1-2. Ki difikilte bann serviter fidel Zeova i kapab fer fas avek?

 EN KEKSOZ grav i kapab arive en sel kou avek nou e sanz nou lavi konpletman. Par egzanp, en frer ki apel Luis a ti ganny dir ki i ganny en kanser ki rar. Dokter ti dir li ki i annan zis detrwa mwan pour li viv. Monika ek son msye ti bizi pe fer bann aktivite spirityel ansanm. En zour, Monika ti aprann ki son msye, ki ti en ansyen, ti annan en lot madanm an sekre e sa ti’n dire pour plizyer lannen. En ser selibater ki apel Olivia ti bezwen kit son lakaz deswit parski i ti annan en gro siklonn ki ti pe al tap sa landrwa kot i ti pe reste. Ler i ti retournen, i ti vwar ki sa siklonn ti’n detri son lakaz. Dan zis en pti moman, lavi sa bann dimoun ti’n sanz konpletman. Eski en keksoz grav in deza arive avek ou ki’n sanz ou lavi konpletman?

² Menm si nou bann serviter fidel Zeova, nou fer fas avek bann difikilte ek maladi parey tou lezot dimoun. Me an plis ki sa, nou bezwen fer fas avek lopozisyon oubyen persekisyon avek bann dimoun ki ay pep Bondye. Menm si Zeova pa anpes nou ganny sa bann problenm, i promet ki i pou ed nou. (Iza. 41:10) Avek led Zeova, nou kapab gard nou lazwa, fer bann bon desizyon e reste fidel avek Zeova ler nou pas dan bann sityasyon vreman difisil. Dan sa lartik, nou pou vwar kat fason ki Zeova i ed nou ler nou dan bann moman difisil. Nou pou osi vwar ki nou bezwen fer pour ganny bann byenfe avek led ki Zeova i donn nou.

 ZEOVA POU PROTEZ OU

3. Ler nou pas dan bann sityasyon difisil, kwa ki kapab difisil pour nou fer?

³ Ler nou fer fas avek en sityasyon vreman difisil, nou kapab vwar li difisil pour reflesir byen e fer desizyon. Akoz? Parski i kapab ki nou tro sagren e enkyet e sa i fer nou santi nou konfize e pa konnen ki pour fer. Annou vwar ki mannyer sa de ser ki’n ganny mansyonnen pli boner ti santi ler zot ti pas dan difikilte. Olivia i dir: “Apre ki sa siklonn ti’n detri mon lakour, mon ti santi mwan konfize e pa konnen ki pour fer.” Konsernan sa ki msye Monika in fer, Monika i dir: “Mon ti vreman dezapwente. Mon ti santi ki mon leker in kase. I ti difisil pour mwan fer mon bann aktivite toulezour. Mon pa ti zanmen ekspekte ki sa ti pou arive avek mwan.” Ki mannyer Zeova i promet i pou ed nou ler nou santi nou konfize e pa konnen ki pou fer?

4. Dapre Filipyen 4:​6, 7, ki Zeova i promet nou?

⁴ Ki mannyer Zeova pou ed nou? Zeova i promet pour donn nou sa ki Labib i apel “lape Bondye.” (Lir Filipyen 4:​6, 7.) Sa lape i refer avek sa trankilite ki nou santi ler nou annan en bon lanmitye avek Zeova. Sa lape ki “depas tou sa ki nou kapab konpran,” i pli merveye ki sa ki nou kapab imazinen. Par egzanp, eski ou’n deza sipliy Zeova dan lapriyer e apre sa ou ti sirprann parski ou ti santi ou kalm? Ou’n santi koumsa parski Zeova in donn ou “lape Bondye.”

5. Ki mannyer lape Bondye i protez nou lespri ek leker?

⁵ Dan Filipyen 4:7 i osi dir ki lape Bondye pou “protez zot leker ek lespri.” Sa mo orizinal ki’n ganny tradwir konman “protez,” ti en lekspresyon ki dekri en solda ki vey en lavil kont okenn latak. Bann dimoun dan lavil kot i annan bann solda pe veye, i santi zot an sekirite parski zot konnen ki i annan solda kot baro. Pareyman, ler lape Bondye i protez nou leker ek lespri, nou santi nou kalm parski nou konnen ki nou an sekirite. (Ps. 4:8) Parey Ana, menm si nou sityasyon pa sanze deswit, nou kapab santi nou kalm. (1 Sam. 1:​16-18) Ler nou santi nou kalm, souvan nou pli kapab reflesir byen e fer bann desizyon ki saz.

6. Ki nou kapab fer pour ganny lape Bondye? (Vwar portre.)

⁶ Ki nou bezwen fer? Ler nou fer fas avek difikilte, nou kapab demann Zeova pour protez nou. Ki mannyer? Priye ziska ki ou ganny lape Bondye. (Lik 11:9; 1 Tesa. 5:17) Luis, ki’n ganny mansyonnen  pli boner ti eksplike ki mannyer li avek son madanm Ana, ti kapab fer fas avek zot problenm ler i ti aprann ki i reste li zis detrwa mwan pour viv. I ti dir: “Dan en moman koumsa, i vreman difisil pour fer desizyon konsernan swen medikal ek lezot keksoz. Me ler nou ti fer lapriyer, nou ti ganny lape lespri.” Luis ek son madanm i dir ki plizyer fwa zot ti sipliy Zeova e demann Zeova pour donn zot lape lespri, pour ed zot reste kalm e pour donn zot lasazes pour fer bann bon desizyon. Zot ti santi ki Zeova ti pe ed zot. Si ou dan en sityasyon difisil, kontinyen sipliy Zeova dan lapriyer e ou pou santi lape Bondye pe protez ou leker ek lespri.—Rom. 12:12.

ZEOVA POU ED OU RESTE STAB

7. Ki mannyer nou kapab santi ler nou fer fas avek en sityasyon difisil?

⁷ Ler nou pas dan difikilte, petet nou pa pou santi, reflesir oubyen azir parey labitid. Parey en bato ki pe balote dan bann gro laroul, nou kapab santi ki nou pe ganny tape avek diferan lemosyon. Ana, ki’n ganny mansyonnen pli boner i dir ki i ti fer fas avek diferan lemosyon ler Luis ti mor. Ana i dir: “Parfwa mon ti santi mwan dekouraze e mon ti pran lapenn pour mon prop lekor. Mon ti osi ankoler akoz Luis in mor.” Osi, Ana ti santi li tousel e i ti ankoler parski i ti bezwen pran desizyon konsernan bann keksoz ki normalman Luis ti pou fer. Parfwa i ti santi konmsi i dan en tanpet lo lanmer. Ki mannyer Zeova i ed nou ler nou bann lemosyon i konmans fer nou konfize e nou pa konnen ki pour fer?

8. Dapre Izai 33:​6, ki Zeova i asir nou?

⁸ Ki mannyer Zeova pou ed nou? Zeova i asir nou ki i pou ed nou pour reste stab. (Lir Izai 33:6.) Ler en bato i pas dan en tanpet, sa bato i kapab balote gos drwat. Pour ki en bato i reste stab, i annan bann stabilizers ki ganny mete lo sak kote sa bato anba delo. Sa bann stabilizers i kapab ede pour ki bato pa tro balote. Sa i fer ki bann dimoun ki abor sa bato i pli an sekirite e zot vwayaz i vin pli konfortab. Me en kantite sa bann stabilizers i fonksyonn pli byen ler bato pe bouz devan. Pareyman, Zeova pou ed nou vin stab anmezir nou kontinyen servi li dan bann moman difisil.

9. Ki mannyer nou bann zouti resers i kapab ed nou pour reste stab? (Vwar portre.)

⁹ Ki nou bezwen fer? Ler ou pas dan bann sityasyon difisil e ou pe ganny tape avek diferan lemosyon, fer ou mye pour kontinyen priye, asiste renyon e anons sa  bon nouvel. Byensir, petet ou pa pou kapab fer parey ou ti fer avan me rapel ki Zeova pa ekspekte ki nou fer plis ki sa ki nou kapab fer. (Konpar Lik 21:​1-4.) Osi, met letan de kote pour fer ou letid personnel e pour medite. Akoz? Parski atraver son lorganizasyon, Zeova in donn nou bann lenformasyon merveye ki baze lo Labib e ki kapab ed nou pour kontrol nou bann lemosyon ler nou fer fas avek bann sityasyon difisil. Pour trouv sa ki ou bezwen, ou kapab servi bann zouti resers ki disponib dan ou langaz, parey JW Library^®, Watch Tower Publications Index ek Liv resers pour Temwen Zeova. Monika, ki’n ganny mansyonnen pli boner, ti dir ki ler i santi ki son bann lemosyon pe vin for, deswit i servi sa bann zouti resers. Par egzanp, i ti fer resers lo sa mo “lakoler.” Parfwa i ti osi fer resers lo sa mo “traizon” oubyen “fidelite.” Apre i ti lir sa bann lenformasyon ziska i santi li pli byen. Monika i dir: “Ler mon konmans fer resers, mon annan bokou traka. Me anmezir mon lir, mon santi konmsi Zeova pe ser mwan dan son lebra. Anmezir mon kontinyen lir, mon realize ki Zeova i konpran tou mon bann santiman e ki i ti pe ed mwan.” Sa bann led ki ou gannyen avek Zeova i osi kapab ed ou pour kontrol ou bann lemosyon ziska ki ou santi ou pli kalm.—Ps. 119:​143, 144.

ZEOVA POU SIPORT OU

10. Ki mannyer nou kapab santi ler nou pas dan en sityasyon vreman difisil?

¹⁰ Apre ki nou’n pas dan en sityasyon vreman difisil, i annan zour ki petet nou santi nou fay fizikman e emosyonnelman. Nou kapab santi nou parey en atlet ki ti tay vit me ki aprezan i bwete akoz en blesir ki i’n gannyen. Nou kapab vwar li difisil pour nou fer bann keksoz ki avan i ti fasil pour nou fer oubyen nou nepli annan sa dezir pour fer bann keksoz ki avan ti fer nou zwaye. Parey Eliya, nou kapab santi ki i tro difisil pour nou leve e nou zis anvi dormi. (1 Rwa. 19:​5-7) Ki Zeova i promet i pou fer ler nou santi nou fay?

11. Ki en lot fason ki Zeova i ed nou? (Psonm 94:18)

¹¹ Ki mannyer Zeova pou ed nou? Zeova i promet pour siport nou. (Lir Psonm 94:18.) Zis parey en atlet ki’n ganny en blesir, i bezwen sipor pour li bouze, i kapab ki nou osi nou bezwen led pour kontinyen reste aktif dan servis Zeova. Dan bann moman koumsa, Zeova i asir nou:  “Mwan, Zeova ou Bondye, pe atrap ou lanmen drwat, mon sa Enn ki pe dir ou, ‘Pa per, mon pou ed ou.’” (Iza. 41:13) Lerwa David ti ganny sa menm led. Ler David ti fer fas avek bann sityasyon difisil, i ti dir avek Zeova: “Ou lanmen drwat i soutenir mwan.” (Ps. 18:35) Me ki mannyer Zeova i donn siport nou?

12. Lekel ki Zeova i kapab servi pour ed nou ler nou santi nou fay?

¹² Souvan Zeova i siport nou par motiv lezot pour ed nou. Par egzanp, en fwa ler David ti santi li fay, son zanmi Zonatan ti al vizit li pour ankouraz li. (1 Sam. 23:​16, 17) Pareyman Zeova ti swazir Elisa pour donn Eliya bann led pratik. (1 Rwa. 19:​16, 21; 2 Rwa. 2:2) Ozordi, Zeova i kapab servi nou fanmir, zanmi oubyen bann ansyen pour siport nou. Me ler nou vreman sagren, petet nou anvi reste lwen avek lezot e nou zis anvi reste tousel. I normal pour nou reazir koumsa. Me ki nou kapab fer pour ki Zeova i siport nou?

13. Ki nou bezwen fer pour ganny sipor Zeova? (Vwar portre.)

¹³ Ki nou bezwen fer? Fer zefor pour pa reste lwen avek lezot. Ler nou reste lwen avek lezot nou kapab konmans konsantre zis lo nou menm ek bann problenm ki nou pe fer fas avek. Sa kalite fason panse i kapab anpes nou fer bann bon desizyon. (Prov. 18:1) Byensir nou tou nou bezwen letan pour nou menm sirtou ler nou pas dan en sityasyon vreman difisil. Me si nou reste lwen avek lezot pour en kantite letan, i kapab ki nou pe rezet led bann dimoun ki Zeova pe servi pour siport nou. Alor menm si nou pe fer fas avek en sityasyon ki vreman difisil, annou aksepte led avek nou fanmir, zanmi e avek bann ansyen. Vwar zot konman sa bann ki Zeova pe servi pour siport nou.—Prov. 17:17; Iza. 32:​1, 2.

ZEOVA POU REKONFORT OU

14. Ki bann sityasyon ki kapab fer nou per?

¹⁴ Nou kapab fer fas avek bann sityasyon ki fer nou per. Dan Labib, bann serviter fidel Zeova i koz lo bann moman kot zot ti vreman dekouraze e per akoz zot lennmi oubyen lezot problenm. (Ps. 18:4; 55:​1, 5) Pareyman, i kapab ki nou osi nou pe ganny opoze kot lekol, dan travay, avek nou fanmir oubyen avek gouvernman. I kapab osi ki nou per ki nou pou mor akoz nou annan en maladi.  Dan bann moman koumsa, nou kapab santi nou parey en zanfan ki pa kapab fer nanryen. Ki mannyer Zeova i ed nou dan bann moman koumsa?

15. Dapre Psonm 94:​19, ki Zeova pou fer pour nou?

¹⁵ Ki mannyer Zeova pou ed nou? Zeova i rekonfort e soulaz nou. (Lir Psonm 94:19.) Sa psonm i kapab fer nou mazin en pti fiy ki per e ki pa kapab dormi parski i annan en gro tanpet. Nou kapab mazin son papa ki al kot li e i pran li dan son lebra ziska i dormi. Menm si sa tanpet i ankor la, sa pti fiy i santi li an sekirite dan lebra son papa. Ler nou fer fas avek bann problenm ki fer nou per, i kapab ki nou bezwen nou Papa ki dan lesyel pour ser nou dan son lebra ziska ki nou santi nou pli kalm. Ki mannyer nou kapab ganny sa kalite rekonfor avek Zeova?

16. Ki nou kapab fer pour ganny sa rekonfor ki Zeova i donn nou? (Vwar portre.)

¹⁶ Ki nou bezwen fer? Pas letan avek Zeova regilyerman par fer lapriyer e par lir son Parol. (Ps. 77:​1, 12-14) Si ou annan sa labitid, i tre probab ki sa premye keksoz ki ou pou fer ler ou anba presyon, i pour rod led ou Papa ki dan lesyel. Dir li kwa ki fer ou per e enkyet. Apre sa, ekout son larepons par lir son Parol e ou pou vwar ki mannyer Zeova i rekonfort ou. (Ps. 119:28) Serten parti oubyen liv spesifik dan Labib i kapab rekonfort ou ler ou per. Par egzanp, ou kapab trouv bann lankourazman dan liv Zob, Psonm ek Proverb e osi avek sa ki Zezi i dir dan Matye sapit 6. Ler ou priy Zeova e ou lir son Parol ou pou santi ki Zeova pe rekonfort ou.

17. Ki nou kapab asire?

¹⁷ Nou kapab asire ki Zeova pou ed nou ler nou pas dan bann moman difisil. Nou pa pou zanmen tousel. (Ps. 23:4; 94:14) Zeova i promet ki i pou protez nou, fer nou vin stab, siport nou e rekonfort nou. Izai 26:3 i dir sa parol konsernan Zeova: “Ou pou protez bann ki depan lo ou konpletman, ou pou toultan donn zot lape, parski zot annan konfyans dan ou.” Alor annan konfyans dan Zeova e fer tou sa ki ou kapab pour ganny led ki i donnen. Si ou fer sa, ou pou reganny ou lafors menm ler ou fer fas avek bann sityasyon difisil.