1, 2. (a) Ki Zezi ti demande dan son dernyen lapriyer ki i ti fer ansanm avek son bann zapot? (b) Petet, akoz Zezi ti’n trakas konsernan linite son bann disip?

PANDAN sa dernyen repa ki Zezi ti pran avek son bann zapot, i ti trakas konsernan zot linite. Ler i ti pe fer lapriyer ansanm avek zot, i ti dir ki i anvi ki son bann disip i vin en sel, andotmo ki zot ini, zis parey li ek son Papa zot ini. (Lir Zan 17:21.) Si bann disip Zezi ti ini, sa ti pou en laprev pour lezot ki Zeova ti’n anvoy Zezi lo later. Dimoun ti pou konnen lekel bann vre disip Zezi par zot lanmour pour kanmarad e sa lanmour ti pou fer zot pli ini.​—Zan 13:34, 35.

² Nou kapab konpran akoz Zezi ti koz bokou konsernan linite sa zour swar. I ti’n remarke ki son bann zapot pa ti konpletman ini. Par egzanp, ankor enn fwa bann zapot ti dispit antre zot konsernan “lekel parmi zot ki ti pli gran.” (Lik 22:24-27; Mark 9:33, 34) En lot fwa, Zak ek Zan ti’n demann Zezi pour donn zot sa plas pli enportan dan Rwayonm lesyel akote li.​—Mark 10:35-40.

3. Kwa ki ti’n kapab anpes bann disip Kris vin ini e ki kestyon nou pou diskit lo la?

 ³ Bann disip Kris ti anvi ganny plis pouvwar ek lotorite e sa ti’n kapab anpes zot vin ini, me i ti annan lezot keksoz ankor. Par egzanp, dan letan Zezi, i ti annan divizyon parmi bann dimoun akoz laenn ek prezidis. Bann disip Zezi ti pou bezwen sirmont bann santiman negatif ki zot ti annan. Dan sa lartik, nou pou diskit lo sa bann kestyon swivan: Ki Zezi ti fer konsernan prezidis? Ki mannyer i ti ed son bann disip aprann pour pa fer lapreferans, andotmo pour tret lezot dan en fason zis e vin ini? E ki mannyer legzanp Zezi ek bann keksoz ki i ti ansennyen pou ed nou reste ini?

4. Donn legzanp bann prezidis ki Zezi ti bezwen fer fas avek.

⁴ Menm Zezi ti bezwen fer fas avek prezidis. Ler Filip ti dir Natanael ki i ti’n trouv Mesi, Natanael ti dir: “Eski i kapab annan okenn bon keksoz sorti Nazaret?” (Zan 1:46) I tre probab ki Natanael ti konnen ki Mesi ti pou ne Betleenm, parey sa profesi dan Mika 5:2 ti’n predir. Me petet i ti’n mazinen ki lavil Nazaret pa ti ase enportan pour Mesi grandi laba. Deplis, i ti annan bann dimoun enportan Zide ki ti mepriz Zezi parski i ti sorti Galile. (Zan 7:52) En kantite zabitan Zide ti krwar ki dimoun ki sorti Galile ti enferyer. Lezot Zwif ti apel Zezi en Samariten pour esey ensilte li. (Zan 8:48) Bann Samariten ti sorti dan en lot nasyon e zot larelizyon ti diferan avek larelizyon bann Zwif. Tou le de bann dimoun ki ti sorti Zide ek Galile ti napa en sou respe pour bann Samariten e tant pour evit zot.​—Zan 4:9.

5. Ki prezidis bann disip Zezi ti bezwen fer fas avek?

⁵ Bann sef relizye Zwif ti osi mank respe pour bann disip Zezi. Bann Farizyen ti apel zot “bann dimoun modi.” (Zan 7:47-49) Bann Farizyen ti annan en move pwennvi lo bann dimoun ki pa ti’n al etidye dan bann lekol relizye Zwif e ki pa ti swiv zot bann tradisyon. Zot ti konsider zot konman bann dimoun ki pa vo nanryen e ordiner. (Akt 4:13, not) Zezi ek son bann disip ti fer fas avek prezidis parski dimoun sa letan ti fyer akoz zot larelizyon, zot pozisyon dan lasosyete ek zot ras. Sa kalite prezidis ti osi annan en lenfliyans lo bann disip ek zot pwennvi lo lezot. Pour reste ini zot ti pou bezwen sanz zot fason panse.

6. Servi bann legzanp pour montre ki mannyer prezidis i kapab afekte nou.

⁶ Ozordi, partou dan lemonn dimoun i annan bann prezidis. Dimoun i kapab annan prezidis anver nou ouswa i kapab ki nou ki annan prezidis anver lezot. En ser ki aprezan pe servi konman en pionye Lostrali i dir: “Mon laenn pour bann dimoun blan ti vin pli for pli mon ti  konsantre lo bann lenzistis ki bann dimoun Aborizin in bezwen sibir dan lepase e konmela.” Son laenn ti osi vin pli for akoz serten dimoun blan ti’n tret li dan en move fason. En frer ki sorti Kanada i admet lafason ki i ti abitye santi: “Mon ti krwar ki bann dimoun ki koz Franse ti pli siperyer.” I dir ki pour fini kont, i pa ti kontan bann dimoun ki ti koz Angle.

7. Ki Zezi ti fer konsernan prezidis?

⁷ Ozordi, laplipar ditan bann santiman prezidis i vreman for e difisil pour sanze zis parey dan letan Zezi. Ki Zezi ti fer konsernan sa bann santiman prezidis? Premyerman, i pa ti zanmen devlop bann santiman prezidis. Toultan i ti tret lezot dan en fason zis san fer lapreferans. I ti pres avek bann dimoun ris ek pov, avek bann Farizyen ek Samariten e menm avek bann kolekter taks ek bann ki ti annan en move lavi. Dezyenmman, Zezi ti ansenny son bann disip e atraver son legzanp, i ti montre zot ki zot pa devret mefye lezot ouswa annan prezidis anver zot.

8. Ki prensip enportan ki form sa rezon de baz pour nou linite? Eksplike.

⁸ Zezi ti ansenny en prensip enportan ki form sa rezon de baz pour nou linite. I ti dir son bann disip: “Zot tou zot frer.” (Lir Matye 23:8, 9.) Dan en sans, nou tou nou bann frer akoz nou bann zanfan Adan. (Akt 17:26) Zezi ti eksplike ki son bann disip osi ti bann frer ek ser parski zot tou zot ti’n aksepte Zeova konman zot Papa dan lesyel. (Matye 12:50) Deplis, zot ti’n antre dan fanmir Bondye e zot lanmour ek lafwa ti fer zot ini. I pour sa rezon ki dan bann let ki bann zapot ti anvoy pour bann kongregasyon, zot ti apel lezot Kretyen zot frer ek ser.​—Romen 1:13; 1 Pyer 2:17; 1 Zan 3:13. *​—Vwar not.

9, 10. (a) Akoz bann Zwif ti napa rezon pour fyer akoz zot ras? (b) Ki mannyer Zezi ti montre ki i mal pour mepriz bann dimoun ki annan en lot ras? (Vwar portre o konmansman sa lartik.)

⁹ Apre ki Zezi ti dir son bann disip ki zot devret konsider kanmarad konman frer ek ser, i ti fer resorti ki zot bezwen annan limilite. (Lir Matye 23:11, 12.) Parey nou’n fini aprann, parfwa lorgey ti anmenn divizyon ant bann zapot. Deplis, dan letan Zezi, dimoun ti vreman fyer akoz zot ras. En kantite Zwif ti krwar ki zot ti pli siperyer ki lezot parski zot ti bann zanfan Abraam. Me Zan ki batize ti dir zot: “Bondye i kapab fer sa bann ros vin zanfan Abraam.”​—Lik 3:8.

¹⁰ Zezi ti dir ki i mal pour dimoun fyer akoz zot ras. I ti fer sa kler ler en profeser lalwa ti demann li: “Lekel vreman ki mon prosen?” Pour reponn sa kestyon, Zezi ti rakont en zistwar. Bann voler ti bat en Zwif e kit li lo semen. Menm si serten Zwif ti pas dan sa semen e vwar sa zonm, zot pa ti ed li. Me en Samariten ti pran pitye pour sa Zwif e pran swen avek li. Apre ki Zezi ti’n fini rakont son zistwar, i ti dir sa profeser lalwa ki i ti bezwen vin parey sa Samariten. (Lik  10:25-37) Zezi ti montre ki en Samariten ti kapab ansenny bann Zwif ki savedir kontan zot prosen.

11. Akoz i ti enportan pour bann disip pa fer lapreferans e ki mannyer Zezi ti ed zot pour konpran sa?

¹¹ Avan Zezi ti al dan lesyel, i ti dir son bann disip pres “partou dan Zide ek Samari e ziska dan bann landrwa pli elwannyen lo later.” (Akt 1:8) Pour zot arive fer sa, bann disip Zezi ti pou bezwen sirmont lorgey ek prezidis ki zot ti annan. Souvan Zezi ti’n koz lo bann bon kalite ki bann etranze ti annan e sa ti prepar son bann disip pour pres avek dimoun dan tou nasyon. Par egzanp, i ti felisit en zofisye larme etranze ki ti annan en gran lafwa. (Matye 8:5-10) Ler Zezi ti Nazaret, sa lavil kot i ti’n grandi, i ti eksplike ki mannyer Zeova ti’n ed bann etranze, tel parey sa vev Fenisyen ki ti sorti Zarefat ek Naaman sa lepre ki ti sorti Siri. (Lik 4:25-27) Zezi ti osi pres avek en madanm Samariten e menm pas de zour dan en lavil Samariten parski bann dimoun laba ti enterese avek son mesaz.​—Zan 4:21-24, 40.

12, 13. (a) Ki mannyer bann zapot ti reazir ler Zezi ti ansenny en madanm Samariten? (Vwar portre o konmansman sa lartik.) (b) Kwa ki montre ki Zak ek Zan pa ti vreman konpran sa ki Zezi ti pe esey ansenny zot?

¹² I pa ti fasil pour bann zapot sirmont bann santiman prezidis ki zot ti annan. Zot ti sirprann ki Zezi ti pare pour ansenny en madanm Samariten. (Zan 4:9, 27) Akoz? Petet akoz bann sef relizye Zwif pa ti pou koz avek en madanm an piblik e sirtou en madanm Samariten ki ti annan en move repitasyon. Bann zapot ti dir Zezi manze, me Zezi ti’n telman kontan pour koz avek sa madanm ki manze pa ti enportan pour li. Bondye ti anvi ki Zezi i prese, menm avek en madanm Samariten e ler i ti fer sa ki son Papa ti anvi, sa ti parey manze pour li.​—Zan 4:31-34.

¹³ Zak ek Zan pa ti konpran sa leson enportan. Ler bann disip ti pe vwayaze avek Zezi, zot ti pas par Samari e zot ti rod en landrwa pour pas lannwit dan en vilaz Samariten. Me bann Samariten pa ti oule les zot dormi laba. Zak ek Zan ti vin sitan ankoler ki zot ti demann Zezi si i ti oule ki zot fer dife sorti dan lesyel pour detri sa vilaz antye. Zezi ti koz severman avek zot pour koriz zot. (Lik 9:51-56) Petet Zak ek Zan pa ti pou’n sitan ankoler si sa ti’n ariv Galile, sa lavil kot zot ti sorti. I tre probab ki zot ti ankoler akoz zot ti annan bann santiman prezidis anver bann Samariten. Pli tar, ler Zan ti pe anons sa bon nouvel avek bann Samariten e en kantite ti ekout li, i kapab ki i ti anbarase akoz lafason ki i ti’n reazir avan.​—Akt 8:14, 25.

14. Ki mannyer en problenm prezidis ti ganny rezourd?

¹⁴ Pa bokou letan apre Lapannkot lannen 33, i ti annan en problenm dan kongregasyon akoz diskriminasyon. Ler bann frer ti donn bann vev ki ti dan bezwen manze, zot pa ti donn bann vev ki ti koz Grek. (Akt 6:1) Sa ti’n kapab arive akoz zot ti annan bann prezidis konsernan langaz. Bann zapot ti rezourd sa problenm vitman. Zot ti swazir set frer  kalifye pour distribye bann manze dan en fason zis. Tou sa bann frer ti annan bann non Grek, ki ti’n kapab rekonfort bann vev ki ti’n ganny ofanse.

15. Ki mannyer Pyer ti aprann pour pa fer okenn lapreferans? (Vwar portre o konmansman sa lartik.)

¹⁵ Lannen 36, bann disip Zezi ti konmans pres avek bann dimoun sorti dan tou nasyon. Avan sa, zapot Pyer ti’n pas letan zis avek bann Zwif. Apre, Bondye ti fer li kler ki bann Kretyen pa devret fer lapreferans e alor, Pyer ti pres avek Korney ki ti en solda Romen. (Lir Akt 10:28, 34, 35.) Apre sa, Pyer ti pas letan avek bann Kretyen non Zwif e manz ansanm avek zot. Me plizyer lannen pli tar dan lavil Antyos, i ti aret manz avek bann Kretyen non Zwif. (Galat 2:11-14) Pol ti koriz Pyer e Pyer ti aksepte sa koreksyon. Ki mannyer nou konnen? Ler Pyer ti ekri son premye let pour bann Kretyen Zwif ek non Zwif ki ti reste Lazi Miner, i ti koz lo lenportans pour kontan tou nou bann frer ek ser.​—1 Pyer 1:1; 2:17.

16. Bann Kretyen dan premye syek ti vin koni pour kwa?

¹⁶ I kler ki gras a legzanp Zezi, bann zapot ti aprann pour kontan “tou sort kalite dimoun.” (Zan 12:32; 1 Timote 4:10) Menm si i ti pran letan, zot ti sanz zot fason vwar dimoun. Anfet, bann Kretyen dan premye syek ti vin koni pour zot lanmour anver kanmarad. Apepre lannen 200, ekriven Tertullian ti sit sa ki lezot dimoun ti dir konsernan bann Kretyen: “Zot kontan kanmarad” e “Zot menm pare pour mor pour kanmarad.” Vi ki bann Kretyen in “devlop sa nouvo personnalite,” zot in aprann pour vwar tou dimoun egal, parey Bondye i vwar zot.​—Kolosyen 3:10, 11.

17. Ki mannyer nou kapab retir okenn santiman prezidis ki nou annan? Donn legzanp.

¹⁷ Ozordi, i osi kapab pran letan pour  retir okenn santiman prezidis ki nou annan. En ser ki reste Lafrans i dekrir ki kantite sa in difisil pour li fer. I dir: “Zeova in montre mwan ki savedir lanmour, ki savedir partaze, ki savedir kontan tou sort kalite dimoun. Me mon ankor pe aprann pour sirmont prezidis ki mon annan anver lezot e sa pa toultan fasil. Sanmenm sa mon kontinyen priy lo la.” En ser Lespanny i eksplike ki parfwa i ankor bezwen lager avek bann santiman negatif konsernan en serten group dimoun. I dir: “Laplipar ditan mon reisi. Me mon konnen ki mon bezwen kontinyen lager. Gras a Zeova, mon kontan ki mon form parti en fanmir ini.” Nou tou nou bezwen reflesi seryezman lo nou bann santiman. Eski nou osi nou annan bann santiman prezidis ki nou bezwen retire?

18, 19. (a) Ki bann rezon nou annan pour resevwar tou dimoun? (b) Ki mannyer nou kapab fer sa?

¹⁸ I byen pour rapel ki nou tou nou pa ti konn Bondye. (Efezyen 2:12) Me avek lanmour, Zeova ti atir nou anver li. (Osea 11:4; Zan 6:44) Apre, Kris in resevwar nou. I’n fer li posib pour nou form parti fanmir Bondye. (Lir Romen 15:7.) Menm si nou enparfe, Zezi in resevwar nou, alor nou pa devret zanmen menm mazin pour rezet personn!

¹⁹ Pli nou apros ver lafen sa move lemonn, pli dimoun pou vin pli divize e annan plis prezidis ek laenn. (Galat 5:19-21; 2 Timote 3:13) Me konman pep Zeova, nou rod “lasazes ki sorti dan lesyel” ki ed nou pour pa fer lapreferans e promot lape. (Zak 3:17, 18) Nou kontan pour fer zanmi avek dimoun sorti dan lezot pei, pour aksepte zot fason fer keksoz e petet menm pour aprann zot langaz. Ler nou fer sa, nou ganny lape ki “parey en larivyer” e lazistis ki “parey bann laroul dan lanmer.”​—Izai 48:17, 18.

20. Ki arive ler lanmour i sanz nou fason panse ek santiman?

²⁰ Ler sa ser sorti Lostrali ti etidye Labib, tou son santiman prezidis ek laenn ki ti byen anrasinen ti dousman dousman disparet. Lanmour ti sanz son fason panse ek santiman. Sa frer Kanada ki koz Franse i dir ki aprezan i realize ki dimoun i souvandfwa annan laenn pour lezot akoz zot zis pa konn zot. I ti aprann ki “bann kalite ki dimoun i annan pa depan lo zot landrwa nesans.” I ti menm marye avek en ser ki koz Angle! Sa bann legzanp i prouve ki lanmour i sirmont prezidis. Lanmour i fer nou ini e soud nou ansanm dan en fason ki pa kapab ganny kase.​—Kolosyen 3:14.