I pa toultan fasil pour rapel sa ki ou’n aprann. Me i fasil pour rapel bann keksoz ki Zezi ti ansennyen parski souvandfwa i ti servi bann legzanp. Nou kapab imazin sa ki Zezi ti dir e sa i ed nou pour rapel sa ki i ti ansennyen. Pareyman, ou kapab rapel plis sa ki ou etidye par imazin sa ki ou lir. Ki mannyer ou kapab fer sa? Par desin sa ki ou aprann.

Souvandfwa, bann dimoun ki desin bann nouvo keksoz ki zot aprann i rapel sa bann keksoz pli byen. Ler zot desinen, sa i ed zot pour rapel bann mo e osi bann pwen prensipal ki zot in aprann. Zot desen pa konplike me i senp. Bann levidans i montre ki sa fason fer i ed bann dimoun aze pour rapel sa ki zot in aprann.

Laprosenn fwa ki ou etidye, petet ou kapab esey desin serten keksoz ki ou’n aprann. Ou kapab sirprann avek lakantite keksoz ki ou rapel.