1. Akoz nou bezwen ekout lavertisman Zezi?

DAN sa profesi ki Zezi ti donnen konsernan bann dernyen zour, i ti dir: “Fer byen atansyon pour ki zot pa vin lour akoz . . . traka lavi.” (Lik 21:34) Nou bezwen ekout sa lavertisman. Akoz? Parski pour le moman, nou bezwen fer fas avek bann menm problenm ki tou lezot dimoun i annan.

2. Ki bann problenm ki met nou bann frer ek ser anba presyon?

² Parfwa, nou bezwen fer fas avek plizyer sityasyon ki met nou anba presyon. Annou vwar detrwa legzanp. En Temwen ki apel John * i annan en maladi grav ki afekte son bann nerf (multiple sclerosis). Osi, apre 19 an maryaz, son madanm ti kit li e sa ti tap li en kantite. An plis ki sa, son de fiy ti aret servi Zeova. En koup ki apel Bob ek Linda ti fer fas avek bann lot kalite problenm. Zot tou le de zot ti perdi zot travay e zot ti nepli kapab pey pour zot lakaz, alor zot ti bezwen al reste en lot landrwa. Par lao tousala, dokter ti vwar ki Linda i annan en problenm leker ki ti kapab touy li ek en lot maladi ki ti pe atak son sistenm defans.

3. Ki Filipyen 4:6, 7 i dir nou lo Zeova?

³ Vi ki Zeova i nou Kreater ek Papa, nou kapab asire ki i konpran ki mannyer nou santi ler nou anba presyon. An plis, i anvi ed nou pour fer fas avek bann problenm ki nou rankontre. (Lir Filipyen 4:6, 7.) Dan Parol Bondye, i annan plizyer resi ki dekrir bann difikilte ki bann serviter Bondye ti pas atraver. Labib i osi dir nou ki mannyer  Zeova ti ed zot fer fas avek sa bann sityasyon ki ti met presyon lo zot. Annou vwar detrwa legzanp.

4. Ki bann difikilte Eliya ti pas atraver e ki mannyer Eliya ti santi konsernan Zeova?

⁴ Eliya ti servi Zeova pandan bann moman difisil e i ti fer fas avek bann gro difikilte. Lerwa Aab ti enn bann lerwa Izrael ki pa ti fidel avek Zeova e i ti marye avek Zezabel ki ti ador Baal. Zot ti ankouraz dimoun dan zot nasyon pour ador Baal e zot ti responsab pour lanmor plizyer profet Zeova. Eliya ti nobou sove. Ler i ti annan en lafamin, Eliya ti depan lo Zeova pour ganny son manze pour viv. (1 Rwa. 17:2-4, 14-16) I ti osi depan lo Zeova ler i ti opoz bann profet ek adorater Baal e ankouraz bann Izraelit pour servi Zeova. (1 Rwa. 18:21-24, 36-38) Eliya ti vwar ki mannyer Zeova ti protez e ed li pandan sa bann moman difisil.

5-6. Dapre 1 Lerwa 19:1-4, ki mannyer Eliya ti santi e ki mannyer Zeova ti montre ki i kontan li?

⁵ Lir 1 Lerwa 19:1-4. Par kont, Eliya ti konmans per ler Larenn Zezabel ti dir ki i pou touy li. Alor i ti sove e al Beer-Seba. I ti sitan dekouraze ki i ti “demann lanmor.” Akoz i ti santi koumsa? Eliya ti enparfe, i ti “en zonm ki ti annan bann santiman parey nou menm.” (Zak 5:17) Kekfwa i ti anba tro bokou presyon oubyen i ti tro fatige. I paret ki Eliya ti krwar ki tou son zefor pour ankouraz dimoun  pour ador Zeova pa ti’n abouti dan nanryen. I ti osi krwar ki tou keksoz an Izrael ti ankor parey e ki zis li ki ti ankor pe servi Zeova. (1 Rwa. 18:3, 4, 13; 19:10, 14) Petet nou sirprann ki sa profet fidel ti santi koumsa, me Zeova ti konpran son santiman.

⁶ Zeova pa ti dispit avek Eliya akoz i ti santi koumsa. O kontrer, i ti ed Eliya pour reganny son lafors. (1 Rwa. 19:5-7) Pli tar, Zeova ti zantiman ed Eliya pour koriz son fason panse ler i ti montre li Son gran pwisans. Apre sa, Zeova ti dir Eliya ki i ti ankor annan 7,000 dimoun an Izrael ki ti refize ador Baal. (1 Rwa. 19:11-18) Dan sa bann fason, Zeova ti pe montre Eliya ki i kontan li.

7. Ler nou vwar lafason ki Zeova ti ed Eliya, ki sa i fer nou asire?

⁷ Eski i annan en keksoz ki pe met ou anba presyon? Si wi, pa i rekonfortan pour konnen ki Zeova ti konpran santiman Eliya! Sa i fer nou asire ki i osi konpran ki mannyer nou santi ler nou fer fas avek bann difikilte. I konnen kwa ki nou kapab fer e kwa ki nou pa kapab fer e i menm konnen kwa ki dan nou lespri ek leker. (Ps. 103:14; 139:3, 4) Si nou depan lo Zeova parey Eliya, Zeova pou ed nou fer fas avek bann problenm ki met nou anba presyon.​—Ps. 55:22.

8. Ki mannyer Zeova pou ed ou ler ou anba presyon?

⁸ Ler ou anba presyon, ou kapab mazinen ki ou sityasyon pa pou zanmen amelyore e sa i fer ou dekouraze. Si sa i arive, pa oubliye ki Zeova pou ed ou. Ki mannyer i pou fer sa? I demann ou pour koz avek li lo ou bann problenm e dir li ki mannyer ou santi. I pou reponn ou lapriyer. (Ps. 5:3, NWT; 1 Pyer 5:7) Alor, annan labitid pour koz avek Zeova lo ou bann problenm. I pa pou koz avek ou direkteman parey i ti fer avek Eliya, me i pou koz avek ou atraver son Parol Labib e osi atraver son lorganizasyon. Bann resi ki ou lir dan Labib i kapab rekonfort ou e donn ou en lespwar. An plis, ou bann frer ek ser i kapab ankouraz ou.​—Rom. 15:4; Ebr. 10:24, 25.

9. Ki mannyer en bon zanmi i kapab ed nou?

⁹ Zeova ti dir Eliya donn Elisa en pe son responsabilite. Koumsa, Zeova ti donn Eliya en bon zanmi ki ti kapab ed li ler i ti dekouraze. Pareyman, ler nou koz avek en zanmi lo nou bann santiman, i pou kapab ed nou fer fas avek presyon. (2 Rwa. 2:2; Prov. 17:17) Si ou santi ki ou napa personn ki ou kapab koz avek, demann Zeova pour ed ou trouv en Kretyen matir ki kapab ankouraz ou.

10. Ki mannyer legzanp Eliya i donn nou lespwar e ki mannyer sa promes dan Izai 40:28, 29 i ed nou?

¹⁰ Zeova ti ed Eliya pour fer fas avek presyon e pour kontinyen servi li fidelman pour plizyer lannen. Legzanp Eliya i donn nou lespwar ki nou osi nou kapab fer parey. Parfwa, nou telman anba presyon ki nou santi nou epwize fizikman e emosyonnelman. Pourtan, si nou depan lo Zeova, i pou donn nou sa lafors ki nou bezwen pour kontinyen servi li.​—Lir Izai 40:28, 29.

11-13. Ki lefe presyon ti annan lo trwa serviter Bondye dan lepase?

¹¹ I annan lezot dimoun dan Labib ki ti osi fer fas avek presyon. Par egzanp,  Ana ti anba presyon parski i ti santi li onte ki i pa ti kapab fer zanfan, tandis ki lot madanm son msye ti kapab e an plis, sa madanm ti pe sifok li. (1 Sam. 1:2, 6) Tou sa presyon ti fer Ana sitan tris ki i ti plere asodlarm e perdi son lapeti.​—1 Sam. 1:7, 10.

¹² I ti annan bann moman kot Lerwa David ti anba bokou presyon. Mazin lo bann difikilte ki i ti fer fas avek. I ti santi li koupab akoz tou bann fot ki i ti’n fer. (Ps. 40:12) Son garson Absalonm, ki i ti kontan en kantite ti rebel kont li e pli tar Absalonm ti ganny touye. (2 Sam. 15:13, 14; 18:33) An plis ki sa, enn son pli bon zanmi ti trai li. (2 Sam. 16:23–17:2; Ps. 55:12-14) Dan plizyer psonm ki David ti ekri, i ti dekrir ki mannyer i ti santi ler i ti dekouraze e osi son gran konfyans dan Zeova.​—Ps. 38:5-10; 94:17-19.

¹³ Pli tar, i ti annan en psalmis ki ti konmans zalou fason viv bann move dimoun. I kapab ki sa psalmis ti en desandans Azaf ki ti en Levit e i ti servi dan “sanktyer Bondye.” Sa psalmis ti anba presyon emosyonnelman ki ti fer li malere e i pa ti satisfe avek son lavi. I ti menm konmans mazinen ki sa privilez pour servi Bondye pa ti ase.​—Ps. 73:2-5, 7, 12-14, 16, 17, 21.

14-15. Ki nou aprann avek sa trwa legzanp dan Labib lo ki mannyer pour depan lo led Zeova?

¹⁴ Sa trwa serviter fidel ki nou’n fek koz lo la ti depan lo led Zeova. Zot ti priy Zeova konsernan bann keksoz ki ti pe fatig zot. Zot pa ti per pour dir li kwa ki ti pe met zot anba presyon. An plis, zot ti kontinyen al kot landrwa ladorasyon Zeova.​—1 Sam. 1:9, 10; Ps. 55:22; 73:17; 122:1.

 ¹⁵ An retour, Zeova ti demontre konpasyon anver zot e ed zot. Ana ti ganny lape lespri. (1 Sam. 1:18) David ti ekri: “En zonm ki zis i tonm dan bokou maler. Me [Zeova] i touzour delivre li.” (Ps. 34:19) Tandis ki sa psalmis li, i ti santi ki Zeova ti’n “atrap [son] lanmen drwat,” setadir ki i ti’n donn li bann bon konsey pour gid li. Dan en kantik i ti dir: “Pour mwan, kan mon apros avek Bondye, mon dan lazwa. Mon swazir Senyer [Zeova] pour mon labri.” (Ps. 73:23, 24, 28) Ki nou aprann avek sa bann legzanp? Parfwa, nou pou fer fas avek bann gro problenm ki met nou anba bokou presyon. Me nou kapab fer fas avek presyon, si nou medit lo lafason ki Zeova in ed lezot, depan lo li dan lapriyer e fer sa ki i demann nou pour fer.​—Ps. 143:1, 4-8.

16-17. (a) Akoz nou pa devret izol nou avek Zeova ek son pep? (b) Ki mannyer nou kapab reganny lafors?

¹⁶ Nou aprann en lot leson enportan avek sa trwa legzanp: Nou pa devret izol nou avek Zeova ek son pep. (Prov. 18:1, NWT) Nancy ki ti anba bokou presyon ler son msye ti kit li, i dir: “I ti annan plizyer zour ki mon pa ti anvi vwar personn, ni  menm koz avek personn. Me selman, pli mon ti izol mon lekor, pli mon ti santi mwan tris.” Keksoz ti sanze ler Nancy ti konmans rod fason pour ed lezot dimoun ki ti dan problenm. I dir: “Mon ti ekout lezot dimoun e donn zot en sans pour koz lo zot problenm. Mon ti realize ki ler mon ti konsantre lo zot ek zot problenm, sa ti fer ki mon ti aret konsantre lo mon lekor ek mon bann problenm.”

¹⁷ En lot fason ki nou kapab reganny lafors i ler nou asiste nou bann renyon. Ler nou al renyon nou donn Zeova plis loportinite pour ‘vin sekour e konsol nou.’ (Ps. 86:17) Dan renyon, i ranforsi nou atraver son lespri sen, son Parol ek son pep. Nou osi ganny sa loportinite pour “ankouraz kanmarad.” (Rom. 1:11, 12) En ser ki apel Sophia ti dir: “Zeova ek nou lasosyasyon frer ek ser ti ed mwan pour kontinyen andire. Renyon ti sa keksoz pli enportan pour mwan. Mon’n remarke ki ler mon fer plis zefor dan predikasyon ek renyon, mon pli kapab fer fas avek presyon ek traka.”

18. Si nou dekouraze, ki Zeova i kapab fer?

¹⁸ Ler nou dekouraze, annou rapel ki Zeova in promet ki a lavenir i pou retir tou sa ki met nou anba presyon e ki antretan i ofer pour ed nou fer fas avek presyon. I donn nou “sa dezir ek lafors” ki nou bezwen pour aret santi ki nou san lespwar e pour aret dekouraze.​—Fili. 2:13.

19. Ki promes nou vwar dan Romen 8:37-39?

¹⁹ Lir Romen 8:37-39. Zapot Pol i dir ki napa nanryen ki kapab anpes Bondye kontan nou. Ki mannyer nou kapab ed nou bann frer ek ser ki anba presyon? Dan sa lot lartik, nou pou vwar ki mannyer nou kapab swiv legzanp Zeova par demontre konpasyon e siport nou bann frer ek ser ler zot anba presyon.