, nou pou ganny persekite, i pou annan bann lager, maladi ek lezot keksoz ankor. (Mat. 10:36; Mark 13:9; Lik 21:10, 11) Parfwa sa bann sityasyon i fer li difisil pour nou selebre Memoryal. Dan bann sityasyon koumsa, ki nou bann frer ek ser in fer e ki mannyer Zeova in ed zot?

13. Ki mannyer Zeova ti beni kouraz ek determinasyon ki Artem ti demontre ler i ti selebre Memoryal dan prizon?

¹³ Ler zot ganny met dan prizon. Nou bann frer ek ser ki dan prizon akoz zot lafwa i fer sa ki zot kapab pour selebre Memoryal. Annou vwar legzanp Artem. Pandan sezon Memoryal 2020, Artem ti dan en kaso ki ti mezir 17 met kare, ki ti kapab pran senk dimoun an menm tan. Menm si i ti dan prizon, i ti kapab ganny serten keksoz pour li servi konman lanblenm Memoryal e i ti plàn pour fer sa diskour Memoryal pour li menm. Me bann zonm ki ti dan kaso avek li, ti fimen e zot ti kontan zoure. Ki Artem ti fer? I ti demann zot pour pa zoure e pour pa fimen pour enn erdtan. Artem ti sirprann parski zot ti dakor pour pa fimen oubyen pa zoure pandan Memoryal. Artem i dir: “Mon ti dir zot ki mon kapab eksplik zot konsernan  Memoryal.” Zot ti dir ki zot pa anvi tann konsernan Memoryal. Me apre ki zot ti’n vwar e tann Artem pe selebre Memoryal, zot ti demann li kestyon.

14. Ki mannyer pep Zeova ti selebre Memoryal menm si i ti annan pandemi COVID-19?

¹⁴ Pandemi COVID-19. Ler sa pandemi ti konmanse, pep Zeova pa ti kapab selebre Memoryal dan bann Lasal Rwayonm. Me sa pa ti anpes zot selebre Memoryal. d Bann kongregasyon ki ganny akse avek Enternet ti selebre Memoryal atraver video konferans. Me ki bann kongregasyon ki napa akse avek Enternet ti fer? Dan serten pei, bann frer ti fer laranzman pour dimoun kapab swiv diskour Memoryal lo televizyon oubyen lo radyo. Osi, bann Betel ti rikord sa diskour Memoryal dan plis ki 500 langaz pour ki menm bann dimoun ki reste dan bann landrwa pli elwannyen i kapab selebre Memoryal. Bann frer ti al anmenn sa bann lanrezistreman kot bann frer ek ser ki ti bezwen.

15. Ki ou aprann avek leksperyans en etidyan Labib ki apel Sue?

 ¹⁵ Ler zot fanmir i opoz zot. Pour lezot, i annan en lot keksoz ki fer li difisil pour zot selebre Memoryal. Sa i ler zot fanmir i opoz zot. Annou vwar leksperyans en etidyan Labib ki apel Sue. An 2021, lavey Memoryal, Sue ti dir avek sa ser ki ti pe fer letid avek li ki i pa ti pou kapab asiste Memoryal parski serten dan son fanmir ti pe opoz li. Sa ser ti lir Lik 22:44 avek li. Apre, sa ser ti eksplik li ki ler nou fer fas avek problenm, nou devret swiv legzanp Zezi par koz avek Zeova dan lapriyer e par met tou nou konfyans dan li. Son lannmen, Sue ti prepar lanblenm pour Memoryal e i ti get sa video ladorasyon bomaten pour Memoryal lo jw.org. Sa zour swar, i ti al dan son lasanm li tousel e i ti konekte avek son kongregasyon pour ekout Memoryal atraver telefonn. Apre Memoryal, Sue ti anvoy en mesaz pour sa ser ki ti pe fer letid avek li e i ti dir li: “Ou ti vreman ankouraz mwan yer. Mon ti fer tou sa ki mon kapab pour asiste Memoryal e Zeova ti ed mwan. Mon vreman kontan e mon vreman rekonesan pour sa!” Eski ou krwar ki Zeova i kapab ed ou si ou dan en sityasyon en pe parey?

16. Akoz nou kapab asire ki Zeova pou beni sa zefor ki nou fer pour asiste Memoryal? (Romen 8:31, 32)

¹⁶ Zeova i vreman apresye sa zefor ki nou fer pour selebre Memoryal. Nou kapab asire ki i pou beni nou ler nou demontre lapresyasyon pour sa ki i’n fer pour nou. (Lir Romen 8:31, 32.) Alor annou fer tou sa ki nou kapab pour asiste Memoryal sa lannen e pour fer plis dan servis Zeova pandan sezon Memoryal.