1. Kwa ki fer nou vreman kontan?

NOU vreman kontan pour tande ki mannyer bann serviter Bondye pe fer zot lalimyer briye! Lannen pase, pep Zeova ti kondwir plis ki dis milyon letid Labib. Osi, plizyer milyon nouvo dimoun ki enterese ti asiste Memoryal e aprann konsernan sa kado ranson ki Zeova in donn nou akoz i kontan nou.​—1 Zan 4:9.

2, 3. (a) Kwa ki pa anpes nou ‘lalimyer briye’? (b) Ki nou pou diskite dan sa lartik?

² Partou dan lemonn, Temwen Zeova i koz plizyer langaz. Me sa pa anpes nou loue Zeova konman en fanmir ini. (Revelasyon 7:9) Nenport ki langaz ki nou koze ouswa landrwa kot nou reste, nou kapab “parey bann lalimyer ki pe briye dan sa lemonn.”​—Filipyen 2:15.

³ Nou glorifye Zeova atraver nou minister, nou linite Kretyen e lefet ki nou gard antet ki i pa reste bokou letan. Ki mannyer nou lalimyer i devret briye dan sa trwa domenn?​—Lir Matye 5:14-16.

4, 5. (a) Apard ki prese, ki mannyer nou lalimyer i devret briye? (b) Ki bon rezilta nou gannyen ler nou demontre labonte? (Vwar portre o konmansman sa lartik.)

⁴ En fason enportan ki nou lalimyer i devret briye i par anons sa bon nouvel e fer disip. (Matye 28:19, 20) An 1925, sa lartik “Light in the Darkness” ti dir ki pandan bann dernyen zour, personn pa ti pou kapab reste fidel avek Senyer si i pa ti sezi “sa loportinite pour fer son lalimyer briye.” Sa lartik ti osi dir: “Pour fer sa, i bezwen anons sa bon nouvel avek bann dimoun lo later e viv dapre bann standar drwat Zeova.” (Latour Veyer le 1 Zen 1925 an Angle) Apard ki prese, nou kondwit osi i glorifye Zeova. Bokou dimoun i vwar nou ler nou pe prese. Ler nou fer en pti sourir e dir zot bonzour, sa i ed zot pour annan en bon pwennvi lo nou e lo sa Bondye ki nou adore.

⁵ Zezi ti dir son bann disip: “Ler ou antre dan lakaz, dir tou dimoun ki reste la, ‘Ki lape i avek zot.’” (Matye 10:12) Dan sa landrwa kot Zezi ti prese, i ti dan koutim bann dimoun pour envit bann dimoun ki zot pa konnen se zot. Dan bokou landrwa ozordi, sa i nepli le ka. Dimoun i souvandfwa per oubyen ankoler ler zot vwar en dimoun ki zot pa konnen devan zot laport. Me si nou amikal e zantiy, sa i kapab fer zot santi zot pli alez. Ler ou pe fer temwannyaz an piblik avek prezantwar, eski ou’n deza remarke ki si ou fer en pti sourir e dir dimoun bonzour dan en fason amikal, zot santi zot pli alez pour vin pran en piblikasyon? Zot menm kapab anvi fer en konversasyon!

6. Kwa ki ed en koup aze pour reste aktif dan predikasyon?

⁶ En koup aze Langleter i nepli kapab pres kazankaz menm kantite parey avan akoz zot lasante pa tro tro bon. Alor zot met en latab ranpli avek bann piblikasyon zis devan zot lakaz. Zot reste pros avek en lekol, alor zot met bann piblikasyon ki pou atir latansyon bann paran ki vin sers zot zanfan. Serten paran in pran sa bann piblikasyon, parey sa liv Questions Young People Ask​—Answers That Work, Volim 1 ek 2. Souvandfwa en ser pionye i travay ansanm avek sa koup. Bann paran i remarke ki sa ser i vreman amikal e ki sa koup i vreman anvi ed lezot. En paran in menm konmans etidye Labib.

7. Ki mannyer ou kapab ed bann refizye dan ou pei?

⁷ Resaman, bokou dimoun in bezwen sove, kit zot pei e aprezan zot pe viv dan lezot pei konman bann refizye. Ki ou kapab fer pour ed bann refizye ki pe reste dan ou pei pour aprann konn Zeova? Premyerman, ou kapab aprann ki mannyer pour dir bonzour dan zot langaz. An plis ki sa, ou kapab servi  JW Language app pour aprann enn de fraz ki pou kapab fer zot anvi arete e koz avek ou. Apre, ou kapab montre zot bann video ek piblikasyon ki disponib dan zot langaz lo jw.org.​—Deterononm 10:19.

8, 9. (a) Ki mannyer nou renyon lasemenn i ed nou? (b) Ki mannyer bann paran i kapab ed zot zanfan pour amelyor bann larepons ki zot donnen dan renyon?

⁸ Zeova i donn nou egzakteman sa ki nou bezwen pour vin efikas dan predikasyon. Par egzanp, sa ki nou aprann dan Renyon Nou minister ek lavi Kretyen i ed nou pour vin pli konfidan pour fer bann retourn vizit e konmans bann letid Labib.

⁹ Ler bann viziter i vin nou renyon, zot enpresyonnen avek bann komanter ki bann zanfan i fer. Ou kapab montre ou zanfan konman pour reponn dan zot prop mo. Serten dimoun in ganny atire ver laverite ler zot ti tann bann zanfan eksprim zot lafwa dan en fason senp e senser.​—1 Korentyen 14:25.

10. Ki mannyer ladorasyon fanmir i kapab ed bann fanmir pour vin pli ini?

¹⁰ Nou glorifye Zeova ler nou fer bokou zefor pour antrenn nou fanmir pour travay ansanm dan linite ek lape. Par egzanp, si ou en paran, fer laranzman pour fer Ladorasyon Fanmir regilyerman. Bokou fanmir i get JW Broadcasting ansanm e apre zot diskit lo ki  mannyer zot kapab aplik sa ki zot in aprann. Rapel ki led ki en pti manrmay i bezwen i diferan avek sa led ki en adolesan i bezwen. Fer tou sa ki ou kapab pour ed sak manm ou fanmir pour vreman benefisye avek ladorasyon fanmir.​—Psonm 148:12, 13.

11-13. Ki mannyer nou kapab ed nou kongregasyon pour vin pli ini?

¹¹ Menm si ou zenn, ou kapab ede pour fer tou dimoun dan kongregasyon santi ki nou bezwen zot. En fason pour fer sa i ler ou fer zanmi avek bann frer ek ser aze. Demann zot kwa ki’n ed zot pour kontinyen servi Zeova tou sa bann lannen. Zot kapab ed ou pour aprann bann leson enportan. Sa pou ankouraz zot e ou osi ou pou benefisye! Nou tou, ki swa nou zenn ouswa aze, nou kapab byen resevwar bann dimoun ki vin kot nou Lasal Rwayonm. Ou kapab dir zot bonzour, fer en zoli sourir, ed zot pour ganny en plas asize e entrodwi zot avek lezot. Fer zot santi zot alez.

¹² Si ou ganny demande pour fer bann renyon predikasyon, ou kapab ed bann aze pour kontinyen fer zot lalimyer briye. Fer sir ki zot annan bann teritwar apropriye. Fer laranzman pour bann zenn travay avek zot. Bann frer ek ser aze ek bann ki annan problenm lasante i souvandfwa santi zot dekouraze akoz zot pa kapab pres menm kantite parey zot ti fer avan. Me zot pou santi zot bokou pli byen ler zot konnen ki ou annan zot lentere aker e konpran zot sityasyon. Nenport ki laz zot annan oubyen ki kantite letan zot in dan laverite, ou labonte i kapab ankouraz zot pour kontinyen pres avek devouman.​—Levitik 19:32.

¹³ Bann Izraelit ti kontan pour ador Zeova ansanm. En psalmis ti ekri: “Ki mannyer i bon e ki mannyer i agreab pour bann frer reste ansanm dan linite!” (Lir Psonm 133:1, 2.) * (Vwar not.) I ti konpar sa linite avek delwil ki ti ganny servi pour apwent en pret, ki rafresi lapo e santi bon. Pareyman, nou osi nou kapab rafresi nou bann frer ek ser par demontre labonte e tret zot dan en fason agreab. Sa i fer kongregasyon pli ini. Eski ou kapab fer zefor pour aprann konn pli byen bann frer ek ser dan ou kongregasyon?​—2 Korentyen 6:11-13; not.

14. Ki mannyer ou lalimyer i devret briye kot ou reste?

¹⁴ Ou lalimyer i kapab briye nenport ki landrwa ou ete. Ou labonte i kapab ed ou vwazen pour anvi aprann plis lo Zeova. Demann ou lekor: ‘Ki mon bann vwazen i panse lo mwan? Eski mon lakour i prop e annord? Eski i fer  nou vwazinaz pli zoli? Eski mon ed mon bann vwazen?’ Demann lezot Temwen ki lefe zot labonte ek bon legzanp in annan lo zot fanmir, vwazen, koleg travay oubyen kanmarad lekol.​—Efezyen 5:9.

15. Akoz nou bezwen kontinyen veye?

¹⁵ Si nou anvi ki nou lalimyer i kontinyen briye, nou bezwen rekonnet ki letan nou pe viv ladan. Plizyer fwa, Zezi ti dir son bann disip: “Kontinyen veye.” (Matye 24:42; 25:13; 26:41) Si nou santi ki i ankor annan en ta letan avan “gran ladetres” i vini, nou pa pou vey tou loportinite pour ed lezot aprann konn Zeova. (Matye 24:21) Dan plas ki nou lalimyer i briye, i pou gradyelman vin pli sonm e i menm kapab tennyen.

16, 17. Ki ou kapab fer pour gard antet ki i pa reste bokou letan?

¹⁶ Plis ki zanmen oparavan, nou bezwen kontinyen veye. Bann kondisyon lemonn i kontinyen vin pli pir. Me nou konnen ki lafen pou vin egzakteman sa ler ki Zeova in swazir. (Matye 24:42-44) Antretan, nou bezwen annan  pasyans e konsantre lo nou lavenir. Lir Labib toulezour e pa zanmen aret priy Zeova. (1 Pyer 4:7) Aprann avek bann frer ek ser ki’n servi Zeova pour plizyer lannen. Par egzanp, ou kapab lir bann biografi, parey sa lartik “Seventy Years of Holding On to the Skirt of a Jew,” ki dan Latour Veyer le 15 Avril 2012, paz 18-21 an Angle.

¹⁷ Reste okipe dan servis Zeova. Fer bann bon keksoz pour lezot e pas letan avek ou bann frer ek ser. Koumsa ou pou ere e i pou paret ki letan pe pas vit. (Efezyen 5:16) Bann serviter Zeova in akonpli en kantite keksoz pandan sa dernyen san-t-an. Ozordi, nou pli okipe ki zanmen oparavan. Travay Zeova in agrandi plis ki nou ti’n kapab imazinen. Nou lalimyer pe briye!

18, 19. Ki mannyer bann ansyen i kapab ed nou pour servi Zeova avek devouman? Donn en legzanp.

¹⁸ Menm si nou fer bokou fot, Zeova i permet nou pour servi li. Pour ed nou, i donn nou “bann zonm konman kado,” setadir bann ansyen dan kongregasyon. (Lir Efezyen 4:8, 11, 12.) Alor ler bann ansyen i vizit ou, servi byen sa letan ki ou annan avek zot pour aprann avek zot lasazes ek konsey.

¹⁹ Par egzanp, en koup Langleter ti pe fer fas avek bann sityasyon difisil dan zot maryaz e zot ti demann de ansyen pour ed zot. Sa madanm ti santi ki son msye pa ti pe desarz son responsabilite konman sef fanmir an rapor avek zot servis pour Zeova. Sa msye ti santi ki i pa ti en bon ansenyan e i ti admet ki i pa ti pe fer laranzman pour annan en ladorasyon fanmir ki regilye. Bann ansyen ti ed sa koup pour mazin lo legzanp Zezi. Zot ti ankouraz sa msye pour imit lafason ki Zezi ti pran swen avek son bann disip. Zot ti ankouraz sa madanm pour demontre pasyans anver son msye. Zot ti osi donn sa koup bann sizesyon lo ki mannyer zot ti pou kapab fer ladorasyon fanmir avek zot de zanfan. (Efezyen 5:21-29) Sa msye ti fer bokou zefor pour vin en pli bon sef fanmir. Bann ansyen ti ankouraz li pour pa zanmen abandonnen e pour kontinyen depan lo lespri sen Zeova. Sa lanmour ek labonte ki bann ansyen ti demontre ti vreman ed sa fanmir!

20. Ki pou arive ler ou lalimyer i briye?

²⁰ “Byennere sa enn ki annan respe pour [Zeova], ki swiv semen ki SENYER i’n trase!” (Psonm 128:1) Ou pou ere ler ou lalimyer i briye. Alor ansenny lezot lo Bondye, fer tou sa ki ou kapab pour ed ou fanmir ek kongregasyon pour reste ini e kontinyen veye. Lezot pou vwar ou bon legzanp e zot osi zot pou anvi glorifye nou Papa Zeova.​—Matye 5:16.