1. Ki byenfe nou gannyen ler nou asiste Memoryal lanmor Kris tou le lannen?

 OU POU dakor ki ranson i en kado ki annan bokou valer. (2 Kor. 9:15) Vi ki Zezi in sakrifye son lavi pour nou, ou kapab annan bon lanmitye avek Zeova. Ou kapab osi annan sa lespwar pour viv pour touzour. Nou annan en kantite rezon pour montre ki nou apresye sa ranson e ki nou rekonesan anver Zeova ki’n donn nou sa ranson akoz i kontan nou. (Rom. 5:8) Pour ed nou kontinyen annan rekonesans e pour pa zanmen oubliy sa ki Zeova ek Zezi in fer pour nou, Zezi in donn nou lord pour asiste Memoryal son lanmor ki ganny fer tou le lannen.—Lik 22:19, 20.

 2. Ki nou pou vwar dan sa lartik?

² Sa lannen nou pou selebre Memoryal Sanmdi le 12 Avril 2025. San dout, nou tou nou pou asiste. Nou pou ganny bann byenfe si pandan sezon Memoryal, nou pran letan pour medit a lo sa ki Zeova ek son Garson in fer pour nou. Dan sa lartik, nou pou vwar ki sa ranson i ansenny nou konsernan Zeova ek son Garson. Sa lartik ki swiv pou ed nou konpran ki mannyer nou kapab ganny bann byenfe avek sa ranson e ki mannyer nou kapab montre nou lapresyasyon.

KI RANSON I ANSENNY NOU KONSERNAN ZEOVA?

 3. Ki mannyer lanmor en zonm i kapab liber plizyer milyon dimoun dan pese ek lanmor? (Vwar portre.)

³ Sa ranson i ansenny nou ki Zeova i en Bondye ki kontan lazistis. (Det. 32:4) Annou vwar ki mannyer. Ler Adan ti dezobeir Bondye, i ti fer pese e pli tar, i ti mor. Vi ki nou son desandans, nou osi nou fer pese e nou mor. (Rom. 5:12) Pour liber nou avek pese ek lanmor, Zeova ti fer laranzman  pour Zezi pey sa ranson. Me ki mannyer lanmor en zonm parfe i kapab liber plizyer milyon dimoun dan pese ek lanmor? Zapot Pol ti dir: “Zis parey atraver dezobeisans en sel zonm [Adan] en kantite in fer pese, pareyman atraver lobeisans en sel zonm [Zezi], en kantite pou fer sa ki byen.” (Rom. 5:19; 1 Tim. 2:6) Andotmo, dezobeisans en zonm parfe ti fer ki tou dimoun i vin lesklav pese ek lanmor. Alor pour nou kapab ganny libere avek pese ek lanmor, en zonm parfe ti bezwen obeir Bondye.

 4. Akoz Zeova pa ti zis les bann desandans Adan ki ti obeir li, viv pour touzour?

⁴ Eski Zezi ti bezwen mor pour sov nou? Akoz Zeova pa ti zis les bann desandans Adan ki ti obeir li, viv pour touzour? Dapre pwennvi bann imen enparfe, sa ti pou sa pli bon fason pour rezourd sa problenm. Me Zeova i zis e pour li, sa fason fer pa ti pou sa bon fason pour fer keksoz. Parski si i ti’n fer sa, i ti pou konmsi i pe inyor lefet ki Adan ti’n fer en pese grav.

 5. Akoz nou kapab asire ki Zeova pou toultan fer sa ki byen?

⁵ Ki i ti pou arive si Zeova pa ti donn sa ranson e i ti les bann desandans Adan viv pour touzour menm si zot ti enparfe? Si Zeova ti fer sa, i ti pou’n inyor son prop standar konsernan sa ki byen ek sa ki mal. Petet sa ti pou fer dimoun mazinen ki si Bondye in kapab inyor son standar konsernan lazistis dan sa ka, i ti pou kapab fer sanmenm dan lavenir. Par egzanp, eski Bondye pou gard tou son bann promes? Me nou pa bezwen enkyet ki sa pou arive. Lefet ki Zeova ti demontre lazistis e sakrifye son prop Garson menm si sa ti fer li soufer en kantite, i fer nou asire ki i pou toultan fer sa ki byen.

 6. Ki en fason ranson i montre ki Zeova i kontan nou? (1 Zan 4:9, 10)

⁶ Menm si ranson i ed nou konpran ki Zeova i zis, i annan en lot kalite ki ti motiv li pour anvoy Zezi pour mor pour nou. Sa i son lanmour pour nou. (Zan 3:16; lir 1 Zan 4:9, 10.) Ranson i ansenny nou ki Zeova pa zis anvi ki nou viv pour touzour me i osi anvi ki nou form parti son fanmir. Annou reflesir lo sa: Ler Adan ti fer pese, i ti nepli kapab form parti fanmir Zeova. Sa i fer ki ler nou ne, nou tou nou pa form parti fanmir Bondye. Me gras a sa ranson, Zeova i kapab pardonn nou pese e en zour, tou dimoun ki annan lafwa dan li e ki obeir li pou kapab form parti son fanmir. Menm la konmela, nou kapab annan en bon lanmitye avek Zeova  e avek nou bann frer ek ser. Tousala i montre ki Zeova i vreman kontan nou.—Rom. 5:10, 11.

 7. Ki mannyer bann soufrans ki Zezi ti pas ladan i ed nou konpran ki kantite Zeova i kontan nou?

⁷ Nou kapab pli byen konpran ki kantite Zeova i kontan nou ler nou reflesir lo ki kantite son leker ti fermal ler i ti vwar son Garson soufer. Satan i dir ki napa en serviter Bondye ki pou reste fidel avek Bondye ler keksoz i vin difisil. Pour montre ki Satan i en manter, Zeova ti les Zezi soufer avan i mor. (Zob 2:1-5; 1 Pyer 2:21) Zeova ti vwar ler dimoun ti boufonn Zezi, bann solda ti bat li e apre klout li lo en poto. Apre Zeova ti vwar ler son Garson ti mor dan en fason kriyel. (Mat. 27:28-31, 39) Zeova ti kapab anpes tousala arive. Par egzanp, ler bann ki ti opoz Zezi ti dir: “Si Bondye i pran plezir dan li, i pou sov li.” Zeova ti’n kapab fer sanmenm. (Mat. 27:42, 43) Me si Bondye ti fer sa, Zezi pa ti pou’n kapab pey sa ranson e nou ti pou napa lespwar. Alor, Zeova ti les son Garson soufer ziska ki i mor.

 8. Eski Zeova ti sagren ler i ti vwar son Garson pe soufer? Eksplike. (Vwar portre.)

⁸ Nou pa devret krwar ki Bondye napa santiman zis akoz i tou pwisan. I’n kree nou dan son resanblans avek sa abilite pour annan santiman, alor i normal ki li osi i annan santiman. Labib i dir ki plizyer fwa, Zeova ti “vreman sagren” e “tris.” (Ps. 78:40, 41) Annou vwar sa ki ti arive avek Abraam ek Izaak. Rapel ki Zeova ti demann Abraam pour ofer son sel garson konman sakrifis. (Zen. 22:9-12; Ebr. 11:17-19) Mazinen ki mannyer Abraam ti sagren e son leker ti fermal ler i ti pe met pare pour touy son prop garson. Zeova ti pli sagren e son leker ti pli fermal ankor ler i ti get son Garson pe ganny tortire par bann move dimoun ziska ki i mor.—Vwar sa video Imit zot lafwa—Abraam, Parti 2 ki lo jw.org.

 9. Ki Romen 8:32, 38, 39 i ed ou konpran konsernan sa kantite lanmour ki Zeova i annan pour ou e pour ou bann frer ek ser?

⁹ Sa ranson i ansenny nou ki i napa personn ki kontan nou parey Zeova i kontan nou. I kontan nou plis ki nou fanmir oubyen zanmi i kontan nou. (Lir Romen 8:32, 38, 39.) Nou kapab asire ki Zeova i kontan nou plis ki nou kontan nou prop lekor. Eski ou anvi viv pour touzour? Zeova i pli anvi ki ou viv pour touzour. Eski ou anvi ou bann pese ganny pardonnen? Zeova i pli anvi ki ou pese i ganny pardonnen. An retour, i zis demande ki nou demontre lapresyasyon pour sa kado presye par demontre lafwa e obeir li. Sa ranson i en kado presye ki montre ki Zeova i  kontan nou en kantite. Dan nouvo lemonn, nou pou aprann plis konsernan lanmour Zeova.—Ekle. 3:11.

KI RANSON I ANSENNY NOU KONSERNAN ZEZI?

10. (a) Akoz Zezi ti vreman sagren konsernan son lanmor? (b) Dan ki fason Zezi ti sanktifye non Zeova? (Vwar bwat “ Zezi ti sanktifye non Zeova par reste fidel.”)

¹⁰ Zezi i vreman enterese avek sa ki dimoun i panse lo son Papa. (Zan 14:31) Zezi ti vreman sagren ki dimoun ti pou koz an mal lo son Papa parski i ti’n ganny akize konmkwa i’n koz kont Bondye e i ti pe al ganny touye konman en kriminel. I pour sa rezon ki i ti priye: “Mon Papa, si i posib, pran sa lakoup avek mwan.” (Mat. 26:39) Par reste fidel avek Zeova ziska lanmor, Zezi ti montre klerman ki bann mansonz ki Satan ti’n dir konsernan son Papa, pa ti vre.

11. Ki mannyer Zezi ti montre ki i vreman kontan dimoun? (Zan 13:1)

¹¹ Sa ranson i osi ansenny nou ki Zezi i vreman enterese avek bann dimoun espesyalman son bann disip. (Prov. 8:31; lir Zan 13:1.) Par egzanp, Zezi ti konnen ki serten keksoz ki i ti pou bezwen fer lo later ti pou vreman difisil, enkli son lanmor, ki ti pou kriyel. I ti fer tou sa bann keksoz difisil pa zis akoz Zeova ti’n demann li pour fer me sirtou akoz i ti kontan dimoun. Zezi ti montre ki i ti kontan dimoun par anons sa bon nouvel avek zot, ansenny zot e ed zot. Menm sa zour ki i ti pe al mor, Zezi ti pran letan pour lav lipye son bann zapot, pour ansenny zot, ankouraz zot e rekonfort zot. (Zan 13:12-15) Apre ler i ti pe soufer lo poto, Zezi ti dir en kriminel ki ti pe mor, ki i pou avek li dan Paradi e sa ti donn sa kriminel  lespwar. I ti osi demann Zan pour pran swen avek son manman. (Lik 23:42, 43; Zan 19:26, 27) Pa zis atraver son lanmor ki Zezi ti montre ki i ti kontan dimoun me i ti osi montre ki i ti kontan dimoun tou dilon son lavi lo later.

12. Ki Zezi pe fer la konmela pour nou?

¹² Menm si Zezi ti mor “enn fwa pour tou,” i ankor pe fer en kantite keksoz pour nou. (Rom. 6:10) Ki Zezi pe fer? I pe kontinyen travay pour donn nou bann bon keksoz ki posib pour nou gannyen gras a sa ranson. Annou vwar ki Zezi pe fer. I pe servi konman nou Lerwa, Granpret ek sef kongregasyon. (1 Kor. 15:25; Efe. 5:23; Ebr. 2:17) I pe diriz sa travay pour rasanble bann Kretyen swazir e osi sa gran lafoul, en travay ki pou konplete avan gran ladetres i fini. b (Mat. 25:32; Mark 13:27) I pe osi fer sir ki pandan sa bann dernyen zour, son bann serviter fidel i ganny byen nouri spirityelman. (Mat. 24:45) Pandan sa mil an ki Kris pou dirize, i pou kontinyen fer keksoz pour nou. Zeova pa’n zis donn son Garson pour mor pour nou me in donn li pour fer en kantite keksoz pour nou.

KONTINYEN APRANN BANN NOUVO KEKSOZ

13. Ki mannyer ler ou medite, sa i kapab ed ou pour aprann konsernan sa lanmour ki Bondye ek Kris i annan pour nou?

¹³ Ou kapab kontinyen aprann konsernan sa lanmour ki Zeova ek Zezi i annan pour nou si ou kontinyen medit lo sa ki zot in fer pour nou. Petet pandan sezon Memoryal, ou kapab pran letan pour lir enn oubyen de Levanzil. Pa esey lir tro bokou sapit en sel kou. Me pran ou letan e rod lezot rezon akoz nou devret kontan Zeova ek Zezi. Apre, koz avek lezot lo sa ki ou’n aprann.

14. Dapre Psonm 119:97 ek not dan sa verse, ki mannyer ler nou fer resers, sa i kapab ed nou pour kontinyen aprann konsernan ranson ek lezot lansennyman? (Vwar portre.)

¹⁴ Si ou’n dan laverite pour en kantite lannen, petet ou kapab demande si i ankor annan nouvo keksoz pour ou aprann konsernan lazistis Zeova, son lanmour e lo ranson. Anfet, i pou toultan annan nouvo keksoz pour nou aprann lo sa bann topik e lo lezot topik ankor. Alor, ki  ou kapab fer? Pran letan pour lir e etidye bann lenformasyon ki i annan dan nou bann piblikasyon. Ler ou lir en keksoz dan Labib ki ou pa tro konpran, fer resers. Apre sa, pandan lazournen, ou kapab medit lo sa ki ou’n aprann e lo ki sa lenformasyon i dir ou konsernan Zeova, son Garson e lo zot lanmour pour ou.—Lir Psonm 119:97 ek not dan sa verse.

15. Akoz nou devret kontinyen esey rod bann nouvo keksoz ki nou kapab aprann dan Labib?

¹⁵ Pa bezwen dekouraze si ou pa vwar en nouvo keksoz oubyen en keksoz enteresan sak fwa ki ou lir Labib oubyen ou fer resers. Dan en sans ou parey en dimoun ki pe rod lor. Souvandfwa en dimoun ki pe rod lor i bezwen pas plizyer erdtan oubyen zour avan ki i vwar en pti bout lor. Kantmenm sa, i kontinyen parski sak pti bout lor i presye pour li. Dan menm fason, sak nouvo keksoz ki nou aprann dan Labib i bokou pli presye ki lor. (Ps. 119:127; Prov. 8:10) Alor kontinyen lir Labib e kontinyen rod bann nouvo keksoz ki ou kapab aprann.—Ps. 1:2.

16. Ki mannyer nou kapab swiv legzanp Zeova ek Zezi?

¹⁶ Anmezir ki ou etidye, reflesir lo ki mannyer ou kapab aplik sa ki ou pe aprann. Par egzanp, swiv legzanp Zeova e demontre lazistis par pa fer lapreferans. Swiv legzanp Zezi e demontre lanmour pour Zeova e pour lezot. Nou fer sa ler nou pare pour fer sa ki Zeova i anvi e nou ed lezot menm si par ler sa pou fer nou lavi pli difisil. Osi, swiv legzanp Zezi par anons sa bon nouvel avek lezot pour ki zot ganny sa loportinite pour konn bann keksoz merveye ki Zeova in fer pour bann imen e pour demontre lafwa dan sa ranson.

17. Ki nou pou vwar dan sa lartik ki swiv?

¹⁷ Pli nou konpran e apresye sa ranson, pli nou pou kontan Zeova ek son Garson. Sa pou fer ki zot pou kontan nou plis. (Zan 14:21; Zak 4:8) Alor annou kontinyen servi tou sa ki Zeova in donn nou pour aprann konsernan sa ranson. Dan sa lartik ki swiv, nou pou vwar serten fason ki nou kapab benefisye avek sa ranson e ki mannyer nou kapab montre ki nou apresye lanmour Zeova.