1. Lo kwa ki en kantite dimoun ozordi i konsantre?

 ESKI ou’n remarke ki en kantite dimoun ozordi i mazin zot prop lekor plis ki zot mazin lezot? Par egzanp, i annan serten ki servi rezo sosyal pour atir latansyon lo zot lekor e lo bann keksoz ki zot in akonpli. Me i napa bokou dimoun ki donn Zeova laglwar. Dan sa lartik, nou pou vwar ki i vedir pour donn Zeova laglwar e akoz nou devret fer sa. Nou pou osi aprann ki mannyer nou kapab donn Bondye sa laglwar ki i merite e ki mannyer Bondye pour glorifye son non byento.

KI I VEDIR POUR DONN ZEOVA LAGLWAR?

 2. Ki mannyer Zeova ti montre bann Izraelit son laglwar kot Montanny Sinai? (Vwar portre.)

² Kisisa laglwar? Dan Labib, sa mo “laglwar” i kapab refer avek okenn keksoz ki fer en dimoun enpresyonan. Pa bokou letan apre ki bann Izraelit ti ganny libere dan lesklavaz Lezip, Zeova ti montre zot ki i en Bondye vreman pwisan. Imazin sa ki ti arive: Plizyer milyon Izraelit i debout devan Montanny Sinai pour ekout sa ki Bondye pe al dir zot. En nyaz nwanr i kouver sa montanny. En sel kou, later i tranble anba lipye bann Izraelit. Petet sa i akoz i annan en volkan. I osi annan zekler, loraz ek en gro tapaz tronpet. (Egz. 19:16-18; 24:17; Ps. 68:8) I bezwen ki bann Izraelit ti enpresyonnen ler Zeova ti montre zot son laglwar dan sa fason.

 3. Ki i vedir pour donn Zeova laglwar?

³ Ki nou kapab dir konsernan bann imen? Eski nou kapab donn Zeova laglwar? Wi nou kapab. En fason nou kapab donn Zeova laglwar i par koz avek lezot konsernan bann keksoz merveye ki i’n fer e konsernan son bann zoli kalite. Nou osi glorifye Bondye ler nou donn li loner pour tou bann keksoz ki i ed nou pour fer. (Iza. 26:12)  Lerwa David ti donn laglwar Zeova e sa i en bon legzanp pour nou. Dan en lapriyer ki David ti fer devan pep Izrael, David ti dir Bondye: “O Zeova, grander, pwisans, labote, laglwar ek dinyite i pour ou parski tou keksoz dan lesyel e lo later i pour ou.” Apre ki David ti’n fini priye, “sa pep antye ti loue Zeova.”—1 Kron. 29:11, 20.

 4. Ki mannyer Zezi ti donn Zeova laglwar?

⁴ Ler Zezi ti lo later, i ti glorifye son Papa par dir lezot ki Zeova ki’n donn li sa pouvwar pour fer mirak. (Mark 5:18-20) Zezi ti osi glorifye Zeova par lafason ki i ti koz lo son Papa e lafason ki i ti tret lezot. En fwa, Zezi ti pe ansennyen dan sinagog e parmi bann ki ti pe ekout li, i ti annan en madanm ki ti posede par en demon pour 18 an. Sa demon ti’n fer lekor sa madanm sitan kourbe ki sa madanm pa ti ni menm kapab debout drwat. Zezi ti konpran ki sa madanm ti pe soufer e i ti anvi ed li. Alor i ti apros sa madanm e i ti koz avek li dan en fason zantiy. I ti dir sa madanm: “Madanm, ou’n geri.” Apre i ti poz son lanmen lo sa madanm e deswit sa madanm ti debout drwat e “konmans glorifye Bondye.” Sa madanm ti vreman rekonesan ki Zeova ti’n geri li. (Lik 13:10-13) Sa madanm ti annan bon rezon pour donn Zeova laglwar e nou osi nou annan bon rezon pour donn Zeova laglwar.

AKOZ NOU DEVRET DONN ZEOVA LAGLWAR?

 5. Akoz nou annan respe pour Zeova?

⁵ Nou glorifye Zeova parski nou annan bokou respe pour li. Nou annan en kantite rezon pour annan respe pour Zeova. Zeova i tou pwisan setadir i kapab fer nenport keksoz ki i anvi e i pa zanmen fatige. (Ps. 96:4-7) Atraver bann keksoz ki Zeova in fer, nou kapab vwar ki i vreman saz. I’n donn nou lavi e tou sa ki nou bezwen pour viv. (Rev. 4:11) I fidel. (Rev. 15:4) Tou sa ki i fer i reisi e i toultan gard son bann promes. (Zoz. 23:14) I pour sa rezon ki profet Zeremi ti dir sa konsernan Zeova: “Parmi tou bann dimoun saz dan bann nasyon e parmi tou zot bann rwayonm, napa personn parey ou.” (Zer. 10:6, 7) I kler ki nou annan bann bon rezon pour annan respe pour nou Papa ki dan lesyel. Me nou pa zis annan respe pour Zeova, nou kontan li.

 6. Akoz nou kontan Zeova?

⁶ Nou glorifye Zeova parski nou vreman kontan li. Annou vwar serten kalite ki Zeova i annan ki fer nou kontan li. I pran pitye e i demontre konpasyon. (Ps. 103:13; Iza. 49:15) Ler nou sagren, Zeova osi i sagren. (Zek. 2:8) I fer li fasil pour nou aprann konn li e vin son zanmi. (Ps. 25:14; Akt 17:27) Zeova i annan limilite setadir “i bese pour get lesyel ek later e i ed en malere ki pe asiz dan lapousyer.” (Ps. 113:6, 7) Tou sa bann rezon i fer nou anvi glorifye nou Bondye.—Ps. 86:12.

 7. Ki loportinite spesyal nou annan?

⁷ Nou glorifye Zeova parski nou anvi lezot i konn li. En kantite dimoun pa konn laverite konsernan Zeova. Akoz? Parski Satan in dir bann mansonz lo Zeova e sa in avegle en kantite dimoun. (2 Kor. 4:4) Satan in fer dimoun krwar ki Zeova i en Bondye ki kontan revanze, ki Zeova pa kontan nou e ki Zeova i responsab pour laplipar soufrans ki i annan lo later. Me  nou, nou konn laverite konsernan nou Bondye. Nou annan sa loportinite pour dir lezot konsernan sa kalite Bondye ki Zeova i ete e pour ed zot glorifye li zot osi. (Iza. 43:10) Psonm 96 i koz prensipalman lo donn laglwar Zeova. Anmezir ki nou diskit lo serten parol dan sa psonm, mazin lo bann fason ki ou kapab donn Zeova sa laglwar ki i merite.

KI MANNYER NOU KAPAB DONN ZEOVA SA LAGLWAR KI I MERITE?

 8. Ki en fason nou kapab glorifye Zeova? (Psonm 96:1-3)

⁸ Lir Psonm 96:1-3. Nou kapab glorifye Zeova atraver sa ki nou dir lo li. Dan sa bann verse, pep Zeova i ganny ankouraze pour “sant pour Zeova,” pour “loue son non,” pour “anons sa bon nouvel lo son delivrans” e pour “anons son laglwar avek bann nasyon.” Tousala i bann fason ki nou kapab glorifye nou Papa ki dan lesyel. Bann Zwif fidel ek bann Kretyen dan premye syek pa ti ezite pour dir lezot konsernan bann bon keksoz ki Zeova ti’n fer pour zot e pour defann son repitasyon. (Dan. 3:16-18; Akt 4:29) Ki mannyer nou kapab swiv zot legzanp?

9-10. Ki ou aprann avek leksperyans Angelena? (Vwar portre.)

⁹ Annou vwar leksperyans en ser ki apel Angelena, a ki reste Leta-z-ini Lanmerik. I ti demontre kouraz e defann repitasyon Zeova dan sa landrwa kot i ti travay. Vi ki i ti’n fek konmans travay dan sa landrwa, i ti ganny envite en renyon kot tou dimoun ki ti’n fek konmans travay dan sa landrwa ti ganny loportinite pour koz avek lezot konsernan zot lavi. Angelena ti plàn pour montre serten portre ki montre sa lazwa ki i annan konman en Temwen Zeova. Me zis avan i ti son tour pour koze, enn son koleg ti entrodwir son lekor e i ti dir ki i’n ganny elve konman en Temwen Zeova. I ti konmans dir bann move keksoz lo Temwen Zeova e lo nou krwayans. Angelena i dir: “Mon leker ti pe bat for. Me mon ti dir dan mwan menm: ‘Eski mon pou les en dimoun koz manti lo Zeova oubyen eski mon pou defann repitasyon Zeova?’”

¹⁰ Ler son koleg travay ti fini koze, Angelena ti fer en pti lapriyer trankil. Apre i ti dir li dan en fason zantiy: “Mwan osi  mon’n grandi en pe parey ou. Mwan osi mon’n ganny elve konman en Temwen Zeova e mon ankor en Temwen Zeova.” Menm si Angelena ti strese, i ti reste kalm. I ti montre son bann koleg travay bann portre kot li ek son bann zanmi pe servi Zeova dan lazwa e avek respe, i ti defann son krwayans. Ki ti arive apre? Ler Angelena ti fini koze, sa zonm ti’n vin pli kalm. I ti menm mansyonn serten zoli souvenir ki i ti annan ler i ti pe grandi konman en Temwen Zeova. Angelena i dir: “Zeova i merite ki nou defann son repitasyon. I en loner pour nou dir lezot laverite lo li.” Nou osi nou annan sa loner pour loue Zeova e pour glorifye li menm ler lezot i mank respe pour li.

11. Ki mannyer bann serviter Zeova tou dilon listwar in swiv sa prensip ki dan Psonm 96:8?

¹¹ Lir Psonm 96:8. Nou kapab glorifye Zeova atraver lafason ki nou servi nou bann keksoz materyel. Bann serviter Zeova in toultan onor li dan sa fason. (Prov. 3:9) Par egzanp, bann Izraelit ti donn larzan ek bann keksoz materyel pour ede konstri e mentenir tanp. (2 Rwa. 12:4, 5; 1 Kron. 29:3-9) Serten disip Zezi ti “servi zot keksoz” pour ed Zezi ek son bann zapot. (Lik 8:1-3) Bann Kretyen dan premye syek ti osi fer kontribisyon pour ed bann Kretyen ki ti pe soufer akoz lafamin. (Akt 11:27-29) Ozordi, nou osi nou kapab glorifye Zeova atraver bann kontribisyon ki nou fer.

12. Ki mannyer nou bann kontribisyon i anmenn laglwar pour Zeova? (Vwar portre.)

¹² Annou vwar en leksperyans ki montre lafason ki nou bann kontribisyon i anmenn laglwar pour Zeova. An 2020, i ti annan en lasesres Zimbabwe ki ti dire pour en kantite letan. Sa ti fer ki plizyer milyon dimoun ti pe mor lafen enkli en ser ki apel Prisca. Menm si sa sityasyon ti vreman difisil, Prisca ti kontinyen al predikasyon tou le Merkredi ek Vandredi parey son labitid, menm pandan letan kot zot ti bezwen labour later. Son bann vwazen ti boufonn li parski i ti al predikasyon olye travay dan son plantasyon e zot ti dir: “Ou pou mor lafen ou.” Prisca ti asire ki Zeova ti pou pran swen avek li. Alor i ti toultan reponn: “Zeova pa’n zanmen abandonn son bann serviter.” Pa bokou letan apre sa, i ti ganny  manze ek lezot keksoz ki i ti bezwen avek lorganizasyon. Sa ti posib akoz bann kontribisyon ki nou fer. Bann vwazen Prisca ti enpresyonnen e zot ti dir li: “Bondye pa’n zanmen abandonn ou alor nou anvi aprann plis lo li.” Set parmi son bann vwazen ti konmans asiste renyon.

13. Ki mannyer nou kapab glorifye Zeova atraver nou kondwit? (Psonm 96:9)

¹³ Lir Psonm 96:9. Nou kapab glorifye Zeova atraver nou kondwit. Bann pret ki ti servi kot tanp Zeova ti bezwen bennyen e prop pour zot kapab fer zot servis. (Egz. 40:30-32) Konman bann serviter Zeova, nou bezwen prop fizikman me pli enportan ankor, nou bezwen annan en bon kondwit. (Ps. 24:3, 4; 1 Pyer 1:15, 16) Nou bezwen debaras nou avek “sa vye personnalite” e devlop “sa nouvo personnalite.” Sa i vedir ki nou fer tou sa ki nou kapab pour evite annan en move fason panse ek bann move konportman ki pa fer Zeova plezir. O kontrer nou aprann pour reflesir e azir dan en fason ki montre ki nou pe swiv legzanp Zeova e nou pe demontre bann kalite ki Zeova i annan. (Kol. 3:9, 10) Avek led Zeova, menm bann dimoun ki fer bann keksoz vreman mal e ki vyolan i kapab sanze e devlop sa nouvo personnalite.

14. Ki ou aprann avek leksperyans Jack? (Vwar portre.)

¹⁴ Annou vwar leksperyans Jack. Jack ti en zonm ki ti vyolan e danzere e dimoun ti donn li sa pti non Demon. Jack ti ganny kondannen amor pour bann krim ki i ti’n fer. Pandan ki i ti pe espere pour li ganny egzekite, i ti aksepte pour etidye Labib avek en frer ki ti vizit sa prizon kot i ti ete. Malgre tou sa ki i ti’n fer, Jack ti debaras li avek son vye personnalite e avek letan, i ti kalifye pour batize. Jack ti’n sitan sanze ki sa zour ki i ti ganny egzekite, serten gard prizon ti plere anmezir zot ti pe dir li orevwar. En serzan ki ti travay dan prizon ti dir: “Oparavan Jack ti sa pli move prizonnyen me aprezan i enn parmi bann pli bon prizonnyen.” Sa semenn apre ki Jack ti’n ganny egzekite, bann frer ki ti abitye fer bann renyon lasemenn dan prizon ti zwenn en prizonnyen ki ti asiste renyon pour premye fwa. Kwa ki ti  motiv li pour asiste renyon? I ti enpresyonnen avek lafason ki Jack ti’n sanze e i ti anvi konnen ki i ti bezwen fer pour ador Zeova. I kler ki nou kondwit i kapab anmenn laglwar pour nou Papa ki dan lesyel.—1 Pyer 2:12.

KI MANNYER ZEOVA POU GLORIFYE SON NON BYENTO?

15. Ki mannyer Zeova pou glorifye son non byento? (Psonm 96:10-13)

¹⁵ Lir Psonm 96:10-13. Bann dernyen verse dan Psonm 96 i dir ki Zeova i en Ziz ek Lerwa ki drwat. Ki mannyer Zeova pou glorifye son non byento? I pou fer sa par anmenn lazistis. Byento i pou detrir Gran Babilonn parski bann fo larelizyon in fer bann move keksoz e zot in ansenny bann mansonz lo li. (Rev. 17:5, 16; 19:1, 2) Petet serten ki pou vwar destriksyon Gran Babilonn pou zwenn ansanm avek nou pour ador Zeova. Finalman, dan lager Armagedon, Zeova pou detrir lemonn Satan setadir tou bann ki opoz li e ki’n dir bann mansonz lo li. Me i pou sov tou bann ki kontan li, ki obeir li e ki fyer pour glorifye li. (Mark 8:38; 2 Tesa. 1:6-10) A lafen Renny Mil an Kris apre sa tes final, Zeova pou’n fini sanktifye son non. (Rev. 20:7-10) Sa letan, “konnesans lo laglwar Zeova pou ranpli later zis parey delo i kouver fon lanmer.”—Aba. 2:14.

16. Ki ou determinen pour fer? (Vwar portre.)

¹⁶ Pa i pou gou ler tou dimoun lo later pou donn Zeova laglwar ki son non i merite. Me ziska ki sa i arive, nou kapab fer tou sa ki nou kapab pour glorifye nou Bondye sak fwa ki nou annan sa loportinite pour fer li. Pour ed nou gard antet sa responsabilite enportan ki nou annan, Konsey Direkter in swazir Psonm 96:8 konman nou teks pour lannen 2025. Sa verse i dir: “Donn Zeova laglwar ki son non i merite.”