1. Kwa ki vin dan ou lespri ler ou mazin Zeova?

 ESKI ou’n deza esey imazinen ki mannyer Zeova i ete? Kwa ki vin dan ou lespri ler ou koz avek li dan lapriyer? Menm si nou pa kapab vwar Zeova, Labib i dekri li dan diferan fason. Labib i dir ki Zeova i “en soley e en boukliye” e ki i parey “en dife ki detri konpletman.” (Ps. 84:11; Ebr. 12:29) Dan en vizyon, Ezekyel ti vwar ki mannyer i ete dan prezans Zeova e i ti dir ki i parey safir, en metal ki klate e en larkansyel ki pe briye. (Ezek. 1:​26-28) Serten sa bann deskripsyon i kapab enpresyonn nou oubyen menm fer nou per.

2. Akoz serten dimoun i vwar li difisil pour vin pros avek Zeova?

² Vi ki nou pa kapab vwar Zeova, nou kapab vwar li difisil pour krwar ki i kontan nou. Serten dimoun ki’n eksperyans bann move keksoz i kapab krwar ki Zeova pa pou zanmen kapab kontan zot. I annan ki pa’n zanmen annan en papa ki kontan zot e sa i fer zot war li difisil pour krwar ki Zeova i kontan zot. Me Zeova i konpran nou santiman e i konnen akoz nou kapab vwar li difisil pour vin pros avek li. Pour ed nou vin pros avek li, Zeova i fer nou konn son bann zoli kalite dan son Parol.

3. Akoz nou devret koz lo sa lanmour ki Zeova i annan pour nou?

³ Sa mo ki dekri Zeova byen i lanmour. Labib i dir ki “Bondye i lanmour.” (1 Zan 4:8) Tou sa ki Bondye i fer i akoz i annan lanmour. Bondye i sitan annan lanmour e son lanmour i sitan for, ki i pa zis kontan bann ki kontan li me i osi kontan bann ki pa kontan li. (Mat. 5:​44, 45) Dan sa lartik, nou pou koz en pe plis lo Zeova e sa lanmour ki i annan pour nou. Pli nou aprann lo nou Bondye, pli nou pou kontan li.

 ZEOVA I KONTAN NOU EN KANTITE

4. Ki mannyer sa lafeksyon ek tandres ki Zeova i annan i fer ou santi? (Vwar portre.)

⁴ “Zeova i annan en kantite lafeksyon ek tandres.” (Zak 5:​11, not.) Dan Labib, Zeova i dir ki i parey en manman ki kontan son zanfan. (Iza. 66:​12, 13) Imazin en manman ki kontan son zanfan e ki pran byen swen avek li. Sa manman i asize, i bers son zanfan dousman e i koz avek son zanfan avek en lavwa dous. Ler son zanfan i plere oubyen i dan douler, i fer sir ki son zanfan i annan sa ki i bezwen. Pareyman, ler nou pe soufer, nou kapab asire ki Zeova i kontan nou. En psalmis ti ekri: “Ler mon ti enkyet en kantite, ou ti rekonfort mwan e soulaz mwan.”—Ps. 94:19.

5. Ki mannyer lanmour fidel Zeova i fer ou santi?

⁵ Zeova i fidel. (Ps. 103:8) I pa aret kontan nou ler nou fer en keksoz mal. Nasyon Izrael ti dezapwent Zeova plizyer fwa. Me ler zot ti repantir, Zeova ti asir zot ki i ankor kontan zot. I ti dir zot: “Ou presye pour mwan, ou’n ganny onore, mon kontan ou.” (Iza. 43:​4, 5) Nou osi nou kapab asire ki Zeova i annan sa menm kalite lanmour pour nou ozordi. Menm si nou’n fer bann fot grav, Zeova pa abandonn nou. Ler nou repantir e retourn kot Zeova, nou pou vwar ki i ankor kontan nou. I promet ki i pou “pardonn [nou] avek zenerozite.” (Iza. 55:7) Labib i dir ki ler Zeova i pardonn en dimoun, “Zeova li menm i . . . donn zot soulazman.”—Akt 3:19.

6. Ki Zekarya 2:8 i ansenny nou konsernan Zeova?

⁶ Lir Zekarya 2:8. Zeova i kontan nou, alor i konpran nou santiman e i vreman anvi ed nou. I sagren ler nou soufer. Alor, nou kapab asire ki i pou reponn ler nou priye e dir: “Protez mwan parey ou kannet lizye.” (Ps. 17:8) Lizye i en parti lekor ki vreman sansib e ki presye. Alor, ler Zeova i konpar nou avek son kannet lizye, i konmsi i pe dir, ‘Nenport ki, ki fer mon pep ditor, i fer ditor en keksoz ki presye pour mwan.’

7. Akoz nou bezwen konvenki ki Zeova i kontan nou?

⁷ Zeova i anvi ki nou konvenki ki i kontan nou. Me i konnen ki bann keksoz ki nou’n pas ladan, i kapab fer nou annan dout konsernan si i kontan nou. Oubyen i kapab ki  nou pe pas dan en sityasyon ki fer nou doute ki Zeova i kontan nou. Pour ed nou pli asire ki Zeova i kontan nou, annou vwar lafason ki Zeova i montre son lanmour anver Zezi, bann Kretyen swazir e anver nou tou.

LAFASON KI ZEOVA I DEMONTRE SON LANMOUR

8. Kwa ki ti fer Zezi asire ki son Papa i kontan li?

⁸ Zeova ek son Garson in ansanm plis letan ki okenn dimoun ki’n deza egziste. Pandan sa plizyer bilyon lannen ki zot in pase ansanm dan lesyel, zot in devlop en gran lanmour pour kanmarad e zot in vin vreman pros. Parey nou lir dan Matye 17:​5, Zeova i eksprim son lanmour pour Zezi. Zeova ti’n kapab zis dir, ‘Sa i sa enn ki mon’n aprouve.’ Me i ti anvi ki nou konnen ki kantite i kontan Zezi. I pour sa rezon ki i ti dir sa lo Zezi: “Mon Garson ki mon kontan.” Zeova ti fyer konsernan Zezi e konsernan sa ki Zezi ti pe al fer. (Efe. 1:7) Zezi ti asire ki son Papa i kontan li. Plizyer fwa i ti dir ki i asire ki son Papa i kontan li.—Zan 3:35; 10:17; 17:24.

9. Ki lekspresyon dan Labib ki montre ki Zeova i kontan bann Kretyen swazir? Eksplike. (Romen 5:5)

⁹ Zeova i osi eksprim son lanmour pour bann Kretyen swazir. (Lir Romen 5:5.) Remark sa lekspresyon ki sa verse i servi pour montre ki kantite Bondye i kontan bann Kretyen swazir. Sa verse i dir ki lanmour Zeova in “ranpli” zot leker. En liv referans i konpar lanmour Bondye avek en larivyer. Pa sa i montre ki kantite Zeova i kontan bann Kretyen swazir! Sa bann Kretyen i konnen ki ‘Bondye i kontan’ zot. (Zid 1) Zapot Zan ti montre ki mannyer sa i fer zot santi ler i ti dir: “Gete ki kantite nou Papa in kontan nou! Sanmenm i’n swazir nou konman son zanfan.” (1 Zan 3:1) Me eski Zeova i kontan zis bann Kretyen swazir? Non, Zeova in montre ki i kontan nou tou.

10. Ki sa pli gran fason ki Zeova in montre ki i kontan ou?

¹⁰ Ki sa pli gran fason ki Zeova in montre ki i kontan nou? Sa i atraver sa ranson. Par sa, Zeova in demontre plis lanmour ki okenn dimoun in deza demontre. (Zan 3:16; Rom. 5:8) Zeova ti les son Garson presye mor pour tou imen, pour nou pese kapab ganny pardonnen e pour nou kapab vin Son zanmi. (1 Zan 4:10) Pli nou medit lo sa pri ki Zeova ek Zezi in peye, pli nou pou konpran ki kantite zot kontan sakenn parmi nou. (Gal. 2:20) Sa ranson pa ti ganny donnen zis pour satisfer lazistis Zeova. Me i ti ganny donnen konman en kado. Zeova in montre ki i kontan nou par sakrifye sa ki pli presye pour li e sa i Zezi. Zeova ti les son Garson soufer e mor pour nou.

11. Ki nou aprann dan Zeremi 31:3?

¹¹ Parey nou’n vwar, Zeova pa kasyet son santiman avek nou. O kontrer i fer nou konnen ki kantite i kontan nou. (Lir Zeremi 31:3.) Zeova in atir nou ver li parski i kontan nou. (Konpar Deterononm 7:​7, 8.) I napa nanryen e i napa personn ki kapab anpes Zeova kontan nou. (Rom. 8:​38, 39) Ki mannyer lanmour ki Zeova i annan pour ou i fer ou santi? Lir Psonm 23 e vwar ki mannyer sa lanmour ki Zeova ti annan pour David ti fer David santi e ki mannyer lanmour ki Zeova i annan pour nou i kapab fer nou santi.

KI MANNYER SA LANMOUR KI ZEOVA I ANNAN POUR OU I FER OU SANTI?

12. Ki Psonm 23 i koz lo la?

¹² Lir Psonm 23:​1-6. Dan Psonm 23, David i montre ki i asire ki Zeova i kontan li e ki Zeova pou pran swen avek li. David i  dekri sa lanmitye pros ki i annan ant li ek Zeova, ki son Berze. David ti santi li an sekirite ler i ti les Zeova gid li e i ti depan lo Zeova konpletman. I ti konnen ki Zeova ti pou demontre lanmour pour li tou dilon son lavi. Kwa ki ti fer David sitan asire?

13. Akoz David ti asire ki Zeova ti pou pran swen avek li?

¹³ “Mon pa pou mank nanryen.” David ti santi ki Zeova ti pe pran swen avek li parski Zeova ti’n toultan donn li sa ki i bezwen. I ti konnen ki Zeova i son zanmi e ki i ti annan Son laprouvasyon. Sa ti fer ki i ti asire ki nenport keksoz ki kapab arive dan lavenir, Zeova ti pou kontinyen donn li tou sa ki i bezwen. Vi ki David ti asire ki Zeova i kontan li e ki i ti pou toultan pran swen avek li, sa ti fer ki David pa ti enkyet me i ti zwaye.—Ps. 16:11.

14. Ki mannyer Zeova i kapab pran swen avek nou?

¹⁴ Zeova i pran swen avek nou, sirtou ler bann move keksoz i arive dan nou lavi. En ser ki apel Claire, a ki’n servi dan Betel pour plis ki 20 an, pa ti konnen ki mannyer pour ed son fanmir ler zot ti fer fas avek bann problenm, enn apre lot. Premyerman, son papa ti ganny en latak laservel, apre enn son ser ti ganny ekskli konman en Temwen Zeova. Apre sa son fanmir ti rankontre bann problenm larzan e zot ti perdi zot biznes ek zot lakour. Ki mannyer Zeova ti demontre son lanmour anver zot e pran swen avek zot? Claire i dir: “Zeova ti fer sir ki mon fanmir ti annan sa ki zot bezwen sak zour. Plizyer fwa, Zeova in donn nou plis ki sa ki nou ti bezwen. Tanzantan  mon mazin sa bann moman kot Zeova ti pran swen avek nou e mon pa pou zanmen oubliy sa lanmour ki i’n demontre. Sa bann souvenir in ed mwan pour kontinyen servi Zeova avek lazwa ler mon fer fas avek problenm.”

15. Kwa ki ti ed David pour reganny lafors? (Vwar portre.)

¹⁵ “I redonn mwan lafors.” Parfwa, David ti per akoz bann problenm ki i ti pe fer fas avek. (Ps. 18:​4-6) Me sa lanmour ek tandres ki Zeova ti demontre anver li ti fer li reganny lafors. Ler David ti fatige, Zeova ti anmenn li “dan laplenn zerb” e “kot i annan bokou delo pour repoze.” Akoz sa, David ti kapab reganny lafors e kontinyen servi Zeova avek lazwa.—Ps. 18:​28-32.

16. Ki mannyer sa lanmour ki Zeova in demontre anver ou in ed ou pour reganny lafors?

¹⁶ Ler nou pas dan problenm ek difikilte, Zeova i fer menm keksoz pour nou, parey i ti fer pour David. “Nou pa’n disparet akoz Zeova in demontre son lanmour fidel” anver nou. (Lam. 3:22; Kol. 1:11) Annou vwar leksperyans Rachel. Pandan pandemi COVID-19, msye Rachel ti kit li e i ti kit Zeova. Sa ti fer Rachel vreman sagren. Ki Zeova ti fer pour li? Rachel i dir: “Zeova ti fer sir ki mon santi ki lezot i kontan mwan. Akoz Zeova, mon ti annan bann zanmi ki ti pas letan avek mwan, ki ti anmenn manze pour mwan, ki ti anvoy mwan bann mesaz ek verse ankourazan. Mon bann zanmi ti sourir avek mwan e zot ti kontinyen fer mwan rapel ki Zeova pe pran swen avek mwan. Mon remersye Zeova tou lazournen parski in donn mwan en gran fanmir ki kontan mwan.”

17. Akoz David “pa [ti] per nanryen mal”?

¹⁷ “Mon pa per nanryen mal akoz ou avek mwan.” Souvan, lavi David ti an danze e i ti annan en kantite lennmi pwisan. Me sa lanmour ki Zeova ti annan pour li, ti fer li santi li an sekirite e ki Zeova pe protez li. Dan tou sityasyon ki David ti pas ladan, i ti kapab santi ki Zeova i avek li e sa ti reasir li. I pour sa rezon ki i ti kapab sante: “[Zeova] ti delivre mwan avek tou sa ki fer mwan per.” (Ps. 34:4) Menm si parfwa David ti vreman per, i ti kapab sirmont son lafreyer parski i ti konnen ki Zeova i kontan li.

18. Ki mannyer ler ou konnen ki Zeova i kontan ou, sa i donn ou lafors ler ou per?

¹⁸ Ki mannyer ler nou konnen ki Zeova i kontan nou, sa i donn nou lafors ler nou pas dan bann sityasyon ki fer nou per? En  pionye ki apel Susi i dir ki mannyer li ek son msye ti santi ler zot garson ti swiside. I dir: “Ler en keksoz sitan terib i arive dan ou lavi, sa i afekte ou en kantite. Ou santi ki ou pa kapab fer nanryen e ou per ki lezot move keksoz pou arive. Me lanmour ek tandres ki Zeova in demontre in fer mwan santi mwan an sekirite e ki Zeova pe protez mwan.” Rachel, ki’n ganny mansyonnen pli boner, i dir: “En zour swar, ler mon ti vreman sagren, enkyet e per, mon ti koz avek Zeova aotvwa. Dan sa moman, Zeova ti soulaz mwan e ed mwan pour santi mwan kalm zis parey en manman i fer avek son pti baba e apre sa mon ti kapab dormi. Mon pa pou zanmen oubliy sa zour.” En ansyen ki apel Tasos ti pas kat-r-an dan prizon parski i ti refize antre dan larme. Ki mannyer Zeova ti demontre lanmour pour li e pran swen avek li? I dir: “Zeova ti donn mwan tou sa ki mon ti bezwen e plis ankor. Sa ti fer mwan pli asire ki mon kapab met tou mon konfyans dan li. Atraver son lespri sen, Zeova ti ed mwan pour zwaye menm si mon pa ti dan en landrwa ki gou. Sa ti ed mwan vwar ki pli mon annan konfyans dan Zeova, pli mon pou santi ki i kontan mwan. Alor mon ti konmans fer servis pionye ordiner pandan ki mon ti ankor dan prizon.”

VIN PLI PROS AVEK OU BONDYE KI ANNAN TANDRES

19. (a) Ler nou konnen ki Zeova i kontan nou, ki lefe sa i annan lo nou lapriyer? (b) Parmi bann fason ki Labib i dekri lanmour ki Zeova i annan pour nou, ki sa enn ki ou pli kontan? (Vwar sa bwat “ Bann parol ki ed nou konnen ki Zeova i kontan nou.”)

¹⁹ Sa bann leksperyans ki nou’n koz lo la i montre ki Zeova, sa “Bondye lanmour” i avek nou. (2 Kor. 13:11) I enterese avek sakenn parmi nou. Nou asire ki nou “antoure avek Son lanmour fidel.” (Ps. 32:10) Pli nou medit lo lafason ki I’n demontre lanmour anver nou, pli nou pou vwar ki kantite i kontan nou e sa pou fer nou vin pli pros avek li. Nou pou kapab koz avek li san okenn lafreyer e dir li ki kantite nou kontan li. Nou pou kapab koz avek li konsernan sa ki fer nou enkyet parski nou asire ki i konpran nou e i vreman anvi ed nou.—Ps. 145:​18, 19.

20. Ki mannyer sa lanmour ki Zeova i demontre anver nou i fer nou vin pli pros avek li?

²⁰ Zis parey nou kontan asiz kot i annan lasaler ler i fer fre, sa lanmour ki Zeova i annan i fer nou kontan pour reste pros avek li. Sa lanmour ki Zeova i annan i vreman pwisan me i osi ranpli avek tandres. Alor ou kapab zwaye parski Zeova i kontan ou e nou tou nou kapab dir: “Mon kontan Zeova.”—Ps. 116:1.