NOU viv dan en lemonn kot i annan en ta keksoz ki kapab fer nou strese, alor i kapab difisil pour trouv lape. Menm ler nou annan en serten degre lape, nou kapab fasilman perdi sa lape. Ki Labib i dir ki kapab ed nou pour trouv vre lape ki dire? Osi, ki mannyer nou kapab ed lezot pour fer parey?

Pour trouv vre lape, nou bezwen santi nou an sekirite. Nou bezwen annan bann bon zanmi e pli enportan ki tou, nou bezwen vin pros avek Bondye. Ki mannyer nou kapab fer sa?

Bann lord ek prensip ki Bondye i donn nou i toultan bon pour nou. Ler nou obei zot, nou montre ki nou annan konfyans dan Zeova e ki nou anvi annan en relasyon kot nou anpe avek li. (Zeremi 17:7, 8; Zak 2:22, 23) Apre, Zeova pou vin pros avek nou e donn nou lape lespri. Izai 32:17 i dir: “Lazistis pou anmenn lape. Lazistis pou anmenn trankilite ek sekirite pour touzour.” Nou kapab trouv vre lape ler nou obei Zeova volonterman.​—Izai 48:18, 19.

Zeova in osi donn nou en kado presye ki ed nou pour devlop lape ki dire. Sa kado i son lespri sen.​—Akt 9:31.

Zapot Pol ti dir ki lape i form parti “fri lespri sen.” (Galat 5:22, 23) Vi ki lespri sen Bondye i ed nou devlop lape, nou bezwen permet lespri sen gid nou si nou anvi ganny lape. Ki mannyer nou kapab fer sa?

Premyerman, nou bezwen lir Parol Bondye regilyerman. (Psonm 1:2, 3) Anmezir ki nou reflesi o profon lo sa ki nou lir, lespri sen i ed nou pour konpran pwennvi Zeova lo diferan  topik. Par egzanp, nou aprann ki mannyer i gard son lape e akoz lape i sitan enportan pour li. Ler nou aplik sa ki nou aprann dan Labib, nou pou annan plis lape dan nou lavi.​—Proverb 3:1, 2, NWT.

Dezyenmman, nou bezwen priye pour ganny lespri sen Bondye. (Lik 11:13) Zeova i fer sa promes avek bann ki demann li son led: “Lape Bondye ki depas tou sa ki nou kapab konpran [pou] protez zot leker ek lespri par Kris Zezi.” (Filipyen 4:6, 7) Ler nou reste pros avek Zeova e depan lo son lespri sen, i pou donn nou vre lape lespri.​—Romen 15:13.

Labib in ed en kantite dimoun pour fer bann sanzman dan zot lavi e aprezan zot annan lape avek Zeova, lape lespri e lape avek lezot. Ki mannyer zot in fer sa bann sanzman?

Avan ki serten frer ek ser ti vin dan laverite, zot ti annan en lakoler e menm servi vyolans. Me zot ti fer bokou zefor pour sanze e aprezan zot demontre plis labonte ek pasyans e zot viv anpe avek lezot. * (Vwar not.) (Proverb 29:22) Vwar ki mannyer en frer ki apel David ek en ser ki apel Rachel ti fer sa bann sanzman dan zot personnalite.

Avan ki David ti vin dan laverite, i ti abitye kritik lezot e koz avek son fanmir dan en fason brit. Me apre i ti realize ki i ti bezwen sanze. Ki mannyer i ti trouv lape? David i dir, “Mon ti konmans aplik bann prensip Labib dan mon lavi e sa ti fer ki mwan ek mon fanmir nou ti devlop plis respe pour kanmarad.”

Lafason ki Rachel ti’n grandi ti annan en move lefe lo li. I eksplike, “Menm ozordi mon bezwen lalit avek lakoler parski mon’n grandi dan en fanmir kot tou dimoun ti ankoler.” Kwa ki ti ed Rachel trouv lape? I dir, “Mon ti priye e depan lo Zeova.”

 David ek Rachel i zis de legzanp parmi tou bann dimoun ki annan lape aprezan parski zot ti aplik bann prensip Labib e depan lo led lespri sen. Menm si nou viv dan en lemonn kot bokou dimoun i ankoler, nou kapab annan lape lespri. Sa pou fer li pli fasil pour annan en bon relasyon avek nou fanmir ek bann frer ek ser dan kongregasyon. Me Zeova i demann nou pour “viv anpe avek tou dimoun.” (Romen 12:18) Eski sa i vreman posib? Osi, akoz nou devret esey annan lape avek lezot?

Dan predikasyon, nou anons en mesaz lape konsernan Rwayonm Bondye. (Izai 9:6, 7; Matye 24:14) En kantite dimoun i kontan e aksepte sa mesaz. Sa i fer ki zot nepli santi ki zot pa kapab fer nanryen oubyen ankoler akoz sa bann keksoz ki pe arive dan lemonn. Aprezan zot annan en vre lespwar pour lavenir e sa i fer zot anvi “rod lape.”​—Psonm 34:14.

Me kantmenm sa, pa tou dimoun ki kontan nou mesaz, sirtou o konmansman. (Zan 3:19) Nenport ki fason dimoun i reakte, Bondye i donn nou son lespri sen. Son lespri sen i ed nou pour gard lape e kontinyen demontre respe ler nou prese. Dan sa fason, nou aplik konsey Zezi: “Ler ou antre dan lakaz, dir tou dimoun ki reste la, ‘Ki lape i avek zot.’ Si dimoun dan sa lakaz i merite, ki zot lape i reste avek sa bann dimoun, me si sa bann dimoun pa merite, ki sa lape i retourn avek zot.” (Matye 10:11-13) Ler nou annan sa latitid, nou kapab gard lape malgre sa ki lezot i dir oubyen fer. Deplis, nou gard antet ki i posib ki nou ankor annan en loportinite pour ed sa bann dimoun a lavenir.

En lot fason ki nou promot lape i ler nou demontre respe kan nou koz avek bann zofisye gouvernman, menm si zot opoz nou travay. Par egzanp, dan en pei Lafrik, gouvernman pa ti permet ki nou konstri bann Lasal Rwayonm. Nou bann frer ti konnen ki zot devret esey rezourd sa problenm dan lape. Zot ti anvoy en frer ki ti’n servi konman misyonner dan sa pei pour al vwar Lanbasader sa pei dan lavil Lonn, Langleter e pour dir li konsernan sa travay ki Temwen Zeova i fer dan lape.

Sa frer ti dir: “Ler mon ti ariv kot resepsyon, mon ti realize ki dapre fason sanze sa resepsyonnis ki i ti sorti dan en tribi ki koz en langaz ki mon ti’n aprann. Alor mon ti dir li bonzour dan son langaz. I ti sirprann e demann mwan, ‘Akoz ou’n vin isi?’ Avek respe mon ti dir li ki mon ti a kontan vwar Lanbasader. I ti telefonn sa zofisye ki ti vin vwar mwan e dir mwan bonzour dan zot langaz. Apre sa, i ti ekout mwan atantivman anmezir ki mon ti eksplik li bann aktivite ki bann Temwen i fer dan lape.”

Apre ki sa Lanbasader ti’n tann sa ki sa frer ti dir, i ti pli byen konpran nou travay e i ti nepli annan bann santiman negatif lo nou parey avan. En pe letan pli tar, sa gouvernman ti sanz son desizyon e permet Temwen Zeova pour konstri bann Lasal Rwayonm. Bann frer ek ser ti vreman kontan! I evidan ki ler nou tret lezot avek respe, nou promot lape.

Ozordi, pep Zeova i annan en paradi spirityel anmezir ki zot ador li dan en lanvironnman kot i annan lape. Nou tou nou kapab ede ranforsi sa lape ler nou fer zefor pour devlop lape dan nou prop lavi. Apre nou kapab asire ki nou pe fer leker Zeova rezoui. Pour fini kont, dan nouvo lemonn i pou donn nou lape ki dire pour touzour.​—2 Pyer 3:13, 14.