1. Ki keksoz ki nou tou nou bezwen fer ki kapab difisil?

 TOU LE ZOUR, nou bezwen fer bann desizyon. Serten desizyon i ase fasil pour fer. Par egzanp, ler nou pe deside ki nou pou manze pour brekfas oubyen ki ler nou pou al dormi. I annan lezot desizyon ki pli difisil pour fer. Sa bann desizyon i kapab annan en lefe lo nou lasante, nou lazwa, nou fanmir oubyen nou ladorasyon pour Zeova. Nou anvi ki bann desizyon ki nou fer i anmenn byenfe pour nou ek nou fanmir. Me sa ki pli enportan ankor, nou anvi ki nou bann desizyon i fer Zeova plezir.—Rom. 12:1, 2.

 2. Ki ou kapab fer pour ed ou fer bann desizyon ki saz?

² Ou pou pli kapab fer bann desizyon ki saz si ou (1) annan tou lenformasyon, (2) pran kont pwennvi Zeova lo sa ki ou pe deside e (3) reflesir byen lo ou bann opsyon. Sa lartik pou diskit lo sa trwa keksoz e i pou ed nou vwar ki mannyer nou kapab pli byen servi nou abilite pour zize.—Prov. 2:11.

ANNAN TOU LENFORMASYON

 3. Akoz ou bezwen annan tou lenformasyon avan ou fer en desizyon? Donn en legzanp.

³ Sa premye keksoz ki nou bezwen fer pour nou kapab fer en bon desizyon i pour annan tou lenformasyon. Akoz sa i enportan? Imazin en pasyan ki al kot dokter akoz i annan en maladi grav. Eski sa dokter pou fer en desizyon lo ki tretman pour donn sa pasyan san egzamin sa pasyan oubyen demann li kestyon avan? Non. Ou osi ou pou fer bann pli bon desizyon si ou premyerman reflesir lo tou lenformasyon ki annan pour fer avek ou sityasyon. Ki mannyer ou kapab fer sa?

 4. Dapre Proverb 18:13, ki mannyer ou kapab fer sir ki ou konn tou lenformasyon? (Vwar portre.)

 ⁴ Souvandfwa, ou kapab ganny lenformasyon par demann kestyon. Meton ou’n ganny envite en parti. Eski ou devret al sa parti? Si ou pa konn sa dimoun ki pe fer sa parti oubyen bann laranzman, ou pou bezwen demann bann kestyon parey: “Kote e ki ler sa parti pou ganny fer? Ki kantite dimoun ki pou la? Lekel ki pou fer sir ki tou keksoz i mars byen dan sa parti? Lekel ki pe vin sa parti? Ki bann aktivite ki’n ganny plàn? Eski i pou annan lalkol?” Larepons pour sa bann kestyon pou ed ou fer en bon desizyon.—Lir Proverb 18:13.

 5. Ki ou devret fer apre ki ou’n ganny tou lenformasyon?

⁵ Apre ki ou’n ganny tou lenformasyon, reflesir byen lo sa sityasyon. Par egzanp, ki ou pou fer si ou aprann ki serten dimoun ki pou vin sa parti pa obeir bann standar Zeova oubyen ki lalkol pou ganny servi me ki i napa personn ki pou fer sir ki dimoun pa pe bwar tro bokou? Eski ou krwar ki i annan en posibilite pour sa parti vin en parti san kontrol? (1 Pyer 4:3) De lot kote, ki ou pou fer si sa ler ki sa parti pou ganny fer pou fer ou mank renyon oubyen predikasyon? Ler ou’n konn tousala, ou pou pli byen kapab fer en bon desizyon. Me i annan en lot keksoz ki ou  devret fer. Ou deza konnen ki mannyer ou vwar sa sityasyon. Aprezan demann ou lekor: “Ki mannyer Zeova i santi konsernan sa sityasyon?”—Prov. 2:6.

PRAN KONT PWENNVI ZEOVA

 6. Dapre Zak 1:5, akoz nou devret demann Zeova son led dan lapriyer?

⁶ Demann Zeova pour ed ou konpran son fason panse. Zeova i promet pour donn nou lasazes pour konnen si en desizyon pou fer li plezir. I donn nou sa lasazes “avek zenerozite san fer okenn repros.”—Lir Zak 1:5.

 7. Ki mannyer ou kapab konn fason panse Zeova lo en size? Donn en legzanp.

⁷ Apre ki ou’n priy Zeova pour ganny son gidans, vey byen pour vwar ki mannyer Zeova i reponn ou lapriyer. Annou vwar en legzanp. Si ou’n perdi ler ou pe al en landrwa, ou kapab demann en dimoun ki reste dan sa landrwa pour ed ou. Me eski ou pou ale avan ki sa dimoun i ganny sans reponn ou? Non. Ou pou ekout atantivman ler i pe montre ou ki semen pour ale. Pareyman, apre ki ou’n demann Zeova pour donn ou lasazes, ou kapab trouv son larepons par rod bann lalwa ek prensip dan Labib ki aplik pour ou sityasyon. Par egzanp, ler ou pe deside si ou pou al sa parti ki’n ganny mansyonnen pli boner, ou kapab reflesir lo sa ki Labib i dir konsernan bann parti san kontrol, konsernan move frekantasyon e konsernan lenportans  pour met Rwayonm premye olye sa ki ou ti ava kontan.—Mat. 6:33; Rom. 13:13; 1 Kor. 15:33.

 8. Ki ou kapab fer si ou bezwen led pour vwar bann lenformasyon ki ou pe rode? (Vwar portre.)

⁸ Parfwa i kapab ki ou pou bezwen led pour vwar bann lenformasyon ki ou pe rode. Ou kapab ganny konsey avek en frer oubyen en ser matir. Par kont, ou pou osi ganny bann byenfe ler ou fer ou prop resers. I annan en kantite lenformasyon ki kapab ed nou dan nou bann zouti resers parey Liv resers pour Temwen Zeova ek sa piblikasyon Bann verse Labib pour nou lavi Kretyen. Rapel ki ou lobzektif i pour fer en desizyon ki fer Zeova plezir.

 9. Ki mannyer nou kapab fer sir ki desizyon ki nou fer i fer Zeova plezir? (Efezyen 5:17)

⁹ Ki mannyer nou kapab fer sir ki sa desizyon ki nou fer i fer Zeova plezir? Premyerman, nou bezwen konn Zeova byen. Labib i dir ki “en dimoun ki konn sa Enn ki Tre Sen i ganny lentelizans.” (Prov. 9:10) Vre lentelizans i ler nou konn bann kalite ki Zeova i annan, son plan e sa ki i kontan oubyen sa ki i pa kontan. Ou kapab demann ou lekor: ‘Dapre sa ki mon konnen lo Zeova, ki desizyon mon kapab fer ki pou fer li plezir?’—Lir Efezyen 5:17.

10. Akoz bann prensip Labib i pli enportan ki tradisyon oubyen kiltir?

¹⁰ Pour nou kapab fer Zeova plezir, parfwa nou pou bezwen dezapwent bann ki pros avek nou. Par egzanp, serten paran ki annan bon lentansyon i kapab met presyon lo zot fiy pour marye avek en msye ki ris menm si sa msye pa for spirityelman. I normal ki zot anvi zot fiy i annan en lavi konfortab me eski sa msye pou ed zot fiy pour annan en bon lanmitye avek Zeova? Me ki mannyer Zeova li, i vwar sa sityasyon? Nou kapab vwar larepons dan Matye 6:33. Dan sa verse, bann Kretyen i ganny ankouraze pour “kontinyen rod Rwayonm . . . premye.” Menm si nou devret onor nou paran e annan respe pour bann dimoun dan nou kominote, sa ki pli enportan i pour fer Zeova kontan.

REFLESIR BYEN LO OU BANN OPSYON

11. Ki kalite ki’n ganny mansyonnen dan Filipyen 1:9, 10 ki pou ed ou reflesir byen lo ou bann opsyon?

¹¹ Apre ki ou’n vwar bann prensip Labib ki aplikab pour ou sityasyon, ou bezwen reflesir byen lo ou bann opsyon. (Lir Filipyen 1:9, 10, not; vwar not letid “full discernment” dan nwtsty-E.) Disernman pou ed ou imazinen ki i kapab arive si ou swazir sak sa bann opsyon. Parfwa i kapab fasil pour fer en desizyon me i annan letan kot i pa kler ki desizyon ou pou fer. Disernman pou ed ou fer bann desizyon ki saz menm dan bann sityasyon ki konplike.

12-13. Ki mannyer disernman i kapab ed ou fer en desizyon ki saz ler ou pe deside ki travay ou pou fer?

¹² Reflesir lo sa sityasyon. Ou pe rod en louvraz pour ou kapab pran swen avek ou fanmir. I annan de travay ki ou kapab swazir. Ou reflesir lo tou lenformasyon par egzanp, lo kalite travay ki ou pou fer, ler ki ou pou travay, sa kantite letan ki ou pou pran pour ariv dan sa landrwa travay ek lezot keksoz ankor. Tou le de travay pa pe al kont bann prensip Labib e en Kretyen i kapab aksepte sa travay. Petet ou ti pou pli kontan pour fer enn parmi sa de travay parski ou pli kontan sa kalite travay oubyen ou pou ganny plis larzan. Me i annan lezot keksoz ki ou bezwen reflesir lo la avan ki ou fer en desizyon.

¹³ Par egzanp, eski sa bann travay pou  permet ou al tou ou renyon? Eski sa bann travay pou pran sa letan ki ou bezwen pour ed ou fanmir santi zot an sekirite, zwaye e pour ed zot vin pros avek Zeova? Ler ou demann bann kestyon koumsa, sa pou ed ou met “sa ki pli enportan” setadir ou ladorasyon ek bezwen ou fanmir avan bann keksoz materyel. Apre ou pou kapab fer en desizyon ki Zeova pou beni.

14. Ki mannyer ler nou annan disernman e nou demontre lanmour, sa pou ed nou pour pa fer lezot tonbe?

¹⁴ Ler nou annan disernman, nou pou osi reflesir lo lefe ki nou desizyon i kapab annan lo lezot pour ki nou pa “fer lezot tonbe.” (Fili. 1:10) Sa i enportan sirtou si nou pe fer bann desizyon konsernan nou fason sanze ek laparans. Par egzanp, i kapab ki nou kontan en kalite stil sanze  oubyen pennyen. Me ki nou pou fer si lezot dan kongregasyon oubyen an deor kongregasyon i ganny ofanse par nou fason sanze ek pennyen? Disernman pou ed nou respekte zot santiman. Lanmour pou pous nou pour rod “lentere lezot” e pour sanz dan en fason modes. (1 Kor. 10:23, 24, 32; 1 Tim. 2:9, 10) Sa pou ed nou fer en desizyon ki montre ki nou kontan e nou annan respe pour lezot.

15. Ki ou devret fer avan ki ou fer en desizyon enportan?

¹⁵ Si ou pe fer en desizyon enportan, reflesir lo ki ou pou bezwen fer pour fer sa desizyon. Zezi ti ansenny nou pour “kalkile” avan ki nou fer en keksoz. (Lik 14:28) Alor pran an konsiderasyon lakantite letan, resours ek zefor ki ou pou bezwen pour reisi dan sa desizyon. Dan serten ka, petet ou pou bezwen koz avek ou fanmir pour vwar ki sak manm fanmir pou bezwen fer pour siport sa desizyon. Akoz i enportan pour fer sa? Ler ou fer sa, sa i kapab ed ou vwar ki ou bezwen fer serten azisteman dan ou desizyon oubyen ki i annan en lot opsyon ki pli pratik. Ler ou ekout ou fanmir e enkli zot dan ou desizyon, zot pou pli pare pour travay ansanm avek ou pour ou reisi dan sa desizyon ki ou pou fer.—Prov. 15:22.

FER EN DESIZYON KI POU ED OU REISI

16. Kwa ki pou ed ou fer en desizyon ki pou reisi? (Vwar bwat “ Ki mannyer ou kapab fer bann desizyon ki saz?”)

¹⁶ Si ou’n swiv sa bann keksoz ki’n ganny mansyonnen pli boner, ou’n pare pour fer en desizyon ki saz. Ou’n rod tou lenformasyon e ou’n vwar bann prensip ki pou ed ou fer en desizyon ki pou fer Zeova plezir. Aprezan ou kapab demann Zeova pour ed ou fer sa desizyon reisi.

17. Ki sa keksoz pli enportan ki pou ed ou fer bann bon desizyon?

¹⁷ Menm si dan lepase ou’n fer en kantite desizyon ki’n reisi, rapel ki sa keksoz ki pou ed ou fer bann bon desizyon i pour depan lo lasazes sorti kot Zeova e pa lo ou prop lentelizans oubyen leksperyans. Zis Zeova ki kapab donn ou vre konnesans, lentelizans ek disernman e tousala pou ed ou annan lasazes. (Prov. 2:1-5) Zeova i kapab ed ou pour fer bann desizyon ki fer li plezir.—Ps. 23:2, 3.