“Ler mon kouzen ti konmans lager avek mwan, mon ti tyonbo li dan son likou e konmans trangle li. Mon ti anvi touy li.”​—Paul.

“Dan lakour, mon ti ankoler vitman menm ler mon ti napa rezon. Mon ti kas bann meb, zouzou e nenport keksoz ki mon ti vwar.”​—Marco.

I kapab ki nou pa pou fer parey Paul ek Marco. Me parfwa nou tou nou vwar li difisil pour kontrol nou lekor. Sa i akoz nou’n erit pese avek sa premye zonm. (Rom. 5:12) I annan serten dimoun ki vwar li difisil pour kontrol zot lakoler parey Paul ek Marco. I annan ki vwar li difisil pour kontrol sa ki zot panse. Par egzanp, zot kontinyen mazin lo bann keksoz ki fer zot per oubyen ki dekouraz zot. I annan lezot ankor ki kapab vwar li difisil pour lalit avek sa dezir pour komet imoralite seksyel, abiz lalkol oubyen servi drog.

Bann dimoun ki pa kontrol zot dezir, aksyon ek sa ki zot mazinen i kapab gat zot lavenir. Me nou kapab anpes sa arive. Ki mannyer nou kapab fer sa? Ler nou devlop kontrol lo nou lekor. Pour ed nou fer sa, annou diskit lo sa trwa kestyon: (1) Ki savedir annan kontrol lo nou lekor? (2) Akoz i enportan pour annan kontrol lo nou lekor? (3) Ki mannyer nou kapab devlop kontrol lo nou lekor, en kalite ki form parti “fri lespri sen”? (Gal. 5:22, 23) Apre, nou pou diskit lo ki nou kapab fer si parfwa nou napa kontrol lo nou lekor.

En dimoun ki annan kontrol lo son lekor pa azir dapre son bann dezir. I pa dir oubyen fer keksoz ki pa fer plezir Bondye.

Zezi ti montre nou ki i vedir pour annan kontrol lo nou lekor. Labib i dir: “Ler zot ti ensilte li, i pa ti ensilte zot li osi. Ler i ti pe soufer, i pa ti menas bann ki ti fer li soufer, me i ti les tou dan lanmen sa Enn ki ziz avek lazistis.” (1 Pyer 2:23) Ler Zezi ti lo poto e son bann lennmi ti pe boufonn li, i ti demontre kontrol lo son lekor. (Mat. 27:39-44) Avan sa, i ti demontre kontrol lo son lekor ler bann sef relizye ti demann li en ta kestyon avek bi pour fer li dir en keksoz mal. (Mat. 22:15-22) Zezi in kit en bon legzanp pour nou ler bann Zwif ankoler ti anmas ros pour saboul li. Dan plas rann mal pour mal, “Zezi ti kasyet e i ti kit tanp.”​—Zan 8:57-59.

Eski nou kapab swiv legzanp Zezi? Wi, me pa konpletman. Zapot Pyer ti ekri: “Kris li menm ti soufer pour zot e i’n kit en model  pour ki zot swiv son lepa fidelman.” (1 Pyer 2:21) Menm si nou enparfe nou kapab swiv legzanp Zezi fidelman e demontre kontrol lo nou lekor. Akoz i enportan pour nou fer sa?

Nou bezwen annan kontrol lo nou lekor si nou anvi fer plezir Zeova. Menm si nou’n servi Zeova fidelman pour en kantite lannen, nou kapab gat nou lanmitye avek li si nou pa kontrol sa ki nou dir e fer.

Annou vwar legzanp Moiz ki ti “en zonm avek bokou limilite, plis ki nenport ki zonm lo later” sa letan. (Nom. 12:3) Pour bokou lannen, Moiz ti demontre pasyans e ekout bann Izraelit konplent. Me en zour, i ti perdi kontrol. Ankor enn fwa, bann Izraelit ti pe konplent akoz i ti napa ase delo e Moiz ti ankoler avek sa pep. I ti koz brit avek zot e dir: “Ekout mwan byen, pep rebel! Eski nou kapab fer sorti delo dan sa ros pour zot?”​—Nom. 20:2-11.

Moiz pa ti reisi kontrol son lekor. I pa ti onor Zeova pour sa mirak ki Zeova ti’n fer pour donn zot delo. (Ps. 106:32, 33) Akoz sa, Zeova pa ti les li antre dan Later Promiz. (Nom. 20:12) I tre probab ki pour larestan son lavi, Moiz ti regrete ki i ti’n perdi kontrol.​—Det. 3:23-27.

Ki leson nou aprann? Menm si nou’n servi Zeova pour en kantite lannen, nou pa devret zanmen mank respe pour bann ki fer nou ankoler oubyen ki bezwen ganny korize. (Efe. 4:32; Kol. 3:12) Anmezir ki laz i monte, i kapab difisil pour nou demontre pasyans. Mazin legzanp Moiz. Nou pa pou anvi gat nou bon repitasyon devan Zeova zis akoz nou pa’n demontre kontrol lo nou lekor. Ki nou kapab fer pour devlop sa kalite ki vreman enportan?

Priye pour ganny led lespri sen. Akoz? Parski kontrol lo nou lekor i form parti fri lespri sen Bondye e Zeova i pare pour donn son lespri sen bann ki demann li. (Lik 11:13) Atraver son lespri sen, Zeova i kapab donn nou sa lafors ki nou bezwen pour kontrol nou lekor. (Fili. 4:13) Zeova i kapab osi ed nou pour devlop lezot kalite ki form parti fri lespri tel parey lanmour. Lanmour i kapab ed nou pour annan plis kontrol lo nou lekor.​—1 Kor. 13:5.

Evit okenn keksoz ki kapab fer li difisil pour nou kontrol nou lekor. Par egzanp, evit  okenn sit Enternet ek divertisman ki montre bann move keksoz. (Efe. 5:3, 4) Anfet, nou bezwen evit okenn keksoz ki kapab tant nou pour fer sa ki mal. (Prov. 22:3; 1 Kor. 6:12) Par egzanp, en dimoun ki fasilman kapab ganny tante pour fer en keksoz imoral i kapab deside pour pa lir liv romantik e pa get bann film romantik.

Nou kapab vwar li difisil pour aplik sa konsey. Par kont, si nou fer zefor Zeova i kapab donn nou sa lafors ki nou bezwen pour kontrol nou lekor. (2 Pyer 1:5-8) I pou ed nou kontrol nou panse, nou parol ek nou aksyon. Paul ek Marco, ki’n ganny mansyonnen pli boner, ti aprann pour kontrol zot lakoler. Annou vwar legzanp en lot frer. Souvan sa frer ti ankoler avek lezot drayver lo semen e i ti menm dispit avek zot. Ki i ti fer pour amelyore? Sa frer i dir: “Tou le zour mon ti priye. Mon ti etidye bann lartik ki ti koz konsernan annan kontrol lo nou lekor e mon ti aprann bann verse Labib parker. Menm si mon pe fer sa pour plizyer lannen, tou le bomaten mon gard antet ki mon pou reste kalm ozordi. Osi, ler mon annan bann randevou, mon kit lakaz boner pour mon pa bezwen degaze. Sa i anpes mwan strese e mon pa ankoler avek lezot drayver.”

Parfwa, nou tou nou pa arive kontrol nou lekor. Ler sa i arive, i kapab ki nou tro onte pour priy Zeova. Me sa i sa moman ki nou pli bezwen demann Zeova pour ed nou. Alor, koz avek Zeova dan lapriyer deswit. Sipliy li pour pardonn ou, demann li son led e fer sir ki ou pa fer menm fot ankor. (Ps. 51:9-11) Pa zanmen krwar ki Zeova pou rezet ou lapriyer senser. (Ps. 102:17) Zapot Zan i fer nou rapel ki disan Garson Bondye “i pirifye nou avek tou pese.” (1 Zan 1:7; 2:1; Ps. 86:5) Rapel ki Zeova i demann son serviter pour pardonn kanmarad toultan. Alor nou kapab asire ki Zeova pou pardonn nou nou osi.​—Mat. 18:21, 22; Kol. 3:13.

Zeova pa ti kontan ler Moiz pa ti kontrol son lekor dan dezer. Kantmenm sa, Zeova ti pardonn li. Labib i dir ki Moiz ti annan en gran lafwa e ki nou devret imit li. (Det. 34:10; Ebr. 11:24-28) Zeova pa ti permet Moiz antre dan Later Promiz me i pou donn li sa loportinite pour viv pour touzour dan Paradi lo later. Si nou fer zefor pour devlop kontrol lo nou lekor, nou osi nou kapab annan sa menm lespwar.​—1 Kor. 9:25.