1. Ki nou kapab fer pour fer Zeova kontan?

 METON ou donn en dimoun ki ou kontan en zoli kado ki i kapab servi. Ou ti pou dezapwente si sa dimoun ti met sa kado dan en bwat e i pa servi. De lot kote, ou ti pou kontan si sa dimoun i servi sa kado e i montre ki i apresye sa kado. Ki mannyer sa legzanp i relye avek sa kado ki Zeova in donn nou setadir sa ranson? Zeova in donn son Garson pour mor pour nou. Alor i bezwen ki Zeova i vreman kontan ler nou demontre lapresyasyon pour sa kado presye e pour sa lanmour ki’n motiv li pour pey sa ranson.—Zan 3:16; Rom. 5:7, 8.

 2. Ki nou pou vwar dan sa lartik?

² Anmezir letan i pase, i kapab ki nou nepli vwar sa ranson konman en kado presye. I pou konmsi nou’n met sa kado ki Bondye in donn nou dan en landrwa kot nou pa vwar. Pour anpese ki sa i arive, nou bezwen regilyerman rapel tou sa ki Bondye ek Kris in fer pour nou. Sa lartik i kapab ed nou pour fer sa. Nou pou vwar ki byenfe nou gannyen avek sa ranson la konmela e ki byenfe nou kapab gannyen dan lavenir. Nou pou osi vwar ki nou kapab fer pour montre ki nou apresye sa lanmour ki Zeova i annan pour nou sirtou pandan bann semenn avan e apre Memoryal.

KI BYENFE NOU GANNYEN LA KONMELA?

 3. Ki en byenfe nou gannyen depi la konmela avek sa ranson?

³ Nou deza pe ganny bann byenfe avek sa ranson. Par egzanp, gras a sa ranson, Zeova i pardonn nou bann pese. I pa oblize pardonn nou me i anvi pardonn nou. En psalmis ti demontre son lapresyasyon pour lefet ki Zeova i pardonnen. I ti dir: “Parski ou, O Zeova, ou bon e pare pour pardonnen.”—Ps. 86:5; 103:3, 10-13.

 4. Pour lekel Zeova in donn sa ranson? (Lik 5:32; 1 Timote 1:15)

⁴ Serten i kapab santi ki zot pa merite ki Zeova i pardonn  zot. Anfet, nou tou nou pa merite ki Zeova i pardonn nou. Zapot Pol ti konpran ki i “pa merite ganny apele zapot.” Me kantmenm sa, i ti dir: “Gras a labonte ekstraordiner Bondye, mon sa ki mon ete.” (1 Kor. 15:9, 10) Ler nou repantir pour nou pese, Zeova i pardonn nou. Akoz? Pa akoz nou merite me akoz Zeova i kontan nou. Alor si ou sagren parski ou krwar ki ou pa merite ki Zeova i pardonn ou, rapel ki Zeova pa’n donn sa ranson pour bann dimoun parfe. O kontrer, i’n donn sa ranson pour bann dimoun enparfe ki’n repantir pour zot pese.—Lir Lik 5:32; 1 Timote 1:15.

 5. Eski Zeova i oblize pardonn nou? Eksplike.

⁵ Napa personn parmi nou ki devret santi ki Zeova i oblize pardonn nou zis akoz nou’n servi li pour en kantite lannen. Byensir Zeova i apresye tou sa ki nou fer pour li. (Ebr. 6:10) I ti donn nou son Garson konman en kado e pa konman en peyman pour bann keksoz ki nou’n fer pour li. Alor i ti pou mal pour krwar ki vi ki nou’n fer en kantite keksoz pour Zeova, nou merite ki Zeova i pardonn nou. Si nou krwar sa, i ti pou konmsi nou pe dir ki Kris in mor pour nanryen e ki nou pa ti bezwen sa ranson.—Konpar Galat 2:21.

 6. Akoz Pol ti travay dir dan servis Zeova?

⁶ Pol ti konnen ki nenport kantite keksoz ki i ti fer pour Zeova, sa pa ti vedir ki Zeova ti oblize pardonn li. Me akoz Pol ti kontinyen travay dir dan servis Zeova? Pol ti fer tou sa ki i ti kapab dan servis Zeova pa akoz i ti anvi montre ki i merite ganny pardonnen me akoz i ti anvi montre ki i ti rekonesan pour sa labonte ki Zeova in demontre anver li e pour lefet ki Zeova in pran pitye pour li. (Efe. 3:7) Parey Pol, nou kontinyen devoue dan servis Zeova pour montre ki nou rekonesan ki Zeova i pran pitye pour nou.

 7. Ki en lot byenfe nou gannyen la konmela avek sa ranson? (Romen 5:1; Zak 2:23)

⁷ En lot byenfe ki nou gannyen la konmela atraver sa ranson i lefet ki nou kapab annan en lanmitye pros avek Zeova. a Parey nou’n vwar dan sa lartik avan, ler nou ti ne, nou ti napa en lanmitye avek Bondye. Me sa ranson i fer li posib pour nou “anpe avek Bondye” e sa i fer ki nou kapab vin pros avek li.—Lir Romen 5:1; Zak 2:23.

 8. Akoz nou devret rekonesan anver Zeova pour sa privilez ki nou annan pour koz avek li dan lapriyer?

⁸ Nou lanmitye avek Zeova i fer li posib pour nou fer en keksoz vreman spesyal setadir nou kapab koz avek Zeova dan lapriyer. Zeova i tann bann lapriyer ki son pep i fer an piblik, ler zot dan renyon oubyen ler zot avek lezot. I osi tann bann lapriyer ki sakenn parmi nou i fer ler nou tousel. Ler nou priye, sa i donn nou lape lespri e fer nou pli kalm. Me i annan lezot byenfe ki nou gannyen ler nou priye. Lapriyer i kapab ed nou vin pli pros avek Bondye. (Ps. 65:2; Zak 4:8; 1 Zan 5:14) Ler Zezi ti lo later, i ti priy Zeova souvan parski i ti konnen ki Zeova ti pe ekout son lapriyer. I ti osi konnen ki lapriyer ti pou ed li reste pros avek son Papa. (Lik 5:16) Nou vreman rekonesan ki gras a sakrifis Zezi, nou kapab vin zanmi avek Zeova e menm koz avek Li dan lapriyer.

KI BYENFE NOU POU GANNYEN DAN LAVENIR?

 9. Dan lavenir, ki byenfe bann serviter Zeova ki fidel pou gannyen atraver sa ranson?

⁹ Dan lavenir, ki byenfe bann serviter Zeova ki fidel pou gannyen atraver sa ranson?  Zeova pou donn zot lavi eternel. En kantite dimoun i krwar ki sa i enposib parski pour plizyer milye lannen dimoun in mor. Me i ti dan plan Zeova depi o konmansman pour bann imen viv pour touzour. Si Adan pa ti’n fer pese, personn pa ti pou krwar ki i enposib pour viv pour touzour parski tou dimoun ti pou pe viv pour touzour. Menm si la konmela, i difisil pour imazin bann imen pe viv pour touzour, nou kapab krwar ki sa pou arive parski nou konnen ki Zeova in pey sa pli gro pri setadir in sakrifye son Garson pour nou kapab viv pour touzour.—Rom. 8:32.

10. Ki lespwar bann Kretyen swazir ek lezot mouton i annan?

¹⁰ Menm si lavi eternel i en keksoz ki nou pou gannyen dan lavenir, Zeova i anvi ki depi la konmela, nou imazin lafason ki lavi pou ete sa letan. Bann Kretyen swazir pe esper sa letan kot zot pou viv dan lesyel e diriz later ansanm avek Kris. (Rev. 20:6) Lezot mouton pe esper sa letan kot zot pou viv dan en paradi lo later kot i pou nepli annan douler, soufrans ek sagrinasyon. (Rev. 21:3, 4) Eski ou form parti lezot mouton ki annan lespwar pour viv pour touzour lo later? Pa bezwen krwar ki sa lespwar ki ou annan i mwen enportan ki sa lespwar ki bann Kretyen swazir i annan. Zeova ti kree bann imen pour zot viv lo later. Alor ler nou pou viv pour touzour lo later, sa pou fer nou vreman zwaye.

11-12. Ki serten benediksyon nou pou gannyen dan Paradi? (Vwar portre.)

¹¹ Imazin ki mannyer ou lavi pou ete ler ou pou dan Paradi lo later. Ou pa pou bezwen enkyet konsernan si ou pou malad oubyen mor. (Iza. 25:8; 33:24) Zeova pou donn ou tou bann bon keksoz ki ou anvi. Ki ou ti ava kontan aprann? Eski ou ti pou kontan aprann plis konsernan bann zannimo? Eski ou ti pou kontan aprann zwe en lenstriman lanmizik? Oubyen eski ou ti pou kontan aprann desinen? Dan Paradi, nou pou bezwen dimoun ki konn fer plan lakaz, konstri lakaz ek bann fermye. Nou pou osi bezwen dimoun pour prepar manze, pour  fer bann zouti travay e pour pran swen avek bann zoli zarden. (Iza. 35:1; 65:21) Vi ki ou pou viv pour touzour, ou pou annan letan pour aprann e fer okenn keksoz ki ou ti ava kontan.

¹² Nou pou vreman kontan pour akeyir bann ki pou ganny resisite. (Akt 24:15) Imazin ki mannyer ou pou kontan pour aprann plis lo Zeova par etidye bann keksoz ki i’n kree. (Ps. 104:24; Iza. 11:9) Plis ankor, ou pou kapab ador Zeova san ki ou santi ou koupab pour bann move keksoz ki ou fer parski sa letan ou pa pou fer okenn pese e ou pa pou bezwen demann Zeova pardon. Alor, eski ou pou swazir pour “pran plezir dan pese pour zis en serten letan” olye ganny sa bann zoli benediksyon ki Bondye in promet dan Paradi? (Ebr. 11:25) Definitivman non! Sa bann benediksyon i vo plis ki okenn sakrifis ki ou bezwen fer la konmela. Rapel ki Paradi pa pou toultan en keksoz ki nou pe espere. En zour, i pou vin en realite. Tousala pa ti pou posib si Zeova pa ti sitan kontan nou ki i ti pare pour donn son Garson konman en ranson.

MONTRE KI OU REKONESAN POUR LANMOUR KI ZEOVA IN DEMONTRE

13. Ki mannyer nou kapab demontre lapresyasyon pour sa lanmour ki Zeova in demontre? (2 Korentyen 6:1)

¹³ Ki mannyer nou kapab demontre lapresyasyon anver Zeova pour sa ranson ki i’n donnen? Nou kapab fer sa par fer sir ki nou servis i sa keksoz pli enportan dan nou lavi. (Mat. 6:33) Zezi ti mor “pour ki sa bann ki viv pa viv pour zot prop lekor, me pour sa enn ki’n mor e resisite pour zot.” (2 Kor. 5:15) Apre tou, Zeova in demontre labonte anver nou e in pardonn nou. Ler nou fer tou sa ki nou kapab dan son servis, nou montre ki nou konpran ki kantite in fer pour nou e nou montre ki nou vreman rekonesan.—Lir 2 Korentyen 6:1.

14. Ki mannyer nou kapab annan konfyans dan Zeova e swiv son gidans?

¹⁴ En lot fason ki nou kapab montre ki nou rekonesan pour sa lanmour ki Zeova in demontre anver nou i par annan konfyans dan li e swiv son gidans. Ki mannyer nou kapab fer sa? Ler nou annan bann desizyon pour fer par egzanp ler nou pe fer deside si nou pou fer letid avanse oubyen ki kalite travay nou pou aksepte, nou bezwen mazin sa ki Zeova i anvi nou fer. (1 Kor. 10:31; 2 Kor. 5:7) Ler nou fer bann desizyon dapre sa ki Zeova i anvi, nou lafwa i vin pli for e nou vin pli pros avek li. Sa i fer ki nou lespwar i vin pli reel.—Rom. 5:3-5; Zak 2:21, 22.

15. Ki mannyer nou kapab demontre nou lapresyasyon anver Zeova pandan sezon Memoryal?

¹⁵ I annan ankor en lot fason ki nou kapab demontre lapresyasyon pour sa lanmour ki Zeova in demontre. Nou fer sa par  servi bann semenn avan e apre Memoryal pour montre Zeova ki kantite nou rekonesan pour sa ranson. Apard ki fer laranzman pour asiste Memoryal, nou kapab osi envit lezot pour asiste sa levennman. (1 Tim. 2:4) Eksplik bann ki ou envite ki pou arive pandan Memoryal. Petet i pou itil pour montre zot sa video Akoz Zezi ti mor? ek sa video Mazin lanmor Zezi ki lo jw.org. Bann ansyen i devret fer sir ki zot envit bann ki inaktif. Imazin sa lazwa ki i pou annan dan lesyel e lo later si serten parmi bann mouton Zeova ki’n perdi i retourn dan troupo. (Lik 15:4-7) Ler nou asiste Memoryal, fer li en lobzektif pour nou akeyir kanmarad me sirtou pour akeyir bann ki nouvo ek bann ki pa’n asiste Memoryal pour en kantite letan. Nou anvi ki zot santi ki nou kontan ki zot la.

16. Akoz pandan sezon Memoryal, nou devret fer laranzman pour fer plis dan nou servis pour Zeova?

¹⁶ Eski pandan sezon Memoryal, ou kapab fer plis dan ou servis pour Zeova? Sa i en bon fason pour ou montre ki ou apresye tou sa ki Zeova ek Zezi in fer pour ou. Pli nou fer plis dan servis Zeova, pli nou pou vwar lafason ki Zeova i ed nou e sa pou fer nou annan plis konfyans dan li. (1 Kor. 3:9) Osi, fer sir ki ou swiv lektir Labib pour Memoryal ki dan Egzamin Labib sak zour oubyen ki dan latab Kaye Renyon. Ou kapab menm swazir pour etidye serten sa bann resi ki ganny mansyonnen dan lektir Labib pour Memoryal.

17. Kwa ki fer Zeova plezir? (Vwar bwat “ Ki mannyer ou kapab montre ki ou rekonesan pour lanmour ki Zeova in demontre?”)

¹⁷ I kapab ki ou sirkonstans pa permet ou pour fer plis dan ou servis pour Zeova. Me rapel ki Zeova pa konpar sa ki ou kapab fer avek sa ki lezot pe fer. I vwar sa ki dan ou leker. I vreman kontan ler i vwar ki kantite ou rekonesan pour sa kado presye ki i’n donnen setadir sa ranson.—1 Sam. 16:7; Mark 12:41-44.

18. Akoz nou rekonesan anver Zeova ek Zezi Kri?

¹⁸ Sa ranson i sa sel rezon akoz nou pese i kapab ganny pardonnen, ki nou kapab annan en lanmitye avek Zeova e annan sa lespwar pour viv pour touzour. Annou toultan demontre rekonesans anver Zeova pour sa lanmour ki i’n demontre ki’n motiv li pour donn nou tou sa benediksyon. (1 Zan 4:19) Annou osi demontre nou lapresyasyon anver Zezi ki’n sitan kontan nou ki i ti pare pour donn son lavi pour nou.—Zan 15:13.