NOU tou nou konnen ki Zeova pe diriz son pep e i pe donn zot sa ki zot bezwen pour zot reste pros avek li pandan sa “bann dernyen zour.” (2 Tim. 3:1) Me sakenn ant nou i bezwen azir. Nou kapab konpar nou sityasyon avek sa ki pour bann Izraelit dan dezer. Zot ti bezwen azir ler zot ti tann son en tronpet.

Zeova ti fer Moiz fer de tronpet annarzan pour li servi “pour konvok lasanble e ler zot deplas kan.” (Nom. 10:2) Bann pret ti bezwen soufle tronpet dan diferan fason pour dir bann dimoun ki zot devret fer. (Nom. 10:3-8) Ozordi, pep Bondye i ganny bann lenstriksyon dan diferan fason. Dan sa lartik, nou pou vwar trwa fason ki nou ganny bann lenstriksyon e nou pou konpar sa bann lenstriksyon avek bann son tronpet dan ansyen Izrael. Sa trwa fason i ler nou ganny envite bann lasanble, ler bann ansyen i ganny bann formasyon e ler i annan bann azisteman dan bann lenstriksyon pour tou kongregasyon.

Ler Zeova ti oule “pep Izrael antye” i rasanble lo kote les larantre tabernak, bann pret ti soufle tou le de tronpet. (Nom. 10:3) Tou bann tribi ki ti pe kanpe dan kat group otour tabernak, ti tann sa son. I tre probab ki bann ki ti pe kanp pros avek larantre ti kapab ariv dan zis detrwa minit. Lezot ti pli lwen e i kapab ki zot ti bezwen plis letan ek zefor pour arive. Ki swa zot ti pre ouswa lwen, Zeova ti oule ki tou i rasanble e tann son bann lenstriksyon.

Ozordi, nou pa rasanble kot en tabernak, me nou ganny envite bann lasanble ki pep Bondye i fer. Sa i enkli bann lasanble rezyonal ek lezot levennman spesyal, kot nou ganny bann lenformasyon ek lenstriksyon enportan. Dan bann pei partou lo later, pep Zeova i benefisye avek menm laranzman. Alor, tou bann ki aksepte lenvitasyon pour vin sa bann lasanble i form parti en gran group ki ere. Serten i bezwen vwayaz pli lwen ki lezot. Me tou sa ki asiste i dakor ki i vo lapenn pour vin sa bann lasanble.

Eski bann ki dan bann group izole e ki lwen avek sa bann lasanble i kapab benefisye zot osi? Avek led teknolozi modern, bokou sa bann dimoun i kapab benefisye avek sa bann menm levennman e zot santi ki zot osi zot ansanm dan sa lasanble. Par egzanp, ler en reprezantan sorti biro prensipal Temwen Zeova ti vizit biro brans Temwen Zeova Benen, sa progranm ti ganny transmet Arlit, Nizer, ki en pti lavil dan Dezer Sahara. An tou, i ti annan 21 dimoun ki ti asiste sa levennman. Parmi, i ti annan bann frer, ser ek lezot dimoun enterese. Menm si zot ti lwen, zot ti  santi ki zot ti ini ansanm avek sa lasanble ki ti annan 44,131 dimoun. En frer i dir: “Nou dir zot en gran mersi sorti dan fon nou leker. Zot in ed nou vwar sa levennman nou osi. I montre nou ankor ki kantite zot kontan nou.”

Ler bann pret Izraelit ti soufle zis en tronpet, “zis bann responsab ek bann sef tribi” ki ti bezwen vin kot tabernak. (Nom. 10:4) Laba, Moiz ti kapab donn zot bann lenformasyon e zot ti ganny formasyon. Sa ti pou ed zot pran swen avek responsabilite ki zot ti annan dan zot tribi. Si ou ti enn parmi sa bann sef tribi, pa ou ti pou fer sir ki ou la pour ou benefisye avek sa formasyon?

Ozordi, bann ansyen dan kongregasyon pa “bann sef tribi” e zot pa domin lo troupo Bondye ki anba zot responsabilite. (1 Pyer 5:1-3) Me zot fer zot mye pour pran swen avek troupo. Alor, zot pare pour aksepte lenvitasyon pour ganny plis formasyon, tel parey dan Lekol Minister Rwayonm. Pandan sa lekol, bann ansyen i aprann ki mannyer pour pran pli byen swen avek bann responsabilite dan kongregasyon. Sa i fer ki bann ansyen ek lezot ki zot pran swen avek dan kongregasyon i kapab vin pli pros avek Zeova. Menm si ou pa’n asiste enn sa bann lekol, i tre probab ki ou benefisye parski bann ki’n asiste i servi sa ki zot in aprann pour ed kongregasyon.

Parfwa, bann pret ti soufle tronpet dan en fason ki ti fer sa son paret monte desann. Sa son ti fer bann Izraelit konnen ki Zeova ti oule ki pep antye i deplase. (Nom. 10:5, 6, NWT) Ler bann dimoun ti deplase, zot ti fer li dan en fason byen organize me i ti demann bokou travay. Parfwa bann Izraelit ti kapab ezite pour bouz en lot landrwa. Akoz?

Petet serten ti santi ki zot ti bezwen deplas tro bokou oubyen tro vitman. “Parfwa nyaz ti reste zis en lannwit ziska bomaten.” Lezot fwa, zot ti reste en landrwa “de zour, en mwan, ou menm pli lontan.” (Nom. 9:21, 22) Kantite fwa ki bann Izraelit ti bezwen bouze? Nonm sapit 33 i dir ki bann Izraelit ti reste dan apepre 40 landrwa.

I kapab ki parfwa bann Izraelit ti reste dan en landrwa kot i ti annan lonbraz. I kapab ki bann Izraelit ti kontan sa bann landrwa koumsa dan “sa gran dezer terib.” (Det. 1:19) Alor, zot ti kapab panse ki si zot bouze, zot pou al dan en landrwa ki pa sitan agreab.

Ler zot ti konmans deplase, serten tribi ti bezwen annan pasyans pour esper zot tour pour konmans bouze. Tou dimoun ti kapab tann sa son tronpet, me pa zot tou ki ti kapab bouz an menm tan. Sa son tronpet ti montre ki bann tribi ki ti lo kote les, setadir Zida, Izakar, Zeboulonn ti bezwen bouze. (Nom. 2:3-7; 10:5, 6) Apre ki zot ti’n deplase, bann pret ti soufle tronpet en dezyenm fwa pour ki bann tribi ki lo kote sid i konmans deplase zot osi. Bann pret ti kontinyen fer sa ziska ki pep antye ti’n fini kit landrwa.

Petet ou’n vwar li difisil pour aksepte serten azisteman ki lorganizasyon in fer. I kapab ki ou ti krwar ki i ti annan tro bokou sanzman. Oubyen ou ti kontan ki mannyer keksoz ti ete avan e ou pa ti oule zot sanze. Petet i ti difisil pour annan pasyans anmezir ki ou ti pe adapte avek sa bann sanzman. Me si nou fer nou mye pour azir dan sa fason ki nou devret, i tre probab ki nou pou vwar ki sa bann sanzman i bon pour nou e sa pou fer Zeova plezir.

Dan letan Moiz, Zeova ti gid plizyer milyon zonm, madanm ek zanfan dan dezer. San gidans Zeova ek son led, zot pa ti pou’n sirviv. Ozordi, Zeova i gid nou pandan sa bann dernyen zour vreman difisil. I ed nou pour reste pros avek li e pour gard nou lafwa for. Alor, nou tou nou anvi demontre nou lobeisans e azir parey sa bann Izraelit ti fer ler zot ti tann sa bann son tronpet!