1. Akoz Memoryal i sa zour pli enportan dan lannen? (Lik 22:​19, 20)

 POUR pep Zeova, Memoryal lanmor Kris i sa zour pli enportan dan lannen. I sa sel levennman ki Zezi ti donn son bann disip lord pour selebre. (Lir Lik 22:​19, 20.) Nou vreman kontan pour selebre Memoryal pour plizyer rezon. Annou vwar serten sa bann rezon.

2. Ki serten rezon nou kontan pour asiste Memoryal?

² Memoryal i ed nou pour medit lo sa valer ki ranson i annan. I fer nou rapel bann fason ki nou kapab montre ki nou rekonesan pour sakrifis Zezi. (2 Kor. 5:​14, 15) I osi donn nou en loportinite pour “ankouraz kanmarad.” (Rom. 1:12) Sak lannen, i annan en kantite frer ek ser inaktif ki asiste Memoryal. Serten parmi zot in menm deside pour retourn kot Zeova parski bann frer ek ser in byen akeyir zot. Osi en kantite dimoun in konmans etidye Labib parski zot in enpresyonnen avek sa ki zot in vwar e tande. Tou sa bann keksoz i fer Memoryal vreman spesyal pour nou!

3. Ki mannyer Memoryal i ini bann frer ek ser dan lemonn antye? (Vwar portre.)

³ Nou osi vreman kontan pour asiste Memoryal parski nou konnen ki sa zour nou ini avek nou bann frer ek ser partou dan lemonn. Anmezir ki soley i kouse, Temwen Zeova i zwenn ansanm pour selebre Memoryal. Nou tou nou ekout en diskour ki koz lo lenportans ranson. Nou sant de kantik, nou pas dipen ek diven e nou dir “amenn” a lafen kat lapriyer. Dan apepre 24 erdtan, tou kongregasyon i fer sa bann menm keksoz. Eski ou kapab imazin sa  lazwa ki Zeova ek Zezi i annan ler zot vwar nou tou pe onor zot dan sa fason?

4. Ki nou pou vwar dan sa lartik?

⁴ Dan sa lartik, nou pou reponn sa bann kestyon: Ki mannyer nou kapab prepar nou leker pour Memoryal? Ki mannyer nou kapab ed lezot pour ganny bann byenfe avek Memoryal? Ki mannyer nou kapab ed bann frer ek ser inaktif? Larepons sa bann kestyon pou ed nou met pare pour sa zour vreman enportan.

KI MANNYER NOU KAPAB PREPAR NOU LEKER POUR MEMORYAL?

5. (a) Akoz nou devret medit lo valer ki ranson i annan? (Psonm 49:​7, 8) (b) Ki ou’n aprann dan sa video Akoz Zezi ti mor?

⁵ Enn bann fason pli enportan ki nou kapab prepar nou leker pour Memoryal i par medit lo valer ki sakrifis Zezi Kri i annan. Nou menm nou pa ti pou kapab fer nanryen pour sov nou prop lekor dan pese ek lanmor. (Lir Psonm 49:​7, 8; vwar osi sa video Akoz Zezi ti mor?) a Alor Zeova ti fer laranzman pour son Garson donn son lavi pour sov nou menm si sa ti pou vreman difisil pour zot. (Rom. 6:23) Pli nou medit lo sa ki Zeova ek Zezi in sakrifye pour nou, pli nou pou apresye sa ranson. Nou pou vwar detrwa keksoz ki Zeova ek Zezi ti pare pour fer pour nou ki ti difisil pour zot. Me premyerman, nou pou vwar ki sa ranson ti enplike.

6. Kisisa en ranson e akoz Zezi ti bezwen pey sa ranson?

⁶ En ranson i en pri ki ganny peye pour reaste en keksoz. Ler Adan, sa premye zonm ti ganny kree, i ti parfe. Ler i ti fer pese, i ti perdi sa loportinite pour li viv pour touzour e pour tou son bann zanfan osi viv pour touzour. Pour reaste sa ki Adan ti’n perdi, Zezi ti ofer son lavi parfe konman en sakrifis. Ler Zezi ti lo later, i “pa ti fer okenn pese, ni koz manti.” (1 Pyer 2:22) Ler Zezi ti mor, i ti parfe zis parey Adan ti ete avan i fer pese. Alor ler Zezi ti sakrifye son lavi, i ti kapab pey sa pri pour sa ki Adan ti’n perdi.—1 Kor. 15:45; 1 Tim. 2:6.

7. Ki serten difikilte Zezi ti fer fas avek ler i ti lo later?

⁷ Ler Zezi ti lo later, i ti obei Zeova dan tou sa ki i ti fer menm ler i ti difisil pour li. Ler i ti en zanfan, Zezi ti bezwen obei son paran ki ti enparfe menm si li i ti parfe. (Lik 2:51) Konman en adolesan, i tre probab ki Zezi ti bezwen reziste bann presyon ki ti’n kapab fer li dezobei son paran oubyen dezobei Zeova. Osi ler i ti en adilt, i ti bezwen reziste Satan ki ti esey tant li pour fer pese, enkli esey fer li aret fidel avek Bondye. (Mat. 4:​1-11) Satan ti anvi fer Zezi fer pese pour ki Zezi pa kapab pey sa ranson.

8. Ki lezot difikilte Zezi ti fer fas avek?

⁸ Ler Zezi ti lo later, i ti fer fas avek lezot problenm. Son bann lennmi ti persekit li e esey touy li. (Lik 4:​28, 29; 13:31) I ti bezwen fer fas avek defo son bann disip. (Mark 9:​33, 34) Ler Zezi ti pe ganny zize, i ti ganny tortire e sikannen. Apre, i ti ganny touye parey en kriminel e i ti soufer en kantite. (Ebr. 12:​1-3) I ti bezwen andir sa dernyen parti son lavi li tousel, san proteksyon Zeova. b—Mat. 27:46.

9. Ki mannyer nou santi anver sakrifis Zezi? (1 Pyer 1:8)

 ⁹ I kler ki Zezi ti soufer en kantite pour li kapab pey sa ranson. Ler nou medit lo tou sa ki Zezi ti pare pour sakrifye pour nou, sa i fer nou kontan li en kantite.—Lir 1 Pyer 1:8.

10. Ki Zeova ti pare pour sakrifye pour Zezi kapab pey sa ranson?

¹⁰ Ki Zeova ti pare pour sakrifye pour ki Zezi i kapab pey sa ranson? Zeova ek Zezi i annan sa pli bon relasyon ki egziste ant en papa ek en garson. (Prov. 8:30) Alor imazin lafason ki Zeova ti santi ler i ti vwar Zezi pe fer fas avek tou sa problenm ler i ti lo later. San dout, i ti vreman fermal pour Zeova vwar son Garson ganny trete dan en move fason, ganny rezete e soufer.

11. Donn en legzanp pour montre lafason ki Zeova ti’n bezwen santi ler Zezi ti ganny touye.

¹¹ En paran ki son zanfan in mor, i konn byen douler ki en paran i santi ler son zanfan i mor. Menm si nou annan konfyans dan sa promes konsernan rezireksyon, ler en dimoun ki nou kontan i mor, nou leker i fermal. Sa legzanp i ed nou pour konpran ki mannyer Zeova ti santi sa zour prentan lannen 33, ler i ti pe get son Garson pe soufer e mor. c—Mat. 3:17.

12. Ki nou kapab fer pandan bann semenn avan Memoryal?

¹² Depi ozordi ziska zour Memoryal, esey etidye plis konsernan ranson dan ou letid personnel oubyen dan ladorasyon fanmir. Servi Liv resers pour Temwen Zeova oubyen lezot piblikasyon pour vwar plis detay konsernan ranson. d Osi, pa oubliye pour swiv lektir Labib pour Memoryal ki dan Nou minister ek lavi Kretyen—Kaye renyon. Zour Memoryal, pa oubliye pour get sa video ladorasyon bomaten pour Memoryal. Ler nou prepar nou leker pour Memoryal, nou pou kapab ed lezot pour ganny bann byenfe zot osi.—Ezra 7:10.

ED LEZOT GANNY BANN BYENFE

13. Ki sa premye keksoz nou kapab fer pour ed lezot ganny bann byenfe avek Memoryal?

¹³ Ki mannyer nou kapab ed lezot pour ganny bann byenfe avek Memoryal?  Premyerman, envit zot pour vin Memoryal. Nou kapab zwenn zot dan predikasyon e nou osi kapab fer en lalis bann dimoun ki nou konnen pour nou envite. Sa i kapab enkli nou fanmir, nou koleg travay, kanmarad lekol ek lezot ankor. Menm si nou napa ase kopi lenvitasyon ki’n enprimen, nou kapab anvoy zot en link sa lenvitasyon. Nou kapab sirprann avek lakantite dimoun ki deside pour asiste Memoryal.—Ekle. 11:6.

14. Donn en legzanp pour montre byenfe ki i annan ler ou personnelman envit en dimoun Memoryal.

¹⁴ Ler ou envit en dimoun Memoryal, sa i kapab motiv sa dimoun pour asiste. En zour, en ser ki son msye pa Temwen Zeova, ti sirprann ler son msye ti dir li ki i pou asiste Memoryal ansanm avek li. Akoz i ti sirprann? Parski plizyer fwa dan lepase in ankouraz son msye pour asiste Memoryal me i pa’n zanmen fer li. Kwa ki diferan safwasi? Son msye ti dir li ki i’n ganny en lenvitasyon. I ti eksplike ki en ansyen ki i konn byen ki’n envit li. Sa msye ti asiste Memoryal sa lannen e i ti kontinyen fer li pour plizyer lannen apre sa.

15. Ki nou anvi gard antet ler nou pe envit en dimoun pour asiste Memoryal?

¹⁵ Gard antet ki sa bann dimoun ki nou envite pour asiste Memoryal i kapab demann bann kestyon konsernan Memoryal, sirtou si zot pa’n zanmen asiste enn nou bann renyon. I ti pou byen ki nou mazin davans bann kestyon ki zot pou kapab demande e prepar nou larepons. (Kol. 4:6) Par egzanp, serten dimoun i kapab demande: ‘Ki pou arive pandan sa levennman?’ ‘Ki kantite letan i pou dire?’ ‘Ki mannyer mon devret sanze?’ ‘Eski mon bezwen peye pour asiste?’ ‘Eski i pou annan laket?’ Ler nou envit en dimoun pour asiste Memoryal, nou kapab demann li, “Eski ou annan okenn kestyon?” e apre reponn okenn kestyon ki sa dimoun i annan. Nou kapab osi servi sa video Mazin lanmor  Zezi ek video Kwa ki pase dan Lasal Rwayonm? pour ed sa dimoun vwar lafason ki nou bann renyon i deroule. Osi i annan en kantite bon pwen dan leson 28 dan liv Viv ere pour touzour! ki nou kapab partaze.

16. Ki lezot kestyon bann ki asiste Memoryal i kapab demande?

¹⁶ I kapab ki apre Memoryal, bann dimoun ki enterese pour konn Parol Bondye i annan lezot kestyon. Petet zot kapab mazinen akoz personn pa’n manz sa dipen e bwar sa diven oubyen akoz zis en ptigin dimoun ki’n manz sa dipen e bwar sa diven. Zot kapab osi mazinen ki kantite fwa ki nou selebre Memoryal. Osi zot kapab anvi konnen si tou renyon ki Temwen Zeova i fer i deroul dan sa fason. Menm si pandan diskour Memoryal en kantite sa bann kestyon i ganny reponn, petet bann dimoun ki asiste Memoryal pour premye fwa pou bezwen plis leksplikasyon. Sa lartik “Why Do Jehovah’s Witnesses Observe the Lord’s Supper Differently From the Way Other Religions Do?” ki lo jw.org i kapab ed nou reponn serten zot bann kestyon. Avan, pandan e apre Memoryal, nou anvi fer sa ki nou kapab pour ed bann ki annan “sa bon kondisyon leker” pour ganny bann byenfe avek Memoryal.—Akt 13:48.

ED BANN KI INAKTIF

17. Ki mannyer bann ansyen i kapab ed bann ki inaktif? (Ezekyel 34:​12, 16)

¹⁷ Pandan sezon Memoryal, ki mannyer bann ansyen i kapab ed bann ki inaktif? Montre zot ki ou kontan zot. (Lir Ezekyel 34:​12, 16.) Avan Memoryal, fer sir ki ou kontakte zot otan ki posib. Dir zot ki ou kontan zot e ki ou anvi ed zot dan nenport fason ki ou kapab. Envit zot pour asiste Memoryal. Si zot asiste, akey zot byen. Apre Memoryal, kontinyen vizit zot oubyen kontakte zot e ed zot dan nenport fason pour retourn kot Zeova.—1 Pyer 2:25.

18. Ki mannyer nou tou nou kapab ed bann ki inaktif? (Romen 12:10)

 ¹⁸ Tou bann frer ek ser dan kongregasyon i kapab ed bann ki inaktif ki asiste Memoryal. Ki mannyer? Ler nou tret zot avek lanmour, labonte ek respe. (Lir Romen 12:10.) Rapel ki petet i ti difisil pour sa bann frer ek ser asiste en renyon ankor. Petet zot ti per ki zot pa ti pou ganny akeyir byen. e Alor pa demann zot bann kestyon ki kapab anbaras zot oubyen dir en keksoz ki kapab bles zot santiman. (1 Tesa. 5:11) Gard antet ki zot nou bann frer ek ser. Nou kontan pour ador Bondye ansanm avek zot ankor!—Ps. 119:176; Akt 20:35.

19. Ki bann byenfe nou gannyen ler nou rapel lanmor Zezi?

¹⁹ Nou rekonesan ki Zezi ti dir nou rapel son lanmor sak lannen e nou konpran akoz sa i enportan. Ler nou asiste Memoryal, sa i anmenn bann byenfe pour nou e pour lezot dan plizyer fason. (Iza. 48:​17, 18) Nou kontan Zeova ek Zezi plis. Nou montre ki kantite nou apresye sa ki zot in fer pour nou. Nou vin pli pros avek nou bann frer ek ser. Osi nou kapab ed lezot pour aprann ki mannyer zot osi zot kapab benefisye avek bann byenfe ki ranson i anmennen. Annou fer tou sa ki nou kapab pour met nou pare pour Memoryal ki pou ganny fer sa lannen, ki pou sa zour pli enportan dan lannen!