LARTIK LETID 2
KANTIK 132 Aprezan nou en sel
Msye, ki mannyer ou kapab onor ou madanm?
“Zot bann msye, . . . onor zot madanm.”—1 PYER 3:7.
TOPIK
Ki mannyer en msye i kapab onor son madanm par sa ki i dir e fer?
1. Akoz Zeova ti kree sa laranzman maryaz?
ZEOVA i “sa Bondye ki ere” e i anvi ki nou osi nou ere. (1 Tim. 1:11) I’n donn nou en kantite kado pour ed nou apresye lavi. (Zak 1:17) Enn parmi sa bann kado i maryaz. Ler en msye ek en madanm i marye, zot promet pour kontan kanmarad, annan respe pour kanmarad e pran swen avek kanmarad. Ler zot fer sa, zot pou vreman zwaye.—Prov. 5:18.
2. Ki pe arive dan bokou maryaz ozordi?
2 Malerezman bokou koup marye ozordi i oubliy bann promes ki zot ti fer zour zot maryaz. Sa i fer ki zot pa ere. En rapor ki Lorganizasyon Mondyal pour Lasante in fer resaman i montre ki bokou msye i abiz zot madanm fizikman, verbalman oubyen emosyonnelman. En msye ki fer sa i kapab tret son madanm byen devan dimoun me i pa tret li byen ler zot kot lakour. Bokou msye i get pornografi e sa i fer zot madanm santi ki zot msye pa kontan zot e zot pa ere.
3. Akoz serten msye pa tret zot madanm byen?
3 Akoz serten msye pa tret zot madanm byen? I kapab ki sa bann msye ti grandi avek en papa ki ti vyolan e sa i fer zot krwar ki i normal pour tret zot madanm dan sa fason. Lezot msye i ganny enfliyanse par zot kiltir ki fer zot krwar ki “en vre zonm” i bezwen servi lafors pour montre son madanm ki li ki ansarz. Lezot msye pa’n ganny montre ki mannyer pour kontrol zot lemosyon enkli zot lakoler. Serten msye i kontan get pornografi e sa i fer ki zot annan en move pwennvi lo bann madanm ek sèks. Bann rapor i montre ki sa bann problenm in ogmant plis pandan pandemi COVID-19. Byensir sa pa donn bann msye rezon pour tret zot madanm dan en move fason.
4. Ki bann msye ki servi Zeova i bezwen fer atansyon e akoz?
4 Bann msye ki servi Zeova i bezwen fer atansyon ki zot pa les sa move pwennvi ki lemonn i annan lo bann madanm enfliyans zot. a Akoz? En rezon i akoz souvandfwa sa ki en dimoun i mazinen i kapab fer li azir dan en serten fason. Zapot Pol ti averti bann Kretyen swazir ki ti reste Ronm pour “pa les sa lemonn enfliyans zot.” (Rom. 12:1, 2) Ler Pol ti ekri sa let, bann ki ti dan sa kongregasyon ti deza Kretyen pour plizyer lannen. Me sa ki Pol ti dir ti montre ki serten dan sa kongregasyon ti ankor pe ganny enfliyanse par bann koutim ek fason panse sa lemonn. Sa i rezon akoz Pol ti ankouraz zot pour sanz zot fason panse ek zot konportman. Sa konsey i osi aplik pour bann msye ki pe servi Zeova ozordi. Malerezman serten sa bann msye in ganny enfliyanse par fason panse sa lemonn e zot in menm abiz zot madanm. b Ki mannyer Zeova i ekspekte en msye i tret son madanm? Nou vwar larepons dan verse tenm pour sa lartik.
5. Dapre 1 Pyer 3:7, ki mannyer en msye i devret tret son madanm?
5 Lir 1 Pyer 3:7. Zeova i donn lord bann msye pour onor zot madanm. Sa mo onor i refer avek lafason ki nou tret en dimoun ki nou annan respe pour li. En msye ki onor son madanm pou tret li dan en fason zantiy e avek lanmour. Dan sa lartik, nou pou vwar ki mannyer en msye i kapab onor son madanm. Me avan sa, nou pou vwar bann keksoz ki en msye pa devret zanmen fer avek son madanm.
PA FER OKENN KEKSOZ KI POU FER DITOR OU MADANM
6. Ki mannyer Zeova i santi anver bann msye ki vyolan anver zot madanm? (Kolosyen 3:19)
6 En msye pa devret vyolan avek son madanm. Zeova i ay nenport dimoun ki vyolan. (Ps. 11:5) I sirtou pa kontan ler bann msye i vyolan avek zot madanm. (Mal. 2:16; lir Kolosyen 3:19.) Dapre 1 Pyer 3:7 ki nou verse tenm, si en msye pa tret son madanm byen, sa pou gat son lanmitye avek Bondye. I kapab ki Zeova pa menm ekout son lapriyer.
7. Dapre Efezyen 4:31, 32, ki kalite fason koze en msye i bezwen evite? (Vwar “Ki sa i vedir?”)
7 En msye pa devret kriy avek son madanm oubyen dir li bann parol blesan. Serten msye i koz avek zot madanm avek lakoler e zot dir bann keksoz ki bles li en kantite. Me Zeova i ay “lakoler, firer, kriye ek lensilt.” c (Lir Efezyen 4:31, 32.) I tann tou keksoz. Lafason ki en msye i koz avek son madanm, menm ler zot kot lakour, i enportan pour Zeova. En msye ki koz brit avek son madanm i andomaz son maryaz e i gat son lanmitye avek Bondye.—Zak 1:26.
8. Ki mannyer Zeova i santi konsernan pornografi e akoz?
8 En msye pa devret get pornografi. Ki mannyer Zeova i santi konsernan pornografi? Zeova i ay pornografi. Alor en msye ki get pornografi, i gat son lanmitye avek Zeova e i napa respe pour son madanm. d Zeova i ekspekte ki en msye i fidel avek son madanm, pa zis par sa ki i fer me osi par sa ki i mazinen. Zezi ti dir ki en zonm ki get en lot madanm avek dezir, i’n fini fer adilter “dan son leker.” e—Mat. 5:28, 29.
9. Akoz Zeova pa kontan ler en msye i fors son madanm pour fer bann aksyon seksyel ki fatig konsyans son madanm?
9 En msye pa devret fors son madanm pour fer keksoz ki fatig konsyans son madanm ler zot pe fer sèks. Serten msye i met presyon lo zot madanm pour fer bann aksyon seksyel ki fatig konsyans zot madanm oubyen ki fer zot madanm santi ki zot msye pa kontan zot. Zeova pa kontan ler bann msye i fer sa bann keksoz parski sa i egois e i montre ki zot pa enterese avek byennet zot madanm. Zeova i ekspekte ki en msye i kontan son madanm, i tret li byen e i respekte son konsyans. (Efe. 5:28, 29) Ki en frer ki’n marye i devret fer si i deza pe fors son madanm pour fer bann keksoz ki fatig konsyans son madanm oubyen i pe get pornografi? Ki mannyer i kapab sanz son fason panse ek son aksyon?
KI MANNYER OU KAPAB ARET FER BANN KEKSOZ KI PA ONOR OU MADANM?
10. Ki mannyer legzanp Zezi i kapab ed bann msye?
10 Kwa ki kapab ed en msye pour aret fer bann keksoz ki fer ditor son madanm e ki fatig konsyans son madanm? Sa msye i kapab fer zefor pour swiv legzanp Zezi. Menm si Zezi pa ti zanmen marye, lafason ki i ti tret son bann disip i en bon legzanp lo lafason ki en msye i devret tret son madanm. (Efe. 5:25) Par egzanp, annou vwar ki bann msye i kapab aprann avek lafason ki Zezi ti tret son bann zapot e lafason ki i ti koz avek zot.
11. Ki mannyer Zezi ti tret son bann zapot?
11 Zezi ti toultan demontre labonte anver son bann zapot e tret zot avek respe. I pa ti zanmen brit oubyen dominer. Menm si i ti zot Senyer ek Met, i pa ti santi ki i bezwen servi son pouvwar pour montre ki i annan lotorite lo zot. O kontrer, i ti demontre limilite e i ti fer keksoz pour zot. (Zan 13:12-17) I ti dir son bann disip: “Swiv mon legzanp, parski mon dous e mon annan limilite e zot pou reganny lafors.” (Mat. 11:28-30) Remarke ki sa verse i dir ki Zezi i annan ladouser. En dimoun ki annan ladouser i pa en dimoun ki fay. O kontrer, i en dimoun ki for parski i annan kontrol lo son lekor. Ler lezot i esey fer li ankoler, i reste kalm e i annan kontrol lo son santiman.
12. Ki mannyer Zezi ti koz avek lezot?
12 Zezi ti servi son bann parol pour rekonfort e ankouraz lezot. I pa ti koz brit avek son bann disip. (Lik 8:47, 48) Menm ler bann dimoun ki ti opoz li ti ensilte li e esey fer li ankoler, “i pa ti ensilte zot li osi.” (1 Pyer 2:21-23) Parfwa, Zezi ti menm swazir pour reste trankil olye reponn dan en fason brit. (Mat. 27:12-14) Sa i en bon legzanp pour bann msye ki pe servi Zeova!
13. Dapre Matye 19:4-6, ki mannyer en msye i “atase avek son madanm”? (Vwar portre.)
13 Zezi ti donn lord bann msye pour reste fidel avek zot madanm. I ti repet parol son Papa, ki dir ki en msye i devret “atase avek son madanm.” (Lir Matye 19:4-6.) Sa verb Grek ki’n ganny servi dan sa verse e ki’n ganny tradwir “atase” i vedir “kole.” Alor, sa lyen ki i annan ant en msye ek son madanm i devret sitan for ki i konmsi zot in kole avek kanmarad. Si enn ant zot i fer en keksoz pour kas sa lyen, zot tou le de zot pou soufer. En msye ki kontan son madanm en kantite pou rezet tou form pornografi. Deswit i pou aret “get sa ki napa valer.” (Ps. 119:37) Parey Zob, i fer en lalyans avek son lizye e i determinen pour pa get okenn madanm avek en move dezir.—Zob 31:1.
En msye ki fidel avek son madanm pa get pornografi (Vwar paragraf 13) g
14. Ki en msye ki abiz son madanm i bezwen fer pour aranz son relasyon avek Zeova e avek son madanm?
14 En msye ki abiz son madanm fizikman oubyen verbalman, i bezwen fer lezot keksoz pour aranz son relasyon avek Zeova e avek son madanm. Ki i bezwen fer? Premyerman, i bezwen realize ki i annan en problenm grav. Napa nanryen ki kasyet devan lizye Zeova. (Ps. 44:21; Ekle. 12:14; Ebr. 4:13) Dezyenmman, i aret abiz son madanm e sanz son konportman. (Prov. 28:13) Trwazyenmman, i demann pardon son madanm e i osi demann Zeova pardon. (Akt 3:19) I devret osi sipliy Zeova pour ed li anvi sanze e pour ed li pour annan kontrol lo son panse, lo son fason koze e lo son aksyon. (Ps. 51:10-12; 2 Kor. 10:5; Fili. 2:13) Katriyenmman, i azir an armoni avek son lapriyer par aprann pour ay tou form vyolans ek bann parol ki ensilte lezot. (Ps. 97:10) Senkyenmman, i devret deswit al rod led avek bann ansyen dan kongregasyon. (Zak 5:14-16) Sizyenmman, i fer en plan ki pou ed li konnen kwa ki i pou evite pour li pa abiz son madanm dan lavenir. En msye ki get pornografi i devret osi fer sa sis keksoz ki’n ganny mansyonnen. Zeova pou beni bann zefor ki i pe fer pour sanz son konportman. (Ps. 37:5) Me i devret fer plis ki zis aret fer bann keksoz ki pou bles santiman son madanm. I osi bezwen aprann pour onor son madanm. Ki mannyer i kapab fer sa?
KI MANNYER OU KAPAB ONOR OU MADANM?
15. Ki mannyer en msye i montre ki i kontan son madanm?
15 Montre ou madanm ki ou kontan li. Serten frer ki’n marye e ki ere dan zot maryaz, i fer keksoz toulezour pour montre zot madanm ki kantite zot kontan li. (1 Zan 3:18) En msye i kapab montre ki i kontan son madanm par fer bann keksoz senp, parey atrap son lanmen oubyen may li. I kapab anvoy son madanm en mesaz e dir li: “Mon mank ou” oubyen i kapab demann li: “Ki mannyer ou pe pas ou lazournen?” Tanzantan, i kapab montre son madanm ki i kontan li par donn li fler oubyen en kado. Ler en msye i fer sa bann keksoz, i onor son madanm e i fer zot maryaz vin pli for.
16. Akoz en msye i devret dir son madanm ki i apresye li?
16 Dir ou madanm ki ou apresye li. En msye ki onor son madanm i fer son madanm konnen ki i presye pour li e i ankouraz son madanm. En fason ki i fer sa i par montre lapresyasyon pour tou sa ki son madanm i fer pour ed li. (Kol. 3:15) Ler en msye i felisit son madanm, sa i fer son madanm kontan. I pou santi li an sekirite, ki son msye i kontan li e ki son msye i onor li.—Prov. 31:28.
17. Ki mannyer en msye i kapab montre ki i annan respe pour son madanm?
17 Demontre labonte ek respe anver ou madanm. En msye ki kontan son madanm i montre ki i apresye li. I vwar son madanm konman en kado presye sorti kot Zeova. (Prov. 18:22; 31:10) Sa i fer ki i tret son madanm avek labonte e avek respe, menm ler zot pe fer sèks. Pandan ki zot pe fer sèks, i pa pou fors son madanm pour fer bann keksoz ki fer son madanm enkonfortab, ki fer son madanm santi ki i pe ganny abize oubyen ki fatig konsyans son madanm. f I osi pa pou fer okenn keksoz ki pou fatig son prop konsyans.—Akt 24:16.
18. Ki bann msye i devret determinen pour fer? (Vwar bwat “ Kat fason ki ou kapab montre ki ou annan respe pour ou madanm.”)
18 Bann msye, ou kapab asire ki Zeova i vwar e i apresye zefor ki zot fer pour onor zot madanm dan tou sa ki zot dir e fer. Determinen pour onor zot madanm par evite fer keksoz ki fer li ditor, par demontre labonte, respe e annan lafeksyon pour li. Ler zot fer sa, zot montre zot madanm ki zot kontan li e ki zot apresye li. Ler ou onor ou madanm, ou pou protez sa lanmitye ki pli enportan, setadir ou lanmitye avek Zeova.—Ps. 25:14.
KANTIK 131 “Sa ki Bondye in ini ansanm”
a I ti pou byen ki bann msye ki’n marye i lir sa lartik “Eski ou tret bann madanm parey Zeova i tret zot?” ki dan Latour Veyer Zanvye 2024.
b Si ou konzwen in abiz ou, i ti pou byen ki ou lir sa lartik “Help for Victims of Domestic Abuse” dan sa seri lartik “More Topics” ki lo jw.org ek JW Library® an Angle.
c KI SA I VEDIR? “Lensilt” i enkli bann parol kriyel ki en dimoun i dir pour ensilte en lot dimoun e ki fer sa dimoun santi dan en move fason. I osi enkli ler en dimoun i kontinyen kritik en lot dimoun. Okenn parol ki en msye i dir pour bles santiman son madanm oubyen pour abes son madanm i bann lensilt.
d Vwar sa lartik “Pornography Can Shatter Your Marriage” ki lo jw.org ek JW Library an Angle.
e Si ou msye i get pornografi, i ti pou byen ki ou lir sa lartik “Ki ou kapab fer si ou konzwen i get pornografi?” ki dan Latour Veyer Out 2023.
f Labib pa donn detay konsernan bann pratik seksyel ki byen ouswa mal ant en msye ek en madanm marye. En koup Kretyen i bezwen fer bann desizyon ki montre ki zot determinen pour onor Zeova, pour fer plezir kanmarad e pour gard en konsyans kler devan Zeova. An zeneral, en koup pa pou koz avek lezot konsernan sa ki zot fer dan zot maryaz an prive.
g LEKSPLIKASYON PORTRE: Bann koleg travay en frer i esey fer li get bann magazin ki annan pour fer avek pornografi.
